Sikuli Lalodiai Dahaka Ia Vara?

“ISEDA Sikuli Idia Dika: Harihari Pulisi Mailaidia.” Vanegai New York City ena niuspepa ta ena hereva kwarana be unai. New York City ena Edukeisini Naria Oreana be sibona mai ena sikuli sekuriti taudia 3,200; idia ese siti ena sikuli 1,000 bamona idia naria. Hari inai negai taunimanima momo idia ura pulisi taudia korikoridia be sikuli lalodiai do idia abia vareai, sekuriti gaukarana durua totona. Edia heduru idia tahua be mai badina korikorina, eiava?

New York Times niuspepana ena hereva kwarana ta be inai: “Ripoti ese Ia Hahedinaraia New York City ai Stiuden Ima Ima amo Ta Ta ese Ipidi Idia Loalaia.” Lagani 1990 amo ela bona lagani 1992 New York City ena sikuli naridia oreana ia gunalaia tauna, Joseph Fernandez, ia gwau: “Iseda siti badana ena sikuli lalodiai idia vara dagedage karadia be guna lau itaia lasi. . . . Lagani 1990 ai inai dagi New York ai lau abia dae neganai, lau diba lasi sikuli be inai bamona do idia dika herea. Inai dika ia bada ia lao bona do ia ore haraga lasi.”

Dika Ena Bada be Edena Bamona?

Fernandez ia gwau: “Egu dagi gaukarana ena hua ginigunadia 10 ai, dina rua rua amo sikuli merona ta idia hamasea​—subway ai idia gwadaia mase, eiava sikuli maguna ai o dala edia kona ai idia pidia mase . . . Sikuli haida ai, [sekuriti taudia] 15 o 16 be sikuli lalonai bona murimurinai idia loaloa.” Ma ia gwau: “Gabu iboudiai dagedage be iseda sikuli rumadia lalodiai ia vara, bona idia hekwarahilaia bada. Chicago, Los Angeles, Detroit​—siti badadia iboudiai​—lalodiai, dagedage karadia be dika rohoroho.

“Emai hemarai ia hedinarai goevagoeva. Lagani 20 lalonai ai be metairametaira ai abia dae herevana dikana be inai: America ena sikuli be tuari gabudia. Idia be lalo-diari gabudia namodia lasi, to idia be gari rumadia.”

United States ai, sekuriti taudia be sikuli oreadia 245 lalodiai idia gaukara, bona unai orea 102 lalodiai idia be mai edia ipidi. To idia sibodia mo lasi. University of Michigan ena ripoti ai idia gwau, idia laloa United States dekenai dina ta ta iboudiai stiuden ese ipidi 270,000 be sikuli dekenai idia abia lao, bona tuari gaudia ma haida danu!

Unai dika ia maragi ia lao lasi, to ia bada ia lao. Ena be sikuli momo dekenai metal detector idia gaukaralaidia, to tuari gaudia abia vareai karana idia koua diba lasi. Lagani 1993 ela bona lagani 1994, dagedage karadia New York City ena sikuli lalodiai be 28 pesen amo idia bada daekau! Phi Delta Kappan ia gwau, United States ai “idia davaria komiuniti sikuli edia hekwakwanai badadia be ‘kamonai lasi karana’ sibona mo lasi, to ‘heatu, dagedage, bona raskol oreadia’ danu.”

Tano momo ai, dagedage karadia ese sikuli idia hadikadia. Canada ai, Toronto ena niuspepa ladana Globe and Mail ena kwara herevana ta be inai: “Sikuli be Dika Davaria Gabudia ai Idia Lao.” Bona Melbourne, Australia ai, idia davaria komiuniti sikuli memerodia bona kekenidia 10 10 amo 6 6 be edia tamadia o sinadia ese motuka amo idia laohaidia sikuli dekenai, badina be idia gari, haida ese do idia hadikadia o do idia henaodia garina.

To dagedage be unai hekwakwanai ena kahana sibona mo. Iseda sikuli ai idia vara karadia ma haida ese lalo-hekwarahi bada idia havaraia.

Kara Maoromaoro Idia Laloa Lasi

Ena be Baibel ia gwau heudahanai bona sihari kava karadia be kerere, to hari inai negai sikuli ai unai hahediba herevana maorona idia abia isi lasi. (Efeso 5:5; 1 Tesalonika 4:​3-5; Apokalupo 22:15) Momokani unai ese hekwakwanai badana ia havaraia. Fernandez ese ia herevalaia, ia gwau: “Iseda memero kekeni badadia 10 10 amo 8 8 be idia sihari.” Chicago ai, haisikuli ta lalonai kekeni toi toi amo ta ta idia rogorogo!

Sikuli haida ai, sikuli kekenidia edia beibi idia naridia. Danu, kondom idia hariharilaidia loulou, AIDS gorerena bona natu havaradia kava karadia koua totona, to idia koua diba lasi. Reana kondom hariharilaidia karana amo stiuden idia hagoadadia lasi do idia sihari kava totona, to idia hahedinaraia unai kara idia laloa momo lasi. Vadaeni, memero bona kekeni ese namo bona dika be edena bamona do idia lalohadailaia?

Tisa ta, nega daudau iunivesiti ai ia hahediba hahinena, ia gwau: “Taunimanima matamatadia momo idia laloa maoro bona kerere be lasi dainai ta be sibona ena hemami hegeregerena ia kara be namo.” Dahaka dainai unai bamona idia laloa? Unai tisa ia gwau: “Reana badina be haisikuli ai idia davaria gaudia dainai namo bona dika idia daradaralaia.” Unai daradara dainai dahaka ia vara?

Vanegai niuspepa ta ia gwau: “Toana be kerere iboudiai be haida edia lasi. Lasi vaitani.” Oibe, edia lalohadai be kara iboudiai be kerere lasi! Unai ena anina stiuden taudia dekenai be mani oi laloa. Iunivesiti ena klas ta lalonai tisa ta ese Tanobada Ibounai Tuarina Iharuana bona Nazi dalana ia hadibalaidia neganai, ia davaria idia momo idia laloa Nazi taudia ese Iuda taudia momo herea idia hamasea be ta ena kerere lasi! Tisa ia gwau: “Stiuden taudia idia laloa unai kara be ia vara kava hisihisina ta bamona: Koua dalana be lasi.”

Bema stiuden taudia be kara maoromaoro bona kara kerere edia idau idia diba lasi, unai be daika ena kerere?

Nega Dikana Lalonai

Guna tisa tauna ese sikuli ia gwauraidia namo, ia gwau: “Inai hekwakwanai be iseda bese lalonai ia matamaia, bona iniseniai idia noho hekwakwanaidia be sikuli ese idia hahedinaraia mo.” Momokani, bese gunalaia taudia ese idia badinaia lasi taravatudia hahedibalaidia be auka.

Unai hegeregerena, niuspepa ese U.S. ena gavamani taudia edia kara dika idia herevalaia badabada negana ta ai, niuspepa torea hahinena ta mai ladana bada be ia gwau: “Tisa taudia inai abidadama lasi negana lalonai ese kara maoromaoro edena bamona idia hahedibalaia diba be lau diba lasi. . . . Gado maragidia do idia boiboi, do idia gwau, ‘Washington itaia!’ Idia diba . . . haida ese koikoi dika hereadia be unai ruma kurokurona badana ena guhi henunai idia karaia vadaeni.”

Baibel ia gwau “nega ena dokona dekenai, metau dikadia momo do idia vara.” (2 Timoteo 3:​1-5) Momokani, inai be metau dikadia momo negana! Unai dainai, dahaka idia karaia noho, sikuli edia hekwakwanai haoredia totona bona stiuden taudia durua, edukeisini namona idia abia totona? Umui tama sina bona stiuden taudia be edena bamona do umui kara diba? Unai be hereva gabedia ai do ai herevalaia.