Tuari Lasi Tanobadana Ia Vara Diba, A?

MANI inai oi laloa: Tuari ese ia havaraia dika bada bona ia ore murinai idia vara hekwakwanai ta do oi itaia lou lasi eiava do oi mamia lou diba lasi. Inai oi laloa: Ipidi eiava bomu idia pou regena do oi kamonaia lasi, edia hanua amo idia heau oho hitolo mase taudia do oi itaia lasi, bona oi bona emu lalokau taudia be reana dagedage bona anina lasi tuari ta lalonai do umui mase be oi lalohadailaia lasi. Do ia namo herea, bema tuari lasi tanobadana lalonai do ita noho!

Sedira oi gwau, ‘unai be reana do ia vara diba lasi.’ To lagani haida idia hanai vadaeni lalonai, momo idia laloa maino tanobadana be do ia vara momokani. Lagani 1990 bona 1991 ai, momo idia gwau, tano momo be kahirakahira noho namo bona gaukara hebou karana matamatana do idia havaraia. Unai neganai idia laloa noho hegeregerena, George Bush, unai nega ena United States presiden, ese “tanobada oromana matamatana” be ia vara noho ia herevalaia momo.

Dahaka dainai idia laloa do ia vara? Badina be America bona Russia idia inai heheni karana ia doko dainai. Lagani 40 mai kahana idia hanai vadaeni lalonai, niuklia tuarina be hegeregere kotini severana amo idia kwatua tuari kaiana bamona bona taunimanima edia ataiai ia noho. To Komiunis lohia dalana ena siahu ia ore bona Soviet Union be ia parara dainai niuklia tuarina be do ia vara ena hagaria herevana be ia boio bamona. Tanobada ena lalo-hekwarahi be ia maragi ia lao.

Badina ma ta ia noho, unai dainai taunimanima be mai lalo-goada ida nega vaira idia laloa, bona idia momo be unai bamona idia do laloa noho. Lagani 40 lalodiai, East bona West idia inai heheni dainai United Nations be hegeregere hepapahuahu gabuna ai idia halaoa. To America bona Russia edia inai heheni karana ena dokona ese UN ia ruhaia iena gaukara ia karaia totona​—tanobada hegegemadai maino bona noho namo ia havaraia toho gaukarana unai.

Vanegai laganidia lalonai UN be ena gaukara ia habadaia tuari do ia koudia totona. Lagani 1990 ema bona 1994 ai, United Nations ese iena memba tanodia amo tuari taudia ia gaukaralaia nega momo maino naria totona, to idia hanai vadaeni lagani 44 lalodiai unai bamona ia karaia lasi. Taunimanima ma haida bona ami taudia 70,000 ese unai maino naria gaukaradia idauidau 17 idia karaia tanobada hegegemadai lalonai. Lagani rua sibona lalonai maino naria gaukarana lalonai idia negea monina be nega rua amo ia bada daekau 4.422 bilioni kina dekenai lagani 1994 ai.

Boutros Boutros-Ghali, UN ena Seketere-Jeneral, be vanegai inai ia torea: “Toana haida idia hahedinaraia lagani 50 gunanai [UN idia haginia matamata negana] San Francisco dekenai, tano idauidau ese noho namona idia davaria totona oromana be hari iena gaukara ia karaia matamaia, guna idia ura hegeregerena . . . Ai gaukara noho bona kahirakahira ai ese tano iboudiai be do idia gaukara hebou oromana do ai havaraia.” Ena be unai idia vara, tanobada oromana matamatana ena helaro be ia boio haraga noho. Tuari lasi tanobada helarona be dahaka ese ia hadiburaia? Ita laloa tanobada hegegemadai lalonai maino do ita itaia be mai badina, a? Gabeai herevana ese unai henanadai do ia haerelaia.

[Picture Credit Lines on page 3]

War planes: USAF photo

Anti-aircraft guns: U.S. National Archives photo