Tanobada Oreadia ese Maino Idia Havaraia Diba, A?

Tuari idauidau be iseda tanobada ai idia vara noho. Unai dainai United Nations bona orea ma haida be idia gaukara goada noho tuari idia vara gabudia dekenai maino idia havaraia totona. Idia ura henia gauna be unai gabudia dekenai dagedage karadia idia hamaragia. UN Secretary-General António Guterres ia gwau, “United Nations peacekeepers, be tanobada ai maino ia ura havaraia orea badana ta.”

Idia hanaia lagani haida lalonai, maino havaraia totona idia karaia gaukara ese namo haida ia havaraia. Hegeregere, idia ese taunimanima idia gimaia, refiuji be edia tano dekenai idia siaia giroa, bona heduru gaudia ma haida idia henia. To edia hekwarahi maino havaraia totona be gau haida ese ia koua. Dala ia noho tanobada ai maino korikorina ia vara totona, a? Baibel be dahaka haere ia henia?

Maino idia ura havaraia oreadia dekenai idia vara koua gaudia bona Baibel ena haere

Tatau rua idia gini, edia doruna idia henia bona imana idia lokua.

Koua gaudia: ta ta idia durua lasi. Maino havaraia totona orea idauidau, bona ami orea bona idia tuari lasi taudia idia gaukara hebou be auka. Nega haida, idia hekwarahi badina edia laloparara bona ura be idauidau.

Baibel ena haere: “Guba Diravana ese basileia ta do ia haginia, . . . Unai basileia ese basileia ibounai [tanobada gavamani] do ia . . . haorea momokani, bona ia sibona do ia gini ela bona hanaihanai.”—Daniela 2:44.

Kahirakahira, Dirava ese tuari ibounai do ia haorea bona tanobada ibounai ai maino do ia havaraia. (Salamo 46:8, 9) Dirava ese tanobada gavamani ibounai do ia haorea bona gavamani tamona sibona ese tanobada do ia lohiaia: Unai be Dirava ena Basileia. Gavamani goevadaena tamona be guba amo tanobada ia lohiaia neganai, tuari do ia ore bona maino havaraia totona tanobada oreadia ta do ia noho lasi.

Ia kehoa maua lalonai be gau ta ia noho lasi.

Koua gaudia: kohu bona goada ena hetoana. Maino havaraia totona idia gaukara taudia, moni, bona heduru gaudia be hegeregere lasi dainai, idia ura hagugurua gauna be ia vara lasi. Idia gaukara gabudia be mai ena hekwarahi bona dika do idia davaria diba.

Baibel ena haere: “Iseda Lohiabada Iesu Keriso ena Dirava . . . guba ai iena idiba kahanai Keriso ia helai neganai, unai siahu badana ia gaukaralaia. Keriso ese gavamani, dagi bada taudia, siahu taudia . . . ia hereaia.”—Efeso 1:17, 20, 21.

Siahu ibounai Diravana, Iehova,a ese Iesu ia abia hidi Dirava ena Basileia ena King ai ia lao totona bona gau ibounai ia henia ia lohiaia totona. (Daniela 7:13, 14 b) Dirava ese Iesu dekenai siahu bada, diba, aonega bona laloparara ia henia, ia ese tanobada gavamani o orea idauidau idia lohiaia taudia ia hereaia. (Isaia 11:2) Danu, Iesu be ena aneru orea badana ia gaukaralaia diba. (Apokalupo 19:14) Gau ta ese Iesu do ia koua diba lasi.

Iesu be Dirava ese ia henia gaudia bona diba do ia gaukaralaia, tuari do ia haorea bona gau ma haida do ia karaia. Ia ese Dirava ena Basileia henunai idia noho taunimanima dekenai noho namo, bona maino korikori do ia havaraia.—Isaia 32:17, 18.

Diadi ese idia gaukaralaia hama bamona gauna.

Koua gaudia: gavamani taravatudia. Nega haida maino havaraia oreadia totona idia gaukara taudia idia ura karaia gauna be gavamani ena taravatu ese ia gwauraia namonamo lasi, o unai ese idia ura karaia gaukarana ia taravatua. Unai dainai idia hegeregere lasi haida idia gimaia eiava idia ura karaia gaukarana idia hagugurua lasi.

Baibel ena haere: “Dirava ese [Iesu] dekenai siahu ia henia, guba bona tanobada gaudia ibounai [ia] biagua totona.”—Mataio 28:18.

Dirava ese Iesu dekenai hakaua dalana bona siahu ia henia tanobada ai maino do ia havaraia totona. (Ioane 5:22) Iesu be kara gageva o kara koikoi do ia karaia lasi. (Isaia 11:3-5) Unai dainai Baibel ese Iesu ia gwauraia “Maino Lohiana” bona iena Basileia be “kota maoromaoro bona kara maoromaoro” amo ia haginia.—Isaia 9:6, 7.

Dirava Ena Basileia—maino korikorina do ia mailaia

Maino idia ura havaraia oreadia ese namo haida idia havaraia bona tuari idia hadokoa. To idia hegeregere lasi dagedage ia vara ena badina korikorina, taunimanima edia kudouna ai ia noho inai heheni karana unai, idia haorea totona.

“Hekwakwanai badana be maino idia ura havaraia oreadia be hegeregere lasi maino idia havaraia totona.”—Dennis Jett, former U.S. ambassador.

To, Dirava ena Basileia sibona be mai ena siahu maino korikorina ia havaraia totona, badina taunimanima ia durua edia kudouna ai inai heheni karana idia hadokoa totona. Hegeregere, Iesu be tanobada ai ia noho neganai, ena hereva bona kara amo maino karaia bona ta ta dekenai lalokau hahedinaraia dalana ia hadibaia:

“Maino idia karaia taudia be idia moale.”—Mataio 5:9.

“Namona be emu dekena tauna oi lalokau henia.”—Mareko 12:29-31.

“Emu tuari kaia be ena gabu dekenai oi atoa lou, badina tuari kaia idia gaukaralaia taudia ibounai be tuari kaia amo do idia mase.”—Mataio 26:52.

“[Iesu] idia hereva dika henia neganai, idia ia hereva dika henia lasi. Hisihisi ia abia neganai, idia dekenai dagedage herevadia ia gwauraia lasi.”—1 Petero 2:23.

Danu Iesu ia gwau Dirava ena Basileia henunai idia noho taudia edia kara be, ta ta idia lalokau henia. Baibel ia gwau ma haida idia inai henia taudia be Dirava ena Basileia henunai do idia noho lasi:

“Unai amo taunimanima ibounai do idia diba umui be egu hahediba taudia, bema umui huanai lalokau ia noho.”—Ioane 13:34, 35.

“Iena tadikaka ia inai henia tauna be ala-ala tauna.”—1 Ioane 3:15.

“Dirava ia lalokau henia tauna ese ena tadikaka ia lalokau henia danu be namo.”—1 Ioane 4:20, 21.

Taunimanima ia karaia Diravana Iehova be tanobada ai maino ia vara dala maorona ia diba. Taunimanima ese maino idia havaraia diba lasi gabudia dekenai Dirava ena Basileia ese maino do ia havaraia.

a Iehova be Dirava ena ladana korikori. (Salamo 83:18) Inai atikol “Iehova be Daika?” itaia.

b Daniela 7:13, 14 ai, inai hereva “taunimanima ena natuna” be Iesu Keriso ia herevalaia.—Mataio 25:31; 26:63, 64.

Hari danu, Dirava ena Basileia ese taunimanima ia durua maino bona lalotamona ai idia noho totona

Vaira nega ai, Dirava ena Basileia ese tanobada ibounai ia lohiaia neganai, Dirava ese ia hadibaia maino dalana idia badinaia taudia do ia hatamonaia. (Isaia 2:4; 11:9) To hari Dirava ena Basileia be guba ai ia lohiaia noho, bona tanobada ai unai Basileia ese taunimanima milioni momo dekenai maino bona lalotamona ai noho karana ia hadibaia bona hagoadaia noho.

Vidio ladana Lalokau ese Inai Heheni Karana Ia Halusia Diba, A? itaia. Baibel ese Jew bona Arab tatau rua ia durua dainai, edia kudouna ai inai heheni karana idia kokia.

Vidio ladana Guna Idia Inai Heheni to Gabeai Tura Namodia ai Idia Lao itaia. Baibel ena hahediba hereva ese raskol orea ia gunalaia tauna dikana bona kara auka pulisi tauna ia durua dainai, ta ta inai henia karana idia rakatania bona tura namodia ai idia lao.