Maino Momokanina Oi Tahua Bona Badinaia!
“Bema tau ta ese mauri ia ura henia, bona nega namodia ia ura itaia . . . , dika do ia rakatania, bona kara namo do ia karaia. Maino do ia tahua, bona maino ena dala do ia badinaia noho.”—1 PETERO 3:10, 11.
“IDIA ese edia tuari kaia be hama dekenai do idia makohia, bona makohia auri dekena amo, tano geia auri do idia karaia. Bona idia edia io ena auri danu do idia botaia palaka, au rigi utua kaia do idia halaoa. Bese ta ese bese ta dekenai do ia tuari henia lou lasi, bona tuari dalana be do idia hadibaia lou lasi.” (Isaia 2:4) Ena be unai taunimanima momo idia diba herevana be United Nations ena hedikwota kahirakahira, New York City ai ia noho, to unai tanobada ibounai oreana ese ia hagugurua lasi. To, ia be Iehova Dirava ena hereva, ia moru diba lasi herevana, ena kahana ta dainai, ia ese anina do ia havaraia.—Isaia 55:10, 11.
2 Isaia 2:4 ena hereva be peroveta herevana namona ena kahana ta, unai peroveta herevana ese maino momokanina ia perovetalaia—bona hari iseda negai ena anina be ia vara noho. Tuari bona tuari gaudia do idia noho lasi negana ia do gwauraia lasi lalonai, unai peroveta herevana ia gwau: “Nega gabeai be inai bamona do ia vara: Lohiabada ena Dubu Helaga ia gini ororona, be ataiai momokani ororona do ia lao. Inai ororo be ia ese, ororo ibounai do ia hereaia. Bese ibounai ese ia dekenai do idia haboua lao. Bona edia taunimanima do idia gwau, ‘Umui mai, Lohiabada ena ororo dekenai do ita daekau, Israela ena Dirava ena Dubu Helaga dekenai do ita lao. Ia ese iena kara ita dekenai do ia hadibaia, bona ita ese unai Dirava ena dala dekenai do ita raka. Badina be Lohiabada ena hadibaia hereva, be Ierusalema dekena amo ia mai noho. Siona dekena amo Lohiabada ese, iena bese taudia dekenai ia hereva henia noho.’ ”—Isaia 2:2, 3.
Taunimanima be Maino Taudia ai Idia Lao Diba
3 Mani oi itaia taunimanima be maino taudia ai idia lao totona, Iehova ena dala idia dibaia be namo. Dagedage tauna ta ese Iehova ena hahediba herevadia ia kamonaia neganai, unai ese ena lalohadai bona ena kara ia haidaua, bena ia be maino tauna ai ia lao. Unai be edena bamona ia vara? Roma 12:2 ia gwau: “Inai tanobada taudia edia kara bamona do umui karaia lasi, to Dirava ese emui lalona do ia hagiroa, vadaeni do umui matamata, bona idau momokani. Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.” Dirava ena Hereva amo hakaua herevadia bona hahegani ita abia karana amo, eda lalona ita hagiroa eiava ma gau haida ita laloa matamaia. Hanaihanai Baibel ita stadilaia karana ese ita ia durua iseda lalona ita hagiroa bona Iehova ena ura ita dekenai be eda lalona ai ita hamomokania diba, bena eda raka dalana ita itaia namonamo.—Salamo 119:105.
4 Baibel ena hereva momokani ese iseda laloa dalana sibona ia haidaua lasi, to iseda kara danu bona mauri matamata ia henia. Ita ia durua aposetolo Paulo ena hahegani ita badinaia totona, ia gwau: “Emui mauri gunana be dabua gunana bamona do umui kokia. Badina be iena dika bona iena koikoi dainai, ia be mase dekenai ia lao noho. Umui emui laloa bona emui kudouna do umui hamatamataia, be gau badana. Mauri matamata do umui atoa, dabua matamata umui atoa bamona. Inai mauri matamata dainai, emui toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.” (Efeso 4:22-24) Iseda lalona ia hasiahua gauna be ita lalonai. Iseda lalokau Iehova bona iena taravatu dekenai ia bada ia lao neganai, unai siahu ia idau bona ia goada, bona ia ese lauma goadalaia maino taudia ai ita ia halaoa.
5 Iseda lalona ita haidaua be gau badana, unai be ena hora ginigabedia tanobada ai Iesu ese ena hahediba taudia ia hadibaia amo ita itaia, ia gwau: “Taravatu matamatana lau henia umui dekenai, inai bamona: Umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:34, 35) Unai lalokau, sibona ena ura dadaraia lalokauna, Keriso ena bamona, ese hahediba taudia ia haboua do idia lalo-tamona momokani. (Kolose 3:14) Unai “taravatu matamatana” idia abia dae bona badinaia taudia sibona ese Dirava ia gwauhamatalaia mainona do idia moalelaia. Unai idia karaia taudia idia noho hari inai negai, a?
6 Iehova ena Witness taudia ese edia tanobada hegegemadai oreana lalonai lalokau idia hahedinaraia toho. Ena be idia be tanobada besedia iboudiai amo, bona ena be politikol oreadia bona tomadiho oreadia ese idia doridia auka, to tanobada ena hepapahuahu lalodiai idia vareai lasi. Lalo-tamona ai Iehova ese ia hadibadia noho, bona maino idia moalelaia. (Isaia 54:13) Politikol taudia edia hepapahuahu amo idia gini siri, bona tuari lalodiai idia vareai lasi. Idia haida be guna idia dagedage, to unai mauri dalana idia rakatania vadaeni. Idia be maino ura henia Keristani taudia ai idia lao, bona Keriso Iesu ena kara idia tohotohoa. Bona mai edia kudouna ibounai Petero ena hereva idia badinaia, ia gwau: “Bema tau ta ese mauri ia ura henia, bona nega namodia ia ura itaia neganai, ia ese iena uduna do ia naria, hereva dika do ia gwauraia lasi. Bona hereva koikoi do ia gwauraia lasi, dika do ia rakatania, bona kara namo do ia karaia. Maino do ia tahua, bona maino ena dala do ia badinaia noho.”—1 Petero 3:10, 11; Efeso 4:3.
Maino Dalana Idia Badinaia Taudia
7 Haheitalai ta be Rami Oved, guna ia be opesa ta, tuari oreana ta lalonai. Iena inai taudia alaia mase dalana idia hadibaia vadaeni. Sibona ena bese Israel ena namo habadaia karana ia goadalaia, ela bona ia davaria rabi taudia idia ura lasi ia ura henia hahinena do ia adavaia, badina ia be Asia hahinena ta, Iuda Lasi hahinena dainai. Ia ese hereva momokani Baibel lalonai ia tahua matamaia. Gabeai Iehova ena Witness taudia ia davaria. Witness taudia ida Baibel ia stadilaia dainai, ia diba bese abia isi karana do ia hadokoa be namo. Keristani lalokauna ena anina be tuari bona tuari gaudia do ia rakatania bona bese iboudiai taudia lalokau henidia karana do ia manadalaia. Ia hoa bada revareva ta mai ena hebogahisi herevadia ia davaria neganai, ena hereva ginigunadia be “Egu Tadikaka Rami e”! Dahaka dainai unai ia hoalaia? Torea tauna be Palestine Witness ta. Rami ia gwau: “Unai lau hoalaia bada, badina Palestine taudia be egu inai taudia, to idia ta ese lau ia gwauraia ‘Egu Tadikaka.’ ” Hari Rami bona ena adavana ese maino momokani dalana be Dirava ena dala ai idia badinaia.
8 Haheitalai ma ta be Georg Reuter, ia be Tanobada Ibounai Tuarina Iharuana lalonai, Russia ai idia vareai Germany ena tuari oreana tauna ta. Daudau lasi murinai ia ese Hitler ena palani, idia amo tanobada ibounai ia lohiaia gwauraia gaudia, ia abidadama henia lasi. Tuari amo ia giroa lou neganai, ia be Iehova ena Witness taudia ida Baibel ia stadilaia matamaia. Ia torea: “Unai neganai egu lalona ia parara matamaia. Lau diba Dirava ese unai ala-ala ia havaraia lasi . . . lau diba iena palani be tanobada hegegemadai ai paradaiso do ia karaia, ia lalonai kamonai taudia ese noho hanaihanai hahenamodia do idia abia. . . . Hitler ese sibona ena ‘Lagani 1,000 Basileiana’ ia heagilaia, to ia be [lagani] 12 sibona ia lohia—bona unai ena anina be dika rohoroho! Hitler be hegeregere lasi, to Keriso . . . ese tanobada do ia lohiaia diba ela bona lagani 1,000, bona unai bamona do ia karaia.” Lagani 50 bamona lalonai, Georg ese ful-taim hesiai gaukarana lalonai maino momokanina ia gwauraia.
9 Germany ena Nazi gavamanina henunai, Iehova ena Witness taudia ese kara maoromaoro idia badinaia noho bona politikol karadia bona tuari amo idia gini siri. Hari danu, lagani 50 ia hanaia murinai, edia kara ese ia hamomokania idia be Dirava bona maino ura henia taudia. United States Holocaust Memorial Museum, Washington, D.C. ai, ese ia halasia buklet ta ia gwau: “Nazi gavamanina henunai Iehova ena Witness taudia ese dagedage bada herea idia haheaukalaia. . . . Ena be idia hahisidia bada, dibura kamepadia ai idia kara dika henidia, bona idia haida idia alaia mase, to idia momo idia boga-auka [edia tomadiho idia negea lasi], unai dainai unai negai idia noho taudia momo ese idia matauraidia.” Bena ma ia gwau: “Kamepa taudia ruhaia negana lalonai, Iehova ena Witness taudia ese edia gaukara idia karaia noho, kamepa taudia bogaragidiai idia loaloa, haida edia lalona idia giroa.”
Unai Ia Hereaia Gauna
10 Unai ena anina be Iehova ena Witness taudia idia laloa taunimanima momo herea edia lalona do idia veria, bena Keristani taudia hegeregeredia tuari amo do idia gini siri dainai, maino be tanobada dekenai do idia havaraia, a? Lasi! Maino be tanobada dekenai do ia vara lou totona, unai ia hereaia momokani gauna do ia vara be namo. Unai be dahaka? Namona be taunimanima edia heiriheiri, badu, bona dagedage lohiana ia boio bona Dirava ena Basileia be ia lohia matamaia, Iesu ese ena hahediba taudia ia hadibaia unai idia gurigurilaia totona. (Mataio 6:9, 10) Unai be edena bamona do ia vara? Dirava ese ena lauma amo ia henia nihina lalonai, peroveta tauna Daniela ese ia itaia, dina gabediai, Dirava ena Basileia, ‘nadi ta, tau ta ena imana ese ia siaia lasi’ gauna bamona, ese kaivakuku badana ta do ia hamakohia, unai kaivakuku ese taunimanima edia tanobada basileiadia ia laulaulaia. Bena ia gwau: “Unai basileia namba 4 ena nega lalonai, guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.”—Daniela 2:31-44.
11 Dahaka dainai tanobada be unai bamona do ia idau vaitani? Badina Iehova ia gwauhamata vadaeni tanobada do ia hagoevaia, idia hamiroa bona idia hadikaia noho taudia do ia haorea. (Apokalupo 11:18) Mai ena kara maoromaoro ida Iehova ese Satani bona ena tanobada dikana do ia tuari henia neganai, unai do ia vara. Apokalupo 16:14, 16 ia gwau: “Idia be lauma dikadia momokani, mai edia siahu hoa kara do idia karaia. Idia be tanobada edia king [politikol lohiadia] ibounai dekenai idia lao. Vadaeni unai king ibounai be do idia haboua, Siahu Ibounai Diravana ena Dina Badana neganai, be do idia tuari hebou totona. Unai lauma dikadia ese king ibounai idia haboua gabu ta dekenai. Inai gabu ena ladana Heberu gado dekenai be Aramagedono.”
12 To Aramagedono be edena bamona? Ia be niuklia tuarina badana eiava taunimanima ese do idia havaraia hisihisi badana lasi. Lasi. Ia be Dirava ena tuari, tuari iboudiai bona tuari havaraia taudia iboudiai haorea totona do ia karaia tuarina. Ia be Dirava ena tuari, maino momokanina idia ura henia taudia dekenai maino do ia henia totona. Oibe, Aramagedono ia mai noho, Iehova ena palani hegeregerena. Do ia leiti lasi. Iena lauma amo iena peroveta tauna Habakuku ia hasiahua, bena ia gwau: “Inai lau palania kara be harihari do ia vara lasi. Unai dainai ena anina do oi torea, ia noho. To ia be nega daudau lasi lalonai do ia vara. Lau koikoi lasi. Sedira oi laloa iena mai be haraga lasi, to do oi naria noho, ia be do ia vara momokani.” (Habakuku 2:3) Ita taunimanima eda hemami dainai, ena toana be do ia mai haraga lasi, to Iehova ese ena sediual ia badinaia. Iehova ese ia abia hidi guna horana ai Aramagedono do ia vara.
13 Unai kara ese maino momokanina ena dala ia lailaia! To maino momokanina do ia gini goada totona, ma gau ta ia vara be gau badana—heiriheiri, badu, bona tuari ia havaraia tauna do idia kokia. Bona unai do ia vara Baibel ena peroveta herevadia hegeregerena—Satani, tuari havaraia tauna bona koikoi iboudiai edia tamana, be guri dobu masemase lalonai do idia koua. Aposetolo Ioane ese peroveta mata hanai lalonai unai ia itaia, Apokalupo 20:1-3 ai ia gwau: “Aneru ta lau itaia, guba dekena amo ia diho. Iena imana dekenai guri dobu masemase ena ki ia dogoatao, bona auri seini badana ta danu. Inai aneru ese unai huala, unai idaunegai gaigaina, ma iena ladana be ‘Diabolo’ bona ‘Satani,’ ia dogoatao, seini dekenai ia guia. Vadaeni do ia guia noho, ela bona lagani 1,000 idia ore. Aneru ese unai huala be guri dobu masemase lalonai ia negea diho. Vadaeni unai guri ia lokaia, bona koua toana ia karaia. Satani be unai bamona ia koua, tanobada bese do ia koia diba lasi totona, lagani 1,000 lalonai.”
14 Unai be nihi kava gauna lasi; ia be Dirava ena gwauhamata—bona Baibel ia gwau: “Dirava ia koikoi diba lasi.” (Heberu 6:18) Unai dainai Iehova ese ena peroveta tauna Ieremia amo inai bamona ia hereva diba: “Lauegu lalokau, be noho hanaihanai lalokauna, bona lauegu kara be namo, bona maoromaoro danu. Inai bamona karadia, be lauegu kudouna ese ia ura henidia bada noho. Lau Lohiabada ese lau hereva vadaeni.” (Ieremia 9:24) Iehova be mai ena kara maoromaoro ida iena kara do ia karaia, bona tanobada dekenai do ia havaraia mainona ia moalelaia.
Maino Ena Lohia
15 Basileia henunai idia mauri taudia iboudiai ese maino momokanina do idia abia ia hamomokania totona, Iehova ese Maino ena Lohia momokanina, Iesu Keriso, dekenai lohia siahuna ia henia, Isaia 9:6, 7 ese ia perovetalaia hegeregerena, ia gwau: “Badina be ita totona natuna ta ia vara! Dirava ese ita dekenai, natuna mero do ia henia! Bona ia be iseda gunalaia tauna do ia lao, bona iena ladana do idia gwauraia, ‘Sisiba Henia Tauna Namo Herea,’ ‘Siahu Bada Dirava,’ ‘Hanaihanai Noho Tamana,’ ‘Maino ena Lohia.’ Iena King siahuna, be do ia bada daekau lao, bona iena basileia be nega ibounai, mai maino danu do ia noho. . . . Inai kara be Siahu Ibounai Lohiabada ese do ia karaia momokani.” Salamo torea tauna danu ese Mesia ena lohia negana mai mainona ia perovetalaia, ia gwau: “Ena dina lalodiai kara maoromaoro tauna do ia tubu, maino danu be bada herea ela bona hua do ia ore.”—Salamo 72:7, NW.
16 Ma danu, Dirava ese ena lauma amo ia horoa Keriso ena tadikaka 144,000 be guba dekenai ia ida do idia lohia. Paulo ese unai Keriso ida do idia lohia taudia ia herevalaia, ia gwau: “Nega sisina iseda maino ia havaraia Diravana ese Satani do ia moia diho momokani, umui emui aena henuna dekenai. Dirava lau noia, iseda Lohiabada Iesu Keriso ena hariharibada do ia hedinaraia noho umui dekenai.” (Roma 16:20) Oibe, idia ese guba dekenai Keriso ena kwalimu, tuari havaraia tauna Satani Diabolo hadikaia karana, do idia moalelaia!
17 Vadaeni, henanadai ta be inai, Dahaka do oi karaia be namo, maino momokanina do oi abia totona? Maino momokanina be Dirava ena dala sibona amo do ia mai, bona oi abia totona kara haida oi karaia be namo. Namona be Maino ena Lohia do oi abia dae bona do oi abidadama henia. Unai ena anina be, namona be Keriso do oi abia dae ia be ita kara dika taudia hoia bona hamauria Tauna. Iesu sibona ese taunimanima momo idia diba herevana ia gwauraia, ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Oiemu lalona ia hegeregere, Iesu Keriso do oi abidadama henia ia amo Dirava ese maino momokanina bona hahemauri do ia havaraia, a? Guba henunai ladana idauna ta ia noho lasi, maino mailaia bona hamomokania totona. (Filipi 2:8-11) Badina be dahaka? Badina Iesu be Dirava ena Abia Hidi Tauna. Tanobada dekenai ia noho neganai ia be maino ena gwaukau tauna hereadaena. Iesu do oi kamonai henia bona iena kara hegeregerena do oi kara, a?
18 Iesu ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Hari be nega namona Iehova ena Witness taudia edia hebou Kingdom Hall ai do oi lao henia loulou, diba maoromaoro do oi abia totona. Unai hadibaia heboudia ese emu lalona do idia doria, emu diba bona emu helaro be ma haida dekenai do oi hahedinaraia. Oi danu be Dirava ena maino ena gwaukau tauna ai oi lao diba. Bema Iehova oi abidadama henia, hari inai negai moale oi abia diba, New International Version Baibel lalonai Isaia 26:3 ia hereva bamona: “Ena lalona ia goada tauna be oi ese maino goevadaena ai do oi hanohoa, badina be ia ese oi ia abidadama henia noho.” Daika oi abidadama henia be namo? “Lohiabada do oi abidadama henia hanaihanai, badina Iehova, Lohiabada, be iseda noho hanaihanai nadi goadana momokani.”—Isaia 26:4.
19 Emu lalona oi hadaia auka Dirava ena maino tanobadana matamatana lalonai mauri hanaihanai do oi abia. Apokalupo 21:3, 4 ai, Dirava ena Hereva ese ita ia hamaoroa, ia gwau: “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” Unai be oi ura henia nega vaira mai mainona, ani?
20 Vadaeni, Dirava ese ia gwauhamatalaia gauna be mani oi laloa. “Manau taudia ese noho gabuna tano do idia abia, do idia helai namonamo, mai moale bona mai maino danu. Mai ena kerere lasi tauna do oi laloa. Kara maoromaoro tauna do oi itaia noho. Unai bamona tauna be mai maino danu do ia noho.” (Salamo 37:11, 37) Unai moale negana do ia ginidae neganai, do ita gwau: “Maino momokanina be ia ginidae vadaeni! Iehova Dirava, maino momokanina ena badina, ita tanikiu henia!”
Inai Oi Gwauraia Diba, A?
◻ Dahaka ese ta ia durua diba ena lalohadai bona ena kara do ia haidaua totona?
◻ Iehova ena Witness taudia ta ta bona edia orea ibounai ese edena bamona idia hahedinaraia maino momokanina idia ura henia bada?
◻ Iehova ese dahaka do ia karaia badu bona tuari idia habadaia taudia dekenai?
◻ Maino ena Lohia ese dahaka do ia havaraia taunimanima dekenai?
[Study Questions]
1. Edena hereva, Isaia ese ia gwauraia, bona momo idia diba herevana, ena anina do ia vara momokani?
2. Isaia 2:2, 3 hegeregerena, “nega gabeai” dahaka do ia vara?
3. Dagedage tauna be edena bamona maino tauna ai do ia lao diba?
4. Edena dala ai ta ese mauri matamata mai mainona ia atoa?
5. Iesu ese ena hahediba taudia dekenai ia henia “taravatu matamatana” ese edena bamona edia huanai maino ia havaraia?
6. Dahaka dainai Iehova ena Witness taudia ese maino idia moalelaia, tanobada taudia bamona lasi?
7, 8. Tuari idia hadokoa bona maino tahua taudia ai idia lao taudia edia ekspiriens oi gwauraia. (Oi diba gaudia ma haida oi gwauraia.)
9. Iehova ena Witness taudia edia ekspiriens Nazi Germany dekenai ese edena bamona ia hamomokania idia be idia gari lasi to maino idia tahua?
10. (a) Edena gau badana do ia idau maino momokanina ia mai totona? (b) Daniela ena buka ese edena bamona unai ia hahedinaraia?
11. Edena dala ai Iehova ese maino do ia mailaia?
12. Aramagedono be edena bamona?
13. Dirava ese dahaka do ia karaia dika tauna badana, Satani Diabolo, dekenai?
14. Iehova ese Satani do ia hadikaia ore karana be edena bamona ita gwauraia diba?
15, 16. (a) Iehova ese daika ia abia hidi do ia lohia totona? (b) Unai lohia karana be edena bamona idia gwauraia, bona daika danu do idia lohia?
17. Maino momokanina ita abia totona dahaka do ita karaia be namo?
18. Iesu ena hereva Ioane 17:3 ai hegeregerena, dahaka do ita karaia?
19, 20. Hari maino idia tahua bona badinaia taudia ese dahaka do idia abia?
[Picture on page 14]
Isaia ena hereva do idia guguru, UN ena amo lasi, to Iehova ena hahediba idia abia dae taudia edia amo
[Pictures on page 15]
Inai tatau rua ese edia mauri idia haidaua maino idia badinaia totona
Rami Oved
Georg Reuter
[Picture on page 16]
Maino momokanina do ia noho Maino ena Lohia henunai