Hamomokania Gaudia Dibaia

Hekwakwanai

Inai heheni karana ia vara badina haida be sivarai momokani idia diba lasi. Mani haheitalai haida ita laloa:

• Gaukara biagudia haida idia laloa hahine be idia hegeregere lasi teknikol gaukaradia idia karaia totona.

• Europe dekenai, lagani 500 C.E. bona 1500 C.E. lalonai, haida idia koikoi bona idia gwau Iuda taudia ese ranu guri lalonai poisini idia atoa bona momo dekenai daihanai gorere idia henia. Nazi taudia ese unai tano idia lohiaia neganai, momo ese Iuda taudia idia samania koikoi. Idia gwau Iuda taudia ese Germany dekenai moni ena hekwakwanai idia havaraia. Unai bamona koikoi herevadia dainai taunimanima ese Iuda taudia idia inai henia, bona hari unai idia karaia noho.

• Momo idia laloa diseibol taudia ibounai be hanaihanai idia moale lasi bona idia badu.

Gori sivarai idia abia dae taudia be hamomokania gaudia idia tahua ma haida idia inai henia totona. Idia laloa bema ta be idia ida ia lalotamona lasi, idia dekenai unai tauna be gau ta ia diba lasi.

Baibel Ena Hakaua Herevana

“Tau ta . . . mai ena aonega lasi, be namo lasi.”​—AONEGA HEREVADIA 19:2.

Ena anina be dahaka? Hamomokania gaudia ita diba lasi neganai, abia hidi kereredia do ita karaia. Bema gori sivarai ita abia dae bona hamomokania gaudia ita diba lasi, taunimanima do ita hahemaoro henia kava.

Hamomokania Gaudia Dibaia Karana Ena Namo

Bema taunimanima edia sivarai momokani ita diba, ma haida edia koikoi herevadia do ita dadaraia. Bona bema ita laloparara taunimanima ese grup ta idia herevalaia dalana be koikoi, vadaeni do ia auka lasi ma haida amo ita kamonai gaudia ita dadaraia totona.

Oi Karaia Diba Gauna

• Reana haida do idia gwau, taunimanima haida edia kara be namo lasi. To laloatao, idia ibounai edia kara be unai bamona lasi.

• Namona be oi abia dae, reana unai taudia oi diba namonamo lasi.

• Sivarai idia diba namonamo taudia amo infomeisen maorodia oi abia.