Ta ese Oi Ia Lalo-Dika Henia Kava, A?
BESE dagedage henia, bese inai henia, bese dadaraia, bese hapararaia, bona bese hamasea ore karadia edia badina tamona be dahaka? Idia vara ena badina be taunimanima momo herea edia laloa dalana ta dainai—haida lalo-dika henia kava karana unai!
Haida lalo-dika henia kava karana ena anina be dahaka? Diksenari ta be inai bamona ia gwau, “ta be ena lalona ia hadaia vadaeni guna, hahemaoro karaia totona ena be gau ta ia laloa lasi eiava ia tahua namonamo lasi.” Ita be kara dika taudia dainai, nega ta ta ai reana ma haida do ita lalo-dika henia kava. Reana nega ta oi laloatao diba, unai neganai ena be diba maorona oi abia lasi to ma ta oi hahemaoro henia bamona. Baibel ese ia hahedinaraia unai lalo-dika kava karana be Iehova Dirava ena hahemaoro karana amo ia idau. Ia gwau: “Lohiabada ese gau ia itaia lasi, taunimanima ese idia itaia bamona. Taunimanima ese tau ena toana idia itaia, to Lohiabada ese tau ena kudouna ia itaia.”—1 Samuela 16:7
Lalo-Dika Kava Karana be mai Ena Hisihisi
Ia be daradara gauna lasi, nega ta ai taunimanima haida ese ma haida idia lalo-dika henia kava. (Hadibaia Tauna 7:21, 22 itaia.) Ita gwau diba, ita ibounai be ma haida ese unai bamona idia kara henia vadaeni. To, bema ibounai ese unai lalo-dika lalohadai idia hamaoromaoroa hisihisi do idia havaraia lasi. Dika ia vara diba bema unai lalohadai be nega ibounai ita laloa. Unai lalohadai ese ita ia koia diba idia momokani lasi gaudia ita abiadae totona. Haheitalai ta be inai: Lalo-dika henia kava karana dainai taunimanima haida idia laloa tau ta be ia mataganigani, ia lahedo, ia kavakava, eiava ia hekokoroku badina be ia be tomadiho, bese, eiava tano ta amo ia mai dainai.
Nega momo unai bamona lalo-dika kava karana dainai haida ese ma haida idia kara namo henidia lasi, idia hereva dika henidia eiava idia dagedage henidia danu. Taunimanima milioni momo be bese eiava iduhu hamasea ore karadia amo, bona lalo-dika karadia dikadia ma haida amo idia mase.
Tanobada hegegemadai ai, gavamani ese taravatu idia karaia taunimanima edia ura kwalimu, edia noho namo bona ibounai be kara tamona ai do idia kara henia dalana idia naria totona. Bema oiemu tano ena konstitusen eiava taravatu badadia oi duahia, do oi davaria kahana ta ai, herevana edena iduhu, tau o hahine eiava edena tomadiho, taunimanima iboudiai edia maoro ia naria taravatuna ta idia torea. To, haida lalo-dika henia kava bona dadaraia kava karana be tanobada hegegemadai ia vara kara badana ta.
Ta ese oi ia lalo-dika henia kava, a? Ta ia gwau oi be mataganigani, lahedo, kavakava, eiava hekokoroku tauna badina be oiemu bese, lagani, eiava oi be tau o hahine, oiemu tano, eiava tomadiho be idau dainai, a? Lalo-dika kava karana dainai oi be sikuli namona, gaukara, ruma, bona heduru gaudia ma haida oi abia lasi, a? Bema unai ia vara oi dekenai, edena bamona oi haheaukalaia diba?
[Picture on page 3]
Lalo-dika kava karana laloa momo ese bese inai henia karana ia havaraia
[Credit Line]
Nina Berman/Sipa Press