GAUDIA EDIA PRAIS IA BADA

Emu Moni Gaukaralaia Namonamo

Mauri ia auka badina gaudia edia davana ia bada ia lao. To heduru oi abia daladia haida idia noho.

DAHAKA DAINAI UNAI BE MAI ANINA BADA?

Emu moni gaukaralaia dalana oi lalohadailaia namonamo. Unai amo oi hoia gaudia dekenai sibona do oi biagua, bona moni ena lalohekwarahi do oi hanaia. To bema emu moni be bada lasi, gau haida oi karaia diba emu moni gaukaralaia dalana oi biagua totona.

OI KARAIA DIBA GAUDIA

Emu moni gaukaralaia ena palani. Unai oi karaia neganai, oi diba edena gaudia do oi hoia bona oi dekenai ia noho moni sisina, be gabeai idia vara gaudia totona oi gaukaralaia diba.

Namona be palani oi karaia moni hida be emu dabu gaudia hoia totona do oi gaukaralaia, bona unai oi badinaia. Unai amo emu moni do oi haorea lasi. Bema emu pei ia senisi, eiava gaudia edia davana ia bada. Emu moni gaukaralaia ena palani oi sekea lou. Bona headava taudia be edia adavadia ida edia palani idia herevalaia hebou.

Inai oi karaia: Bema hegeregere moni amo gaudia oi hoia, to oi abitorehai lasi. Haida be unai idia karaia dainai, edia moni idia gaukaralaia namonamo. To danu nega oi atoa emu moni oi gaukaralaia noho karana oi sekea totona. Unai amo do oi diba moni hida oi dogoatao.

Nega haida gau ma haida oi ura hoia, to oi karaia palani oi badinaia. Unai ese do oi ia durua sibona oi biagua, bona do oi lalohekwarahi momo lasi.

“Davana do [oi] laloa.”—Luka 14:28.

Emu moni gaukara oi gimaia. Moni gaukara gimaia totona gaukara ena nega oi badinaia. Emu gaukara dekenai lalohadai maorona oi abia. Danu gaukara oi laloa bada. Hemataurai karana oi hahedinaraia, bona gaukara ena taravatu oi badinaia.

Anina lasi gaudia dekenai emu moni haorea lasi. Taunimanima be edia moni gaukara amo idia abia pei, idia gaukaralaia namonamo lasi. Hegeregere, haida be kuku idia hoia, idia inuinu kekero, moni gadara idia karaia bona drag dikadia idauidau idia hoia. Sibona dekenai oi henanadai, ‘Dahaka gaudia dekenai moni bada lau haorea noho?’ Unai bamona mauri dalana ese ta ena helt do ia hadikaia bona moni gaukara ia haboioa diba.

“Aonega ia davaria tauna be ia moale . . . Aonega ena namo ese siliva ia hereaia.”—Aonega Herevadia 3:13, 14.

Dika be nega idauidau ai idia vara kava dainai moni sisina oi haboua. Bema hegeregere, do idia vara gaudia totona moni sisina oi haboua be namo. Unai amo oi eiava emu famili ta be ia gorere eiava moni gaukara ia haboioa neganai, umui haboua moni sisina amo heduru umui abia diba.

“Dika be nega idauidau ai [ita dekenai] idia vara kava.”—Hadibaia Tauna 9:11.

Moni Haboua Daladia Haida

Ruma ai aniani hegaegaelaia.

Nega momo sitoa ai idia hegaegaelaia aniani ena davana be bada. To ruma ai ena be nega bada oi haorea aniani oi hegaegaelaia totona to unai be mai ena namo. Badina oi sibona oi diba edena be aniani namona bona emu moni do oi haorea lasi.

Oi hoia gaudia abia hidi namonamo.

Emu lista ai oi torea gaudia sibona oi hoia.
Sitoa haida oi sekea, bema gaudia haida be davana maragi amo idia hoihoilaia. Bona namona be idia dika haraga diba aniani be gabu maorona ai oi atodia.
Sitoa ai idia hoihoilaia gaudia haida edia davana be maragi, to bema do ia dika haraga lasi. Unai bamona gaudia oi sekea bona oi hoia diba.
Bema emu gabu ai, onlain amo gaudia idia hoihoilaia. Unai oi tohoa diba gaudia edia davana oi hahegeregerea totona. Unai amo oi ura hoia gaudia sibona do oi abia hidi, bona do oi diba moni hida do oi gaukaralaia.
Sitoa haida oi sekea diba bema gaudia edia davana idia hadihoa. Gabu haida dekenai paua, ranu bona gau ma haida edia davana hahegeregerea karana be mai ena namo.

Gau matamata hoia totona, oi laloa namonamo guna.

Faktori momo be moni bada abia totona, fon bona gau matamatadia idia karaia. Unai dainai sibona oi nanadaia: ‘Fon matamata lau hoia be namo, a? Dahaka dainai fon matamata lau ura hoia? Bona hari do lau hoia eiava gabeai?’

Haida be edia kohu idia hoihoilaia, eiava emu kohu haida oi hanamoa diba.

Emu ruma ai ia noho kohu idia dika haraga lasi totona, oi sekea loulou bona hanamodia. Hegeregere bema emu frisa bona stouv oi sekea bona ia dika neganai, oi hanamoa be namo. Haida be idia gaukaralaia vadaeni gaudia be davana maragi amo idia hoihoilaia. Reana unai bamona gaudia oi hoia diba.

Uma gabu oi karaia.

Ruma badinai gabu ta oi hegaegaelaia uma gabu oi karaia totona. Unai ese oi do ia durua sitoa ai gau momo do oi hoia lasi. Bona oi hadoa aniani oi hoihoilaia, bona aniani ma haida be idia dabu taudia dekenai oi henia diba.

“Gaukara goadagoada tauna ena palani idia guguru.”—Aonega Herevadia 21:5.

Miles bona ena adavana be England ai idia noho, idia gwau: “Dina ta ta ai gaudia edia prais ai sekea bema idia bada daekau noho eiava lasi. Bona emai banika kadi gaukaralaia dalana ai naria namonamo.”

Jeremy be U.S.A ai ia noho, ia gwau: “Sitoa dekenai ai do lao lasi neganai, hanaihanai egu ruma bese ida do ai hoia gaudia ena lista ai torea.”

Yael be Israel ai ia noho, ia gwau: “Hanaihanai emai moni ai gaukaralaia namonamo, badina ai diba moni ena hekwakwanai do ia vara. Bona do idia vara kava dika totona moni sisina ai atoa hegaegae.”

Jeffrey bona ena adavana be U.S.A ai idia noho, idia gwau: “Emai natudia ai hadibaia ruma ena kohu ta eiava motuka ia dika neganai, unai gaudia do idia hanamoa unai amo gau matamatadia do ai hoia lasi. Lau bona egu adavana be kohu matamata hoia karana ai ura dadaraia.”

Hono be Myanmar ai ia noho, ia gwau: “Uma gabu lau karaia bona kokoroku lau naria dainai, sitoa eiava maketi ai moni bada lau haorea lasi. Bona lau hadoa aniani haida be idia dabu taudia dekenai lau henia.”

Tau ta be uma gabu ai ia hadoa aniani idauidau ia gogoa.