Stadi 25
Hereva Ia Hegeregere Haroro Gaukarana Dekenai
1 Iseda Keristani hesiai gaukarana ena anina badana be inai: Dirava ena Hereva, Baibel idia diba maragi taudia ita haroro henidia bona ita hadibalaidia. Iseda hereva ese do ia durudia momokani totona, auka lasi herevadia, edia anina idia abia haraga diba herevadia, amo ita hadibadia be namo.
2 Unai hegeregerena, inai kara be Sikuli lalonai oi hahedinaraia toho neganai, namona be hebou taudia oi hereva henidia, hegeregere ruma ta ruma ta gaukarana lalonai oi davaridia taudia oi hereva henidia bamona. Anina be, oi gwauraidia point ta ta bona emu hereva ena toana be hegeregere ruma ta ruma ta haroro gaukarana dekenai taunimanima oi hereva henidia bamona.
3 Baibel ita diba momo dainai, ita ese taunimanima momo idia diba lasi herevadia ita herevalaidia. Unai hereva haida be inai: “orena taudia,” “mamoe idaudia,” “Aramagedono,” bona “Basileia.” Unai hereva be murimuri taudia dekenai ita herevalaidia neganai, namona be edia anina ita gwauraia hedinarai danu, unai do idia lalo-pararalaia totona.
4 Sikuli naria tauna ese emu hereva be inai dala amo do ia tahua neganai, bema unai bamona hereva ta oi gwauraia, ia be sibona ena lalona dekenai do ia henanadai, do ia gwau, ‘Unai hereva ena anina ia gwauraia hedinarai eiava? Baibel ena hereva ia diba lasi tauna bema ia kamonai, unai hereva ena anina ia lalo-pararalaia diba eiava?’
5 Haroro gaukarana oi karaia negadiai, oi sibona oi abia hidi herevadia oi gwauraia diba, to Sikuli lalonai oi gwauraia herevana be Sikuli naria tauna ese ia abia hidi vadaeni. Vadaeni, namona be karaia dalana o setting namona oi abia hidi, unai hereva ena badina o point namodia momo do oi gwauraidia hedinarai diba totona. Sikuli naria tauna ese emu hereva do ia tohoa neganai do ia laloa gauna be inai: Oi abia hidi herevadia be hegeregere unai setting dekenai eiava lasi?
6 Unai dainai, emu hereva oi do hegaegaelaia lasi neganai, oi sibomu be inai bamona oi henanadai, oi gwau: Lau ura egu hereva be dahaka anina do ia havaraia? Unai anina havaraia totona, edena hereva do lau gwauraidia, bona unai hereva edia oromana be edena bamona do lau haidaua, egu hereva karaia dalana ida do lau hahegeregeredia totona? Unai oi lalohadailaia vadaeni neganai, hereva haida do oi abia hidi haraga diba, bena do oi gwauraidia diba, hegeregere haroro gaukarana lalonai oi gwauraidia bamona.
7 Hereva ena heduru gwauraia hedinarai. Ruma-ta-ruma-ta gaukarana lalonai ruma tauna ta oi hereva henia neganai, inai oi hahedinarai henia goevagoeva: Oi gwauraia herevana bema ia kamonai henia bona bema ia badinaia, namo do ia davaria. Bema unai ia diba lasi, emu hereva do ia kamonai daudau lasi.