Gari Lasi Tauna

TANOBADA dekenai taunimanima idia hutuma idia lao neganai, idia momo ese kara dikadia idia karaia, Kaino bamona. To tau ta be ia idau. Ia be inai tau ladana Enoka. Enoka be gari lasi tauna. Iena negai idia noho taudia ibounai be kara dikadia momokani idia karaia, to Enoka ese Dirava ia hesiai henia noho.

Unai negai idia noho taudia ese kara dikadia idia karaia ena badina oi diba, a? Mani oi laloa, Daika ese Adamu bona Heva ia hamaoroa Dirava do idia kamonai henia lasi bona Dirava ia taravatua auna do idia ania? Oibe, ia be aneru dikana ta. Baibel ia gwau iena ladana be Satani. Bona ia ura taunimanima ibounai ia veria kara dikadia idia karaia totona.

Dina ta Iehova Dirava ese Enoka ia hamaoroa taunimanima dekenai idia ura lasi kamonai herevana ta ia gwauraia totona. Hereva be inai: ‘Dina ta Dirava ese kara dika taudia ibounai do ia haorea.’ Reana taunimanima be unai hereva idia kamonai neganai, idia badu momokani. Reana dala idia tahua Enoka idia hamasea totona. Unai dainai, Enoka be taunimanima dekenai Dirava do ia karaia karana ia gwauraia totona, ia gari lasi be namo.

Dirava ia ura lasi Enoka be unai kara dika taudia bogaragidiai ia mauri daudau. Enoka ena mauri lagani be 365 sibona. Dahaka dainai ita gwau “lagani 365 sibona”? Badina unai negai, taunimanima edia tauanina ia goada momokani bona idia mauri daudau herea. Oibe, Enoka ena natuna Metusela ena mauri lagani be 969!

Enoka ia mase murinai, taunimanima edia kara be ia dika momokani. Baibel ia gwau ‘idia laloa gaudia ibounai be nega ibounai ia dika sibona,’ bona ‘tanobada be dagedage karadia amo ia honu.’

Unai negai tanobada dekenai hekwakwanai momo idia vara ena badina ta oi diba, a? Badina Satani be dala matamatana ta ia gaukaralaia taunimanima ia veria kara dikadia idia karaia totona. Unai dala be gabeai do ita dibaia.