Dika Ibounai Edia Dokona

INAI laulau dekenai dahaka oi itaia? Oibe, tuari oreana ta hosi kurokurodia latanai. To idia mai gabuna mani oi itaia. Unai hosi be guba amo idia diho mai noho bona ori latanai idia heau! Hosi be momokani guba dekenai idia noho, a?

Lasi, unai be hosi korikoridia lasi. Unai ita diba badina hosi be ori latanai idia heau diba lasi, ani? To Baibel be guba dekenai idia noho hosi ia herevalaia. Ia herevalaia ena badina oi diba, a?

Badina idaunegai tuari lalodiai hosi idia gaukaralaia momo. Unai dainai Baibel ese guba amo hosi idia guia taudia ia gwauraia, unai amo ia hahedinaraia Dirava be tanobada taudia ida do ia tuari. Unai tuari gabuna ena ladana oi diba, a? Aramagedono. Unai tuari be tanobada ena dika ibounai haorea totona.

Iesu be Aramagedono tuarina do ia gunalaia. Laloaboio lasi, Iehova ese Iesu ia abia hidi Ena gavamani ena king ai ia lao totona. Unai dainai, Iesu be king ena kwara gauna ia karaia. Bona tuari kaia ese ia hahedinaraia ia ese Dirava ena inai taudia ibounai do ia hamasedia. Dirava ese kara dika taudia ibounai do ia hadikaia ore dainai ita hoa, a?

Sivarai 10 mani oi itaia lou. Unuseniai dahaka oi itaia? Oibe, Abata badana ese kara dika taudia ia hadikaia ore. Daika ese unai Abata ia havaraia? Iehova Dirava. Hari, Sivarai 15 mani oi itaia. Unuseniai dahaka ia vara noho? Iehova ese ia siaia lahina ese Sodoma bona Gomora ia hadikaia ore.

Sivarai 33 dekenai oi kehoa. Aigupito taudia edia hosi bona tuari kariota dekenai dahaka ia vara noho? Daika ese idia latanai unai ranu ia hadihoa? Iehova. Unai bamona ia karaia ena taunimanima ia gimaia totona. Sivarai 76 oi itaia. Unuseniai do oi itaia Iehova ese ena taunimanima, Israela taudia unai, be edia kara dika dainai, idia hadikadia neganai ia koua lasi.

Unai dainai, ita diba momokani Iehova ese ena tuari orea do ia siaia tanobada ena dika ibounai idia haorea totona. To unai ena anina mani oi laloa! Rau oi kehoa bona do ita itaia.