Karoa 1
Tomadiho mai Lalo-Tamona—Edena Bamona Oi Laloa be Namo?
TANOBADA ibounai lalonai bese idauidau tau- dia bona gado idauidau taudia ese dala idia davaria, mai edia lalo-tamona danu do idia tomadiho hebou. Hadibaia herevadia kereredia idia abia dae lasi bona Dirava ena taravatu utua karadia idia abia dae lasi, lalo-tamona idia abia totona. Inai taunimanima idauidau edia lalo-tamona ena badina tamona be inai: Idia diba Iehova be Dirava momokani tamona, bona idia ura edia mauri idia haidaua, iena dala maorodia badinaia totona.—Apokalupo 15:3, 4 itaia.
2 Inai ese Mika ena peroveta herevana ia hamomokania. Lagani 2,700 idau negai ia ese “dina gabedia” inai bamona ia gwauraia: “Bese momo do idia lao, do idia gwau: ‘Umui mai, Iehova ena ororo bona Iakobo ena Dirava ena dubu dekenai do ita daekau; ia ese ena dala ita dekenai do ia hadibaia, bona ena dala dekenai do ita raka.’ ” (Mika 4:1, 2) Unai bamona ia vara be oi itaia, a?
3 “Bese” ta ibounai be Iehova ena lauma dubuna dekenai idia lao lasi idia tomadiho henia totona. To bese idauidau taudia haida be unai bamona idia karaia. Iehova ena lalokau karadia bona ena ura idia diba neganai idia laloa momo. Dirava ena ura idia dekenai idia tahua mai edia manau danu. Edia guriguri be abidadama tauna David ena hegeregerena, ia gwau: “Emu ura karaia dalana oi hadibaia lau dekenai, badina oi be lauegu Dirava.”—Sal. 143:10.
4 Oi laloa oi danu be Iehova tomadiho henia taudia hutuma edia huanai oi noho, a? Oiemu kara amo oi hahedinaraia oi laloa oi dekenai idia hadibaia herevadia be Iehova ena amo, a? ‘Ena dala dekenai’ oi raka momokani, eiava?
LALO-TAMONA ITA ABIA DALANA
5 Iehova ena ura be taunimanima iboudiai ese ia sibona idia tomadiho henia mai edia lalo-tamona danu—ia ura lasi ta idia koia o ta ia daradara badina mauri ena anina korikori ia davaria lasi dainai. Ita ura bada nega ta do ia mai, mauri taudia iboudiai ese Dirava momokani tamona sibona do idia tomadiho henia! (Sal. 103:19-22) To Iehova ena lohia siahuna idia dadaraia bona haida edia mauri idia hadikaia taudia be ia ese do ia haoredia guna be namo. Mai ena hebogahisi danu ia hadibadia guna. Taunimanima iboudiai be mai edia dala, edia kara do idia haidaua. Unai hegeregerena, hari inai negai, tanobada ibounai lalonai, inai bamona idia noidia haraga, idia gwau: “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada bona davara bona ranu guridia ibounai ia karaia Diravana do umui tomadiho henia.” (Apok. 14:6, 7) Unai noinoi oi abia dae vadaeni a? Bema oibe, namona be Iehova ena orea danu umui gaukara hebou bona ma haida umui durudia idia abia dae totona.
6 Ena be taunimanima haida idia gwau Iehova idia abidadama henia bona idia ura Paradaiso dekenai idia noho, to bema sibodia edia ura idia tahua noho, Iehova ese ena orea lalonai do ia abidia dae lasi. Ia ura “iena ura dalana” do idia diba maoromaoro bona do idia badinaia. (Kol. 1:9, 10) Kamonai taudia be Bible ena diba hamatamaia herevadia idia diba murinai, idia ura Keristen dalanai ma idia goada idia lao. Idia ura Iehova bona ena Hereva do idia diba goevagoeva bona edia mauri lalonai do idia badinaia namonamo. Dala idia tahua, edia Tamana guba dekenai ena kara bona lalohadai do idia tohotohoa. Unai dainai dala idia tahua, iena hesiai gaukara hari inai nega lalonai do idia karaia. Oi be unai bamona oi karaia a?—Ef. 5:1; Heb. 5:12–6:3; 1 Tim. 4:15.
7 Bible ese ia hahedinaraia Iehova ena hesiai gaukara idia karaia taudia idia lalo-tamona. (Ef. 4:1-3) Ena be heiriheiri bogaraginai ita noho bona ita goevadae lasi, to namona be hari ita lalo-tamona. Iesu ia guriguri iena hahediba taudia do idia tamona, lalo-tamona momokani do idia abia. Anina be idia ese Iehova bona iena Natuna danu do idia hebamo heheni namonamo, bona idia sibodia do idia lalo-tamona danu. (Ioane 17:20, 21) Inai lalo-tamona hari idia davaria, Iehova ena “dubu” dekenai idia kamonaia herevadia idia badinaia neganai.
DAHAKA ESE LALO-TAMONA IA HAVARAIA?
8 Lalo-tamona havaraia gaudia haida be henuai ai torea. Idia murinai ai torea henanadai oi haerelaia neganai, inai oi laloa: inai ese lau edena bamona ia durua, Iehova bona Keristen taudia danu lau lalo-tamona totona? Inai henanadai bona Bible ena siri oi laloa namonamo neganai, oiemu diba bona lalo-parara Dirava badinaia karana dekenai do oi habadaia. (Her. 5:1, 2; Fil. 1:9-11) Vadaeni, mani inai gaudia ta ta oi laloa; gaudia be inai:
(1) Ita ibounai ese Iehova ita tomadiho henia bona ita gwau taravatu ia atoa be maoro.
Bema Iehova ena sisiba gau ta dekenai ita dadaraia badina be ita laloa ia be gau maragina sibona, Iehova be edena bamona do ia laloa ita dekenai? (Luka 16:10; Malaki 1:6-8 itaia.)
Bema nega haida Iehova ena taravatu ita badinaia lasi, unai ese ma haida ia hakereredia, eiava? (Roma 5:12; Iosua 7:20-26; 1 Hanua Pavapavadia 14:16 itaia.)
(2) Herevana edeseniai ita noho, Dirava ena Hereva ese ita ia hakaua diba.
Gau ta ita lalohadailaia neganai, iseda lalona ena “mamina” ese ita edena bamona ia koia diba? (Ier. 17:9; Her. 14:12)
Bema Bible ena sisiba gau ta dekenai ita diba lasi, dahaka ita karaia be namo? (Her. 2:3-5)
(3) Dala tamona ai lauma aniani amo ita idia ubua dainai, namo ita davaria.
Iehova ese ena orea taudia ia ubudia dalana idia laloa lasi taudia edia noho be edena bamona? (Isaia 1:3; 9:16; 65:14 itaia.)
(4) Iesu Keriso sibona be iseda Hakaua Tauna, bona ia sibona amo Iehova ita tomadiho henia.
Bema ita ta ia laloa ia ese haida ia hereaia, ena lalohadai be mai ena badina korikori, a? (Roma 3:23, 24; 12:3; Mat. 23:8-10)
(5) Herevana edeseniai ita noho, ita laloa taunimanima hamauridia gauna tamona be Dirava ena Basileia.
Inai ese ita edena bamona ia naria bena gau haida ese ita idia hapararaia diba lasi? (Mat. 6:9, 10; Mika 4:3)
(6) Lauma helaga ese kara namodia Iehova tomadiho henia taudia lalodiai ia havaraia; unai kara amo Keristen lalo-tamona idia davaria diba.
Dala be edena bamona ita kehoa, Dirava ena lauma ese ena huahua ita lalonai ia havaraia totona? (Sal. 1:2; Her. 22:4; Apok. 3:6; Kara 5:32)
Lauma ena huahua ita abia neganai, unai ese ita edena bamona ia durua Iehova ita badinaia totona? Bona iseda tadikaka danu ita hebamo heheni totona? (Gal. 5:22, 23)
(7) Ita ibounai eda maduna be Dirava ena Basileia ena sivarai namona do ita harorolaia.
Inai haroro gaukara be iseda Keristen turadia danu ita karaia hebou neganai, edena bamona ita laloa idia dekenai? (Kolose 4:7, 11 itaia.)
9 Inai hereva ita abia dae be haraga, to ita badinaia be auka. To ita badinaia neganai Iehova ita bamoa momokani. Iseda orea taudia edia hebamo ese iseda lalona ia hagoadaia danu. Salamo 133:1 ena hereva bamona: “Itaia! Tadikaka idia noho hebou mai edia lalo-tamona, unai be namo bona mai moalena danu!” Tanobada mai ena mataganigani amo oi siri bona Iehova idia lalokau henia momokani taudia danu umui hebou, be emu lalona ia hanamoa bada, ani?
HAPARARAIA GAUDIA DEKENA AMO ITA SIRI
10 Namona be ita idia hapararaia diba gaudia dekena amo ita siri, inai lalo-tamona idia hadikaia garina. Ginigunana be sibona eda ura badinaia karana. Iehova ese ia hahedinaraia unai bamona kara ia hamatamaia tauna be Satana Diabolo. Ia ese Eva ia koia dainai ia laloa Dirava ena hereva ia dadaraia bona sibona ena lalohadai ia karaia be namo. Adam be ia danu idia gwau-edeede. Unai dainai idia ruaosi bona ita danu ese dika ita davaria. (Gen. 2:16, 17; 3:1-6, 17-19) Tanobada be gwau-edeede lalohadai amo ia honu, unai dainai unai lalohadai ese ita ia hakererea be hoa gauna lasi. Unai lalohadai ita koua totona, Iehova ese iena orea amo ita ia sisiba henia.
11 Unai orea amo Iehova ese ita ia hadibaia vadaeni, inai nega dikana do ia haorea bena ena gabunai guba matamatana bona tanobada matamatana do ia haginidia, idia lalodiai “kara maoromaoro sibona do ia noho.” (2 Pet. 3:13) Ita moale dikadika, badina be ita diba nega sisina murinai inai nega dikana do ia ore bena tanobada be Paradaiso ai do ia lao. To iseda mauri dalana amo ita hahedinaraia ita hegaegae momokani, kara maoromaoro tanobadana dekenai ita noho totona, eiava? Bible ia gwau: “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai.” (1 Ioane 2:15) Momokani, ita ibounai ese tanobada gaudia haida ita ura henia lasi. To sibona eda moale idia koua gaudia sibodia ita ura henia lasi, a? Eiava tanobada taudia edia lalohadai kereredia bona sibodia edia ura tahua karadia danu ita dadaraia, a? Sibona eda tauanina edia ura dikadia ita dadaraia bona gau iboudiai dekenai Iehova ita kamonai henia mai eda kudouna danu, a? Herevana edeseniai ita noho o dahaka ita karaia noho, to namona be iseda mauri dalana ibounai ese ia hahedinaraia iseda lalohadai bona ura be Dirava ena hegeregeredia.—Her. 3:5, 6.
12 Iehova ena nega korikori ia ginidae neganai, inai nega dikana bona idia ura henia taudia iboudiai do ia haoredia haraga. Do ia naria lasi bona ena taravatu do ia haidaua lasi, tanobada idia dogoatao bona Dirava ena ura idia tahua bona badinaia momokani lasi taudia idia roho mauri totona. Namona be hari ita kara haraga! (Luka 13:23, 24; 17:32; 21:34-36) Vadaeni, ita moale bada, badina be taunimanima “hutuma bada herea” be Dirava ena ura idia tahua noho; mai edia ura bada danu iena hadibaia herevadia, ena lalokau oreana amo ia hadibaia herevadia, idia tahua, bena ena dala dekenai idia raka mai edia lalo-tamona danu!
INAI HEREVALAIA LOU
● Iehova ena ura tomadiho dekenai be dahaka?
● Bible ena diba hamatamaia herevadia ita diba vadaeni murinai, edena bamona ita goada ita lao toho be namo?
● Ita ta ta be dahaka ita karaia diba, unai amo iseda lalona idia hatamonaia gaudia ese iseda mauri do idia hanamoa?
[Study Questions]
1, 2. (a) Dahaka dainai hari inai negai taunimanima momo idia tomadiho diba mai edia lalo-tamona danu? (b) Bible ese edia kara edena bamona ia gwauraia?
3, 4. (a) Edena dala amo “bese” idauidau be Iehova dekenai idia lao? (b) Sibona dekenai edena bamona ita henanadai be namo?
5. (a) Gabeai taunimanima hida do idia tomadiho mai edia lalo-tamona danu? (b) Dahaka dainai gau badana be taunimanima be Iehova tomadiho henia taudia ai idia lao haraga hari, bona edena bamona ita durudia diba?
6. Bible ena diba hamatamaia herevadia ita diba murinai, edena bamona ita goada ita lao toho be namo?
7. Edena bamona idia lalo-tamona momokani hari inai negai, bona unai lalo-tamona be edena bamona idia abia?
8. (a) Inai henanadai mai anina ita dekenai bema ita be Bible amo ita haerelaidia toho, unai ese ita edena bamona ia durua? (b) Ataiai ai torea henanadai oi haerelaidia, unai amo Keristen lalo-tamona idia havaraia gaudia oi gwauraia.
9. Inai hereva momokanidia be iseda mauri lalonai ita badinaia momokani neganai, dahaka ia vara?
10. Dahaka dainai ita naria namonamo be namo, sibona eda ura bona lalohadai ita badinaia garina?
11. Dahaka ia hahedinaraia ita be Dirava ena kara maoromaoro Negana Matamatana lalonai ita noho totona hari ita hegaegae mai eda momokani eiava lasi?
12. (a) Dahaka dainai hari inai negai Iehova ena dala ita tahua bona iseda mauri lalonai ita gavaia be gau badana? (b) Inai paragraph lalonai ai torea siridia edia anina be dahaka ita ta ta dekenai?