Karoa 1
Tomadiho mai Lalo-Tamona ida Iseda Nega Lalonai—Ena Anina be Dahaka?
1, 2. (a) Iseda nega ai dahaka gau namona ia vara noho? (b) Kudou-maoro taudia edia helaro namona be dahaka?
TANOBADA ibounai lalonai, bese, iduhu, bona gado idauidau taudia milioni momo be mai lalo-tamona ida idia tomadiho hebou. Lagani ta ta, edia namba ia bada ia lao. Baibel ese idia ia gwauraia Iehova ena “witnes taudia” bona “hutuma bada herea.” “Dina bona hanuaboi idia ese Dirava ena hesiai gaukara idia karaia noho.” (Isaia 43:10-12; Apokalupo 7:9-15; NW ) Dahaka dainai unai idia karaia? Badina idia diba Iehova be Dirava momokani tamona. Unai dainai edia mauri idia haidaua bona iena kara maoromaoro taravatudia idia badinaia. Danu, idia diba ita be inai tanobada dikana ena ‘nega dokona’ dekenai ita noho, nega daudau lasi murinai Dirava ese do ia hadikaia ore, bona ena gabu ai tanobada paradaisona matamatana do ia mailaia.—2 Timoteo 3:1-5, 13; 2 Petero 3:10-13.
2 Dirava ena Hereva ia gwauhamata: “Nega daudau lasi lalonai kara dika taudia do idia ore. . . . To manau taudia ese noho gabuna tano do idia abia, do idia helai namonamo, mai moale bona mai maino danu.” (Salamo 37:10, 11) “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:29) “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”—Apokalupo 21:4.
3. Tomadiho lalonai lalo-tamona be edena bamona ia vara?
3 Hari tomadiho momokanina lalonai idia lalo-tamona taudia be unai tanobada matamatana dekenai do idia noho taudia ginigunadia. Dirava ena ura idia dibaia, bona idia karaia goadagoada. Iesu ese ia hahedinaraia unai be mai anina bada, ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Aposetolo Ioane ia gwau: “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”—1 Ioane 2:17.
Ena Anina Korikorina
4. (a) Iseda nega lalonai, taunimanima hutuma be mai lalo-tamona ida idia tomadiho hebou ena anina korikorina be dahaka? (b) Baibel ese unai hebou karana be edena bamona ia herevalaia?
4 Iseda nega lalonai, taunimanima hutuma be mai lalo-tamona ida idia tomadiho hebou ena anina korikorina be dahaka? Ia hahedinaraia goevagoeva, inai tanobada dikana be kahirakahira do ia ore, bena Dirava ena tanobada matamatana do ia vara. Hari ita itaia, taunimanima be tomadiho totona idia hebou ese ia hahedinaraia Baibel ena peroveta herevadia be idia guguru noho. Unai bamona peroveta herevana ta ia gwau: “Nega gabeai dinadia [inai nega dokona] neganai, Dubu Helaga ia gini ena ororo [tomadiho momokani hereadaena], be ataiai herea do ia lao. Ororo ibounai edia lata be ia ese do ia hanaia [tomadiho iboudiai ia hereaia]. Bese idauidau taudia momo, be inai ororo dekenai do idia mai. Bona idia ese do idia gwau, ‘Lohiabada ena ororo dekenai do ita lao, Israela taudia edia Dirava ena Dubu Helaga be unuseni. Badina ia ura ita karaia gaudia, be ia ese ita do ia hadibaia. Ita ese Dirava ena ura dalana dekenai do ita raka.’ ”—Mika 4:1, 2; Salamo 37:34.
5, 6. (a) Edena dala ai Mika 4:1, 2 be hari inai negai ia guguru? (b) Edena henanadai be ita sibona dekenai ita gwauraia be namo?
5 Unai peroveta herevana hegeregerena, hari inai negai bese idauidau amo taunimanima milioni momo be Iehova ena lauma dubuna dekenai ia idia tomadiho henia. Iehova Dirava ena lalokau palanina bona ena kara namo idia dibaia neganai, unai gaudia ese edia kudouna idia hamarerea bada. Mai manau ida idia tahua Dirava ia ura dahaka do idia karaia. Edia guriguri be salamo torea tauna ena bamona, ia gwau: “Oi be lauegu Dirava. Unai dainai oiemu ura ena kara, be lau dekenai mani do oi hadibaia.”—Salamo 143:10.
6 Oi danu be Iehova ese lalo-tamona ai idia tomadiho totona ia haboua taudia hutuma bada herea edia huanai oi noho, a? Iena Hereva amo diba oi abia dainai, oi karaia gaudia ese idia hahedinaraia oi abia dae momokani unai diba ena Badina be Iehova, a? ‘Iena dala dekenai oi raka’ momokani, a?
Ia Vara Dalana
7. (a) Mai lalo-tamona ida do idia tomadiho taudia be daidia? (b) Dahaka dainai Iehova tomadiho henia taudia ai ita lao haraga be gau badana, bona edena dala ai ma haida ita durua diba unai idia karaia totona?
7 Iehova ena ura be guba bona tanobada taudia ibounai be tomadiho momokanina lalonai do idia lalo-tamona. Unai nega, idia mauri noho taudia ibounai ese Dirava momokani tamona do idia tomadiho henia negana, be mai ura bada ida ita naria noho! (Salamo 103:19-22) To Iehova ese ena ura maoromaoro idia dadaraia taudia do ia hadikaia ore guna. Mai hebogahisi ida, do ia karaia gaudia ia hadibaia guna, bena gabu ibounai dekenai taunimanima ese edia kara idia haidaua diba. (Isaia 55:6, 7) Unai dainai, iseda nega lalonai ‘bese ibounai, iduhu ibounai, bona gado ibounai’ taudia dekenai inai mai anina bada herevana idia gwauraia: “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada, bona davara, bona ranu guridia ibounai ia karaia Diravana do umui tomadiho henia.” (Apokalupo 14:6, 7) Oi ese unai hereva oi badinaia vadaeni, a? Bema oibe, oi ese ma haida do oi boiria diba, Dirava momokanina idia diba bona ia idia tomadiho henia totona.
8. Baibel ena hadibaia hereva badadia ita dibaia murinai, dahaka danu ita karaia mai momokani ida be gau badana?
8 Idia gwau Iehova idia abidadama henia to sibona edia ura idia tahua noho taudia ese ia idia tomadiho henia be Iehova ena ura lasi. Dirava ia ura taunimanima ese “iena ura” do idia diba maoromaoro bona edia mauri lalonai unai idia hahedinaraia. (Kolose 1:9, 10) Unai dainai, Baibel ena hadibaia hereva badadia idia dibaia bona laloa bada taudia be idia ura Keristani taudia goadadia ai idia lao. Idia ura Iehova idia diba namonamo, iena Hereva dekenai edia lalo-parara idia habadaia, bona edia mauri lalonai idia badinaia momokani. Idia ura iseda guba Tamana ena kara idia tohotohoa bona iena lalohadai idia abia. Unai dainai dala idia tahua, Iehova ese hari ia henia hahemauri gaukarana idia karaia totona. Oiemu ura danu be unai bamona, a?—Mareko 13:10; Heberu 5:12–6:3.
9. Lalo-tamona momokanina be edena bamona ia vara?
9 Baibel ia hahedinaraia Iehova idia tomadiho henia taudia idia lalo-tamona be gau badana. (Efeso 4:1-3) Unai lalo-tamona be hari ia noho vadaeni be mai anina bada, herevana ia parara tanobadana ai ita noho bona ita be goevadae lasi dainai ita do hekwarahi noho. Iesu be mai momokani ida ia guriguri ena hahediba taudia ibounai do idia tamona, lalo-tamona momokani do idia moalelaia. Unai ena anina be dahaka? Gau ginigunana be, edia hetura karana Iehova bona ena Natuna ida ia namo. Gau iharuana be, idia ta ta ida idia lalo-tamona. (Ioane 17:20, 21) Unai ia vara totona, Iehova ese Keristani kongregesen amo ena taunimanima ia hadibaia.
Dahaka ese Lalo-Tamona Ia Havaraia?
10. (a) Ita dekenai mai anina henanadai edia haere be Baibel amo ita tahua neganai dahaka heduru ita abia? (b) Inai paragraf dekenai idia noho henanadai oi haerelaia bona Keristani lalo-tamona idia havaraia gaudia oi laloa.
10 Tomadiho lalonai lalo-tamona idia havaraia gaudia seven be henunai idia noho. Idia noho henanadai oi haerelaia neganai, unai kahana ta ta ese emu hetura karana Iehova bona Keristani tadikaka ida ia durua be oi laloa. Unai kahadia oi laloa bona idia gwauraia to idia torea hanai lasi siridia oi itaia neganai, heduru oi abia Dirava amo ia mai aonega, laloa dalana, bona laloa kehoa do oi habadaia totona—unai kara iboudiai be mai anina bada. (Aonega Herevadia 5:1, 2; Filipi 1:9-11) Unai gaudia ta ta oi laloa.
(1) Ita abia dae Iehova ese namo bona dika ia gwauraia be maoro. “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.”—Aonega Herevadia 3:5, 6.
Dahaka dainai gau ta ita abia hidi neganai, Iehova ena sisiba bona hakaua dalana ita tahua be namo? (Salamo 146:3-5; Isaia 48:17)
(2) Dirava ena Hereva ese ita ia hakaua. “Dirava ena hereva ai mailaia neganai, umui kamonai henia, bona umui abia dae. . . . Umui dekenai ia be taunimanima edia hereva lasi, to ia be Dirava ena hereva momokani. . . . Emui kudouna dekenai ia gaukara noho.”—1 Tesalonika 2:13.
Ita “mamia” idia maoro gaudia ita karaia neganai, dahaka dika ia vara diba? (Aonega Herevadia 14:12; Ieremia 10:23, 24; 17:9)
Bema Baibel ena sisiba gau ta dekenai ita diba lasi, dahaka ita karaia be namo? (Aonega Herevadia 2:3-5; 2 Timoteo 3:16, 17)
(3) Dala tamona ai lauma aniani amo ita idia ubua dainai namo ita abia. “Emu natuna memerodia iboudiai be Iehova ese do ia hadibaia.” (Isaia 54:13, NW ) “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.”—Heberu 10:24, 25.
Iehova ese lauma dalanai ita ia ubua karana idia abia dae taudia ese dahaka namo idia abia? (Isaia 65:13, 14)
(4) Taunimanima ta lasi, to Iesu Keriso be iseda Hakaua Tauna. “Taunimanima ese umui do idia gwauraia lasi ‘Hadibaia Tauna.’ Badina be umui emui Hadibaia Tauna be tamona sibona, bona umui ibounai be tadikaka. Bona tanobada dekenai tau ta do umui gwauraia lasi emui ‘Tamana,’ badina be emui Tamana be tamona sibona, ia be guba dekenai ia noho. Bona umui be ‘Hakaua Taudia’ do idia gwauraia lasi, badina be emui Hakaua Tauna be tamona sibona, Keriso inai.”—Mataio 23:8-10.
Ita laloa ma haida ita hereaia be maoro, a? (Roma 3:23, 24; 12:3)
(5) Ita abia dae taunimanima edia helaro tamona sibona be Dirava ena Basileia gavamanina. “Inai bamona do umui guriguri: ‘Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.’ Dirava ena Basileia bona iena kara maoromaoro do umui tahua guna.”—Mataio 6:9, 10, 33.
Edena dala ai ‘basileia ita tahua guna’ karana ese iseda lalo-tamona ia gimaia? (Mika 4:3; 1 Ioane 3:10-12)
(6) Lauma helaga dainai Iehova tomadiho henia taudia ese Keristani lalo-tamona idia havaraia karadia idia hahedinaraia diba. “Lauma Helaga ese inai bamona karadia ia havaraia: Lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana.”—Galatia 5:22, 23.
Dirava ena lauma ese ita lalonai kara namodia ia havaraia totona, dahaka ita karaia be namo? (Kara 5:32)
Dirava ena lauma ita abia ese edena bamona iseda hetura karana iseda Keristani tadikaka ida ia durua? (Ioane 13:35; 1 Ioane 4:8, 20, 21)
(7) Dirava idia tomadiho henia taudia momokanidia ibounai ese iena Basileia ena sivarai namona idia harorolaia. “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”—Mataio 24:14.
Dahaka ese ita ia hagoadaia be namo, unai haroro gaukara ita karaia goadagoada totona? (Mataio 22:37-39; Roma 10:10)
11. Iseda mauri lalonai Baibel ena hereva momokani ita badinaia neganai, dahaka ia vara?
11 Mai lalo-tamona ida Iehova ita tomadiho henia neganai, ia kahirakahira ita lao bona iseda tadikaka ida hebamo namona ita moalelaia. Salamo 133:1 ia gwau: “Dirava ena taudia do idia noho hebou, mai edia laloa tamona neganai, unai kara be namo, bona mai ena moale danu.” Tanobada taudia ese sibona edia ura idia tahua, idia matabodaga, bona idia dagedage, bona unai ibounai ita rakatania bona Iehova idia lalokau henia bona ena taravatu idia kamonai henia taudia ida ita hebou ese lalona ia hagoadaia momokani!
Hapararaia Gaudia Oi Dadaraia
12. Dahaka dainai Dirava laloa lasi karana ita dadaraia be gau badana?
12 Tanobada ibounai dekenai ita lalo-tamona bona unai ita hadikaia lasi totona, hapararaia gaudia ita dadaraia be gau badana. Unai bamona gauna ta be Dirava bona ena taravatu laloa lasi karana. Unai kara ita dadaraia totona Iehova ese ita ia durua, bona ia hahedinaraia unai lalohadai ia hamatamaia tauna be Satani Diabolo. (2 Korinto 4:4; Apokalupo 12:9) Satani ese Adamu bona Heva ia veria, Dirava ena hereva idia dadaraia bona Dirava ena ura idia utua gaudia idia abia hidi totona. Unai dainai idia bona ita dekenai dika ia vara. (Genese 3:1-6, 17-19) Inai tanobada lalonai Dirava bona ena taravatu laloa lasi karana ia bada. Unai dainai namona be unai kara ita dadaraia momokani.
13. Dahaka ese ia hahedinaraia Dirava ena kara maoromaoro tanobadana totona hari ita hegaegae noho eiava lasi?
13 Hegeregere, Iehova ena gwauhamata namona mani oi laloa, ia gwau inai tanobada dikana ena gabunai guba matamatana bona tanobada matamatana do ia atoa, idia lalonai “kara maoromaoro sibona do ia noho.” (2 Petero 3:13) Namona be unai ese ita ia veria unai kara maoromaoro negana lalonai do ita noho totona ita hegaegae, ani? Unai ena anina be Baibel ena sisiba ita badinaia, ia gwau: “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai.” (1 Ioane 2:15) Unai dainai inai tanobada ena lalohadai—Dirava laloa lasi, sibona laloa bada, matabodaga, bona dagedage karadia—ita dadaraia. Mai kudouna ibounai ida Iehova ita kamonai henia noho, herevana ita be goevadae lasi taudia. Iseda mauri ibounai ese ia hahedinaraia mai eda lalona bona ura ibounai ida Dirava ena ura ita karaia.—Salamo 40:8.
14. (a) Dahaka dainai hari iseda diba Iehova bona ena dala dekenai ita habadaia bona eda mauri lalonai ita badinaia be gau badana? (b) Paragraf lalonai idia gwauraia siridia edia anina ita ta ta dekenai be dahaka?
14 Iehova ese inai tanobada dikana bona ena mauri daladia idia ura henia taudia ia hadikaia ore dinana ia mai neganai, do ia leiti lasi. Tanobada idia ura badinaia noho bona mai lalo-rua ida Dirava ena ura idia dibaia bona karaia taudia totona, Ia ese iena nega eiava taravatu do ia haidaua lasi. Hari be kara ta ita karaia ena nega namona! (Luka 13:23, 24; 17:32; 21:34-36) Unai dainai, ita moale bada badina ita itaia hutuma bada herea taudia ese inai nega idia gaukaralaia namonamo, Iehova ese ena Hereva bona orea amo ia henia hadibaia herevadia idia tahua mai edia ura bada ida, bona tanobada matamatana dekenai ia lao dalana ai idia raka noho mai lalo-tamona ida! Bona Iehova ita dibaia namonamo neganai, ia do ita lalokau henia bada bona ita ura ia do ita hesiai henia.
Riviu Henanadai
• Iehova ena ura tomadiho dekenai be dahaka?
• Baibel ena hadibaia hereva badadia ita dibaia murinai, namona be mai momokani ida dahaka ita ura ita karaia?
• Ita ta ta ese dahaka ita karaia diba Iehova idia tomadiho henia taudia ma haida ida ita lalo-tamona totona?
[Picture on page 4]
‘Manau taudia ese tano do idia abia bona do idia helai namonamo mai moale bona mai maino danu’