Karoa 4
Peroveta Taudia Iboudiai ese Idia Gwauraia Tauna
IESU ese ia hahedinaraia ia be Iehova danu idia hebamo heheni namo herea, ia gwau: “Tamana ese ena Natuna ia lalokau henia, bona ena kara ibounai ia hedinarai henia ia dekenai.” (Ioane 5:19, 20) Gunaguna momokani, Dirava ese ia havaraia neganai, ruaosi idia hebamo heheni matamaia. Iehova Dirava sibona ese ia havaraia Natuna tamona be ia. Ia be Dirava ena Hereva danu, anina be Dirava ena hereva halasia tauna, ia ena amo Dirava ese ena ura ia hadibaia ma haida dekenai. Inai tau, Dirava ese ia lalokau henia bada Natuna, be taunimanima ta ai ia lao neganai ena ladana idia hatoa Iesu Keriso.—Kol. 1:15, 16; Ioane 1:14; 12:49, 50.
2 Hoa dalanai taunimanima ta bamona do ia vara lasi neganai, ia idia gwauraia herevadia momo, Dirava ena amo idia mai peroveta herevadia, be idia torea vadaeni. Aposetolo Petro ese Korenelio ia hamaoroa hegeregerena, “Peroveta taudia ibounai ese idia gwauraia hedinarai vadaeni.” (Kara 10:43) Bible ese Iesu ena kara tomadiho goevana lalonai ia gwauraia momo herea, unai dainai aneru ta ese aposetolo Ioane ia hamaoroa, ia gwau: “Hereva momokani, Iesu ia hedinaraia gauna ese peroveta taudia edia lauma ia hasiahua noho.” (Apok. 19:10) Inai peroveta herevadia ese ia bona Dirava ena ura ia dekenai idia gwauraia hedinarai; unai dainai idia be mai anina bada ita dekenai, hari inai nega lalonai.
PEROVETA HEREVADIA EDIA ANINA
3 Iehova ese unai peroveta herevadia ginigunana ia gwauraia, gwau-edeede be Eden dekenai ia vara murinai. Gaigai ia kota henia neganai ia gwau: “Lau ese badu oi bona hahine huanai do lau atoa bona oiemu garana bona iena garana huanai. Ia ese emu kwarana do ia haberoa bona oi ese iena aena geduna do oi haberoa.” (Gen. 3:14, 15, NW) Anina be dahaka? Dirava ena ura negadiai peroveta herevadia ma haida ese unai hereva idia habadaia bona ena anina idia hahedinaraia. Unai dainai ita diba Dirava ese ia hereva henia gaigaina anina be Satana Diabolo. “Hahine” anina be Iehova ena kamonai oreana guba dekenai, ia be ena kamonai adavana bamona. “Gaigai ena garana” anina be aneru bona taunimanima, Diabolo ena kara idia tohotohoa bona Iehova bona ena orea taudia idia inai henidia taudia unai. Diabolo ese gaigai Eden dekenai ia gaukaralaia, unai dainai inai peroveta herevana, “emu kwarana do ia haberoa,” anina be inai gwau-edeede laumana, Dirava ena ladana ia hadikaia bona taunimanima ia hahisidia bada laumana, be “garana” ta ese gabeai do ia hamasea. To nega daudau lalonai Dirava ia hahedinaraia lasi daika ese unai dala amo do ia haberoa.—Roma 16:25, 26.
4 Ma lagani 2,000 bamona murinai Iehova ese ma hereva haida ia gwauraia hedinarai. Ia hahedinaraia Garana be Abraham ena bese lalonai do ia vara. (Gen. 22:15-18) To Dirava ese Garana ena tubuna ai do idia lao taudia ia abidia hidi; daika ia vara guna be herevana. Ena be Abraham ese ena natuna Ismael, hesiai hahine Hagara ena amo ia vara merona, ia lalokau henia, to Iehova ese ia hamaoroa, ia gwau: “Lauegu gwauhamata oiemu natuna Isako dekenai be do lau badinaia. Ia be Sara dekenai do ia vara.” (Gen. 17:18-21; 21:8-12) Gabeai unai gwauhamata ia gwauraia lou, Isako ena vara guna natuna Esau dekenai lasi, to Iakobo dekenai, bena Israel ena iduhu 12 be iena amo idia vara. (Gen. 28:10-14) Gabeai Dirava ese ia hahedinaraia Garana be Iuda besena lalonai do ia vara, David ena iduhu lalonai.—Gen. 49:10; 1 Sis. 17:3, 4, 11-14.
5 Lagani 700 gunanai, Bible ia gwau Garana be Betelehem dekenai do ia vara, ma ia hahedinaraia ia be “nega gunana amo,” Dirava ese guba dekenai ia havaraia negana amo, ia noho. (Mika 5:2) Iehova ese ia horoa Tauna, Mesia, hegeregerena tanobada dekenai do ia hedinarai negana be peroveta tauna Daniel ese ia gwauraia guna. (Dan. 9:24-26) Bona Dirava ese lauma helaga amo ia horoa neganai, guba amo ia boiboi, ia gwau “Inai be lauegu Natuna.” (Mat. 3:16, 17) Unai dainai, Filipo be Iesu ena hahediba tauna ta ai ia lao murinai, inai bamona ia hereva, ia daradara lasi, ia gwau: “Mose ena taravatu lalonai bona peroveta taudia edia buka lalonai idia herevalaia tauna ai davaria vadaeni. Ia be Iesu, Nasareta tauna, Iosepa ena [heubu] natuna.”—Ioane 1:45.
6 Unai murinai Iesu ena hahediba taudia idia lalo-parara peroveta herevadia momo herea Bible lalonai ese ia idia gwauraia. Mase amo ia toreisi lou murinai, ia ese sibona ena sivarai Buka Helaga ibounai lalonai ia gwauraia hedinarai idia dekenai. (Luka 24:27) Hari ia hedinarai Iesu be ‘hahine ena garana’ badana bona ia ese “gaigai” ena kwarana do ia haberoa, anina be, Satana do ia hamasea ore. Iesu ena amo Dirava ese ena gwauhamata iboudiai do ia hamomokania bona ita ura bada gaudia iboudiai do ia havaraia.—2 Kor. 1:20.
7 Inai peroveta herevadia haida oi duahia matamata neganai, reana Etiopia tauna hegeregerena oi henanadai, oi gwau, “Edena tauna be peroveta tauna ese ia herevalaia inai bamona?” Filipo ena hereva ia kamonai murinai, ia diba Iesu be unai peroveta herevana ia hamomokania dalana dekenai hari ia lalo-parara dainai namona be kara ta ia karaia, oibe, ia diba namona be ia bapatiso. (Kara 8:32-38; Isa. 53:3-9) Ita be unai bamona ita karaia a? Reana peroveta herevana ta ese iseda kudouna ia hamarerea, o reana unai hereva be gabeai ia momokani dalana Bible ese ia gwauraia hedinarai bena iseda kudouna ia hamarerea.
8 Inai paragraph murinai, Iesu idia perovetalaia herevadia bona ena kara idia laulaulaia karadia edia sivarai ai torea. Oiemu Bible oi gaukaralaia inai henanadai haerelaidia totona.
(1) Abraham ese Isako ia bouboulaia toho sivaraina ese ita edena bamona ia durua, Iehova ese ena Natuna amo iseda mauri davana ia karaia dalana ita laloa bada totona? (Ioane 3:16; Gen. 22:1-18 [mani oi laloa namonamo siri 2 ese Isako edena bamona ia gwauraia.])
Unai dainai iseda lalona be edena bamona idia goada? (Roma 8:32, 38, 39)
To ita be dahaka ita karaia be namo? (Ioane 3:36)
(2) Bible ia gwau peroveta tauna ta Mose bamona be Iesu; vadaeni, ita be edena bamona ita kara henia be namo, ita mase garina? (Kara 3:22, 23; Deut. 18:15-19)
Iesu ese dahaka gaudia ia gwauraia vadaeni ita dekenai, bona dahaka dainai idia be mai anina bada hari inai negai? (Mat. 28:18-20; 19:4-9; 18:3-6)
(3) Bible ese ia gwauraia hegeregerena, Aaron ena hahelaga gaukara ese Iesu ena kara namodia edena bamona ia laulaulaia? (Heb. 4:15–5:3; 7:26-28)
Unai dainai, Keriso ena amo Dirava ita guriguri henia, iseda manoka ita halusia totona ena heduru ita noia neganai, iseda lalona ena mamina be edena bamona be namo?
(4) Iesu ena boubou gauna ese Mose ena taravatu hegeregerena idia henia gaudia ia hanaia momokani; unai ita diba neganai, bema ita diba kara ta ese Dirava ia habadua, dahaka dainai ita naria namonamo, unai kara ita karaia loulou garina? (Heb. 10:26, 27)
Iesu ena boubou gauna dainai ita be mai eda helaro mauri do ita abia; bema unai ita laloa bada, dahaka karadia do ita karaia goadagoada? (Heb. 10:19-25)
EDENA BAMONA ITA HAHEDINARAIA IESU ITA ABIDADAMA HENIA?
9 Aposetolo Petro ese Iuda taudia edia kota badana Ierusalem dekenai ia hereva henia, ia hahedinaraia Iesu ese peroveta herevadia ia hamomokanidia; ena hereva dokonai ia hereva goadagoada, ia gwau: “Hahemauri be ia sibona ese ia henia diba. Badina be tanobada ibounai lalonai ladana idauna ta Dirava ese ia henia lasi, ita do ia hamauria totona.” (Kara 4:11, 12; Sal. 118:22) Adam ena bese taudia iboudiai be kara dika taudia; edia mase be edia kara dika ena davana, unai dainai edia mase amo ma ta ena mauri davana idia karaia diba lasi. To Iesu be goevadae, bona ena mauri ia atoa diho, boubou gauna bamona. (Sal. 49:6-9; Heb. 2:9) Ia ese Dirava ia henia gauna be Adam ese ia haboioa gauna danu ia hegeregere momokani. Vadaeni, unai ese ita edena bamona ia durua?—1 Tim. 2:5, 6.
10 Unai boubou gauna dainai iseda lalona idia goeva, badina be Dirava ese unai gau amo iseda dika ia gwauatao. Israel ese Mose ena Taravatu bamona animal idia bouboulaia neganai, unai kara amo unai hahenamo idia abia lasi. (Kara 13:38, 39; Heb. 9:13, 14) To, momokani, iseda lalona idia goeva totona, namona be sibona ita koia lasi bona Iesu Keriso ita abidadama henia momokani. Ita ta ta be Keriso ena boubou gauna ita laloa bada, badina be ita diba unai sibona ese ita ia hamauria, a? “Bema ita gwau ita kara dika lasi, ita sibona ita koia noho, bona hereva momokani be ita lalonai ia noho lasi. To bema iseda kara dika Dirava dekenai ita gwauraia hedinarai, ia ese ita do ia negea lasi. Lasi momokani. Ia be kara maoromaoro dainai, iena gwauhamata do ia badinaia, bona iseda dika do ia gwauatao.”—1 Ioane 1:8, 9.
11 To, momokani, taunimanima haida, ena be idia diba idia be kara dika taudia bona idia gwau Keriso idia abidadama henia, bona Dirava ena Basileia idia harorolaia Iesu ia karaia hegeregerena, to Iesu idia abidadama henia momokani lasi. Edena bamona? Vadaeni, Bible ese ia hahedinaraia hegeregerena, idau negai taudia be Keristen taudia momokanidia ai idia lao neganai, unai be edena bamona idia hahedinaraia? Bapatiso idia abia. Badina be dahaka? Badina be Iesu ena oda be iena hahediba taudia be bapatiso do idia abia. (Mat. 28:19, 20; Kara 8:12; 18:8) Ta ese Iehova ena lalokau karana, Iesu Keriso ena amo ia hamauria karana, ia laloa namonamo neganai, do ia naria lasi. Ena kara do ia hamaoromaoroa, sibona ena mauri do ia gwauhamatalaia Dirava dekenai, bona bapatiso be ranu lalonai do ia abia, ena gwauhamata ena toana bamona. Bible ese ia hahedinaraia hegeregerena, abidadama be inai dala amo ia hahedinaraia neganai, Dirava ia noia ena lalona do ia hagoevaia.—1 Pet. 3:21.
12 To unai murinai iseda kara dikadia be ma do idia hedinarai loulou. Bena dahaka? Aposetolo Ioane ia gwau: “Umui dekenai lau torea noho, be umui ese do umui kara dika lasi totona.” Unai dainai, bema iseda dika be iseda kara, hereva o lalohadai lalodiai ia hedinarai, namona be iseda lalona dekenai ita gwau lasi unai be gau ta lasi. “To tau ta bema ia kara dika, ita be mai iseda durua tauna, iseda Tamana vairanai. Ia be Iesu Keriso, kara maoromaoro tauna. Bona Keriso sibona be iseda kara dika gwauatao dalana. Bona iseda dika sibona lasi, to Keriso be taunimanima ibounai edia dika gwauatao dalana.” (1 Ioane 2:1, 2) Anina be, herevana dahaka ita karaia, bema Dirava ita guriguri henia, ita gwau, ‘Aiemai dika oi gwauatao,’ vadaeni do ia gwauatao sibona, a? Lasi. Ia gwauatao totona, gau badana be ita helalo-kerehai momokani. Reana elda taudia Keristen kongregesen lalonai edia heduru ita abia be namo. Namona be ita diba namonamo ita karaia karana be dika, bona unai kara dainai ita sori momokani, bona dala ita tahua momokani ita karaia lou lasi totona. (Kara 3:19; Iak. 5:13-16) Bema unai bamona ita karaia, Iesu be momokani ita do ia durua. Bema iena boubou gauna ena dika abia oho siahuna ita abidadama henia, unai dala tamona amo Iehova ese ita bona iseda tomadiho do ia abia dae lou.
13 Iesu ena boubou gauna ese mauri hanaihanai abia dalana ia kehoa ita eda—“seri maragi” ese guba dekenai do idia abia, bona taunimanima milion momo ese Paradaiso tanobadana dekenai do idia abia. (Luka 12:32; Apok. 20:11, 12; 21:3, 4) Sibona eda hekwarahi amo do ita abia diba lasi. Herevana iseda hekwarahi Iehova ena hesiai gaukara lalonai be ede badana, to do ia hegeregere lasi, Iehova ese mauri do ia henia ena davana bamona. Mauri hanaihanai be “Dirava ena harihari gauna davana lasi . . . Iesu Keriso iseda Lohiabada lalonai ita noho dainai.” (Roma 6:23; Ef. 2:8-10) To, bema unai harihari gauna ita abidadama henia bona ia henia dalana ita laloa bada, iseda kara amo unai do ita hahedinaraia. Bema ita lalo-parara Iehova be hoa dalanai Iesu be edena bamona ia hagaukaraia Iena ura hagugurua totona, bona bema ita diba Iesu ena kara ita tohotohoa namonamo be gau badana, vadaeni Keristen hesiai gaukara do ita tahua guna, iseda mauri lalonai. Iseda abidadama do ia hedinarai, inai Dirava ena harihari gauna hereadaena be ma haida dekenai ita herevalaia goadagoada neganai.—Kara 20:24 itaia.
14 Unai bamona abidadama ese ita ia hanamoa bona ia hatamonaia momokani! Ia dainai Iehova bona ena Natuna ita tura henidia bona Keristen kongregesen lalonai ita hetura heheni. (1 Ioane 3:23, 24) Ia dainai ita moale, badina be Iehova ese ladana ta ia henia ena Natuna dekenai, “inai ladana ese ladana ibounai ia hanaia. Bona Iesu ena ladana hanamoa totona ibounai do idia tui diho, guba taudia, tanobada taudia, bona tanobada henunai noho taudia danu. Bona taunimanima ibounai ese Iesu Keriso do idia gwauraia hedinarai ‘Lohiabada,’ badina be unai dekena amo Tamana Dirava ena ladana do idia abia isi momokani.”—Fil. 2:9-11.
INAI HEREVALAIA LOU
● Mesia ia hedinarai neganai, dahaka dainai Dirava ena Hereva idia abia dae momokani taudia idia diba goevagoeva ia be daika?
● Iesu ena kara idia laulaulaia gaudia, rau 34 dekenai idia hedinarai, be edena bamona ita lalodia be namo?
● Edena dala amo Iesu ena boubou gauna ese ita ia durua vadaeni? Edena bamona ita hahedinaraia diba ita be unai ita laloa bada?
[Study Questions]
1. Iesu be tanobada dekenai ia do vara lasi neganai, ia be Iehova danu edena bamona idia noho hebou?
2. Bible ena peroveta herevadia hida ese Iesu idia gwauraia?
3. (a) Genese 3:14, 15 ena peroveta herevana lalonai, “gaigai” anina be daika? “Hahine” anina be daika? ‘Gaigai ena garana’ anina be daidia? (b) Dahaka dainai ‘gaigai ena kwarana haberoa’ karana be mai anina bada Iehova ena hesiai taudia dekenai?
4. Iesu ena tubudia be daika daika, unai amo ia hedinarai gwauhamata garana be ia?
5. Iesu ese ena haroro gaukara ia hamatamaia neganai, dahaka danu ese ia hamomokania ia be Mesia?
6. (a) Iesu ena mase murinai, iena hahediba taudia be dahaka dekenai idia lalo-parara? (b) ‘Hahine ena garana’ badana be daika, bona ia ese gaigai ena kwarana ia haberoa anina be dahaka?
7. Inai peroveta herevadia ese idia gwauraia tauna sibona lasi, to dahaka danu ita laloa namonamo be namo?
8. Iesu Keriso idia haheitalaia peroveta gaudia 4 be iniseniai ai torea. Bible ena siri amo henanadai oi haerelaidia, unai amo oi hahedinaraia inai peroveta herevadia ta ta edia anina be dahaka ita dekenai.
9. Dahaka dainai Dirava ese ita ia hamauria dalana tamona be Iesu Keriso ena amo?
10. Iesu ena boubou gauna ese ita ia durua bada dalana mani oi gwauraia.
11. Dahaka dainai ta be ranu lalonai bapatiso ia abia be gau badana, Dirava vairanai ena lalona ia goeva totona?
12. Bema ita diba ita be kara dikana ta ita karaia vadaeni, dahaka ita karaia be namo, bona badina be dahaka?
13. (a) Iesu ena boubou gauna ese edena dala ta ma amo ita ia durua? (b) Dahaka dainai inai heduru be Dirava ena hesiai gaukara ita karaia ena davana bamona lasi? (c) Bema ita be momokani mai eda abidadama, dahaka ita karaia noho?
14. Iesu Keriso be unai bamona ita abidadama henia dainai, ita be daika danu ita lalo-tamona?
[Box/Pictures on page 34]
IESU ENA KARA IDIA LAULAULAIA GAUDIA—Edena Bamona Oi Lalodia be Namo?
Abraham ese Isako ia bouboulaia
Mose ese Dirava ena hereva ia gwauraia hedinarai
Aaron be hahelaga tauna badana
Animal idia bouboulaidia