Karoa 9

Toreisi Lou Helarona ena Siahu

BEMA toreisi lou be lasi, mase taudia do idia mauri lou dalana be lasi. To Iehova be ena harihari bada amo dala ia kehoa, idia mase vadaeni taudia milion milion momo be mauri hanaihanai do idia abia totona. Unai dainai iseda helaro be iseda lalokau taudia, mase dekenai idia mahuta vadaeni taudia, danu do ita hedavari lou.—⁠Mar. 5⁠:35, 41, 42; Kara 9⁠:36-41.

² Satana ese taunimanima ia samanidia, ia gwau, “Tau ta ese ena orea bona ena kohu iboudiai do ia henia ena mauri ia dogoatao totona.” (Iobu 2⁠:4) Unai samani herevana ia hamomokania totona Iehova ena hesiai taudia mai edia kamonai ia hamasedia gwauraia neganai, Iehova ese ia koua lasi, badina be ia diba toreisi lou amo do idia mauri lou. Iesu be mase amo ia toreisi lou dainai, ena boubou gauna, ena mauri davana, be ena Tamana ena guba terona vairanai ia henia, ita ia hamauria totona. Keriso danu edia ahuna do idia abia taudia do idia toreisi lou, bena ia danu do idia noho hebou, guba Basileiana lalonai. Bona ita abidadama taudia iboudiai be toreisi lou helarona ese ita ia hagoadaia momokani, hahetoho lalonai ita mase gwauraia neganai.

KERISTEN ABIDADAMA ENA BADINA TA

³ Heberu 6⁠:1, 2 ia gwau toreisi lou herevana be “hadibaia hereva, diba hamatamaia gaudia” ta. Ia be abidadama ena badina ta; bema unai abidadama ita abia lasi, Keristen taudia goadadia ai ita lao diba lasi. To tanobada taudia edia lalohadai be idau. Idia momo be lauma gaudia idia laloa lasi dainai moale karadia idia tahua momo. Idia laloa inai mauri sibona be mauri korikori. (1 Kor. 15⁠:32) Edia sene taudia edia tomadiho dalana idia badinaia taudia, Kerisendom lalonai bona murimurinai, idia laloa idia be mai edia lauma tauanina, mase diba lasi gaudia; unai dainai toreisi lou herevana be anina lasi idia dekenai. Unai hadibaia herevadia ruaosi ia hahegeregeredia toho tauna be helaro namona do ia davaria lasi, to do ia daradara sibona. To kamonai taudia be edena bamona ita durudia diba?—⁠Kara 17⁠:32.

⁴ Toreisi lou ena anina bada idia diba totona, namona be idia diba guna mauri ena anina be dahaka bona mase taudia edia oromana be edena bamona. Nega momo, Bible ena siri rua o toi sibodia amo inai gaudia be idia dekenai ita hadibaia diba.—⁠Gen. 2⁠:7; Sal. 146⁠:3, 4.

⁵ Ita hadibadia neganai, namona be Bible ena siri idauidau ita hahegeregerea, inai ita hamomokania totona: Dirava ese taunimanima ia havaraia neganai, lauma tauanina be ia lalonai ia atoa vareai lasi, to mauri ena laga iena udu baubau matudia lalodiai ia hiriria vareai, bena ia be mauri tauna ai ia lao bona mauri siahuna be ia lalonai ia gaukara matamaia. (Gen. 2⁠:7) Inai mauri siahuna Heberu gado ai idia gwauraia ruah [ruʹahh] bona Greek gado ai be niuma [pneuma], bona unai hereva ruaosi edia anina Motu gado ai idia hahegeregerea neganai “lauma” idia torea. Taunimanima momo edia lalohadai inai gau dekenai be kerere; idia laloa idia be mai edia lauma tauanina idia lalodiai bona idia mase neganai edia lauma tauanina ese edia mase tauanina idia rakatanidia. To Bible ese ia gwauraia gauna be idau, ia hahedinaraia inai mauri siahuna be mauri gaudia iboudiai lalodiai ia noho. Taunimanima idia mase bona tano dekenai idia giroa lou murinai, Dirava sibona ese ia henia lou diba. (Iobu 34⁠:14, 15; Koh. 3⁠:19, 20; 12⁠:7) Hereva ma rua Bible lalonai be nega momo Motu gado ai idia hahanaia kerere dainai, taunimanima be lalohadai kererena idia abia. Gaudia be Heberu hereva nifes [neʹphesh] bona Greek hereva saiki [psy·kheʹ]. Idia ruaosi edia anina toi be inai: (1) Taunimanima, (2) animal, (3) mauri, taunimanima ena eiava animal ena. Motu Buka Helaga lalonai “saiki” ena anina idia hahegeregerea kerere gabuna ta be 1 Korinto 15⁠:45; unai siri ia gwau Dirava ese Adam na “lauma maurina” ai ia halaoa, to unai be Genese 2⁠:7 ena anina hegeregerena lasi, badina be Genese 2⁠:7 ia gwau Dirava ese taunimanima na “mauri tauna” ai ia halaoa. Taravatu Matamatana, Hiri Motu gado ai idia torea bukana, lalonai, 1 Korinto 15⁠:45 ia gwau Adam be “taunimanima edia mauri” ia abia, “lauma” ia gwauraia lasi. Inai hereva ruaosi, “saiki” bona “nifes,” edia anina Mataio 10⁠:28 bona Esekiel 18⁠:4 dekenai hahegeregerea maoromaoro dalana be “mauri” idia torea; “lauma” idia torea be kerere.

⁶ Danu, Bible idia duahia taudia haida idia daradara, badina be hahanaia taudia ese Heberu hereva siol [sh^eōlʹ] bona Greek hereva rua, heidis [haʹdes] bona gehena [geʹen·na], edia anina be Motu gado ai idia hahanaia kerere; “heidis” bona “gehena” be anina tamona idia gwauraia “hel.” To siri idauidau ita hahegeregerea neganai, ita davaria “siol” bona “heidis” edia anina be tamona, taunimanima iboudiai edia mase guri unai, kara namo taudia bona kara dika taudia danu be unai gabu tamona dekenai idia lao. Bible ia hahedinaraia mauri be lasi unuseniai to mase taudia be unai gabu amo idia toreisi lou diba. (Sal. 16⁠:10; Kara 2⁠:27; Iobu 14⁠:13; Apok. 20⁠:13) Ma ia hahedinaraia Gehena be idau, unai gabu dekenai idia lao taudia do idia mauri lou lasi.—⁠Mat. 18⁠:9; 10⁠:28.

⁷ Tau ta be unai gaudia dekenai ia lalo-parara vadaeni neganai, Keriso ena mase bona toreisi lou edia anina korikori ia davaria diba. Ita durua diba, toreisi lou ena anina ia dekenai ia laloa totona, bena Iehova ena lalokau do ia laloa matamaia, toreisi lou dalana ia kehoa dainai. Edia lalokau taudia idia mase dainai idia lalohisihisi taudia edia lalohisihisi ia ore bena Dirava ena Nega Matamatana idia naria mai edia moale danu, unai nega lalonai edia lalokau taudia danu do idia hedavari lou mai edia moale bada danu. Keristen taudia ginigunadia idia diba Iesu Keriso ena toreisi lou be Keristen abidadama ena badina badana. Mai edia goada danu iena toreisi lou bona unai amo ia vara helarona idia harorolaia. Unai hegeregerena, hari inai negai toreisi lou idia laloa bada taudia idia ura inai hereva momokanina mai anina bada be ma haida dekenai idia hadibaia.—⁠Kara 5⁠:30-32; 10⁠:40-43; 13⁠:32-39; 17⁠:31.

‘MASE TAUDIA EDIA GABU ENA KI’ IA GAUKARALAIA

⁸ Idia be Keriso danu ena guba Basileiana lalonai do idia noho taudia iboudiai do idia mase guna. To iena hereva aposetolo Ioane dekenai ia gwauraia be idia laloatao; ia gwau: “Guna be lau mase vadaeni, to harihari lau mauri noho, ma do lau noho ela bona hanaihanai. Mase ena ki, bona mase taudia edia gabu ena ki be lauegu imana dekenai ia noho.” (Apok. 1⁠:18) Ena hereva ena anina be dahaka? Sibona ena sivarai ia gwauraia unai. Guna ia mase. To Dirava ese Heidis dekenai ia rakatania lasi. Dina ihatoina ai Iehova ese ia hatoreaisi lauma maurina ia abia totona, bona doko diba lasi maurina ia henia. Unai sibona lasi, to Dirava ese “mase ena ki, bona mase taudia edia gabu ena ki” ia henia, ma haida be mase guridia amo bona Adam dainai idia abia kara dikana amo ia ruhadia totona. Iesu ese unai ki ia abia dainai iena kamonai hahediba taudia be mase amo ia hatoredia isi diba. Unai bamona ia karaia neganai, doko diba lasi maurina guba dekenai be ena ekalesia taudia, Dirava ese ena lauma amo ia horodia taudia, dekenai ia henia, iena Tamana ese ia dekenai ia henia hegeregerena.—⁠Roma 6⁠:5; Fil. 3⁠:20, 21.

⁹ Keristen taudia mai edia kamonai, Dirava ese ia horodia taudia, be edena negai unai toreisi lou idia abia? Ia matamaia vadaeni. Aposetolo Paulo ia gwau do idia toreisi lou, ‘Keriso ia giroa mai neganai,’ bona ia be lagani 1914 C.E. ai ia giroa mai vadaeni. (1 Kor. 15⁠:23) Hari inai nega lalonai, inai taudia ese edia mauri tanobada dekenai idia haorea neganai, mase dekenai idia naria lasi ela bona edia Lohiabada ia lou mai. Idia mase neganai, maoromaoro lauma ai idia toreisi lou; “karaharaga momokani,” “matana hakapua haraga ena nega bamona” Dirava ese ia senisidia bena idia idau. Idia moale bada, badina be “edia kara namodia ena sivarai be idia danu nega tamona ia lao noho.”—⁠1 Kor. 15⁠:51, 52; Apok. 14⁠:13.

¹⁰ To edia toreisi lou be “toreisi lou ginigunana” idia gwauraia; unai ese ia hahedinaraia toreisi lou ma ta be ia murinai do ia vara. (Apok. 20⁠:6) Inai toreisi lou gabena amo do idia mauri lou taudia be mauri hanaihanai Paradaiso tanobadana dekenai do idia abia diba. Apokalupo bukana ese ia hahedinaraia do idia toreisi lou, inai nega dikana ena “guba bona tanobada” idia kokia murinai. Inai nega gunana ena dokona be kahirakahira momokani. Unai murinai, Dirava ena nega korikori ai, tanobada dekenai do idia toreisi lou matamaia.—⁠Apok. 20⁠:11, 12.

¹¹ Daidia do idia toreisi lou? Iehova ena hesiai taudia mai edia kamonai, idau negai idia noho taudia, ese. Idia haida, toreisi lou gwauhamatana idia abia dae momokani dainai, ena be idia be “mai edia mauri dalana bema dala maorona idia negea, to Dirava idia badinaia noho dainai mase idia davaria.” (Heb. 11⁠:35) Idia ta ta danu do ita hedavari bona idia ese sibodia edia sivarai ibounai idia kikilaia neganai, do ita moale bada herea! Idia haida be inai: Abel, Iehova ena witness tauna mai ena kamonai ginigunana. Enok bona Noa, Dirava ena badu herevana idia harorolaia bona idia gari lasi, Abata Badana ia do ginidae lasi neganai. Abraham, aneru ia abidia dae tauna. Mose, ia ena amo Dirava ese Taravatu ia henia Sinai Ororona dekenai. Peroveta taudia mai goadadia, idia ta, Ieremia, ia noho, Ierusalem be lagani 607 B.C.E. lalonai idia hadikaia ore neganai. Bona Ioane Bapatiso, Dirava ena gadona ia kamonai, Iesu be Iena Natuna ia gwauraia neganai. Dirava idia badinaia taudia, inai nega ena dokona lalonai idia mase taudia, danu do idia toreisi lou.—⁠Heb. 11⁠:4-38; Mat. 11⁠:11.

¹² Gabeai ma haida danu do idia toreisi lou. Aposetolo Ioane ese matahanai lalonai ia itaia gauna ta ese ia hahedinaraia, Iesu ese ‘mase taudia edia gabu ena ki’ ia gaukaralaia neganai, Heidis dekenai idia noho taudia iboudiai do ia hatoredia isi lou. Ioane ese Kota Biaguna ia itaia, mase taudia edia gabu “lahi gohuna lalonai ia negea diho.” Anina be dahaka? Anina be ia haorea; unai gabu ia ore vaitani badina be ia lalonai idia noho taudia iboudiai be Iesu ese do ia hatoredia isi lou. Iehova idia tomadiho henia taudia mai edia kamonai sibodia lasi, to kara maoromaoro lasi taudia danu be ia ese mase taudia edia gabu dekena amo do ia mailaidia lou mai ena hebogahisi danu. Do ia hatoredia isi lou, ia kota henidia bona edia mase lou herevana ia gwauraia totona sibona lasi. Dirava ena Basileia henunai, kara maoromaoro taudia bogaragidiai do idia noho, bona idia ese do idia durudia, Iehova ena dala dekenai idia raka totona. Unai matahanai ia hahedinaraia Dirava ese “mauri buka” ia kehoa, bena bema idia hegeregere, edia ladana be ia dekenai do ia torea. Dirava ese idia ta ta ena kara ena kara hegeregeredia do ia kota henidia, idia toreisi lou murinai idia karaia karadia unai. (Apok. 20⁠:12-14; Kara 24⁠:15) Unai hegeregerena, bema dokonai mauri idia abia, edia toreisi lou be “kota toreisi lou” lasi, to ia be “mauri toreisi lou.”—⁠Ioane 5⁠:28, 29, NW.

¹³ To, momokani, mase taudia haida do idia toreisi lou lasi. Idia haida edia kara dika be Dirava ese ia gwauatao diba lasi. “Hisihisi badana” lalonai do ia alaia mase taudia do idia mase ela bona hanaihanai. (Mat. 12⁠:31, 32; 23⁠:33; 24⁠:21, 22; 25⁠:41, 46; 2 Tes. 1⁠:6-9) Unai dainai, ena be Iesu ese hebogahisi bada ia hahedinaraia, Heidis dekenai idia noho taudia iboudiai ia ruhadia neganai, to ita gwau lasi herevana dahaka ita karaia hari inai nega lalonai to do ita toreisi lou diba. To idau, namona be iseda kara amo ita hahedinaraia inai Dirava ena hariharibada gauna ita laloa bada.

TOREISI LOU HELARONA ESE ITA IA HAGOADAIA

¹⁴ Toreisi lou helarona ese idia abia dae momokani taudia edia lalona ia hagoadaia momokani. Idia mase gwauraia neganai, idia diba herevana dahaka heduru be doketa taudia edia amo idia abia, to do idia mase. (Koh. 8⁠:8) Bema idia be Lohiabada ena gaukara idia goadalaia hanaihanai vadaeni bona bema iena orea danu idia gaukara vadaeni mai edia kamonai, vaira negana idia laloa diba mai edia lalo-goada danu. Idia diba Dirava ena nega korikori ai toreisi lou amo do idia mauri lou. Mauri namo hereana do idia abia! Aposetolo Paulo ese ia gwauraia “mauri korikori.”—⁠1 Tim. 6⁠:19, NW; 1 Kor. 15⁠:58; Heb. 6⁠:10-12.

¹⁵ Iseda lalona idia goada diba, toreisi lou sivaraina ita diba dainai sibona lasi, to badina be toreisi lou dalana ia kehoa Diravana ita diba dainai. Unai dainai, ena be dagedage taudia ese ita idia hamasea gwauraia, to Dirava ita badinaia noho diba. Taunimanima idia gari, nega korikori do ia ginidae lasi neganai do idia mase guna garina, bona Satana ese nega daudau lalonai unai gari amo ia guidia. To Iesu ese unai garina ia gari lasi; Iehova ia badinaia noho ela bona mase. Ena mase amo ia ese ma haida unai gari amo ia ruhadia nege. (Heb. 2⁠:14, 15) Ia murinai idia raka momokani taudia be unai idia abidadama henia dainai, kara maoromaoro idia badinaia bona edia sivarai be bada. Hahetoho lalonai idia hahedinaraia Iehova idia lalokau henia bada, sibodia edia mauri idia lalokau henia maragi. (Apok. 12⁠:11) Idia aonega dainai, Keristen kara maoromaoro idia negea lasi edia tanobada maurina idia dogoatao totona, badina be idia diba unai dala amo mauri hanaihanai do idia haboioa. (Luka 9⁠:24, 25) Oi be mai emu abidadama unai bamona a? Bema Iehova oi lalokau henia momokani, bona bema toreisi lou helarona ena anina oi laloa namonamo, vadaeni unai bamona abidadama do oi abia.

INAI HEREVALAIA LOU

● Dahaka dainai namona be ta ia diba guna mase taudia be edena bamona, bena gabeai toreisi lou ena anina do ia diba goevagoeva?

● Daidia be mase amo do idia toreisi lou? Unai ita diba anina be dahaka ita dekenai?

● Toreisi lou helarona ese ita edena bamona ia hagoadaia?

[Study Questions]

1. Toreisi lou ese dahaka dala namo hereana ia kehoa?

2. (a) Dahaka dainai toreisi lou be gau badana, Iehova ese iena palani ia hagugurua noho lalonai? (b) Edena negadiai toreisi lou helarona ese iseda lalona ia hagoadaia momokani?

3. (a) Dahaka dainai toreisi lou herevana ia gwauraia “hadibaia hereva, diba hamatamaia gaudia” ta? (b) Tanobada taudia be dahaka idia laloa toreisi lou dekenai?

4. (a) Tau ta be toreisi lou ena anina bada ia diba totona, dahaka be ia dekenai ita hadibaia guna be namo? (b) Edena siri amo do oi hahedinaraia mase taudia be gau ta idia diba lasi?

5. Ta be edena bamona do oi hadibaia taunimanima lalodiai lauma tauanina be lasi?

6. (a) Dahaka dainai Bible matamatadia haida idia duahia taudia be Siol [Sheol], Heidis [Hades] bona Gehena edia anina dekenai idia daradara? (b) Bible be edena bamona oi gaukaralaia, Siol o Heidis dekenai idia noho taudia edia noho gwauraia hedinarai totona? (c) Gehena dekenai idia noho taudia edia noho be edena bamona oi gwauraia hedinarai?

7. Ta be toreisi lou ena anina ia diba maoromaoro neganai, unai ese ena lalohadai bona ena kara edena bamona ia haidaua diba?

8. Iesu ese “mase ena ki, bona mase taudia edia gabu ena ki” ia gaukaralaia neganai, anina be dahaka, Dirava ese ena lauma amo ia horodia taudia dekenai?

9. Keristen taudia mai edia kamonai, Dirava ese ia horodia taudia unai, be edena negai idia toreisi lou?

10. Edena toreisi lou ma ta do ia vara, bona edena negai do ia vara?

11. Edena kamonai taudia do idia toreisi lou tanobada dekenai idia mauri totona, bona dahaka dainai unai toreisi lou negana ita naria mai eda moale bada danu?

12. (a) Heidis dekenai idia noho mase taudia hida do idia toreisi lou? (b) Anina be daidia danu do idia toreisi lou, bona badina be dahaka?

13. (a) Daidia do idia toreisi lou lasi? (b) Toreisi lou ena anina ita diba maoromaoro dainai edena bamona ita karaia be namo?

14. Ta ia mase gwauraia neganai, toreisi lou helarona ese edena bamona ia hagoadaia momokani diba?

15. Bema dagedage taudia ese ita idia hamasea gwauraia, dahaka ese ita ia durua diba Iehova ita badinaia noho totona?