Karoa 15
Dirava ena Gavamani Henunai Oi Noho Totona
OI URA tanobada dekenai do oi noho hanaihanai Dirava ena gavamani henunai, ani? Badina be unai gavamani henunai hahenamo momo do oi abia diba. Bema oi abia totona emu imana oi abia isi, bema oi gwau: ‘Lau ura Dirava ena basileia henunai lau noho,’ unai sibona be hegeregere lasi. Ma kara haida oi karaia be namo.
2 Hegeregere, bema oi ura idau tano ta dekenai oi noho unai tano tauna korikorina ta bamona, namona be unai tano ena gavamani ena lohia taudia edia ura karadia oi karaia. To unai bamona oi karaia totona, namona be edia ura oi diba guna. Unai hegeregerena, namona be Dirava ena ura iena gavamani henunai idia noho gwauraia taudia dekenai oi diba bena oi badinaia.
DIBA OI ABIA BE NAMO
3 Dirava ena gavamani henunai oi noho totona, gau badana be ena “gado” oi diba. Taunimanima edia gavamani haida danu be taravatu idia atoa, edia tano taudia edia gado idia veria diba taudia sibodia be tano taudia edia dagi idia abia diba. Vadaeni, dahaka “gado” oi diba be namo, Dirava ena gavamani henunai mauri oi abia totona?
4 Iehova ia gwau: “Unai neganai lau ese bese idauidau edia gado do lau haidaua bona gado goevadaena do lau henidia, Iehova ena ladana dekenai idia boiboi totona, bona iena hesiai gaukara be mai lalo-tamona danu idia karaia hebou totona.” (Sefania 3:9) Inai “gado goevadaena” be Dirava ena hereva momokani, Bible lalonai ia noho. Ia lalonai Dirava ena Basileia gavamani sivaraina be gau badana. Unai dainai, bema oi ura Dirava ena gavamani henunai oi noho, namona be Iehova bona ena Basileia dekenai diba oi tahua, inai “gado” oi diba totona.—Kolose 1:9, 10; Hereva Lada-isidia 2:1-5.
5 Gavamani haida idia ura edia tano taudia edia dagi idia abia taudia be edia gavamani ena sivarai bona ena gaukara dalana idia diba. Unai hegeregerena, bema oi ura Dirava ena gavamani henunai oi noho, namona be unai bamona diba oi abia ia dekenai. Unai diba ese oi ia hakaua diba mauri hanaihanai dekenai. Iesu ese ena Tamana ia guriguri henia, ia gwau: “Mauri hanaihanai be inai, idia ese oi Dirava momokani tamona do idia diba, bona Iesu Keriso danu, oi ese oi siaia tauna.”—Ioane 17:3, HM.
6 Bema inai buka amo unai diba momo oi abia vadaeni, inai henanadai oi haerelaia diba be namo: Edena negai Dirava ia hahedinaraia matamaia Basileia gavamani do ia haginia? Dirava ena hesiai taudia haida, edia ura be unai gavamani henunai do idia noho, taudia be daika daika? Pavapava hida be Dirava ena gavamani lalonai do idia lohia? Edeseni amo do idia lohia? Dirava ese daidia ia abiahidi guna, ena gavamani lalonai pavapava ai idia lao totona? Edena dala amo Iesu ia hamomokania pavapava namona ai do ia lao? To Dirava ena gavamani henunai oi noho totona, unai diba oi abia sibona be hegeregere lasi.
KARA MAOROMAORO OI KARAIA BE NAMO
7 Tanobada gavamani haida idia ura edia tano taudia edia dagi idia abia taudia ese edia taravatu idia badinaia. Reana edia taravatu ta be tau ta ese adavana tamona sibona ia adavaia. To ma gavamani haida be unai bamona taravatu idia atoa lasi. Vadaeni, idia ura Dirava ena gavamani henunai idia noho taudia be edena bamona idia karaia be namo? Headava dekenai Dirava ena taravatu be dahaka?
8 Iehova ese hahine tamona sibona ia henia Adam dekenai, unai amo headava taravatu maorona ia hahedinaraia. Dirava ia gwau: “Tau ese tamana sinana do ia rakatania, ena adavana dekenai do ia noho, ruaosi be tau-anina tamona do idia lao.” (Genese 2:21-24, HM) Iesu ia gwau Keristen taudia ese unai taravatu idia badinaia be maoro. (Mataio 19:4-6) Tau ta be ena adavana danu “tau-anina tamona” ai idia lao, unai dainai bema idia heudahanai, edia headava idia hadikaia unai. Dirava ia gwau heudahanai taudia do ia panisia.—Heberu 13:4; Malaki 3:5.
9 To tatau bona hahine momo edia kerere be idau; ena be idia headava momokani lasi to idia noho hebou bona idia mahuta hebou. Unai bamona taudia ese headava dalana ia karaia Diravana idia kara dika henia, badina be ia ura lasi unai sihari kava karana idia karaia. Idia adavaia lasi taudia danu idia mahuta hebou taudia iboudiai ese mata-bodaga karadia idia karaia. Bible ia gwau: “Dirava ena ura be inai, . . . mata-bodaga karadia umui karaia lasi.” (1 Tesalonika 4:3-5) Unai dainai, headava lasi tauna be headava karana ia karaia be kerere.
10 Hari inai nega lalonai tatau momo ese tatau bona memero idia sihari henidia bona hahine momo ese hahine bona kekeni idia sihari henidia. To Bible ia gwau edia kara be kerere, badina be unai bamona taudia ese edia “hegahusi bodagadia” idia badinaia. (Roma 1:26, 27) Danu, Dirava ena taravatu be taunimanima ta ese animal ta do ia sihari henia lasi. (Levitiko 18:23) Idia ura Dirava ena gavamani henunai do idia noho taudia iboudiai be unai mata-bodaga karadia amo idia siri be namo.
11 Uaina o bia o muramura aukadia idaudia be ena sikeli hegeregerena ia inua tauna ese Dirava ena taravatu ia utua lasi. Bible ia gwau uaina sisina ese gorere ia hanamoa diba. (Salamo 104:15; 1 Timoteo 5:23) To idia inuinu kekero taudia bona pati dikadia dekenai lebulebu karadia idia karaia taudia ese Dirava ena taravatu idia utua. (Efeso 5:18; 1 Petro 4:3, 4) Hari inai nega lalonai taunimanima momo ese muramura idauidau idia ania, idia kekero totona. Danu, momo ese marihuana o kuku o buatau idia ania, moale idia davaria totona. To unai gaudia ese idia hagoreredia bona edia tau-anina idia hamirodia. Unai dainai, bema oi ura Dirava ena gavamani henunai oi noho, namona be unai hadikaia gaudia amo oi siri.—2 Korinto 7:1.
12 Tanobada gavamani ese taravatu utua taudia na edia tano lalodiai idia abiadae lasi. Bona Iehova ena taravatu ese edia taravatu ia hanaia. Ia ura ‘gau iboudiai dekenai kara maoromaoro ita badinaia.’ (Heberu 13:18) Dirava ena taravatu idia badinaia lasi taudia be ena basileia henunai do idia noho diba lasi. Taunimanima momo idia koikoi, idia gwau idia be kara maoromaoro taudia, to taravatu momo idia utua. To Dirava ese gau iboudiai ia itaia diba. Ta ese ia koia diba lasi. (Heberu 4:13; Hereva Lada-isidia 15:3; Galatia 6:7, 8) Unai dainai, Iehova ese iena taravatu idia utua taudia, hegeregere koikoi taudia bona henao taudia, do ia koudia, ena gavamani henunai do idia noho diba lasi. (Efeso 4:25, 28; Apokalupo 21:8) To Dirava be mai ena haheauka, bona dika ia gwauatao. Unai dainai, bema kara dika tauna be ena kara dikadia ia hadokoa bona kara namo ia karaia, Dirava ese do ia abiadae.—Isaia 55:7.
13 Taunimanima edia gavamani idia do noho lalonai Dirava ia ura ena hesiai taudia ese unai “lohia” idia kamonai henidia. Ena be takisi bada idia gwauraia bona ta ia laloa unai moni idia gaukaralaia kerere, to ia henia be namo. Danu, namona be gavamani ena taravatu ita badinaia. (Roma 13:1, 7; Tito 3:1) Gau tamona, bema ena taravatu ta ese Dirava ena taravatu ia utua, unai taravatu ita badinaia lasi be namo. Unai bamona ia vara neganai, namona be Petro bona ma aposetolo taudia haida edia kara ita tohotohoa, idia gwau: “Dirava ai kamonai henia be namo, taunimanima ai kamonai henia be dika.”—Kara 5:29, HM.
14 Dirava ese mauri ia laloa bada. Idia ura iena gavamani henunai idia noho taudia be unai idia diba be namo. Taunimanima ia alaia tauna ese Dirava ena taravatu ia utua. To lalo-dika ese ala-ala ia havaraia diba, unai dainai bema tau ta ese ma ta ia lalo-dika henia noho bona ia ura ia mase, ia be Dirava ena gavamani henunai ia noho diba lasi. (1 Ioane 3:15) Unai dainai, gau badana be Isaia 2:4 ena hereva hegeregerena ita tuari lasi. Bible ese ia hahedinaraia ena be natuna ta be ena sinana ena bogana lalonai ia do noho to Iehova ese ena mauri ia laloa bada. (Esodo 21:22, 23; Salamo 127:3) To tanobada ibounai lalonai lagani ta ta iboudiai unai bamona natudia million momo idia hamasedia. Dirava ena taravatu idia utua unai, badina be unai natudia be mauri taudia bona idia hamasedia be kerere.
15 Namona be Dirava ena gavamani henunai idia noho gwauraia taudia ese danu taunimanima idia kara namo henidia bona idia durudia. Namona be King Iesu Keriso ena hahegani idia badinaia: “Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.” (Mataio 7:12, HM) Iesu ese lalokau dalana ia hahedinaraia. Sibona ena mauri ia henia taunimanima dainai bona ena hahediba taudia ia haganidia, ia gwau: “Lau ese umui dekenai lau lalokau henia hegeregerena, umui danu ta ta dekenai umui lalokau henia.” (Ioane 13:34, HM; 1 Ioane 3:16) Unai bamona lalokau bona hebogahisi dainai taunimanima ese moale korikori do idia davaria, Dirava ena basileia henunai.—Iakobo 2:8.
16 Bible ese ia hahedinaraia taunimanima ese edia kara idia haidaua be namo, bena do idia hegeregere Dirava ena gavamani henunai do idia noho. (Efeso 4:20-24) Oi hekwarahi noho emu kara oi haidaua totona a? Oi emu hekwarahi be mai ena davana namona, badina be unai amo nega kwadogi lalonai do oi noho lasi taunimanima edia gavamani ta henunai, to mauri hanaihanai do oi abia Dirava ena gavamani henunai! Unai neganai tanobada ena paradaiso lalonai do oi noho bona do oi gorere lasi.
17 Hari inai negai danu, bema Dirava ena taravatu oi badinaia, moale oi davaria diba. To reana emu kara haida oi haidaua be namo. Taunimanima momo, guna idia be badu taudia o mataganigani taudia, to edia kara idia haidaua vadaeni. Danu, sihari kava taudia, heudahanai taudia, kara bodaga taudia, inuinu kekero taudia, ala-ala taudia, henao taudia, muramura dikadia ania taudia bona kuku ania taudia ese edia kara idia haidaua vadaeni. Idia hekwarahi bada dainai bona Dirava ese ia durudia dainai, idia kwalimu. (1 Korinto 6:9-11; Kolose 3:5-9) Ena be Dirava ena taravatu badinaia totona emu kara oi haidaua be auka herea, to oi hesiku lasi. Oi kwalimu diba!
DIRAVA ENA GAVAMANI OI BADINAIA
18 Iehova Dirava ia ura iena Basileia gavamani henunai idia noho taudia ese unai gavamani idia badinaia bona idia durua. Unai be hoa gauna lasi, badina taunimanima edia gavamani danu edia ura be unai bamona. To Dirava ia ura iena gavamani henunai idia noho taudia be edena bamona idia badinaia bona idia durua? Tuari gaudia idia abia bona unai gavamani durua totona idia tuari be namo a? Lasi. To namona be Iesu Keriso bona ena hahediba taudia ginigunadia bamona Dirava ena basileia idia harorolaia. (Mataio 4:17; 10:5-7; 24:14) Iehova ia ura taunimanima iboudiai idia diba iena basileia be dahaka bona edena bamona do ia durudia. Bible lalonai oi davaria gaudia be emu varavara bona emu turadia bona ma haida dekenai oi hadibaia vadaeni, a? Dirava ia ura unai bamona oi karaia.—Roma 10:10; 1 Petro 3:15.
19 Keriso bona ia murinai idia raka taudia ginigunadia ese Basileia idia harorolaia neganai, idia boga-auka be namo, badina be taunimanima momo ese idia badu henidia. (Kara 5:41, 42) Hari inai nega danu be unai bamona. Diabolo ese tanobada ia lohiaia dainai, tanobada taudia idia ura lasi Basileia ena sivarai namona ita harorolaia. To oi be edena bamona? Dirava ena basileia do oi badinaia a? Ia ura Basileia ita harorolaia bada, dokona do ia ginidae lasi neganai. Do oi harorolaia a?
[Study Questions]
1, 2. Bema ta ia ura Dirava ena gavamani henunai ia noho, dahaka ia karaia be namo?
3. Dirava ena gavamani henunai oi noho totona oi karaia karana ta be dahaka?
4. Dirava ena taunimanima ese dahaka “gado goevadaena” idia diba be namo?
5. (a) Dahaka ita diba Dirava ena gavamani dekenai be namo? (b) Dahaka diba ita abia be namo, mauri hanaihanai ita abia totona?
6. (a) Dirava ena gavamani henunai idia noho taudia be dahaka henanadai idia haerelaia diba be namo? (b) Oi haerelaia diba a?
7. Taunimanima edia gavamani idauidau edia taravatu be edena bamona idia idauidau?
8. (a) Dirava ena taravatu headava dekenai be dahaka? (b) Heudahanai be dahaka, bona Dirava ese edena bamona ia gwauraia?
9. Dirava be dahaka ia laloa sihari kava taudia dekenai?
10. Dahaka kara bodagadia ma haida be Dirava ena taravatu idia hadikaia?
11. (a) Dirava be dahaka ia laloa muramura aukadia inua karana dekenai? (b) Idia ura Dirava ena gavamani henunai idia noho taudia be edena kara ma haida amo idia siri be namo?
12. (a) Edena koikoi karadia ese Dirava ena taravatu idia utua? (b) Unai bamona kara ia karaia tauna be dahaka ia karaia be namo, Dirava ese ia abiadae totona?
13. Dirava ena hesiai taudia ese taunimanima edia gavamani edena bamona idia laloa be namo?
14. Edena bamona ita hahedinaraia diba mauri ita laloa bada, Dirava ese ia laloa bada hegeregerena?
15. Basileia henunai idia noho taudia iboudiai ese dahaka hahegani idia badinaia be namo?
16, 17. (a) Bema Dirava ena taravatu ita badinaia totona iseda kara ita haidaua, dahaka davana namona do ita abia? (b) Dahaka dainai ita diba iseda kara ita haidaua diba?
18. Dirava ia ura iena basileia be edena bamona ita badinaia bona ita durua?
19. (a) Dahaka dainai taunimanima ese ita idia badu henia, Dirava ena basileia ita harorolaia neganai? (b) Dahaka henanadai oi haerelaia be namo?
[Picture on page 128]
Dirava ena gavamani henunai idia noho taudia be unai gavamani idia dibaia be namo
[Pictures on page 131]
Dirava ena gavamani henunai idia noho taudia be kara dikadia amo idia siri
[Picture on page 133]
Dirava ena gavamani henunai idia noho taudia ese unai gavamani idia harorolaia be namo