Drag

Anina: Inai hereva “drag” be mai anina idauidau. Iniseniai ai gwauraia gaudia be aniani gaudia lasi, bona idia be doketa ese idia gwauraia hidi muramuradia lasi, to idia be taunimanima edia lalona ena mamina haidaua gaudia. Taunimanima ese idia ania eiava edia tauanina idia hekodolaia, edia lalo-hekwarahi idia laloaboio totona, o edia lalona ena mamina hanamoa totona.

Moale havaraia totona drag ania karana be Baibel ese ia taravatua, a?

Baibel ese inai drag, heroin, kokein, LSD, PCP (aneru kahuna), mariuana, bona kuku edia ladadia ia gwauraidia lasi. To ia be mai ena sisiba herevadia, idia dainai ita diba dahaka ita karaia be namo bona dahaka ita karaia lasi be namo Dirava hamoalea totona. Unai hegeregerena, Baibel ia gwau lasi taunimanima ta hamasea totona ipidi ita gaukaralaia be kerere, to ia gwau ala-ala be taravatu.

Luka 10:​25-27: “ ‘Lau be edena bamona do lau karaia mauri hanaihanai abia totona?’ . . . ‘Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu goada ibounai, mai emu laloa ibounai. Bona, oiemu badibadinai tauna dekenai oi lalokau henia, oi sibona dekenai oi lalokau henia hegeregerena.’ ” (Bema ta ese ena mauri negana idia hakwadogia gaudia bona iena lalona o darana idia haduhua gaudia ia ania loulou, ia ese Dirava ia lalokau henia lasi mai ena lalona ibounai ida, ani? Bema taunimanima haida edia moni ia henaoa drag ia hoidia totona, iena dekena tauna ia lalokau henia lasi, ani?)

2 Kor. 7:1: “Inai gwauhamata hereva ibounai [Iehova be iseda Dirava bona iseda Tamana ai do ia lao herevadia] be ita totona Dirava ese ia gwauraia. Unai dainai tauanina bona lauma hamiroa karadia ibounai do ita hadokoa, bona iseda mauri ita hagoevaia be namo. Vadaeni Dirava vairanai do ita noho namonamo, mai goeva bona mai gari danu.” (Ita diba bema iseda tauanina hadikaia karadia ita karaia mai eda ura ida, Dirava ese ita do ia lalo-namo henia lasi, ani?)

Tito 2:​11, 12: “Ita diba, Dirava ese iena hariharibada ia hedinaraia vadaeni, taunimanima ibounai do ia hamauria totona. Bona inai hariharibada ese ita ia hadibaia noho, Dirava negea kara bona lebulebu kara do ita rakatania. Ita ia hadibaia danu, do ita noho namonamo, do ita kara maoromaoro, bona Dirava do ita matauraia.” (Ta ese drag ia ania dainai ia laloa namonamo diba lasi bona ena tauanina ia biagua namonamo diba lasi neganai, unai be Baibel ena sisiba hegeregerena, a?)

Gal. 5:​19-21, BH: “Tauanina ena kara na hehedinararai. Ḡaudia bini: . . . babalau, . . . lebulebu; bona kara unuhetomadia iboudiai . . . Unu e kara tomamu taudia ese Dirava ena basileia basie abia.” (Greek gado herevana phar·ma·kiʹa, be Motu gado ai idia hahanaia neganai, inai siri lalonai inai hereva “babalau” idia torea. Unai Greek gado herevana ena anina korikori be, “drag o muramura gaukaralaia karana.” An Expository Dictionary of New Testament Words, W. E. Vine ese ia torea bukana, ese unai Greek gado herevana inai bamona ia gwauraia: “Babalau idia karaia neganai, drag idia gaukaralaidia bona babalau herevadia haida idia gwauraidia lou gwauraidia lou bona lauma edia heduru idia noinoilaia. Babalau gaudia bona toni idia gaukaralaidia, idia gwau idia durua tauna be unai gau amo idia naria, lauma dikadia ese edia siahu amo do idia hadikaia garina, to gauna be idia laloa bema idia gaukaralaidia, idia durua tauna ese edia babalau siahuna do ia hoalaia.” [London, 1940, Vol. IV, pp. 51, 52] Unai hegeregerena, hari inai negai danu, drag idia ania taudia momo ese babalau bona meamea karadia idia karaia eiava unai kara idia karaia taudia idia bamodia, badina bema ta be drag ese idia hakavaia neganai, lauma dikadia be ena lalona dekenai idia vareai haraga diba. Luka 11⁠:​24-26 itaia.)

Tito 3:1: “Oiemu taudia do oi hadibaia lou, idia ese gavana bona gavamani ena siahu taudia do idia kamonai henia. Edia oda hereva do idia badinaia.” (Tano momo dekenai, gavamani ese drag abia eiava ania karadia idia taravatua.)

Drag haida, taunimanima edia lalona edia mamina idia hanamoa gaudia, be momokani idia dika, a?

2 Tim. 3:​1-5: “Nega dokonai metau dikadia momo do idia vara. Badina taunimanima ese . . . lebulebu karadia idauidau do idia ura henia bada, to Dirava do idia ura henia maragi. . . . Inai bamona taudia ibounai dekena amo do oi raka siri.” (Baibel ese ita ia sisiba henia, ia gwau tauanina hamoalea karadia ura henidia bada to Dirava ena taravatu maorodia ura henidia maragi be kerere.)

Drag haida ese taunimanima edia hisihisi idia koua diba bona edia lalona idia hanamoa diba, to danu, idia manadalaia neganai idia rakatania diba lasi, bona bema edia sikele idia hanaia, unai drag ese idia hamasedia diba. Taunimanima ese muramura haida idia bonaia loulou edia lalona hamoalea totona, to unai muramura edia bonana ese ia hakekerodia bamona, bena idia hereva namonamo diba lasi bona idia itaia namonamo diba lasi. Danu, edia varovaro ia hamanokadia, bona edia kwara harana, edia ase, bona edia nadinadi ia hadikadia momokani, bena hanamodia lou dalana be lasi. Taunimanima ese drag idaudia haida idia ania neganai idia hesiku haraga lasi bona idia ura lasi mahuta, to inai dika idia davaria: Idia diba lasi idia bona idia itaia gaudia edia padana be bada o maragi; idia laloa namonamo diba lasi; unai drag ese edia lalona ia hadikaia, bena hanamoa dalana be lasi; idia ura sibodia do idia hamasea eiava taunimanima haida do idia hamasedia.

Mariuana be dika lasi, a? Doketa haida be unai bamona idia hereva

David Powelson, M.D., guna ia be kwara gorerena ena doketa badana, Cowell Hospital, University of California, Berkeley dekenai, be guna ia gwau namona be gavamani ese mariuana ania karana taravatuna do ia kokia. To gabeai, unai drag ena dika idia dibaia namonamo neganai, ia gwau: “Hari lau laloa mariuana be drag dika rohorohona: 1. Ta ese ia ania matamaia neganai ia koia. Ania tauna ena mamina ia namo herea; ena be ena kwarana bona ena lalona idia dika idia lao to mamina ia abia lasi. 2. Ia ania loulou tauna ena kwarana ia hakererea. Bema lagani tamona ia lao lagani toi lalodiai ia ania loulou, ena kwarana ia hakererea diba bena ia laloa namonamo diba lasi, ia kavakava bamona.”​—⁠Executive Health Report, October 1977, p. 8.

Haida idia gwau, Doketa Robert L. DuPont, National Institute on Drug Abuse ena dairekta gunana United States dekenai, be guna ia gwau mariuana ena dika be bada lasi, to vanegai ia gwau: “Hekwakwanai badana be inai: [memero kekeni ese mariuana idia ania dainai] dala rua amo sibodia edia mauri idia hadikaia diba. Dala ta be inai: Ia hakekerodia, bena motuka idia taria neganai aksiden idia davaria diba, eiava gau iboudiai idia laloa momo lasi. Ma dala ta be inai: Huahua gorerena ladana bronkaitis idia abia loulou diba, . . . edia tauanina edia gorere koua siahuna ia hamanokaia diba, bona reana kensa gorerena idia davaria diba danu.”​—⁠Montreal Gazette, March 22, 1979, p. 9.

Science Digest bukana ia gwau: “Nega daudau lalonai mariuana ania loulou karana ese kwara harana ena hemami varovarodia ta ta edia duduna edia padana ia hadaudaua. Unai gau ese taunimanima edia laloatao karana, edia lalona edia mamina, bona edia kara idia biagua. Unai hemami gaudia idia gaukara namonamo totona, namona be diba idia siaia hanai heheni.” Mariuana be animal haida idia henidia, bena idia dekediai idia vara gaudia idia tahudia. Unai buka ese idia davaria gaudia ia gwauraidia inai bamona: “Edia kwara harana edia kahana toi ia hadikadia bada: edia lalona edia mamina idia vara kahana, helalotao ia vara kahana, bona edia kara ia biagua kahana.”​—⁠March 1981, p. 104.

Mariuana ania karana ena dika ese kekero muramurana inua karana ena dika ia hanaia, a?

Kekero muramurana be aniani bamona, bona iena amo tauanina ese goada ia abia; ena momoru be tauanina ese ia negea. To doketa ta ia gwau: “Mariuana ena siahu be bada herea, bona bema ita gwau ia be kekero muramurana hegeregerena, ita kerere bada.” “Mariuana lalonai ia noho muramurana ladana THC ena hakekeroa siahuna ese wiski bona bakadi lalodiai ia noho muramurana ena siahu be nega 10,000 ia hanaia . . . THC be tauanina amo ia lasi metairametaira, bona ta be ena dika amo do ia namo lou lasi ela bona hua momo idia ore murinai.” (Executive Health Report, October 1977, p. 3) Taunimanima ia havaradia Diravana be iseda tauanina ia diba namonamo, bona iena Hereva ia gwau kekero muramurana sisina ita inua be hegeregere. (Sal. 104:15; 1 Tim. 5:⁠23) To kekero muramurana momo inua karana ia gwauraia dika, aniani momo ania karana ia gwauraia dika hegeregerena.​—⁠Her. 23:​20, 21; 1 Kor. 6:​9, 10.

Dahaka dainai Iehova ena Witness taudia idia gwau kuku ania karana be kerere bada?

Kuku ania taudia be Dirava ese ia henidia maurina idia matauraia lasi

Kara 17:​24, 25: “Tanobada bona ena lalonai noho gaudia ibounai ia karaia Diravana . . . ese mauri bona laga bona gau ibounai ia henia noho taunimanima dekenai.”

“Gau momo ese idia hamomokania vadaeni kuku ania karana ese mauri ia hakwadogidia.”​—⁠Science 80, September/October, p. 42.

Ripoti haida ese idia hahedinaraia, lagani ta ta iboudiai kuku ania karana dainai idia mase taudia United States ai be 300,000; Britain ai be 50,000; Canada ai be 50,000. “Lagani ta ta iboudiai taunimanima milion ta mai kahana be kuku ania karana amo idia davaria goreredia dainai idia mase, . . . bona ogogami tanodia ai unai bamona gorere dainai idia mase taudia idia momo daekau haraga.”​—⁠The Journal (Toronto), September 1, 1983, p. 16.

U.S. Secretary of Health, Education, and Welfare gunana, Joseph Califano, ia gwau: “Hari inai negai ia hedinarai goevagoeva, kuku ania karana be taunimanima ese sibodia idia hamasea metairametaira karana.”​—⁠Scholastic Science World, March 20, 1980, p. 13.

Kuku ania karana be Dirava ena ura Keristen taudia ediai hegeregerena lasi

Roma 12:1: “Lauegu varavara taudia e, Dirava ena bogahisihisi bada herea dainai umui lau noia, emui tauanina umui henia Dirava dekenai. Boubou gauna bamona do umui henia, mai mauri bona mai helaga danu, Dirava umui dekenai do ia moale totona. Inai bamona tomadiho momokani Dirava dekenai umui henia be namo.”

United States ena doketa badana, C. Everett Koop, ia gwau: “Ia hedinarai goevagoeva, hari inai negai taunimanima momo be kuku idia ania dainai idia mase, to bema idia ania lasi idia mase haraga lasi.” (The New York Times, February 23, 1982, p. A1) “Doketa ese idia davaria . . . kuku ania lasi tauna ena mauri laganidia ese kuku ania tauna ena mauri laganidia be lagani 3 o 4 bamona amo idia hanaia, bona dina ta ta iboudiai kuku paketi rua o ma haida ia ania tauna ena mauri laganidia be lagani 8 bamona amo idia hanaia.” (The World Book Encyclopedia, 1984, Vol. 17, p. 430) Bema ta ese Dirava ena hesiai gaukara karaia totona iena mauri ia henia bena metairametaira ena mauri ia hadikaia, unai be maoro a?

“Kuku ania karana ese taunimanima edia kudouna bona edia baragina ia hadikaia momokani, bena gorere koua muramuradia edia siahu be hegeregere momokani lasi idia dekenai.” (University of Southern California News Service, February 18, 1982) “Kuku ania karana ese taunimanima momo ia hagoreredia; bema kuku idia ania lasi, idia momo ese unai gorere idia davaria lasi.” (Dr. H. Mahler, director-general of the World Health Organization, in World Health, February/March 1980, p. 3) Bema ta ese sibona ia henia Dirava dekenai iena gaukara helagana karaia totona bena sibona ena ura hegeregerena ia sibona hagorerea karana bema ia karaia, unai be hegeregere a?

Dirava ena taravatu be iseda dekena taudia ita lalokau henidia, to kuku ania karana ese unai taravatu ia utua

Iak. 2:8: “Oi badibadinai ia noho tauna do oi lalokau henia, oi sibona oi lalokau henia bamona.”​—⁠Mataio 7:12 itaia danu.

“Vanegai ripoti ta . . . ese ia hahedinaraia, kuku ania lasi tataudia edia adavadia, kuku ania lasi hahinedia unai, edia mauri laganidia ese kuku ania tataudia edia adavadia, kuku ania lasi hahinedia unai, edia mauri laganidia be lagani 4 bamona amo idia hanaidia.” (The New York Times, November 22, 1978, p. C5) “Hahine ia rogorogo neganai bema kuku ia ania, unai ese ena bogana lalonai ia noho natuna ia hadikaia momokani diba, bena ena bogana lalonai ia do noho neganai do ia mase, eiava do ia vara murinai do ia mase haraga.” (Family Health, May 1979, p. 8) Edia adavadia o edia natudia unai bamona idia kara henidia mai edia lalokau lasi ida taudia ese idia hahedinaraia idia be Keristen taudia bamona idia kara lasi.​—⁠Timoteo Ginigunana 5:8 itaia danu.

“Kuku ania taudia edia kara idia tahua neganai, idia davaria ta ese kuku ia araia murinai, ia ara noho negana ibounai lalonai ia ania lasi, to miniti haida sibodia lalodiai ia ania. Unai dainai, kuku ania lasi tauna be kuku ania tauna badinai ia helai neganai, ena be ia ura lasi to kuku ena kwalahu dikana mai ena muramura dikadia, carbon monoxide, tar bona nicotine, be ia hohoa dae, kuku ania tauna ese ia hohoa dae gaudia edia bada hegeregerena.” (Today’s Health, April 1972, p. 39) Kuku ania tauna ese ena dekena tauna be unai bamona ia kara henia mai ena lalokau lasi neganai, ia hahedinaraia Dirava ia lalokau henia lasi danu.​—⁠Ioane Ginigunana 4⁠:20 itaia.

Bema drag ania karana be kerere, dahaka dainai Dirava ese tubutubu gaudia, idia amo drag idia abidia gaudia, ia karaia?

Taunimanima ese idia gaukaralaia kerere gaudia momo be mai edia gaukaralaia maoromaoro daladia. Unai be momokani, natu havaraia siahuna dekenai bona uaina dekenai. Mariuana be ava ta ena raurau bona ena palaoapalaoa amo idia karaia, to unai ava amo varo idia abia danu kwanau bona dabua karaia totona. Kuku o siomu ena raurau amo gaigai maragimaragidia bona manumanu hamasedia muramuradia idia abia. Tanobada gaudia momo idia do tahudia lasi, edena dala namona ai do idia gaukaralaidia totona. Ava dikadia danu be mai edia namo​—⁠tano idia koua bena medu ese tano ia arua oho lasi, bona idia marai neganai edia raurau idia moru bena unai raurau ese taunimanima idia birulaia noho lasi tanona idia hadigaraia.

Bema kuku o drag ma ta ania karana oi hadokoa toho to oi hegeregere lasi, dahaka oi karaia diba?

Kara ginigunana be, Baibel tahua bona laloa namonamo karana amo emu ura, Dirava do oi hamoalea bona iena kara maoromaoro negana lalonai do oi noho urana, be oi habadaia. Bema Dirava dekenai oi raka kahirakahira lao, ia be oi dekenai do ia raka kahirakahira mai, bona oi do ia durua.​—⁠Iak. 4⁠:⁠8.

Gau badana be emu lalona dekenai oi abia dae momokani unai kara be dika rohoroho, bona oiemu lalona oi hadibaia unai kara do oi inai henia momokani be maoro. (Sal. 97⁠:10) Unai oi karaia totona, inai sinado “Drag” henunai idia noho herevadia oi tahua lou, bona unai drag ania karana amo oi abia moalena oi laloa lasi, to Dirava hamoalea karadia oi laloa loulou bona unai kara dikadia edia anina dikana danu.

Bema mamina oi abia oi ura dikadika kuku o drag ma ta do oi ania, karaharaga Dirava oi noia goadagoada oi do ia durua. (Luka 11⁠:​9, 13; ma danu Filipi 4⁠:13 itaia.) Danu, oiemu Baibel oi kehoa bona iena hereva oi duahia badabada, eiava lo Keristen tauna ta ena heduru oi tahua. Emu lalo-hekwarahi oi hamaorolaia bona oi noia oi do ia durua.