Tanobada (World)

Anina: Inai hereva “tanobada” be Greek gado herevana koʹsmos ida idia hahegeregerea neganai, ena anina be inai: (1) taunimanima ibouboudiai, namodia bona dikadia danu, eiava (2) taunimanima edia noho oromana, ia lalonai idia vara bona idia mauri, eiava (3) Iehova ena hesiai taudia edia orea murimurinai idia noho taudia iboudiai. Baibel ena hereva idia hahanaia taudia haida ese unai Greek gado herevana idia hahanaia kerere. Ena anina ihatoina, ataiai ai torea hegeregerena, be henuai ai herevalaia.

Dirava ese lahi amo tanobada do ia araia ore, a?

2 Pet. 3⁠:​7: “Harihari idia noho guba bona tanobada be Dirava ese, ena oda hereva dekena amo ia naridia noho. Oibe, idia noho hegaegae ela bona Kota Badana Dinanai. Unai neganai lahi badana ese tanobada bona guba do ia araia ore, bona Dirava idia negea taudia be do idia boio.” (Oi itaia, unai siri ia gwau “Dirava idia negea taudia” do ia hamasedia ore, ia gwau lasi taunimanima iboudiai do ia hamasedia ore. Unai hegeregerena, 2Pet 3 siri 6 ia gwau Noa ena negai Dirava ese “tanobada gunana” ia hadikaia ore. Ia ese taunimanima dikadia ia hamasedia ore, to tanobada, ita noholaia gauna, bona Dirava ia gari henia tauna Noa mai ena ruma bese ida be idia noho, idia boio lasi. Kota badana dinana ai, Dirava ese “lahi” korikori do ia gaukaralaia a, eiava “lahi” ese haorea vaitani karana ia laulaulaia? Lahi korikori ese dina bona hisiu, idia siahu masemase gaudia, ia aradia ore diba a? Inai siri ena anina ma haida tahua totona, rau 367-9 itaia danu, inai sinado “Tanobada (Earth)” henunai.)

Her. 2:​21, 22: “Kara maoromaoro taudia na tano bae noholaia, bona lalo-maoromaoro taudia na ia lalonai bae noho; a kara dika taudia na tano amo bae henege daure, bona kara heḡui-heḡui taudia na tano amo bae heraḡa oho.”

Daika ese tanobada ia lohiaia​—⁠Dirava eiava Satana?

Dan. 4:35: “[Herea Mikamika Diravana, Iehova] na sibona ena ura e karamu guba oreana bogaraginai, bona tanobada inoholaina taudia bogaragidiai danu; ta ese ia imana basine laoa ahu diba, eiava basine nanadaia, basineto, ‘Dahaka o karamu?’ ” (Unai hegeregerena, Ieremia 10⁠:​6, 7 ese Iehova ia gwauraia “bese idau-idau edia pavapava” badina ia be Atai Herea Pavapavana. Ia ese tanobada ena pavapava bona idia lohiadia besedia ia hahemaoro henidia diba, bona unai bamona do ia karaia. Iehova ese tanobada ia havaraia dainai, ia be ena Lohia korikorina; unai dagi ia rakatania lasi ema bona hari.)

Ioane 14:30: “[Iesu ia gwau:] Tanobada ena lohia ia mai noho vadaeni. Ia be lau dekenai mai ena siahu lasi.” (Ia hedinarai goevagoeva unai lohia be Iehova Dirava lasi, badina be nega ibounai Iesu ese Iehova ena ura ia karaia mai ena kamonai ida. Ioane Ginigunana 5⁠:19 ese ia hahedinaraia inai “tanobada ena lohia” be Satana Diabolo, “tanobada taudia ibounai ia gunalaia noho” tauna. Ena be taunimanima idia noholaia tanobadana ibounai be Dirava ena, to Iehova idia badinaia lasi taudia be Satana ena siahu henunai idia noho, badina be ia idia kamonai henia dainai. Iehova ena lohia dalana idia badinaia momokani taudia be unai tanobada ena lasi. Korinto Iharuana 4⁠:4 itaia danu.)

Apok. 13:2: “Huala [Satana Diabolo] ese sibona ena siahu inai dagedage gauna dekenai ia henia. Ma sibona ena helai gabuna badana bona ena goada bada herea danu ia henia.” (Unai “dagedage gauna” ena toana bona Daniel 7 ese ia gwauraia gaudia edia toana ita hahegeregeredia neganai, ia hahedinaraia unai dagedage gauna ese taunimanima edia politikol gavamanidia ibouboudiai tanobada hegegemadai ia laulaulaidia. Luka 4⁠:​5-7 ese ia hamomokania unai gavamani iboudiai be Satana ese ia lohiadia, bona Apokalupo 16⁠:​14, 16 ese ia hahedinaraia lauma dikadia ese tanobada ena lohia iboudiai idia hakaudia lao, Aramagedono dekenai Dirava do idia tuari henia totona. Dirava ese Satana ena lohia siahuna ia haheaukalaia mo ela bona ia gwauraia hidi vadaeni negana do ia ginidae; unai neganai Dirava ese sibona ena lohia siahuna do ia hamomokania vaitani.)

Apok. 11:15: “Gado badadia guba dekenai idia hereva, idia gwau, ‘Tanobada biagua siahuna be iseda Lohiabada [Iehova] bona ena Keriso idia abia vadaeni.’ ” (Lagani 1914 ai unai ia vara neganai, hari ia noho tanobada oromana dikana ena ‘dina gabedia’ idia matamaia. Unai neganai Iehova ese ena lohia siahuna be dala matamatana amo ia hahedinaraia, ia sibona ena Natuna, Mesia Lohiana, ena amo. Nega daudau lasi murinai, inai tanobada oromana dikana do ia haorea, bona Satana, tanobada ena lohia dikana, be guri dobu masemasena lalonai do ia koua, bena taunimanima edia lalona do ia ania diba lasi bona do ia hadikadia diba lasi.)

Keristen korikori taudia edia lalohadai tanobada bona tanobada taudia ediai be dahaka?

Ioane 15:19: “Umui [Iesu ena orea taudia] be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia.” (Unai hegeregerena, Keristen korikori taudia be inai tanobada taudia edia orea lalonai lasi, badina be tanobada taudia bona Dirava be mai padana. Taunimanima edia kara korikori idia karaia, to inai tanobada taudia edia lalohadai, edia hereva, bona edia kara, Iehova ena taravatu maoromaorodia idia utua gaudia, be idia ese idia dadaraidia.) (Rau 134-40 bona 375-9 itaia danu.)

Iak. 4:4: “Umui be headava kara ena taravatu umui makohia noho taudia bamona. Umui diba lasi, a, bema umui ura tanobada danu umui turana karaia neganai Dirava umui tuari henia noho?” (Keristen taudia idia goevadae lasi dainai, tanobada taudia bogaragidiai idia noho neganai nega haida tanobada taudia ese idia hakereredia reana. To Keristen taudia goadadia ese Dirava ena Hereva amo idia sisiba henidia neganai, idia helalo-kerehai bona edia kara idia hamaoromaoroa. To, bema haida be sibodia edia ura hegeregerena tanobada idia tura henia eiava tanobada taudia edia lalohadai idia abia dae bona idia tohotohoa, idia hahedinaraia idia be Keristen korikori taudia lasi, to idia be Dirava ia inai henia tanobadana ena.)

Roma 13:1: “Taunimanima ibounai ese gavamani do idia kamonai henia. Badina be gavamani ta ia noho diba lasi bema Dirava ia ura lasi neganai. Gavamani ena siahu be Dirava ese ia henia.” (Inai sisiba idia badinaia taudia ese tanobada ena gavamani idia gwau-edeede henidia lasi bona idia hamorudia toho lasi. Politikol lohiadia edia siahu henunai idia noho bona edia taravatu, Dirava ena taravatu idia utua lasi taravatudia, idia badinadia. Idaunegai, Dirava ia diba unai gavamani do idia vara bona ia perovetalaidia. Idia ese edia lohia siahuna idia gaukaralaia noho, Dirava ese ia hasiahudia dainai lasi, to edia dala ia koua lasi dainai. Ia gwauraia hidi vadaeni negana ai do ia kokidia.)

Gal. 6:10: “Dala ita davaria neganai, taunimanima ibounai dekenai kara namodia do ita karaia. To Keriso idia abidadama henia taudia do ita durua bada herea be namo.” (Unai dainai Keristen korikori taudia ese taunimanima iboudiai idia kara namo henidia. Dirava ena kara idia tohotohoa; ia ese kara dika taudia bona kara namo taudia dina ena diari ia henidia.​—⁠Mat. 5⁠:​43-48.)

Mat. 5:​14-16: “Umui be tanobada taudia ibounai edia diari. . . . Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai umui emui Tamana guba dekenai do idia hanamoa.” (Edia kara dainai taunimanima ese Dirava do idia hanamoa totona, namona be Keristen taudia ese Dirava ena ladana bona ena palani be tanobada taudia idia hadibadia. Keristen korikori taudia ese unai gaukara idia tahua guna.)

Hari inai negai tanobada ai idia vara gaudia edia anina be dahaka?

Inai sinado badana “Dina Gabedia” itaia.