Karoa 25

Ta be Sibona ena Tauanina Ia Gadaralaia be Dika, Eiava?

“Lau be sibogu egu tauanina lau gadaralaia dainai Dirava vairanai lau be mai egu kerere eiava? Gabeai inai kara ese lau do ia hakavakavaia bona lau do ia hagorerea, eiava?”​—⁠Kekeni ta ladana Melissa ena hereva unai.

MEMERO kekeni momo be unai bamona idia laloa momo, badina be sibodia edia tauanina idia gadaralaia dainai. Ripoti ta ese ia hahedinaraia uhau bona ulato kahirakahira iboudiai be sibodia edia tauanina idia gadaralaia vadaeni. Guna taunimanima haida idia gwau unai kara ese ia hagoreredia diba bona ia hakavakavadia diba.

To hari inai nega lalonai, doketa idia laloa unai kara ese idia karaia taudia ia hagoreredia lasi bona ia hakavakavadia lasi. To momokani, dala idaudia amo ia hadikadia diba! Bona Keristen memerodia bona kekenidia momo ese unai kara idia laloa momo be namo. Ta ia gwau: “Lauegu tauanina lau gadaralaia negadiai, lau laloa Iehova ena matana ai lau be hegeregere lasi, bona nega haida lau lalo-metau bada.”

Vadaeni, ta be sibona ena tauanina ia gadaralaia anina be dahaka? Unai kara be dika a, bona dahaka dainai memero bona kekeni momo idia davaria idia hadokoa be auka?

Memero Kekeni Idia Hekwakwanai ena Badina be Inai

Memero bona kekeni ese edia tauanina edia henuna kahana idia gadaralaia, moale ena mamina idia abia totona. Idia tubu daekau noho lalonai, edia tauanina edia ura idia bada idia lao, bona idia lalo-parara unai gau amo moale idia davaria diba. Bona nega haida, ena be ta ese headava karana ia laloa noho lasi, to ena tauanina ena ura ia bada ia lao kava.

Unai hegeregerena, lalo-hekwarahi, gari o badu ese mero ena tauanina ia hasiahua dainai, reana ena usina ia dora. Eiava ena abona be vesi amo ia honu dainai, mahuta amo ia noga neganai ena usina ia dora, eiava hanuaboi ai ena vesi ia aru kava neganai, mahuta hebou karana ia nihilaia. Unai hegeregerena, kekeni haida edia tauanina edia ura ia bada ia lao kava. Hua gorerena idia abia negana vairanai o murinai idia momo be unai bamona ura idia abia badabada.

Unai dainai, bema unai ia vara oi dekenai, oi laloa momo lasi, badina be unai be memero bona kekeni edia tauanina dekenai ia vara hanaihanai. Bona ena be unai mamina be bada herea, to unai be sibomu emu tauanina gadaralaia karana hegeregerena lasi. Bona, oi bada daekau noho lalonai, unai mamina do ia maragi ia lao.

To memero bona kekeni haida be unai mamina matamatana idia moalelaia dainai, edia tauanina edia henuna kahana idia gadaralaia.

‘Lalona Hasiahua Gaudia’

Baibel ese tauhau ta ia gwauraia, ia be lebulebu hahinena ta ida idia hedavari neganai, hahine ese ia kisi henia bona ia noia, ia gwau: “Oi mai, . . . do ita ura heheni mai eda moale ida.” Vadaeni, “maoromaoro ia murinai ia lao, boromakau be alaia gabuna dekenai ia lao bamona.” (Hereva Lada-isidia 7⁠:​7-22) Hari tauhau ese ia itaia gaudia bona ia kamonaia herevadia ese ena tauanina ena ura idia hasiahua.

Unai hegeregerena, tauhau ta ia gwau: ‘Lau be sibogu egu tauanina lau gadaralaia ena badina be inai: Gau dikadia be lauegu lalona ai lau atodia. TV program lau raraidia. Idia lalodiai, matabodaga karadia, lebulebu karadia, bona kopi kavakava taudia idia hahedinaraidia. Lau itaia gaudia lau laloaboio diba lasi. Unai gau lau laloa loulou, bena egu lalona idia hasiahua dainai egu tauanina lau gadaralaia.’

Oibe, ta ese ia duahidia o ia raraidia o ia kamonaidia gaudia, bona ia herevalaidia eiava ia lalodia gaudia danu, ese idia doria diba, sibona ena tauanina do ia gadaralaia totona. Haneulato ta ia gwau: “Guna lau laloa unai kara do lau hadokoa diba lasi. Unai hekwakwanai ena badina ta be, lalokau sivaraidia lau duahia momo dainai.”

“Lalona Hamainoa Muramurana” Ta

Hari haneulato ena sivarai ese ia hahedinaraia badina be dahaka unai kara hadokoa be auka herea. Ia be ma ia gwau: “Nega momo sibogu egu tauanina lau gadaralaia lauegu lalo-hekwarahi hamaragia totona. Unai moale, nega sisina lalonai lau abia moalena, ese egu lalona ia hakerua lou, kekero muramurana ese ia manadalaia tauna ena lalona ia hakerua hegeregerena.”

Ripoti ta ia gwau: “Taunimanima ese idia dadaraidia negadiai, o idia lalo-hekwarahi negadiai, haida be vaia sibodia edia tauanina idia gadaralaia, sibodia edia lalona hakerua totona. Ma haida be nega ta ta sibodia idia karaia, idia lalo-hekwarahi bada herea negadiai.” Unai bamona taudia iboudiai dekenai, unai kara be edia “lalona hamainoa muramurana” hegeregerena ai idia halaoa, edia lalo-hekwarahi laloaboio totona.

Baibel be Dahaka Ia Gwau?

Mero ta ia henanadai, ia gwau: “Sibodia edia tauanina idia gadaralaia taudia edia dika be Dirava ese do ia gwauatao lasi, a?” Unai kara be Baibel lalonai idia gwauraia lasi.a Ena be Baibel negadia ai, Greek gado ai idia hereva taudia edia tano idauidau ai momo ese unai kara idia karaia bona Greek gado ai hereva idauidau amo idia herevalaia, to unai hereva ta be Baibel lalonai idia torea lasi.

Ta be sibona ena tauanina ia gadaralaia karana be Baibel ese ia gwauraia dika lasi, anina be unai kara be dika lasi, a? Lasi vaitani! Ena be Baibel lalonai unai kara be heudahanai bona kara dika rohorohodia ma haida ida idia hahegeregerea lasi, to momokani ia be kara mirona ta. (Efeso 4⁠:19) Unai hegeregerena, Baibel ese ia hahedinaraia namona be unai kara oi dadaraia goadagoada, “sibomu emu namo habadaia” totona.​—⁠Isaia 48⁠:⁠17.

“Matadika” Havaraia Dalana

Baibel ia gwau: “Tauanina ena ura kara umui lalonai idia gaukara noho, do umui hamasea. Gaudia be inai: . . . matadika.” (Kolose 3⁠:⁠5) Badina be “matadika” ese ta ia veria diba, kara dika rohorohodia do ia karaia totona; unai kara haida be Paulo ese ia gwauraia Roma 1⁠:​26, 27 dekenai.

To ta be sibona ena tauanina ia gadaralaia neganai, unai ura dikadia ia “hamasea,” a? Lasi, to mero ta ena hereva hegeregerena: “Sibomu emu tauanina oi gadaralaia neganai, ura dikadia oi laloa noho, bona unai ese emu ura dika ia havaraia sibona.” Unai kara idia karaia negadiai, momo ese matabodaga karadia idia laloa edia moale habadaia totona. (Mataio 5⁠:​27, 28) Unai dainai matabodaga ena hedibagani lalonai idia hekwakwanai haraga diba. Unai bamona ia hekwakwanai merona ta ia gwau: “Guna lau laloa bema sibogu egu tauanina do lau gadaralaia, bena ena be lau be kekeni ta ida do ai mahuta hebou lasi, to egu lalona do ia hegeregere. To, egu kara dainai gabeai lau ura dikadika kekeni ta ida do ai mahuta hebou.” Vadaeni ia heudahanai. Unai hegeregerena, ripoti ta ese ia hahedinaraia, sibodia edia tauanina idia gadaralaia memerodia bona kekenidia momo be idia heudahanai danu.

Lalona Ia Hamiroa

Bema ta be sibona ena tauanina ia gadaralaia, unai ese ena lalona ia hakererea. (2 Korinto 11⁠:3 itaia.) Ia be sibona ena tauanina hamoalea karana ia laloa noho unai; ia dekenai lalokau ena mamina be lasi. To Dirava ena ura be inai: Tau be ena adavana ida do idia mahuta hebou negadiai, unai kara amo ruaosi edia tauanina edia ura do idia hagugurua diba bona do idia hahedinaraia idia lalokau heheni.​—⁠Hereva Lada-isidia 5⁠:​15-19.

Danu, sibodia edia tauanina idia gadaralaia memerodia haida ese kekeni idia matauraidia lasi; edia lalohadai tamona idia dekenai be, do idia mahuta henidia, sibodia edia tauanina hamoaledia totona. Unai bamona lalohadai ese edia lalona ia hamiroa, bena idia haida idia headava murinai unai lalohadai idia negea lasi! Baibel ena sisiba namona be inai: “Tauanina bona lauma hamiroa karadia ibounai do ita hadokoa, bona iseda mauri ita hagoevaia be namo.”​—⁠2 Korinto 7⁠:⁠1.

Kerere Laloa Maoromaoro

Memero kekeni momo, ena be inai kara idia karaia momo lasi guna idia karaia bamona, to nega ta ta edia lalona idia manoka dainai idia karaia lou. To Dirava be mai ena hebogahisi bada herea. Salamo torea tauna ese ia hanamoa, ia gwau: “Iehova e, oi be namo, oi ese dika oi gwauatao.” (Salamo 86⁠:⁠5) Keristen tauna be unai kara dekenai ia hekwakwanai neganai, sibona ena lalona ese ia samania. To, Baibel ia gwau: “Iseda lalona ena diba be Dirava ena diba ese ia hanaia, bona gau ibounai ia diba.” (1 Ioane 3⁠:20) Dirava ese iseda kara dikadia sibodia ia itaia lasi. Bema mai eda lalona ibounai ida ita noia iseda dika do ia gwauatao, iseda noinoi do ia kamonai mai ena hebogahisi ida, badina be ena diba be bada herea dainai. Haneulato ta ia torea herevana be inai: “Lau diba lau kerere vadaeni, to lau diba danu Iehova be lalokau Diravana bona ia be lauegu lalona ibounai ia diba, unai dainai lau lalo-metau bada lasi lau hekwakwanai negadiai.” Sibomu emu tauanina do oi gadaralaia urana bema oi hadarerea toho, kara dika badana, matabodaga karana, be do oi karaia haraga lasi.

The Watchtower, September 1, 1959 gauna, ia gwau: “[Reana] ita be kara dikana ta ita hekwakwanailaia loulou badina be ita manadalaia vadaeni. . . . Oi dara doko lasi. Oi gwau lasi, Dirava ese do ia gwauatao lasi karana dikana be oi karaia vadaeni. Satana ia ura unai lalohadai do oi abia. To oiemu lalohisihisi ese ia hahedinaraia unai bamona kara oi karaia vadaeni lasi. Dirava oi noinoi henia loulou mai emu lalo-manau bona mai emu momokani ida; oi noia, emu dika do ia gwauatao bona oi do ia hagoevaia bona oi do ia durua. Oi noia loulou, mero ta be ia lalo-hekwarahi neganai ena tamana ia noia hegeregerena, bena Iehova ese oi do ia durua mai ena hariharibada ida, bona emu lalona do ia hagoevaia bona do ia hakerua.”

Ta be unai ‘lalo-goeva’ edena bamona do ia abia diba? Unai do oi diba totona, karoa gabena mani oi duahia.

[Footnotes]

Inai Henanadai Herevalaia

◻ Ta be sibona ena tauanina ia gadaralaia ena anina be dahaka, bona momo edia lalohadai kereredia unai kara dekenai be dahaka dahaka?

◻ Dahaka dainai memero bona kekeni edia tauanina edia ura be bada herea? Unai ura idia abia be kerere, a?

◻ Dahaka dahaka ese ta ena lalona idia ha-uraia dainai ia ura sibona ena tauanina do ia gadaralaia?

◻ Unai kara ese memero bona kekeni ia hadikadia, a?

◻ Oi laloa unai kara be kerere badana, a? Bema ta ese unai kara ia hadarerea toho to nega ta ta ia hekwakwanai, Iehova ese ia edena bamona ia laloa?

[Blurb on page 200]

Haida idia ura edia tauanina do idia gadaralaia, idia lalo-hekwarahi eiava idia lalohisihisi negadiai

[Blurb on page 202]

‘Lau be sibogu egu tauanina lau gadaralaia ena badina be inai: Gau dikadia be lauegu lalona ai lau atodia’

[Blurb on page 204]

“Lauegu tauanina lau gadaralaia negadiai, lau laloa Iehova ena matana ai lau be hegeregere lasi”

[Picture on page 198]

Ena be sibona ena tauanina ia gadaralaia tauna be ena kerere ia lalohisihisilaia reana, to bema mai ena momokani ida Dirava ia noia ena dika do ia gwauatao, bona bema unai kara ia dadaraia goadagoada toho, ena lalona do ia goeva

[Picture on page 203]

Muvini piksa, buka, bona TV program ese momo edia ‘lalona idia hasiahua’ dainai, edia tauanina idia gadaralaia