Karoa 26

Egu Tauanina Gadaralaia Urana be Edena Bamona Do Lau Dadaraia Diba?

LAGANI 15 lalodiai inai kara ia karaia tauna ta ia gwau: “Inai kara hadokoa be auka herea, drag o kekero muramurana inua karana hadokoa hegeregerena.”

To aposetolo Paulo ese sibona ena ura dikadia ia koua, ia do idia biagua garina. Ia gwau: “Lauegu tauanina lau botaia momokani, bona iena ura lau karaia lasi.” (1 Korinto 9:27) Ia be sibona ia kara auka henia unai! Unai bamona idia hekwarahi taudia iboudiai ese sibodia edia tauanina gadaralaia karana idia hadokoa diba.

‘Do Oi Laloa Namonamo bona Do Oi Kara Namonamo’

Momo be sibodia edia tauanina idia gadaralaia edia lalo-hekwarahi hadokoa totona. To unai be natu maragidia edia kara bamona. (1 Korinto 13:11 itaia.) Namona be emu hekwakwanai do oi halusidia toho mai emu aonega ida. (Hereva Lada-isidia 1:4) To bema oi daradoko, ‘emu laloa hekwarahi gaudia ibounai Dirava ena imana dekenai do oi atoa’ be namo.​—1 Petero 5:​6, 7.

Emu tauanina ena ura ia havaraia gauna bema oi itaia o oi kamonaia, edena bamona oi kara be namo? Baibel ia gwau: “Do umui laloa namonamo, bona do umui naria namonamo.” (1 Petero 1:​13) Emu lalona ai oi goada karaia bona lalohadai dikana oi dadaraia, bena emu tauanina ena ura do ia ore haraga.

To hanuaboi ai ta be sibona ia hekure neganai, lalohadai dikadia ia dadaraia be auka herea. Haneulato ta ena sisiba be inai: “Namona be emu mahuta patana amo oi toreisi bona gaukara ta oi karaia eiava aniani sisina oi ania, gau idaudia do oi laloa totona.” Oibe, oi be sibomu oi fosia, “kara maoromaoro, kara goevagoeva, lalokau karadia, mai mataurai karadia” do oi laloa totona.​—Filipi 4:8.

Oi mahuta haraga diba lasi negadiai, King David ena kara oi tohotohoa. Ia gwau: “Lauegu mahuta patana dekenai oi [Dirava] lau laloatao neganai, hanuaboi ena gima negadia lalodiai oi lau laloa namonamo.” (Salamo 63:6) Bema emu lalona oi fosia Dirava bona ena kara do oi lalolaia totona, nega momo unai ese emu ura dikana do ia haorea bona oi do ia durua, Dirava ena lalohadai unai kara mirona dekenai do oi laloa namonamo totona.​—Salamo 97:10.

Oi Koua Toho

Baibel ia gwau: “Lalo-parara tauna ese dika ia itaia bena ia komu, to lalo-duhu taudia be idia raka lao, bena edia kerere davana idia abia.” (Hereva Lada-isidia 22:3) Unai hegeregerena, namona be emu hekwakwanai gabudia oi laloa namonamo guna. Bema oi davaria kara haida oi karaia neganai, o piripou hekahihekahina oi karaia neganai, o aniani haida oi ania neganai, unai ese emu tauanina ia ha-uraia, vadaeni unai ibounai oi karaia lasi be namo. Kekero muramurana ese emu lalona ia hamanokaia diba bona ia hahekwakwanaia diba. Danu, matabodaga sivaraidia, buka ai idia torea o muvini piksa o TV ai idia hahedinaraia, be oi dadaraia vaitani. Salamo torea tauna ese Dirava ia noia, ia gwau: “Lauegu matana oi naridia, anina lasi gaudia do idia itaia lasi totona.”​—Salamo 119:37.

Kara haida do oi karaia diba, emu lalona do ia manoka momokani negadiai do oi hekwakwanai lasi totona. Reana ulato idia davaria, hua gorerena idia abia negadiai edia tauanina edia ura ia bada ia lao. Eiava ta ia lalohisihisi o ia lalo-metau neganai ena tauanina ena ura ia bada. Hereva Lada-isidia 24:10 ia gwau: “Hekwakwanai dinana ai oi lalo-manoka a? Oiemu goada do ia maragimaragi.” Unai dainai, hora momo lalodiai oi sibomu oi noho lasi. Kara namodia oi palanilaia, mai emu lalona ibounai ida do oi karaia karadia unai; bena unai kara do oi karaia noho lalonai, matabodaga karadia do oi laloa haraga lasi.

Lauma Tuarina

Tau matamatana ta be lagani 16 lalodiai unai kara ia lalo-hekwarahilaia murinai ia hadarerea. Ia gwau: “Lau hadarerea totona lau tuari henia. Dina ta ta iboudiai Baibel ena karoa rua lau duahia.” Lagani toi lalodiai unai bamona ia karaia vadaeni, nega ta ia laloaboio lasi. Keristen tauna ma ta ena sisiba be inai: “Emu mahuta patana ai oi hekure gwauraia neganai, lauma gaudia herevadia oi duahia. Gau badana be inai: Dina dokonai emu lalohadai ginigabena ai lauma gaudia oi laloa. Bema unai neganai oi guriguri danu, heduru bada herea do oi abia.”

Bema ‘Lohiabada ena gaukara do oi karaia goadagoada’ danu, unai ese oi do ia durua. (1 Korinto 15:58) Unai gaukara ta be Baibel ena hereva taunimanima hadibalaidia karana. Sibona ena tauanina gadaralaia karana ia hadarerea hahinena ta ia gwau: “Lau ia hakwalimua gauna be inai: Pioneer gaukara lau karaia noho lalonai, mai egu lalona ibounai bona mai egu goada ibounai ida haida lau durudia, Dirava ena lalo-namo idia abia totona.”

Oi ese danu Dirava oi noia diba mai emu lalona ibounai ida, “siahu badana” be oi do ia henia. (2 Korinto 4:7) ‘Emu lalona ena anina be ia vairanai oi hahedinaraia.’ (Salamo 62:8) Haneulato ta ia gwau: “Guriguri ese ta ena lalona ia hagoadaia haraga. Emu tauanina ena ura ena mamina oi abia neganai, oi guriguri be namo.” Danu, dabai oi toreisi neganai bona dina ibounai lalonai, emu lalohadai be Dirava dekenai oi gwauraia loulou, bona oi noia iena lauma helaga amo oi do ia durua.​—Luka 11:13.

Haida edia Heduru

Bema oi sibomu oi kwalimu diba lasi, oi ia durua diba tauna ta oi hereva henia, reana emu tamana o emu sinana o Keristen elda tauna ta. Kekeni bona ulato ese Keristen hahinena badana ta idia hereva henia be namo. (Tito 2:​3-5) Ia daradoko tauhauna ta ia gwau: “Hehuni dekenai lauegu tamana lau hamaorolaia. Lau hamaoroa be auka herea. Lau hamaoroa neganai lau tai, badina be lau hemarai bada herea. To ena hereva do lau laloaboio lasi. Egu lalona hagoadaia totona lau ia kiri henia, ia gwau: ‘Inai bamona oi gwauraia hedinarai dainai oi lau laloa bada.’ Ia diba egu kerere lau gwauraia hedinarai be auka herea. Ena hereva ese egu lalona ia hagoadaia momokani.”

Hari tauhau be ma ia gwau: “Bena egu tamana ese Baibel ena siri haida ia hahedinaraia lau dekenai; unai siri amo ia hahedinaraia, lau be mai egu helalo-kerehai dalana, bona lau karaia karana be dika herea. Ia ese nega ta ia gwauraia hidi, ia gwau unai negai ai ruaosi do ai herevalaia lou. Ma ia gwau, namona be unai kara do lau karaia lou lasi ela bona unai nega. Lau ia hamaoroa, bema lau hekwakwanai lou, namona be unai do lau lalohisihisilaia bada lasi, to nega taina daudau lalonai unai kara do lau dadaraia toho lou be namo.” Hari tauhau be ena hekwakwanai ia hadarerea vaitani murinai, ia gwau: “Ia be lauegu hekwakwanai ia diba bona lau ia durua be namo herea.”

Ta Ia Hekwakwanai Lou Neganai

Mero ta be unai kara hadokoa totona ia hekwarahi bada murinai ia hekwakwanai lou. Ia gwau: “Unai ese egu lalona ia hametaua bada. Bena egu lalona ai lau gwau: ‘Madi, lau boio vadaeni. Iehova ese lau ia lalo-namo henia lasi; vadaeni sibogu lau hahekwarahia anina be dahaka?’ ” To, ena be ta ia hekwakwanai lou, to reana gabeai do ia kwalimu. Haneulato ta ia gwau: “Matamana neganai lau be hanuaboi kahirakahira iboudiai lau karaia, to unai murinai lau be Iehova dekenai lau tabekau momokani, bona ena lauma amo lau ia durua dainai, hari inai negai lagani ta lalonai lau be nega 6 sibona lau karaia. Lau karaia negadia murinai lau lalohisihisi bada, to gabeai hedibagani lau davaria lou neganai, egu lalona ia goada herea.” Vadaeni, metairametaira ia kwalimu noho mai ena hekwarahi ida.

Oi hekwakwanai lou neganai, emu hekwakwanai ena badina oi tahua be namo. Mero ta ia gwau: “Lau sibogu lau henanadai, dahaka lau duahia o dahaka lau laloa dainai, inai kerere ia vara? Nega momo egu kerere ena badina be unai bamona lau davaria diba, bena unai kara lau hadokoa diba.”

Tuari Namona ena Davana Namona

Sibona ena tauanina gadaralaia karana ia hadarerea vadaeni merona ta ia gwau: “Unai kara lau hadarerea negana amo ema bona hari, Iehova vairanai lauegu lalona ia goeva, bona unai be mai anina bada lau dekenai!”

Oibe, sibodia edia tauanina gadaralaia karana idia tuari henia taudia ese idia abia davadia namodia be inai: Edia lalona idia goeva, sibodia idia laloa maragi lasi guna idia laloa bamona, kara maoromaoro idia goadalaia, bona Dirava idia badinaia namonamo. Unai kara ia hadarerea haneulatona ta ia gwau: “Momokani, inai kara hadarerea totona lau hekwarahilaia hekwarahina be mai ena davana namona.”

Inai Henanadai Herevalaia

◻ Memero o kekeni ese mahuta hebou karana idia laloa ena dika be dahaka? Ta be unai bamona lalohadai edena bamona ia negea diba bena gau idauna ta ia laloa?

◻ Mero o kekeni be dahaka ia karaia be namo, sibona ena tauanina gadaralaia urana ese do ia dibagania badabada lasi totona?

◻ Dahaka dainai lauma tuarina idia tuarilaia be namo?

◻ Guriguri ena namo be dahaka, ta ese unai kara ia hadarerea toho neganai?

◻ Dahaka dainai ta be ena hekwakwanai unai kara dekenai be ma ta ia hamaorolaia be namo?

[Box/Picture on page 208, 209]

Matabodaga Sivaraidia bona Laulaudia edia Dika

“Buka dikadia be gabu iboudiai dekenai oi davaridia diba; sitoa ai idia hahedinaraidia, bona emai tisa haida ese sikuli dekenai idia mailaidia bona idia duahidia.” Mero badana ta ladana Ronald ena hereva unai. Oibe, taunimanima idauidau momo ese matabodaga sivaraidia idia duahia mai edia ura bada ida. Mero ta ladana Mark ia gwau: “Unai magasin lau duahia bona kopi kavakava kekenidia edia laulau be idia lalodiai lau itaia negadiai, unai ese egu lalona ia hamoalea! . . . Magasin matamatadia do idia halasia negadia be hanaihanai lau naria mai egu ura ida, badina be unai gau matamatadia lau moalelaidia bada.” To, ta be unai bamona sivarai ia duahia loulou bona unai bamona laulau ia raraia loulou be namo, a?

Buka dikadia bona laulau dikadia ese idia hahedinaraia lalohadaina badana be inai: ‘Ta be matabodaga karadia ia karaia ena badina tamona be, sibona ena tauanina ena ura ena anina do ia davaria totona.’ Hahine hadikadia karadia be idia momo lalodiai idia sivarailaia o idia hahedinaraia. Unai gau dikadia idia manadalaidia vadaeni taudia momo ese gau dika rohorohodia idia tahua, edia moale do ia maragi ia lao garina! Profesa ta ladana Ernest van den Haag ia gwau: “Unai hereva bona laulau dikadia ese iseda lalona idia ania neganai, ita laloa taunimanima be hidio kavakava bamona, do ita kara henidia diba, sibona eda tauanina hamoaledia totona.”

Buka dikadia bona laulau dikadia ese headava taudia momo edia lalona idia hahekwakwanaia. Hahine matamatana ta ia gwau: “Unai buka lau duahia dainai, lau ura egu adavana ese unai buka lalodiai idia gwauraia bona idia hahedinaraia karadia idaudia be lau dekenai do ia karaia. Unai dainai, iena kara, ai mahuta hebou negadiai lau dekenai ia karaia karadia, be lau moalelaia diba lasi.” Lagani 1981 lalonai, hahine handred haida idia nanadaidia neganai, unai hahine rua rua amo ta ta idia gwau, hekwakwanai badadia idia davaria, edia tatau ese unai buka dikadia idia duahia dainai. Unai kara dainai haida ese edia headava o edia maoheni idia hadokoa. Hahine ta be mai ena lalohisihisi ida ia gwau: “Egu adavana ia ura unai buka do ia duahia, ia sibona ena tauanina ena ura ena anina do ia davaria totona. Unai dainai lau laloa iena matana ai lau be hegeregere lasi . . . Lau ura dikadika ia do lau hamoalea diba, to ia ese plastik bona pepa ia ura henia bada, lau ia ura henia maragi. . . . Unai buka ese lalokau idia hadikaia ore.”

To, Keristen memerodia bona kekenidia be unai buka dikadia dekenai do idia naria namonamo ena badina badana be inai: Dirava vairanai idia goeva toho neganai, unai buka ese edia dala idia koua. (2 Korinto 6:​17–7:1) Baibel ese ia hahedinaraia, gunaguna haida ese Dirava “dekena amo edia laloa idia koua, bona iena dala idia diba lasi” dainai, “idia be hemarai lasi momokani” bona “lebulebu daladia idia ura dikadika, bona matabodaga karadia idia tahua doko lasi.” (Efeso 4:​18, 19) Oi ura lasi unai bamona do oi kara kerere, ani? Mani inai oi laloa: Ena be unai buka be nega ta ta mo oi duahidia, to emu lalona idia hakererea diba bena emu kerere ena mamina do oi abia lasi. Unai buka idia duahia dainai, Keristen memerodia bona kekenidia haida be sibodia edia tauanina idia gadaralaia bona idia sihari kava. Vadaeni, unai buka bona magasin oi dadaraidia goadagoada be namo.

Mero ta ladana Darryl ia gwau: “Nega momo unai laulau dikadia lau itadia badina be lau vairanai idia atodia hedinarai dainai, to lau raraidia lasi.” Oibe, oi raraia lasi, bona emu kalasi taudia ese emu lalona idia ha-uraia unai laulau dikadia do oi itadia totona neganai, oi dadaraidia. Kekeni badana ta ladana Karen ia gwau: “Lau goevadae lasi dainai, goeva gaudia namodia do lau laloa noho be auka. Vadaeni, bema buka dikadia lau duahia, goeva gaudia namodia do lau laloa be auka herea, ani?”

[Picture on page 206]

“Guriguri ese ta ena lalona ia hagoadaia haraga. Emu tauanina ena ura ena mamina oi abia neganai oi guriguri be namo”