Karoa 27

Kara Maoromaoro be mai ena Davana Namona, A?

NEGA ta oi ura oi hereva koikoi, a? Mero ta ladana Donald ese ena sinana ia hamaoroa ena mahuta daiutuna ia hagoevaia vadaeni, to gau be ena kohu be ena mahuta patana henunai ia negea sibona. Mero ta ladana Richard ese ena tamana sinana ia koidia toho. Ia hamaorodia sikuli ena eksam dekenai ia kwalimu lasi ‘ena tisa ese ia ura henia lasi’ dainai, to gau be ia stadi lasi dainai ia kwalimu lasi.

Nega momo memero bona kekeni ese edia tamadia sinadia bona ma taunimanima badadia danu unai bamona hereva amo idia koidia diba lasi. To bema idia laloa hereva koikoi bona kara koikoi amo namo do idia davaria, do idia koidia toho. Kerere idia vara negadiai tama sina haida idia badu haraga. Unai dainai bema mero o kekeni ta be ena ruma dekenai ia ginidae neganai ia be leiti momokani, reana ia ura ena tamana sinana do ia hamaorodia ia leiti badina be dala idia koua aksiden ia vara dainai; ia ura lasi do ia hereva momokani, do ia hamaorodia nega ia laloaboio dainai ia leiti.

Memero kekeni momo idia davaria sikuli dekenai idia kara maoromaoro be auka. Nega momo idia laloa edia houmwok be bada herea. Sikuli momo dekenai idia gaukara helulu, hebogahisi lasi. Ripoti ta ese ia hahedinaraia United States dekenai sikuli memerodia bona kekenidia rua rua amo ta ta idia kara koikoi. To, ena be ta ia laloa koikoi karana amo do ia kwalimu diba, to gabeai namo do ia davaria, a?

Hereva Koikoi edia Davana Dikana

Reana oi laloa, matahakani oi abia lasi totona oi hereva koikoi be namo. To Baibel ia gwau: “Hereva koikoi tauna be do ia roho mauri lasi.” (Hereva Lada-isidia 19⁠:⁠5) Emu koikoi be do ia hedinarai reana, bena matahakani do oi abia. Unai neganai oiemu tamana sinana do idia badu, oiemu kerere dainai, bona idia dekenai oi hereva koikoi dainai danu!

Kara koikoi sikuli dekenai idia karaia be sikuli ena dairekta ta ese inai bamona ia gwauraia, ia gwau: “Ena sikuli gaukarana dekenai ia koikoi tauna be ena kara dainai, reana ena edukeisini dalana do ia hadikaia bona moni gaukarana do ia davaria be auka.”

Momokani, ena be momo idia koikoi to edia dika ena davana idia abia haraga lasi, unai dainai edia kara idia laloa momo lasi. Bema oi kara koikoi, reana unai dainai eksam dekenai do oi kwalimu, to gabeai dahaka do ia vara? Oi diba bema oi koikoi, bema oi gwau oi nahu diba, to gau be oi nahu diba lasi, bena ta ese oi ia doria diho sinavai dekenai, oi koikoi dainai reana do oi maloa mase, ani?

To, bema namba hagaudia karana bona hereva duahidia karana dibaia dalana dekenai oi kara koikoi, dahaka do ia vara diba? Momokani, do oi mase lasi, to unai kara oi dibaia momokani lasi dainai, reana moni gaukarana namona do oi davaria diba lasi. Bema koikoi karana amo sikuli ena setifiket oi abia, unai ese oi do ia durua lasi do oi kwalimu totona. Baibel ia gwau: “Koikoi malana amo ia abia kohudia be ninoa lai ese ia odaia oho bamona.” (Hereva Lada-isidia 21⁠:⁠6) Koikoi amo idia vara hahenamodia be ninoa bamona, idia noho daudau lasi. Namona be oi stadi goadagoada bona oi koikoi lasi! Hereva Lada-isidia 21⁠:5 ia gwau: “Gaukara goadagoada tauna ena lalohadai ese edia anina idia havaraia bada.”

Hereva Koikoi bona Emu Lalona

Kekeni ta ladana Michelle ese ena taihuna ia samania koikoi, ia gwau ena herahera gauna ta ia hamakohia, to gabeai ena lalona ese ia doria ena koikoi do ia gwauraia hedinarai ena tamana sinana dekediai. Michelle ia gwau: “Nega kahirakahira ibounai lauegu lalona ia hisihisi. Lauegu tamana sinana ese lau idia abidadama henia, to lau koidia.” Unai ese ia hahedinaraia, Dirava ese taunimanima na edia lalona ia henidia, sibodia edia kara do idia laloa maoromaoro totona. (Roma 2⁠:​14, 15) Michelle ena lalona ese ia hahisia, ia koikoi dainai.

Momokani, ta ena lalona ese ia samania neganai ia dadaraia diba. To bema ia koikoi loulou, ena lalona ese ena koikoi do ia manadalaia​—⁠‘ena laloa maoromaoro dalana ia hamasea vadaeni, auri siahu herea ese ena lalona ia gabua dikadika bamona.’ (1 Timoteo 4⁠:⁠2) Oi ura emu laloa maoromaoro dalana do oi hamasea, a?

Dirava ena Lalohadai Hereva Koikoi Dekenai

“Iehova ese ia inai henidia” gaudia ta be “koikoi malana.” (Hereva Lada-isidia 6⁠:​16, 17) Momokani, Satana Diabolo be “koikoi ibounai edia tamana.” (Ioane 8⁠:44) Bona Baibel ia gwau lasi hereva koikoidia haida be dika lasi. “Koikoi be hereva momokani dekena amo ia mai diba lasi.”​—⁠1 Ioane 2⁠:⁠21.

Bema ta ia ura Dirava ena turana ai do ia lao, namona be ia kara maoromaoro. Salamo 15 ia gwau: “Iehova e, daika be oiemu guriguri kalagana lalonai do ia noho? Daika be oiemu ororo helagana dekenai do ia noho?” (Salamo 15 Siri 1) Haere be unai Salamo ena siri oredia lalodiai mani ita tahua.

“Taunimanima be inai: ia raka goevagoeva, kara maoromaoro ia karaia, bona ena lalona amo hereva momokani ia gwauraia.” (Salamo 15 Siri 2) Unai bamona tauna be sitoa ai ia henaohenao o ia kara koikoi, a? Ena tamana sinana dekenai ia hereva koikoi eiava sibona ena kara o diba ia koikoilaia, a? Lasi, ani? Unai dainai, bema oi ura Dirava ena turana ai do oi lao, namona be oi kara maoromaoro bona oi laloa maoromaoro danu.

“Iena malana amo haida ia gwauraidia koikoi lasi, ena bamona hadikaia karana ta ia karaia lasi, bona ena turana hadikaia herevana ta ia gwauraia lasi.” (Salamo 15 Siri 3) Memero o kekeni ese ta idia gwauraia dika neganai, nega ta oi ese edia hereva oi durua, a? Namona be oiemu lalona oi hagoadaia, unai bamona hereva do oi dadaraia totona!

“Kara gagevagageva tauna be ia ese ia dadaraia, to Iehova garina idia gari taudia be ia ese ia hanamodia. Ia sibona hadikaia gwauhamatana ia gwauraia neganai ma ia idau lasi.” (Salamo 15 Siri 4) Idia hereva koikoi o idia kara koikoi o lebulebu karadia idia heagilaidia memerodia bona kekenidia oi dadaraidia, badina do idia ura oi ese edia kara do oi tohotohoa. Mero ta ladana Bobby ia gwau: “Bema oi be emu turana ida umui hereva koikoi, ia ese oi do ia veria lao dika dekenai. Unai bamona turana oi abidadama henia diba lasi.” Kara maoromaoro idia badinaia taudia oi tahudia bena oi tura henidia.​—⁠Salamo 26⁠:4 itaia.

Ena gwauhamata ia haidaua lasi tauna be Iehova ese ia matauraia. Reana oi gwauhamata vadaeni Saturday ai ruma ena gaukara haida do oi karaia, to hari ta ese oi ia boiria Saturday adorahi ai do oi lao gadara ta dekenai. Oiemu gwauhamata do oi laloa lasi bona unai gaukara do oi rakatania oiemu tamana sinana do idia karaia totona, bena emu turadia do oi bamodia a, eiava emu gwauhamata do oi hamomokania, a?

“Ia ese ena moni ia henia torehai lasi davana abia totona, bona kerere lasi tauna hadikaia monina danu ia abia lasi. Unai bamona ia karaia tauna be do ia marere lasi ela bona hanaihanai.” (Salamo 15 Siri 5) Mataganigani dainai taunimanima momo idia kara koikoi, ani? Eksam negadiai idia kara koikoi taudia idia ura dikadika maka namona do idia abia, to idia stadi lasi unai maka abia totona. Lalo-ani monina idia abia taudia ese moni idia laloa bada, kara maoromaoro idia laloa maragi.

Momokani, taunimanima haida idia gwau, politikol bona bisinesi taudia haida ese taravatu maorodia idia hagagevaia sibodia edia namo habadaia totona. To idia kwalimu momokani, a? Salamo 37⁠:2 ia gwau: “Rei bamona do idia kakoro haraga, bona rei matamatana bamona do idia ore.” Bema ma haida ese edia koikoi idia davaria lasi bona idia samanidia lasi, gabeai Iehova Dirava ese do ia kota henidia. To, Dirava ena turadia be ‘do idia marere lasi ela bona hanaihanai.’ Do idia mauri hanaihanai.

Lalo-Maoromaoro Oi Abia

Unai dainai, namona be koikoi karadia iboudiai ita dadaraidia, ani? Aposetolo Paulo ese ia sibona bona ena bamodia be inai bamona ia gwauraidia: “Aiemai lalona be maoromaoro Dirava ena vairanai.” (Heberu 13⁠:18) Unai hegeregerena, emu lalona ese hereva koikoi ia dadaraia, a? Bema lasi, Baibel bona Gima Kohorona bona Noga! magasin bona Baibel idia gwauraia bukadia ma haida oi stadilaidia, oiemu lalona do oi hadibaia totona.

Bobby be unai bamona ia karaia dainai namo ia davaria. Hari ia hereva koikoi lasi ena kerere hunidia totona. Ena lalona ese ia doria, ena kerere be ena tamana sinana do ia hamaorolaidia mai ena momokani ida totona. Nega haida matahakani ia abia, ena kerere ena davana unai. To ia gwau, ia hereva momokani dainai ‘ena lalona be ia namo.’

Nega haida, ita hereva momokani be auka. To ena lalona ia hadaia do ia hereva momokani tauna ena lalona do ia goeva noho, ena turadia korikoridia ese do idia moalelaia, bona ‘Iehova ena guriguri kalagana ai do ia noho’ diba! Kara maoromaoro be mai ena davana namona, bona ia be dala maorona Keristen taudia iboudiai dekediai.

Inai Henanadai Herevalaia

◻ Edena bamona negadia ai ta ia laloa do ia hereva koikoi be namo?

◻ Dahaka dainai hereva koikoi bona kara koikoi ese namo idia havaraia lasi? Haheitalai ta be oi itaia karana o oi karaia karana ena sivarai amo mani oi gwauraia.

◻ Hereva koikoi tauna ese sibona ena lalona be edena bamona ia hadikaia?

◻ Salamo 15 mani oi duahia. Unai siri edia anina hereva momokani gwauraia karana dekenai be dahaka?

◻ Mero o kekeni ese lalo-maoromaoro edena bamona ia abia diba?

[Blurb on page 212]

‘Ena sikuli gaukarana dekenai ia koikoi tauna be reana ena dala ia hadikaia’

[Blurb on page 216]

Baibel ia gwau lasi hereva koikoidia haida be dika lasi

[Picture on page 214]

Memero kekeni be edia gwau-edeede idia koikoilaia toho negadia momo ai, edia tamadia sinadia idia diba idia koikoi