Karoa 26
Kaperanaum Ia Lou Henia
IESU ena sivarai be gabu momo dekediai idia kamonai vadaeni dainai, taunimanima lasi gabuna dekenai ia noho neganai taunimanima be ia dekenai idia lao. To dina haida murinai, Kaperanaum hanuana ia lou henia. Ia lou mai vadaeni sivaraina idia boiboilaia, unai dainai hutuma be ia noholaia rumana dekenai idia mai. Farisea taudia bona Taravatu hadibaia taudia haida be Ierusalem amo idia mai.
Hutuma idia mai dainai ruma ia honu, ma ta ia vareai diba lasi. Bena hoa gauna ta ia vara; unai gau be mai anina bada, badina ia dainai taunimanima idia diba Iesu be mai ena siahu, taunimanima edia hisihisi ena badina do ia kokia bona mauri namona do ia henidia.
Iesu ese hutuma ia hadibadia noho lalonai, tatau 4 ese marere diba lasi gorerena tauna ta geda dekenai idia huaia mai. Idia ura Iesu ese do ia hamauria, to madi hutuma dainai ruma lalonai idia vareai diba lasi. Vadaeni, idia daekau ruma ena guhi dekenai, matu idia karaia, bena gorere tauna mai ena geda danu idia hadihoa Iesu vairanai.
Edia kara dainai Iesu ia badu lasi, to edia abidadama ia moalelaia. Vadaeni, gorere tauna ia hamaoroa, ia gwau: “Natugu, oiemu kara dika be lau gwauatao vadaeni.” Taravatu hadibaia taudia bona Farisea taudia idia laloa Iesu be siahu lasi taunimanima edia kara dika do ia gwauatao. Edia lalona dekenai idia gwau: “Badina dahaka inai tau ia hereva unai bamona? Inai be Dirava ena ladana ia hadikaia. Daika ese Dirava hegeregere kara dika ia gwauatao diba? Dirava sibona mo.”
Iesu be edia lalohadai ia diba dainai ia gwau: “Badina dahaka umui emui lalona dekenai lauegu kara umui gwau henia? Edena hereva be ia haraga, gorere tauna lau hamaoroa, ‘Oiemu kara dika be lau gwauatao vadaeni,’ o, ‘Toreisi, oiemu geda oi abia isi, oi raka lao.’ ”
Bena idia vairadiai Iesu ese hoa karana ta ia karaia, unai amo ia hahedinaraia ena siahu be hegeregere tanobada dekenai kara dika ia gwauatao, bona ia ese taunimanima iboudiai ia hereadia. Gorere tauna ia hamaoroa, ia gwau: “Lau hamaoroa oi, oi toreisi, oiemu geda oi abia isi, bona oi lao ruma dekenai.” Bena nega tamona ia toreisi, ena geda ia abia isi, bona murimuri dekenai ia raka! Taunimanima idia hoa, Dirava idia hanamoa, idia gwau: “Guna inai bamona ita itaia lasi!”
Inai oi itaia a: Iesu ese kara dika bona gorere ia herevalaidia hebou, bona gorere tauna ena kara dika ia gwauatao neganai ia namo lou, ani? Baibel ia gwau Adam ia kara dika bena iena kara dika ese ia havaraia gaudia, gorere bona mase, be ita ibounai dekenai idia hanai. To Dirava ena Basileia lalonai do ia lohia neganai, Iesu ese Dirava idia lalokau henia bona idia hesiai henia taudia iboudiai edia kara dika do ia gwauatao, bena gorere iboudiai do idia ore. Unai be namo herea, ani? Mareko 2:1-12; Luka 5:17-26; Mataio 9:1-8; Roma 5:12, 17-19.
▪ Hoa gauna badana ta be edeseniai bona edena negai ia vara?
▪ Edena bamona marere diba lasi gorerena tauna be Iesu dekenai idia mailaia?
▪ Dahaka dainai ita ibounai be mai eda kara dika, to edena dala amo Iesu ia hahedinaraia iseda kara dika ia gwauatao diba bona mauri namona ita davaria diba?