Iesu ena Mauri bona Gaukara

Kaperanaum Ia Lou Henia

IESU ena sivarai be gabu ibounai dekenai ia lao vadaeni dainai, taunimanima lasi gabuna dekenai ia noho neganai taunimanima be ia dekenai idia lao. Dina haida murinai, Kaperanaum hanuana ia lou lou mai vadaeni sivaraina idia harorolaia, unai dainai hutuma be ena ruma dekenai idia mai. Farisea bona Taravatu hadibaia taudia be Ierusalem amo idia mai.

Hutuma idia mai dainai ruma lalonai bona iduara badinai danu gabu be lasi. Unai dina dekenai hoa gauna ta ia vara, bona ia be mai anina bada, badina ia dainai taunimanima idia diba, Iesu be mai ena siahu, taunimanima edia hisihisi ia havaraia gauna do ia kokia bona mauri namona do ia henidia.

Iesu ese hutuma ia hadibadia noho lalonai, tatau 4 ese marere diba lasi gorerena tauna ta geda latanai idia huaia mai. Idia ura Iesu ese do ia hanamoa, to hutuma dainai ruma lalonai idia vareai diba lasi. Idia lalohisihisi, to idia hekwarahi noho. Idia daekau ruma ena guhi dekenai, matu idia karaia, bena gorere tauna mai ena geda danu idia hadihoa Iesu vairanai.

Edia kara dainai Iesu ia badu lasi, to edia abidadama ese ia hamoalea. Vadaeni, gorere tauna ia hamaoroa, ia gwau: “Natugu, oiemu kara dika be lau gwauatao vadaeni.” Taravatu hadibaia taudia bona Farisea taudia idia laloa Iesu be siahu lasi taunimanima edia kara dika do ia gwauatao. Idia laloa momo, idia gwau: “Daika ese Dirava hegeregere kara dika ia gwauatao diba? Dirava sibona mo.”

Iesu ia diba unai bamona idia laloa, unai dainai ia gwau: “Edena hereva be ia haraga, gorere tauna lau hamaoroa, ‘Oiemu kara dika be lau gwauatao vadaeni,’ o, ‘Toreisi, oiemu geda oi abia isi, oi raka lao ruma dekenai’?” Idia do haere lasi neganai, Iesu ese gorere tauna ia hamaoroa, ia gwau: “Lau hamaoroa oi, oi toreisi, oiemu geda oi abia isi, bona oi lao ruma dekenai.” Nega tamona ia toreisi, ena geda ia abia isi, bona murimuri dekenai ia raka! Taunimanima idia hoa, idia gwau: “Guna inai bamona ita itaia lasi!”

Oi itaia a, Iesu ese kara dika bona gorere ia herevalaidia hebou bona gorere tauna ena kara dika ia gwauatao neganai ia namo lou ani? Bible ia gwau, iseda tubuna ginigunana, Adam ia kara dika bona iena kara dika ese gorere bona mase ia havaraia, bona unai be ita ibounai dekenai ia hanai. Dirava ena Basileia ena lohia siahuna henunai, Iesu ese Dirava idia lalokau henia bona idia hesiai henia taudia iboudiai edia kara dika do ia gwauatao, bena gorere iboudiai do idia ore. Unai be helaro namona, ani? Mareko 2:​1-12; Luka 5:​17-26; Mataio 9:​1-8; Roma 5:​12, 17-19.

◆ Dahaka ia vara guna bena hoa gauna ta ia vara?

◆ Edena bamona marere diba lasi gorerena tauna be Iesu dekenai ia mai?

◆ Dahaka dainai ita ibounai be kara dika taudia, to edena dala amo Iesu ia hahedinaraia iseda kara dika ia gwauatao diba bona mauri namona ita davaria diba?