4
Kerisendom ese Dirava Bona Baibel Ia Badinadia Lasi
1 Sibodia na Baibel badinaia taudia idia gwauraidia taudia edia kara dika dainai, tano momo ai taunimanima ese Baibel idia dadaraia bona idia matauraia lasi. Tano haida ai idia gwau Baibel dainai tuari idia vara bona ia be tau kurokurodia edia buka, edia lohia siahuna ia durua bukana. To unai lalohadai iboudiai be kerere.
2 Baibel, Midel Ist ai idia torea, ese idau besedia biagudia totona nega daudau lalonai Keristen tomadihona ena ladanai idia karaia tuaridia ia gwauraidia namo lasi. Bema Baibel oi duahia, bona Keristen tomadihona momokanina herevadia, Iesu ese ia gwauraidia herevadia, bema oi dibadia, do oi diba Baibel ese tuari, kara dika, bona idau taudia hadikadia karadia ia gwauraidia dika. Kerere be mataganigani taudia edia, Baibel ena lasi. (1 Korinto 13:1-6; Iakobo 4:1-3; 5:1-6; 1 Ioane 4:7, 8) Mataganigani taudia, Baibel ena sisiba namona idia dadaraia taudia, edia kara dika dainai Baibel ena hahenamo do oi reaia be namo lasi.
3 Kerisendom taudia bona besedia ese Baibel idia badinaia lasi. Tanobada ena kahana ta be Kerisendom idia gwauraia, idia gwau Keristen tomadihona ia bada gabuna be unai. Kerisendom ena kahana badana be West tanodia mai edia tomadiho oreadia, lagani 300 C.E. murinai idia hedinarai matamaia oreadia. Nega daudau herea lalonai Kerisendom be mai ena Baibel, bona ena haroro taudia bona ena misinari taudia idia gwau idia hahedibalaia, ma idia gwau idia be Dirava ena gwaukau taudia. To hereva momokani idia hahedibalaia a? Edia kara be momokani Dirava bona Baibel edia hereva hegeregeredia, a? Kerisendom lalonai Keristen tomadihona ia bada a? Lasi. Kerisendom ena sivarai ese ia hahedinaraia, ena tomadiho be lagani 300 C.E. murinai ia bada negana amo ema, ia ese Dirava bona Baibel ia inai henidia.
Hahediba Herevadia Kereredia
4 Kerisendom ena hahediba herevadia badadia be Baibel ena amo lasi to idaunega goridia amo—Greece, Aigupito, Babulono, bona ma haida edia gori unai. Taunimanima edia lauma idia mase diba lasi, pegatori o hel ena lahi lalonai hisihisi idia ania, bona Dirava toi be Tamona lalonai—inai hereva iboudiai be Baibel lalonai lasi.
5 Dirava ese kara dika taudia be hel ena lahi lalonai do ia hahisidia bada ela bona hanaihanai herevana be edena bamona oi laloa? Momo ese idia badulaia bona idia abia dae lasi. Unai hereva dika rohorohona be Baibel ena hereva hegeregerena lasi; Baibel ia gwau “Dirava be lalokau.” (1 Ioane 4:8) Ma ia hahedinaraia goevagoeva unai lalohadai be Siahu Ibounai Diravana ese ia laloa lasi.—Ieremia 7:31; 19:5; 32:35.
6 Tomadiho oreadia momo, Kerisendom ena danu, be idia gwau taunimanima be mai edia mase diba lasi laumadia, mase neganai guba o hel idia lao. Inai be Baibel ena hereva ta lasi. Baibel ia gwau: “Mauri taudia idia diba do idia mase; to mase taudia be gau ta idia diba lasi, . . . badina be oi lao henia gabuna, Sheol [mase gurina], lalonai be gaukara ta lasi, lalohadai ta lasi, lalo-parara ta lasi, bona aonega ta lasi.” (Kohelete 9:5, 10) Ma ia gwau taunimanima ta ia mase neganai, “ena tano ia lou henia; unai dina ai ena lalohadai idia ore.”—Salamo 146:4.
7 Mani oi laloa, Adam bona Eva ese Dirava ena taravatu idia utua neganai, doko diba lasi maurina ia henidia lasi edia kerere ena davana. Unai bamona maurina be davana namona! To ia hamaorodia ‘tano do idia lou henia, badina be tano amo idia mai.’ Adam ia hamaoroa, ia gwau: “Oi be tano kahuna; tano kahuna danu do oi lou henia.” (Genese 3:19) Unai hegeregerena, lauma ia mase diba lasi herevana be Baibel lalonai lasi, to Kerisendom ese Keristen lasi besedia gunadia edia amo ia abia.
8 Kerisendom ese danu ia gwau Dirava be toi tamona Diravana. To unai hereva be Baibel lalonai ita davaria lasi. Isaia 40:25 ai Dirava ia gwau: “Daika ida lau do umui hahegeregerea, bena ia ida do lau hegeregere?” Ta lasi, ani? Bona Salamo 83:18 ia gwau: “Oiemu ladana be Iehova, oi mo sibona be Atai Herea tanobada ibounai ataiai.”—Ma Isaia 45:5; 46:9; Ioane 5:19; 6:38; 7:16 danu itadia.
9 Baibel ena hahediba herevadia, Dirava bona ena palani gwauraidia herevadia, ita lalo-pararalaidia bona ita abidia dae be haraga. To Kerisendom ena tomadiho oreadia edia hahediba herevadia be unai bamona lasi. Bona idia ese danu Baibel idia gwaua tubu.
Kara Dikadia
10 Ena hereva koikoidia amo sibona lasi, to ena kara amo danu, Kerisendom ese Dirava bona Baibel ia hadikadia. Haroro taudia bona edia orea taudia edia kara, gunaguna amo ema bona hari idia karaia, be Baibel ena Dirava ena ura hegeregerena lasi, bona Keristen tomadihona ia hamatamaia tauna, Iesu Keriso, ena hereva bona ena kara hegeregeredia lasi.
11 Iesu ese ena orea taudia ia hadibadia tanobada ena politik bona ena tuari lalodiai do idia vareai lasi. Ia ese danu ia hadibadia maino do idia ura henia, taravatu do idia badinadia, bese idauidau taudia do idia lalokau henidia, bona edia lalodia do idia hegeregere edia mauri do idia atodia diho haida dainai.—Ioane 15:13; Kara 10:34, 35; 1 Ioane 4:20, 21.
12 Iesu ia gwau lalokau be toa ta, ia hahedinaraia Keristen taudia momokanidia be idau, Keristen taudia koikoidia hegeregeredia lasi. Ena orea taudia ia haduadia, ia gwau: “Umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia.”—Ioane 13:34, 35; 15:12.
13 To, nega daudau lalonai, Kerisendom ena haroro taudia be politik ai idia vareai bona edia bese edia tuari idia durudia, Kerisendom besedia idia tuari heheni negadiai danu. Kaha rua ai idia gini, Dirava idia noia edia bese do ia hakwalimudia, bona tomadiho oreana ta taudia ese sibodia edia orea taudia idau besena ta amo be idia aladia mase. To Baibel ia gwau unai be Satana ena natuna edia kara, Dirava ena natuna edia lasi. (1 Ioane 3:10-12, 15) Haroro taudia bona edia orea taudia idia gwau idia be Keristen taudia, to Iesu Keriso ena hereva idia dadaraia; ia ese ena orea taudia ia haduadia ‘tuari kaia do idia atoa siri.’—Mataio 26:51, 52.
14 Nega daudau lalonai Kerisendom ena tomadiho oreadia be ena gavamani idauidau ida idia gaukara hebou, unai bese ese idau besedia idia hadareredia, edia hesiai taudia ai idia halaodia, bona idia hahemaraidia negadiai. Africa ai unai bamona idia karaia. China ai danu unai bamona idia karaia, Opium Tuaridia negadia lalodiai bona Boxer Tuarina negana lalonai.
15 Dibura negana daudauna lalonai Kerisendom ena tomadiho oreadia ese edia hereva idia abidia dae lasi taudia idia dagedage henidia, idia hahisidia bada, bona idia aladia mase danu. Inkwisisen kotadia be lagani 600 bamona lalodiai idia karadia negadiai, kerere lasi taudia idia hahisidia bada bona idia aladia mase. Unai kara dika idia karadia taudia be haroro taudia bona edia orea taudia, idia iboudiai idia gwau idia be Keristen taudia. Idia ese danu Baibel idia haorea toho, hanua taudia ese do idia duahia diba lasi totona.
Keristen Lasi
16 Kerisendom ena bese bona ena tomadiho oreadia be Keristen lasi. Idia be Dirava ena hesiai taudia lasi. Iena Buka Helaga ese inai bamona ia gwauraidia: “Idia gwau Dirava idia diba, to edia kara dekena amo idia ese Dirava idia negea. Idia be dika bada, Dirava idia kamonai henia lasi, bona kara namona ta idia karaia diba lasi.”—Tito 1:16.
17 Iesu ia gwau ita ese tomadiho koikoi be ena huahua amo do ita dibaia diba. Ia gwau: “Umui naria namonamo, peroveta koikoi taudia garina. Idia mai noho, edia toana be mamoe bamona, to edia lalona be uda sisia dagedage bamona. Edia kara toana dekena amo do umui diba. . . . Au namona ena huahua be ia namo, to au dikana ena huahua be ia dika. Au namona ese huahua dika ia havaraia diba lasi, bona au dikana be huahua namo ia havaraia diba lasi. . . . Unai dainai peroveta koikoi taudia edia kara dekena amo do umui diba.”—Mataio 7:15-20.
18 Edia hahediba herevadia bona edia kara amo, Kerisendom ena tomadiho oreadia ese idia hahedinaraia Baibel idia abia dae lasi, Dirava garina idia gari lasi, bona idia be Keristen oreadia lasi. Dirava bona Baibel idia badinadia lasi. Unai dala amo idia ese taunimanima milion milion idia habadudia, bena unai dainai unai taunimanima ese Dirava idia abidadama henia lasi.
19 To, ena be Kerisendom ena tomadiho oreadia be idia hegeregere lasi, to Baibel bona Dirava be idia hegeregere. Baibel ia gwau Atai Herea Diravana ia mauri noho bona ita bona eda nega vaira be ia ese ia laloa. Lalo-momokani taudia, kara maoromaoro bona maino idia ura henidia taudia, edia davana namona do ia henidia dalana be Baibel ese ia gwauraia. Ia ese danu Dirava be kara dika bona hisihisi ia koudia lasi ena badina ia gwauraia, bona taunimanima idia hadikadia taudia, bona idia gwau iena hesiai idia lao henia to idia lao henia lasi taudia, na tanobada amo do ia haoredia dalana danu ia gwauraidia.
[Study Questions]
1, 2. Dahaka dainai taunimanima haida ese Baibel idia matauraia lasi, to Baibel be dahaka ia gwau?
3. Kerisendom ena sivarai ese dahaka ia hahedinaraia?
4, 5. Dahaka hahediba herevadia kereredia be dubu oreadia ese idia hahedibalaidia?
6. Baibel ese mase diba lasi laumana herevana edena bamona ia hakoikoia?
7. Adam bona Eva ese Dirava ena taravatu idia utua dainai, edia dika davana be dahaka?
8. Baibel ese Kerisendom ena Toi Tamona Diravana herevana edena bamona ia hakoikoia?
9. Baibel ena hahediba herevadia be edena bamona, bona Kerisendom ena be edena bamona?
10, 11. Edena dala ai Baibel ena hahediba herevadia edia anina be idau, Kerisendom ena tomadiho oreadia edia kara hegeregeredia lasi?
12. Iesu ia gwau dahaka toa amo Keristen taudia momokanidia do idia dibadia?
13, 14. Dahaka ese ia hahedinaraia Kerisendom ena tomadiho oreadia be Dirava ena lasi?
15. Kerisendom ese dahaka kara dikadia ia karadia vadaeni?
16, 17. Dahaka dainai ita gwau diba dubu oreadia be Keristen lasi?
18. Kerisendom ena hahediba herevadia bona ena kara dainai dahaka ia vara?
19. Kerisendom ia hegeregere lasi, anina be Dirava bona Baibel danu idia hegeregere lasi, a?
[Pictures on page 17]
Dante ena “Hel”
Kerisendom ena Toi Tamona Diravana
[Credit Line]
Doré’s illustration of Barrators—Giampolo for Dante’s Divine Comedy
Hindu toi tamona diravana
[Credit Line]
Courtesy of The British Museum
Aigupito ena toi tamona diravana
[Credit Line]
Museo Egizio, Turin
[Pictures on page 18]
Haroro taudia ese Iesu ena hereva idia badinaia lasi. Kaha rua ai tuari idia durudia
[Credit Line]
U.S. Army photo