8
Mauri Hanaihanai Paradaiso Tanobadana Ai
1 Dirava ese kara dika bona hisihisi do ia haoredia bona ena guba Basileiana henunai ena tanobada matamatana do ia havaraia neganai, mauri be edena bamona? Ia gwauhamata ‘ena imana do ia kehoa, mauri gaudia iboudiai edia ura gaudia do ia henidia.’—Salamo 145:16.
2 Emu ura be dahaka? Oi ura do oi moale, bona gaukara namona, mauri durua gaudia momo, bona noho gabuna mai hairaina do oi abidia, bona bese iboudiai do idia maino, bona kara kereredia, gorere, hisihisi, bona mase do idia ore, ani? Bona lauma gaudia moalelaidia karana be edena bamona? Unai gau iboudiai be kahirakahira do idia vara Dirava ena Basileia henunai. Baibel ena peroveta herevadia, tanobada matamatana ai do idia vara gaudia herevadia, mani oi lalodia.
Maino Korikori Do Ia Vara
3 “ [Dirava ese] tuari ia hadokodia ela bona tanobada dokona. Peva ia hamakohia bona io ia utua maragimaragi; [tuari] kariota na lahi ai ia aradia.”—Salamo 46:9.
4 “Edia tuari kaiadia do idia hododia, tano geia auridia ai do idia halaodia . . . Bese ta ese tuari kaiana do ia abia isi lasi, bese ta hadikaia totona, bona tuari daladia do idia hadibalaidia lou lasi.”—Isaia 2:4.
5 “Manau taudia ese tano do idia abia, bona maino bada do idia moalelaia dikadika.”—Salamo 37:11.
6 “Tanobada ibounai ia laga-ani vadaeni, ena hekwarahi ia ore vadaeni. Taunimanima idia boiboi mai edia moale ida.”—Isaia 14:7.
Taunimanima Bona Animal Idia Maino
7 “Uda sisiana be mamoe natuna ida do idia noho, bona lepadi be nani natuna ida do idia hekure, boromakau natuna bona leona bona ubu-ubu gauna do idia noho hebou; bona mero maragina ta ese do ia hakaudia. Boromakau hahinena bona bea do idia aniani hebou; edia natudia do idia hekure hebou. Bona leona ese rei kakoro do ia ania, boromakau maruanena bamona. Rata ia inua merona be gaigai ena guri latanai do ia gadara; bona rata ia dadaraia vadaeni merona ese ena imana be gaigai dikana ena guri latanai do ia atoa. Ta do idia hahisia lasi eiava do idia hadikaia lasi.”—Isaia 11:6-9.
8 “Unai dina ai kontraka ta do lau karaia uda boromadia bona atai manudia bona tano ai idia rau gaudia dainai . . . bena mai edia maino ida do idia hekure.”—Hosea 2:18.
Mauri Hanaihanai Goevadaena
9 “Unai neganai matakepulu taudia edia matadia do idia papa, bona taia kudima taudia edia taiadia do idia hekeho. Unai neganai aena dika tauna do ia daekau dia bamona, bona mu tauna ena malana do ia boiboi mai ena moale ida.”—Isaia 35:5, 6.
10 “ [Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.”—Apokalupo 21:4.
11 “Ta do ia gwau lasi: ‘Lau gorere.’ ”—Isaia 33:24.
12 “Ena hidiona do ia matamata, tauhau ena bamona; ena tauhau negana ena goada dinadia do ia lou henidia.”—Iobu 33:25.
13 “Dirava ena harihari gauna davana lasi be mauri hanaihanai, Iesu Keriso iseda Lohiabada . . . dainai.”—Roma 6:23.
14 “Idia abidadama henia taudia ibounai be . . . mauri hanaihanai do idia abia.”—Ioane 3:16.
Mase Taudia Do Idia Mauri Lou
15 “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.”—Kara 24:15.
16 “Nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni . . . do idia toreisi.”—Ioane 5:28, 29.
17 “Davara lalonai idia mase vadaeni taudia be davara ese idia ia henia daekau lou. Bona Mase, bona mase taudia edia gabu ese idia lalonai idia koua noho taudia idia henia daekau lou.”—Apokalupo 20:13.
Tanobada be Paradaiso ai Do Ia Lao
18 “Hahenamo medudia badadia do idia diho. Huahua audia be edia huahua do idia atodia, bona tano ese ena anina do ia havaraia, bona tano taudia be edia tano ai do idia noho namonamo.”—Esekiel 34:26, 27.
19 “Tano ena anina do ia vara goevagoeva; Dirava, iseda Dirava, ese ita do ia hanamoa.”—Salamo 67:6.
20 “Tano gagaena bona tano kaukauna do idia moale; tano gagaena do ia moale, bona do ia burea, safaron palaoapalaoana hegeregerena.”—Isaia 35:1.
21 “Umui vairanai ororo badadia bona maragidia do idia boiboi mai edia moale ida, bona tano paka audia iboudiai ese imadia do idia patapatadia. Au ginigini gabuna ai beroso auna do ia tubu, bona ava ginigini gabuna ai keroro auna do ia tubu.”—Isaia 55:12, 13.
22 “Ita ruaosi Paradaisa dekenai do ita ginidae.”—Luka 23:43.
Ruma Namodia
23 “Ruma do idia haginidia bena do idia noholaidia . . . Dia idia ese do idia haginidia, bena idauna ta ese do ia noholaidia, . . . Egu abi-hidi taudia ese edia imadia gaukaradia do idia moalelaidia daudau. Do idia hekwarahi kava lasi, bona edia natudia do idia havaradia lasi, dika ena.”—Isaia 65:21-23.
24 “Ta ta ena vine auna ena vine auna bona ena fig auna ena fig auna henudiai do idia helai, bona tau ta ese do ia hagaridia lasi.”—Mika 4:4.
Paradaiso ai Oi Mauri Hanaihanai Diba
25 Helaro namo hereana unai! Hari helaro, Dirava ena tanobada matamatana lalonai eda hekwakwanai iboudiai do idia ore helarona, bema ita dogoatao, eda mauri be mai edia anina korikori! “Gau gunadia do idia lalodia lou lasi, do idia lalodia tao lasi.” (Isaia 65:17) Bona unai negai do ita mauri ela bona hanaihanai: “ [Dirava] ese mase do ia haorea ela bona hanaihanai.”—Isaia 25:8.
26 Oi ura unai Paradaiso tanobadana matamatana ai do oi mauri hanaihanai a? Dirava ese oi do ia lalo-namo henia bona inai tanobada dokona amo do oi roho mauri bena tanobada matamatana ai do oi vareai totona, Iesu ese ia gwauraia karana do oi karaia be namo. Dirava ia guriguri henia, ia gwau: “Mauri hanaihanai be inai, idia ese oi Dirava momokani tamona do idia diba, bona Iesu Keriso danu, oi ese oi siaia tauna.”—Ioane 17:3.
27 Unai dainai, Baibel ta oi abia, inai buka ena hereva oi hamomokanidia. Inai Baibel herevadia idia tahudia bona idia gwauraidia taudia oi tahudia. Tomadiho koikoi oreadia, Baibel ena hereva idia badinaia lasi oreadia, be oi rakatanidia. Dirava ena palani hegeregerena tanobada ai do oi mauri hanaihanai diba dalana be oi dibaia. Bona Dirava ena Buka Helaga ena hereva oi abia dae: “Tanobada, mai ena gau dikadia, . . . be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”—1 Ioane 2:17.
[Questions]
1, 2. Dirava ena Basileia henunai mauri be edena bamona?
3-6. Dahaka dainai ita diba tanobada matamatana ai taunimanima be maino ai do idia noho?
7, 8. Taunimanima bona animal danu be edena bamona do idia maino heheni?
9-14. Gorere bona mase do idia vara a?
15-17. Dahaka helaro mase taudia ediai be ia noho?
18-22. Tanobada ibounai be dahaka ai do idia halaoa?
23, 24. Dahaka dainai ita diba iboudiai ese ruma namodia do idia noholaidia?
25. Dahaka helaro namo hereana ita abia nega vaira ena?
26. Dirava ena tanobada matamatana ai do oi mauri hanaihanai totona, dahaka do oi karaia be namo?
27. Emu ahuna Dirava ena palani lalonai abia totona, dahaka do oi karaia be namo?
[Picture on page 31]
Dirava ena palani, tanobada paradaiso havaraia lou gauna, be kahirakahira do ia hagugurua