Karoa 19
Aramagedono Murinai Paradaiso Do la Vara
TAUNIMANIMA momo be inai hereva “Aramagedono” dekenai idia gari. Haida idia gwau anina be Tuari Badana Ihatoina. To Bible ia gwau Aramagedono be gabu ta, unuseniai Dirava ese tuari maorona ta do ia karaia. (Apokalupo 16:14, 16) Inai tuari amo Dirava ese kara maoromaoro negana matamatana ena dala do ia kehoa.
2 Aramagedono be taunimanima edia tuari bamona lasi, badina be ia lalonai kara dika taudia sibodia do idia mase. (Salamo 92:7) Iehova Dirava ese kota do ia karaia bona ena taravatu maoromaorodia mai edia ura danu idia utua taudia do ia kokidia. Hari inai nega lalonai taunimanima momo idia gwau sihari kava karadia, inuinu kekero bona koikoi karadia be kerere lasi. To Dirava vairanai unai kara be dika. Unai dainai, unai kara idia karaia noho taudia be Aramagedono dekenai do ia hamauridia lasi. (1 Korinto 6:9, 10; Apokalupo 21:8) Bema Dirava ena taravatu idia diba hari, edia kara idia haidaua be gau badana.
3 Aramagedono murinai inai tanobada dikana ena kahana ta do ia noho lasi. Dirava ena ura idia karaia taudia sibodia do idia mauri noho. (1 Ioane 2:17) Iesu ia gwau unai be Noa ena nega bamona. (Mataio 24:37-39; 2 Petro 3:5-7, 13; 2:5) Aramagedono murinai, gavamani tamona, Dirava ena basileia, ese tanobada do ia lohiaia. Satana bona ena demoni idia kokidia vadaeni. (Apokalupo 20:1-3) Kamonai taudia be Bible ena gwauhamata hegeregerena do idia abia hahenamo haida be rau gabedia dekenai ai torelaia.
TAUNIMANIMA IBOUDIAI BE MAINO AI DO IDIA NOHO
“Natuna ta ia vara, ita eda, natuna merona ta ia henia ita dekenai; bona lohia siahuna be iena pagana dekenai do ia atoa. Bona iena ladana do idia hatoa . . . Maino Lohiana. Iena lohia siahuna bada bona maino do idia doko lasi.”—Isaia 9:6, 7.
“Iena nega lalonai kara maoromaoro tauna do ia tubu, bona maino bada herea do ia noho ela bona hua ia ore. Bona davara ta amo ela bona davara ta, do ia lohia; sinavai badana ela bona tanobada dokodia danu.”—Salamo 72:7, 8.
TUARI DO IDIA DOKO
“Umui mai, Iehova ena gaukara umui itaia; hoa karadia tanobada dekenai ia karaia vadaeni. Tuari ia hadokodia ela bona tanobada dokona.”—Salamo 46:8, 9.
IBOUDIAI ESE RUMA BONA GAUKARA NAMODIA DO IDIA ABIA
“Ruma do idia haginidia bena do idia noholaidia . . . do idia haginidia lasi bena idauna ta ese do ia noholaidia; bona do idia hadohado lasi bena idauna ta ese do ia ania . . . lau abiahidi taudia ese edia imana edia gaukara ena anina ibounai do idia abia. Do idia hekwarahi kava lasi, bona natudia do idia havaradia lasi, dika totona; badina be idia be Iehova ena abiahidi natudia bona edia natudia danu idia danu.”—Isaia 65:21-23.
DAGEDAGE BONA KARA DIKADIA DO IDIA ORE
“Kara dika taudia do idia ore . . . Bona nega sisina murinai kara dika tauna do ia noho lasi; ena gabu do oi tahua, to do oi davaria lasi.”—Salamo 37:9.10.
“To kara dika taudia be tanobada amo do idia utudia oho, bona koikoi taudia be tanobada amo do idia ragaia oho.”—Hereva Lada-isidia 2:22.
TANOBADA IBOUNAI BE PARADAISO
Iesu ia gwau: “Oi be lau danu Paradaiso dekenai do ita noho.”—Luka 23:43.
“Kara maoromaoro taudia ese tanobada do idia abia, bona do idia noholaia ela bona hanaihanai.”—Salamo 37:29.
TAUNIMANIMA IBOUDIAI ESE ANIANI NAMODIA MOMO DO IDIA ANIA
“Tuari oreadia edia Dirava Iehova ese aria namo herea do ia karaia bese iboudiai edia: aniani mai digarana, uaina namona.”—Isaia 25:6.
“Aniani bada herea be tanobada dekenai do ia tubu; ororo edia dorina dekenai aniani momo do ia vara.” “Tano ena anina do ia vara badabada; Dirava, iseda Dirava, ese ita do ia hanamoa.”—Salamo 72:16; 67:6.
4 Tanobada be paradaiso ai do ia lao, tau ginigunana Adam ese ia noholaia gabuna hegeregerena. (Genese 2:8; Luka 23:43) Oi ura unai bamona gabu dekenai oi noho, ani? Tuari, kara dika bona dagedage do idia ore. Dina ai eiava hanuaboi ai do oi loaloa diba, kara dika taudia garidia do oi gari lasi, badina be idia ore vadaeni.—Salamo 37:35-38.
5 Anina be politikol taudia koikoidia bona moni idia ura bada bisinesi biagudia ese taunimanima do idia hahisidia lasi. Taunimanima ese takisi moni momo do idia henia lasi, tuari kohu ena davana karaia totona. Ta do ia ogogami lasi. Haida hari idia lalo-hekwarahi, idia be gaukara lasi dainai, eiava gau momo edia davana idia bada daekau dainai, to unai bamona lalo-hekwarahi gaudia iboudiai do idia ore. Taunimanima iboudiai be gaukara namona do idia davaria, bona edia hekwarahi ena anina do idia abia.
6 Aramagedono amo idia roho mauri taudia ese inai nega gunana ena momoru do idia kokia guna. Bena Basileia ena lohia siahuna henunai tanobada do idia biru henia bona noho gabuna mai hairaina ai do idia halaoa. Unai gaukara do idia moalelaia bada! Dirava ese edia gaukara ibounai do ia hanamoa. Dina bona medu be edia nega korikori ai do ia henidia dainai, edia tano ese anina bada do ia havaraia bona edia animal do idia momo. Danu, edia animal be gorere bona dika amo do ia naridia.
7 Salamo torea tauna ese lalokau Diravana inai bamona ia hereva henia, ia gwau: “Oi emu imana oi kehoa bona mauri gaudia iboudiai edia ura gaudia oi henidia.” (Salamo 145:16) Unai hegeregerena, Dirava ese ia idia gari henia taudia edia ura gaudia maorodia iboudiai do ia henidia. Tanobada paradaisona lalonai Dirava ese hahenamo momo do ia henidia. Aposetolo Petro ia gwau: “Ita be guba matamatana bona tanobada matamatana, [Dirava] ena gwauhamata hegeregerena, ita naria; idia lalodiai kara maoromaoro do ia noho.”—2 Petro 3:13; Isaia 65:17; 66:22.
8 Inai “guba matamatana” be hua matamatana bona hisiu matamatadia lasi. Dirava ese ia karaia vadaeni gaudia be namo herea bona iena hairai idia hahedinaraia. (Salamo 8:3; 19:1, 2) “Guba matamatana” anina be tanobada ataiai do ia noho basileiana matamatana. Hari ia noho “gubana” anina be taunimanima ese idia haginia gavamanidia. Aramagedono dekenai do idia ore. (2 Petro 3:7) Bena “guba matamatana,” Dirava ena guba gavamanina unai, ese edia gabu do ia abia. Iesu Keriso be ena pavapava ai do ia lao bona ena orea taudia 144,000 be ia danu do idia lohia.—Apokalupo 5:9, 10; 14:1, 3.
9 Unai hegeregerena, “tanobada matamatana” be tanobada korikori matamatana lasi. Dirava ese hari ia noho tanobadana ia karaia, taunimanima ese do idia noholaia hanaihanai totona. (Salamo 104:5) “Tanobada matamatana” anina be nega matamatana lalonai do idia noho taudia. Nega momo Bible ese “tanobada” ia gwauraia negadiai anina korikori be taunimanima. Hegeregere, ia gwau: “Iehova be pavapava, tanobada [anina be taunimanima] ia moale.” (Salamo 97:1) Do ia ore “tanobadana” anina be inai tanobada dikana ena kara lalonai idia vareai taudia. (2 Petro 3:7) “Tanobada matamatana” anina be Dirava ena hesiai taudia korikoridia, inai tanobada taudia dikadia amo idia gini siri taudia unai. Idia ese unai kara dika taudia edia gabu do idia abia.—Ioane 17:14; 1 Ioane 2:17.
10 Hari inai nega lalonai Dirava ese bese idauidau taudia Keristen orea lalonai ia gogodia, “tanobada matamatana” ai do idia lao taudia unai. Edia lalo-tamona bona maino ese Aramagedono murinai paradaiso tanobadana do idia noholaia taudia edia moale ena badina idia hahedinaraia sisina sibona. Momokani, taunimanima edia gavamani ese idia karaia diba lasi gaudia be Dirava ena basileia ese do ia karaia. Unai hahenamo haida be rau gabedia ai mani oi itaia.
BESE IBOUDIAI BE TADIKAKA BAMONA LALOKAU AI DO IDIA NOHO
“Dirava ese taunimanima edia toana ia laloa lasi. To bese ibounai lalonai, Dirava dekenai ia gari bona kara maoromaoro ia karaia tauna, Dirava ese do ia abia dae.”—Kara 10:34, 35, HM.
“Itaia! Hutuma bada lau itaia, ta ese edia namba ia duahia diba lasi, bese idauidau bona iduhu idauidau bona hanua idauidau bona gado idauidau dekena amo. . . . Do idia hitolo lou lasi, do idia ranu mase lou lasi.”—Apokalupo 7:9, 16.
MAINO, TAUNIMANIMA BONA ANIMAL BOGARAGIDIAI
“Uda sisia be mamoe natuna danu do idia noho, bona lepad be nani natuna danu do idia hekure; boromakau natuna bona laion bona idia ubua namonamo gauna do idia noho hebou; bona mero maragina ta ese do ia hakaudia.”—Isaia 11:6; 65:25.
GORERE, BURUKA BONA MASE DO IDIA ORE
“Unai neganai mata-kepulu taudia edia matana do ia kehoa, bona taia-kudima taudia edia taiana do ia kehoa. Unai neganai aena dika tauna do ia daekau, dia bamona; bona mu tauna ena malana do ia boiboi mai ena moale danu.”—Isaia 35:5, 6.
“Bona Dirava be idia dekenai do ia noho. Ia ese mata-ranuna ibounai be edia matana amo do ia dahua oho, bona mase do ia ore, bona lalo-hisihisi bona taitai bona hisihisi do idia ore. Gau gunadia idia ore vadaeni.”—Apokalupo 21:3. 4.
MASE TAUDIA DO IDIA MAURI LOU
“Mase guridia lalodiai idia noho taudia iboudiai ese iena gadona do idia kamonai, bena do idia raka lasi.”—Ioane 5:28. 29.
“Davara . . . bona mase bona Mase Gabuna danu ese idia lalodiai idia noho taudia idia henidia dae.”—Apokalupo 20:13.
11 Unai paradaiso Dirava ena basileia henunai ena namo ese inai nega gunana ena namo do ia hanaia momokani! Momokani, hari inai nega lalonai taunimanima haida ese edia noho gabudia edia toana idia hanamoa ela bona idia hairai paradaiso bamona. To reana unai gabu dekenai idia noho taudia edia kara be dika, bona idia badu heheni. Danu, idia gorere, idia buruka idia lao bona idia mase. To, Aramagedono murinai do ia vara paradaisona ena namo ese edia noho gabudia hairaidia edia namo do ia hanaia.
12 Bese idauidau taudia be tadikaka bona taihu hegeregeredia do idia noho hebou. Do idia lalokau heheni momokani. Iboudiai do idia heduru heheni bona do idia hebogahisi heheni. Ta ese ta do ia badu henia lasi, ena bese o ena kopina o ena hanua dainai. Tanobada taudia iboudiai do idia hetura heheni momokani. Unai bamona kara dainai paradaiso korikorina ai do ia lao. Oi ura unai paradaiso lalonai oi noho “guba matamatana” henunai, a?
13 Taunimanima ese maino idia herevalaia momo bona “United Nations” orea idia haginia vadaeni, to idia lalo-tamona lasi. Edia lalona idia giroa be namo, to inai tanobada ena gavamani ese idia durudia diba lasi unai bamona idia karaia totona. To haida ese Dirava ena lalokau sivaraina Bible lalonai idia abiadae dainai unai bamona idia karaia.
14 Taunimanima momo be kara maoromaoro negana matamatana sivaraina idia diba neganai, Dirava idia lalokau henia matamaia. Bena taunimanima idia kara henidia matamaia mai edia lalokau danu, Dirava ia karaia hegeregerena. (1 Ioane 4:9-11, 20) Anina be edia mauri idia haidaua vaitani. Haida be guna idia dagedage momo, dagedage animal bamona, to hari idia lalo-manau bona idia maino. Kamonai mamoe bamona, Keristen orea lalonai idia haboudia.
15 Keriso danu do idia lohia taudia 144,000 edia “seri maragi” be lagani 1,900 bamona lalodiai idia haboudia noho. Idia momo lasi be tanobada dekenai idia do noho; momo be Keriso danu guba dekenai idia lohia noho. (Luka 12:32; Apokalupo 20:6) To Iesu ia gwau: “Lau be mai egu mamoe idaudia haida danu idia noho. Idia be inai magu [“seri maragi” edia] lalonai idia noho lasi. Idia danu do lau hakaudia mai, vadaeni egu gadona do idia kamonai, vadaeni orea do ia tamona, naria tauna danu do ia tamona.” (Ioane 10:16, HM) Unai “mamoe idaudia” “hutuma bada” be hari idia haboudia noho. “Tanobada matamatana” taudia ginigunadia ai do idia lao. Inai nega dikana ena dokona ai “hisihisi badana” do ia vara neganai, Dirava ese do ia naridia dainai do idia roho mauri, bena tanobada paradaisona dekenai do idia noho.—Apokalupo 7:9, 10, 13-15.
16 Aramagedono murinai ma hoa gauna namona ta do ia vara. Dagedage gaudia, hegeregere laion, taiga, lepad bona bea, do idia manada bona maino dekenai do idia noho. Uda dekenai oi loaloa neganai, reana unai animal ta ese oi do ia bamoa. Taunimanima ese animal do idia gari henidia lou lasi.
17 To, ena be iseda ruma bona uma be mai edia hairai bada, ena be taunimanima be mai edia hebogahisi bona mai edia lalokau, bona ena be animal iboudiai idia manada momokani, to bema ita gorere, bema ita buruka ita lao bena ita mase, lalo-hisihisi do ia ore lasi, ani? Daika ese gorere iboudiai ia haorea diba? Taunimanima edia gavamani ese cancer bona ma gorere dikadia idia haorea diba lasi. Bona doketa idia diba, ena be reana unai gorere idia haorea, to taunimanima do idia buruka idia lao. Do ita buruka, iseda matana do idia itaia namonamo diba lasi, iseda kopina do idia makuku bona iseda tau-anina do idia manoka. Bena do ita mase. Madi!
18 Aramagedono murinai, paradaiso tanobadana dekenai, Dirava be hoa dalanai unai dika ibounai do ia kokia. Bible ia gwau: “Noho tauna ta do ia gwau lasi: ‘Lau gorere.’ ” (Isaia 33:24) Adam ena kara dika dainai gorere ita davaria, to Keriso be ena siahu amo gorere idauidau iboudiai do ia hanamoa, tanobada dekenai ia noho neganai ia karaia hegeregerena. (Mareko 2:1-12; Mataio 15:30, 31) Taunimanima do idia buruka idia lao lasi. Buruka taudia do idia matamata lou. (Iobu 33:25) Unai neganai daba daba iboudiai do oi moale bada, badina be mamina do oi abia oi emu tau-anina ia namo ia lao!
19 Unai bamona mauri namona idia abia taudia do idia ura lasi idia mase. Bona iboudiai be mauri hanaihanai do idia abia diba! Dirava ena harihari gauna hereadaena, “mauri hanaihanai, Keriso iseda Lohiabada” ena boubou gauna dainai, do idia abia diba. (Roma 6:23) Bible ia hereva bamona, Keriso “do ia lohia, ela bona iena inai iboudiai be iena aena henunai do ia atodia. Iena inai ginigabena be mase. Ia danu do ia haorea.”—1 Korinto 15:25, 26; Isaia 25:8.
20 Idia mase vadaeni taudia danu be tanobada ena paradaiso do idia moalelaia. Do idia mauri lou! Unai neganai taunimanima ese mase sivaraidia do idia herevalaia lasi, to toreisi lou taudia edia sivarai do idia herevalaia mai edia moale danu. Do ita moale bada, iseda tamana, sinana, natuna bona lalokau taudia danu ita hedavari lou neganai! Gara gabudia iboudiai do idia ore dainai, paradaiso ena hairai do idia hadikaia lasi.
21 Tanobada ena paradaiso lalonai taravatu bona hadibaia herevadia iboudiai be “guba matamatana” orea amo do idia mai. To kamonai taudia haida tanobada dekenai do idia abiahidi, taunimanima lohiaia totona. Guba basileiana ena gaukara unai bamona do idia karaia dainai, Bible ese “lohia” ia gwauraidia. (Isaia 32:1, 2; Salamo 45:16) Unai hegeregerena, hari inai nega lalonai Dirava ena lauma helaga ese tatau haida ia abiahidi, Keristen oreana idia naria bona idia hakaua totona. (Kara 20:28) Ita diba Aramagedono murinai Keriso ese tatau namodia do ia abiahidi, Basileia gavamanina ena gaukara unai bamona idia karaia totona. Dirava ena “guba matamatana” bona “tanobada matamatana” oi naria mai emu moale danu, ani? Vadaeni, namona be Dirava ena ura oi karaia toho mai emu goada ibounai danu, bena unai nega matamatana lalonai do oi noho diba.—2 Petro 3:14.
[Study Questions]
1. (a) Taunimanima momo edia lalohadai Aramagedono dekenai be dahaka? (b) Bible ese edena bamona ia gwauraia?
2. (a) Aramagedono dekenai edena bamona taudia do idia mase? (b) Unai dainai edena kara amo ita siri be namo?
3. (a) Iesu ia gwau inai nega ena dokona be dahaka hegeregerena? (b) Dahaka do ia vara Satana bona ena demoni dekenai? (c) Bible ena siri, rau gabedia ai idia hedinarai, ese idia hahedinaraia kamonai taudia be dahaka hahenamo do idia abia, paradaiso tanobadana dekenai?
4, 5. (a) Paradaiso tanobadana dekenai dahaka do idia ore? (b) Dahaka kara, taunimanima be gabu momo dekenai hari idia karaia diba lasi, be do idia karaia diba?
6. (a) Aramagedono amo idia roho mauri taudia be dahaka gaukara do idia karaia? (b) Dirava ese edia gaukara edena bamona do ia hanamoa?
7. (a) Dirava ese edena gwauhamata do ia hamomokania? (b) Keristen taudia be dahaka idia naria, Dirava ena gwauhamata hegeregerena?
8. (a) Dahaka dainai hua matamatana bona hisiu matamatadia do ia karaia lasi? (b) “Guba matamatana” be dahaka?
9. (a) “Tanobada matamatana” be dahaka? (b) Do ia ore tanobadana be dahaka?
10. (a) Hari inai nega lalonai Dirava ese edena taudia ia haboudia bona dahaka lalonai ia haboudia? (b) Rau gabediai idia noho siridia ese idia hahedinaraia hegeregerena, dahaka hahenamo, taunimanima edia gavamani ese idia havaraia diba lasi gaudia, be tanobada paradaisona dekenai do idia vara?
11. Hari inai nega lalonai taunimanima haida edia noho gabudia edia toana be paradaiso bamona, to dahaka ese edia noho ia hadikaia?
12, 13. (a) Aramagedono murinai maino be edena bamona do ia vara? (b) Maino be unai bamona ia vara totona, taunimanima be dahaka idia karaia be namo?
14. Hari inai nega lalonai taunimanima momo be edena bamona idia karaia, unai amo ita diba unai nega namona do ia vara?
15. (a) Keristen taudia edia orea rua be dahaka dahaka? (b) Edena taudia be “tanobada matamatana” taudia ginigunadia ai do idia lao?
16. Dahaka do ia vara, bena animal danu do ita noho mai eda moale danu?
17, 18. (a) Paradaiso tanobadana lalonai edena lalo-hisihisi havaraia gauna do ia vara lasi? (b) Dahaka dainai ita diba gorere iboudiai do idia ore?
19. Keriso ena inai ginigabena be dahaka? Edena bamona do ia haorea?
20. Hari idia mauri noho taudia sibodia lasi, to daidia danu be tanobada ena paradaiso do idia moalelaia? Edena dala amo?
21. (a) Edena taudia ese taunimanima do idia durudia, “guba matamatana” ena taravatu bona hadibaia herevadia idia badinaia totona? (b) Edena bamona ita hahedinaraia diba “guba matamatana” bona “tanobada matamatana” ita ura henidia momokani?