Dirava Ena Turadia Be Paradaiso Ai Do Idia Noho

Paradaiso be hari ita noholaia tanobadana bamona lasi. Dirava ia ura lasi tanobada be hekwakwanai bona lalohisihisi, hisihisi bona lalo-metau amo do ia honu. Vaira neganai, Dirava ese tanobada be paradaiso ai do ia halaoa. Paradaiso be edena bamona? Mani Baibel ena hereva ita itaia:

Taunimanima namodia. Paradaiso be Dirava ena turadia do idia noho gabuna. Gau namodia do idia karaia heheni. Dirava ena kara maoromaoro daladia ai do idia raka.​​—Aonega Herevadia 2:​21.

Aniani momo. Paradaiso ai, hitolo be lasi. Baibel ia gwau: “Koni [eiava, aniani] momo herea, be tano dekenai do ia vara namonamo.”​​—Salamo 72:16.

Ruma namodia bona moale ia havaraia gaukarana. Paradaiso tanobadana ai, ruma bese iboudiai be mai edia ruma. Taunimanima iboudiai ese moale korikori ia havaraia gaukarana do idia karaia.​​—Isaia 65:​21-​23.

Maino tanobada ibounai dekenai. Tuari dainai taunimanima do idia heatu bona mase lasi. Dirava ena Hereva ia gwau: “Tuari be Dirava ese ia hadokoa noho.”​​—Salamo 46:​8, 9.

Gorere lasi. Baibel ia gwauhamata: “[Paradaiso] dekenai idia noho taudia ta ese do ia gwau lasi, ‘Lau be gorere.’ ” (Isaia 33:24) Danu, aena dika o matakepulu o taia kudima o hereva diba lasi taudia be lasi.​​—Isaia 35:​5, 6.

Hisihisi, lalohisihisi, bona mase edia dokona. Dirava ena Hereva ia gwau: “Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​​—Apokalupo 21:4.

Dika taudia be lasi. Iehova ia gwauhamata: “Kara dika taudia be tano dekena amo . . . do ia abidia siri, bona kara koikoi taudia be, tano dekena amo do ia kokidia momokani.”​​—Aonega Herevadia 2:​22.

Taunimanima ese lalokau bona hemataurai do idia hahedinaraia heheni. Kara gageva, dagedage, mataganigani, bona inai henia karadia do idia ore. Taunimanima be do idia lalo-tamona bona Dirava ena kara maoromaoro daladia ai do idia raka.​​—Isaia 26:9.