Paradaiso Tanobadana

Bese idauidau taudia be paradaiso ai mai moale ida idia aniani hebou

Satani ese ia havaraia gau dikadia ibounai be Iehova ese do ia haorea vaitani. Iehova ese Iesu be King ai ia halaoa vadaeni, tanobada ibounai do ia lohiaia totona. Do ia lohiaia neganai, tanobada be paradaiso ai do idia halaoa.—⁠Daniela 7:13, 14; Luka 23:43.

Iehova ese ia gwauhamatalaia gaudia haida be inai:

ANIANI MOMO: “Tano ena anina idia vara namonamo, badina be, Dirava, iseda Dirava ese ita ia hanamoa vadaeni.” “Namona be koni momo herea, be tano dekenai do ia vara namonamo. Namona be ororo gabudia danu dekenai, uiti bona aniani avadia do idia tubu namonamo.”—⁠Salamo 67:6; 72:16.
TUARI BE LASI: “Umui mai! Lohiabada ena gaukara do umui itaia. Tanobada dekenai hadikaia karadia momo ia karaia vadaeni. Tuari be Dirava ese ia hadokoa noho, tanobada kahana ibounai dekenai.”—⁠Salamo 46:8, 9.
KARA DIKA TAUDIA BE LASI: “Badina kara dika taudia be, dika momokani do idia davaria. . . . Nega daudau lasi lalonai kara dika taudia do idia ore. Edia gabu do umui tahua, to do umui davaria lasi.”—⁠Salamo 37:9, 10.
GORERE, LALOHISIHISI, BONA MASE BE LASI: “Matakepulu taudia ese do idia itaia diba, bona taia kudima taudia, be do idia kamonai diba. Edia aena idia dika taudia be do idia roho bona mavaru, bona hereva diba lasi taudia, be mai moale bada do idia boiboi.”—⁠Isaia 35:5, 6.

“Dirava be idia danu do ia noho . . . Matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”—⁠Apokalupo 21:3, 4.

Iehova be Satani bona lauma dikadia hegeregeredia lasi; nega ta ia koikoi lasi. Ena gwauhamata iboudiai do ia hamomokania. (Luka 1:36, 37) Iehova ese oi ia lalokau henia bona ia ura Paradaiso dekenai do oi noho. Unai dainai Iehova ena Witnes taudia oi tahua, Baibel ena hereva momokanidia amo diba ma haida oi abia totona. Bema hereva momokani oi badinaia, unai hereva ese oi be koikoi herevadia, meamea bona gari kava karana amo oi do ia ruhaia. Gabeai kara dika bona mase amo oi do ia ruhaia danu. Iesu ena hereva hegeregerena: ‘Hereva momokani be do oi diba, bona hereva momokani ese oi do ia ruhaia.’—⁠Ioane 8:32.