Karoa 5
Daidia Edia Tomadiho be Dirava ese Ia Abia Dae?
1. Samaria hahinena ia ura dahaka do ia diba tomadiho dekenai?
DAIDIA edia tomadiho be Dirava ese ia abia dae? Nega ta unai oi henanadailaia, a? Reana hahine ta be unai ia laloa, Samaria dekenai, Gerisima Ororona badinai Iesu ia hereva henia neganai. Ia hahedinaraia Samaria taudia edia tomadiho be idau bona Iuda taudia edia be ma idau; ia gwau: “Aiemai tubuna be inai ororo dekenai Dirava idia tomadiho henia, to umui gwau tomadiho gabuna momokani be Ierusalema dekenai sibona.” (Ioane 4:20) Iesu ese ia hamaoroa Dirava ese tomadiho iboudiai ia abia dae, a? Eiava ia gwau Dirava ese ia moalelaia tomadihona be tamona, a?
2. Iesu ese Samaria hahinena be edena bamona ia haere henia?
2 Iesu ia haere, ia gwau: “Gabeai nega ta do ia mai, inai ororo dekenai, bona Ierusalema dekenai danu, taunimanima be do idia tomadiho henia lasi.” (Ioane 4:21) Nega daudau Samaria taudia ese Iehova idia gari henia, to dirava idaudia be Gerisima Ororona dekenai idia tomadiho henia. (2 King Taudia 17:33) To Iesu Keriso ia gwau, gabeai tomadiho momokani lalonai unai gabu bona Ierusalema danu be anina lasi.
MAI LAUMA BONA MAI MOMOKANI IDA
3. (a) Dahaka dainai Samaria taudia be Dirava idia diba momokani lasi? (b) Iuda taudia mai edia kamonai bona ma taunimanima haida danu ese Dirava be edena bamona idia dibaia diba?
3 Iesu ese Samaria hahinena ma ia hamaoroa, ia gwau: “Umui Samaria taudia ese dahaka umui tomadiho henia be umui diba lasi. Ai Iuda taudia ese dahaka ai tomadiho henia be ai diba.” (Ioane 4:22) Samaria taudia ese tomadiho idia laloa kerere, bona Baibel ena buka ginigunadia imaosi mo, sibodia edia gado dekenai idia torea hanai bukadia, idia abia dae idia gwau unai sibona be Dirava ena hereva. Unai dainai Dirava idia diba momokani lasi. To Dirava ese Iuda taudia be Baibel amo ia hadibadia vadaeni. (Roma 3:1, 2) Baibel dainai Iuda taudia mai edia kamonai bona kamonai taudia ma haida danu be Dirava idia dibaia diba.
4. Iesu ese ia hahedinaraia, Iuda taudia bona Samaria taudia danu be dahaka do idia karaia be namo, Dirava ese edia tomadiho do ia moalelaia totona?
4 Iesu ese ia hahedinaraia Dirava do idia hamoalea totona Iuda taudia bona Samaria taudia ese edia tomadiho daladia do idia haidaua be namo. Ia gwau: “Nega ta do ia mai, bona harihari ia ginidae vadaeni, tomadiho taudia momokani ese mai Lauma bona mai momokani danu Tamana do idia tomadiho henia, badina be Tamana ese unai bamona idia tomadiho henia taudia ia tahua noho. Dirava be Lauma, bona do idia tomadiho henia taudia ese, lauma bona momokani dekena amo do idia tomadiho henia.” (Ioane 4:23, 24) Iseda lalona be abidadama bona lalokau amo idia honu dainai, Dirava do ita tomadiho henia ‘mai lauma danu’ be namo. Bema ena Hereva, Baibel, ita stadilaia, bona ena hereva momokani hegeregerena bema ita tomadiho henia, Dirava be “mai momokani danu” ita tomadiho henia diba. Oi ura unai bamona do oi karaia, a?
5. (a) “Tomadiho” ena anina be dahaka? (b) Bema ita ura Dirava ese iseda tomadiho do ia abia dae, dahaka ita karaia be namo?
5 Iesu ese ia hahedinaraia Dirava be tomadiho karana momokanina ia ura. Anina be ia ese tomadiho daladia haida be ia moalelaia lasi. Dirava ita tomadiho henia, anina be ita hanamoa mai eda hemataurai ida bona ena hesiai ita lao henia. Bema oi ura lohia badana ta do oi matauraia, do oi ura ena hesiai do oi lao henia bona hamoalea karadia do oi karaia, ani? Vadaeni, ita ura Dirava do ita hamoalea. Unai dainai, namo lasi ita ta ta ita gwau, ‘Egu tomadiho lau moalelaia,’ namona be ita hamomokania Dirava ese ia moalelaia.
TAMANA ENA URA KARAIA
6, 7. Dahaka dainai sibodia be Iesu ena hahediba taudia idia gwauraia taudia haida be ia ese ia dadaraia?
6 Mataio 7:21-23 mani ita duahia; Dirava ese tomadiho haida ia moalelaia lasi ena badina badana ta do ita tahua. Iesu ia gwau: “Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana, guba dekenai ia noho ena ura idia karaia taudia, idia sibona do idia vareai. Unai Dirava ena Kota Dina ia ginidae neganai, taunimanima momo do idia hereva lau dekenai, do idia gwau, ‘Lohiabada e, Lohiabada e, oiemu ladana dekenai guna ai haroro, ani? Oiemu ladana dekenai lauma dika ai lulua, bona oiemu ladana dekenai hoa kara momo ai karaia, ani?’ Vadaeni lau ese do lau haere idia dekenai, do lau gwau, ‘Umui be lau diba lasi momokani. Idau gabuna dekenai umui lao, umui dika karaia taudia.’ ”
7 Tomadiho momokani taudia edia kara korikori ta be, Iesu idia abia dae, edia Lohiabada. To Iesu ia gwau, sibodia be iena hahediba taudia do idia gwauraia taudia momo edia tomadiho do ia hegeregere lasi. Ia gwau haida ese “hoa kara” do idia karaia, toana be gorere do idia hanamoa. Gau tamona, ‘iena Tamana ena ura idia karaia’ lasi dainai idia be hegeregere lasi. Bema ita ura Dirava do ita hamoalea, namona be ena ura do ita dibaia bena do ita karaia.
DIBA MAOROMAORO ESE ITA IA NARIA
8. Dirava ena ura do ita karaia diba totona, edena bamona do ita kara be namo, bona dahaka lalohadai kereredia amo do ita siri?
8 Dirava ena ura do ita karaia diba totona, namona be Iehova Dirava bona Iesu Keriso do ita diba. Unai diba dainai mauri hanaihanai do ita abia diba. Unai dainai ita ibounai ese Dirava ena Hereva, Baibel, amo diba maoromaoro abia karana do ita laloa namonamo be namo. Haida idia gwau, bema ita tomadiho mai eda momokani bona mai eda goada ida, ita laloa momo lasi be namo. Ma haida idia gwau, ‘Emu diba ia maragi neganai, emu maduna danu ia maragi.’ To, Baibel ia gwau iseda diba Dirava bona ena palani dekenai do ita habadaia be namo.—Efeso 4:13; Filipi 1:9; Kolose 1:9.
9. Diba maoromaoro ese ita edena bamona do ia naria, bona dahaka dainai unai be namo?
9 Unai diba ese iseda tomadiho dalana do ia naria, gau ta ese do ia hakererea garina. Aposetolo Paulo ese lauma ta ia gwauraia, ena toana ia senisia bena “diari aneruna” ta bamona ia hedinarai. (2 Korinto 11:14) Unai dala amo, unai lauma—Satani unai—ese ita ia koia toho, Dirava ena ura dadaraia karadia do ita karaia totona. Satani idia bamoa laumadia danu ese taunimanima edia tomadiho dalana idia hakererea vadaeni, badina be Paulo ia gwau: “Iuda lasi taudia edia boubou gaudia be lauma dikadia dekenai idia henia, Dirava dekenai idia henia lasi.” (1 Korinto 10:20) Reana ena be idia momo be Dirava ena ura idia karaia lasi, to idia laloa edia tomadiho dalana be maoro. Lauma dikadia ese idia koidia dainai, tomadiho karana mirona bona koikoina idia karaia. Gabeai Satani bona ena lauma dikadia edia kara herevadia ma haida do ita stadilaia. Momokani, Dirava idia inai henia laumadia ese taunimanima edia tomadiho dalana idia hakererea.
10. Bema ta ese poisini be emu ranu tanika lalonai ia atoa, edena bamona do oi kara, bona Dirava ena Hereva bema ita diba maoromaoro, dahaka do ita karaia diba?
10 Bema oi diba tau ta ese poisini be emu ranu tanika lalonai ia atoa, tanika ena ranu do oi inua noho, a? Lasi, ani? Ranu namona bona goevana abia gabuna do oi tahua haraga. Vadaeni, Dirava ena Hereva bema ita diba maoromaoro, unai diba amo do ita diba edena tomadiho be momokani, bona tomadiho karana hakererea gaudia do ita dadaraia diba, unai gau dainai Dirava ese tomadiho momo ia moalelaia lasi.
TAUNIMANIMA EDIA TARAVATU SIBONA
11. Dahaka dainai Iuda taudia momo edia tomadiho dalana be kerere?
11 Iesu be tanobada dekenai ia noho neganai, Iuda taudia momo be Dirava diba maoromaoro dalana ai idia raka lasi dainai, Iehova vairanai idia goeva lasi. Paulo ese ia gwauraidia, ia gwau: “Lau diba idia ese Dirava ena hesiai gaukara idia ura karaia namonamo, to karaia dalana be idia diba lasi.” (Roma 10:2) Dirava ena hereva idia kamonaia lasi, to tomadiho henia dalana idauna idia abia hidi.
12. Dahaka ese Israela ena tomadiho dalana ia hakererea, bona unai ena anina be dahaka?
12 Matamana neganai Israela taudia be Dirava ese ia henidia dalana goevana ai idia tomadiho, to gabeai edia tomadiho be taunimanima edia hereva bona edia lalohadai amo idia hakererea. (Ieremia 8:8, 9; Malaki 2:8, 9; Luka 11:52) Ena be Iuda tomadiho gunalaia taudia, unai Farisea taudia, idia laloa Dirava ese edia tomadiho dalana ia moalelaia, to Iesu ese ia hamaorodia, ia gwau: “Umui be koikoi taudia, Isaia ese emui kara ia hedinaraia vadaeni. Ia torea inai bamona, ia gwau: ‘Inai bese taudia edia ududia sibona idia hanamoa lau, to edia kudoudia be daudau masemase lau dekena amo. Idia tomadiho lau dekenai, to anina lasi. Idia edia hadibaia hereva be taunimanima edia taravatu sibona.’ ”—Mareko 7:6, 7.
13. Reana Farisea taudia hegeregeredia edena bamona ita kerere diba?
13 Farisea taudia hegeregeredia ita kerere diba, a? Bema Dirava ena hereva tomadiho karana dekenai ita tahua lasi, to iseda tamana sinana ese ita idia hadibaia tomadiho herevadia bema ita badinaia, unai bamona ita kerere diba. Paulo ese unai dika ia sisibalaia, ia gwau: “Lauma Helaga ese ia gwauraia hedinarai vadaeni, nega gabeai tau haida ese Iesu badinaia kara do idia rakatania, lauma koikoidia do idia kamonai henia, bona lauma dikadia edia hadibaia hereva do idia abia dae.” (1 Timoteo 4:1) Unai dainai, ena be ita laloa Dirava ese iseda tomadiho ia moalelaia, to unai sibona be hegeregere lasi. Unai Samaria hahinena bamona, reana iseda tomadiho dalana be iseda tamana sinana edia amo ita abia. To namona be ita diba momokani ita karaia noho karadia be Dirava ese ia moalelaia.
NARIA, DIRAVA DO OI HABADUA GARINA
14, 15. Ena be Dirava ena ura ita diba, to dahaka dainai do ita naria namonamo be namo?
14 Bema ita naria namonamo lasi, reana Dirava habadua karana ta do ita karaia. Nega ta aposetolo Ioane be aneru ta ena aena badinai ia tui diho, do ia “tomadiho henia totona.” To aneru ia gwau: “Unai bamona oi karaia lasi, lau danu be hesiai tauna. Lau be oiemu gaukara hebou tauna, bona oiemu varavara. . . . Dirava sibona do oi tomadiho henia.” (Apokalupo 19:10) Namona be do oi naria namonamo, kaivakuku tomadiho henia karana ese emu tomadiho do ia hadikaia garina—hari unai oi diba, a?—1 Korinto 10:14.
15 Keristani taudia haida ese Dirava ia moalelaia lasi karadia amo Ia idia tomadiho henia matamaia neganai, Paulo ese ia nanadaidia, ia gwau: “Edena bamona tanobada idia biagua laumadia dekenai umui ura giroa lou? Idia be manoka bona anina lasi. Badina dahaka umui ura edia hesiai gaukara umui karaia lou? Dina bona hua, aria negadia bona lagani matamata edia hadibaia hereva umui laloa be gau badadia. Lau be umui dainai lau laloa momo! Lau gari danu, umui totona lau hekwarahi kava garina!” (Galatia 4:8-11) Dirava idia diba vadaeni murinai idia kerere, badina be tomadiho karadia bona dina helagadia, Iehova ese ia moalelaia lasi gaudia, be idia badinaia. Paulo ena hereva hegeregerena, namona be ‘Lohiabada ia ura henia karadia do ita tahua.’—Efeso 5:10.
16. Ioane 17:16 bona 1 Petero 4:3 amo holide bona kastom karadia be edena bamona ita henanadailaia diba, Dirava ese ia moalelaidia eiava?
16 Namona be tomadiho oreadia edia holide bona Dirava ena hahegani utua karadia idaudia amo do ita siri. (1 Tesalonika 5:21) Iesu ese ena orea taudia ia gwauraia, ia gwau: “Idia be tanobada ena lasi, lau hegeregerena, lau be tanobada ena lasi.” (Ioane 17:16) Emu tomadiho oreana be tomadiho karadia bona holide amo idia hahedinaraia idia be tanobada ena, a? Eiava emu tomadiho oreana taudia edia kastom karadia bona edia moale heboudia haida be aposetolo Petero ese ia gwauraia gaudia hegeregeredia, a? Ia gwau: “Gunaguna umui be Dirava diba lasi taudia hegeregerena umui noho. Emui kara gunadia be inai: Matabodaga, sihari kava, kekero, lebulebu, uaina umui inua momo, bona kaivakuku dikadia umui tomadiho henia.”—1 Petero 4:3.
17. Badina be dahaka tanobada ena lalohadai idia hahedinaraia karadia iboudiai amo do ita siri be namo?
17 Aposetolo Ioane ese ia hahedinaraia, namona be tanobada ena kara, Dirava dadaraia lalohadaina idia hahedinaraia karadia, amo do ita siri. Ia gwau: “Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai. Badina be tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho. Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” (1 Ioane 2:15-17) ‘Dirava ena ura idia karaia noho’ taudia do idia noho ela bona hanaihanai; unai oi laloa, a? Oibe, bema Dirava ena ura ita karaia bona inai tanobada ena lalohadai idia hahedinaraia karadia amo ita siri, mauri hanaihanai ita naria diba!
DIRAVA ENA TARAVATU BADINADIA
18. Korinto taudia haida ese kara edena bamona idia laloa kerere, bona unai dainai dahaka ita diba?
18 Dirava ia ura ia idia tomadiho henia taudia ese ena taravatu hereadia do idia badinaia. Gunaguna Korinto taudia haida idia laloa ia ese matabodaga karadia do ia laloa lasi. To 1 Korinto 6:9, 10 ese ia hahedinaraia edia lalohadai be ia kerere momokani. Dirava ese iseda tomadiho do ia abia dae totona, namona be iseda hereva bona iseda kara amo do ita hamoalea. Emu tomadiho dalana amo unai bamona oi karaia diba, a?—Mataio 15:8; 23:1-3.
19. Tomadiho momokani dainai taunimanima be edena bamona ita kara henidia?
19 Taunimanima dekenai ita karaia karadia danu ese Dirava ena taravatu edia toana idia hahedinaraia be namo. Iesu Keriso ese ita ia hagoadaia, gau iboudiai ita ura do idia karaia ita dekenai be unai bamona do ita karaia idia dekenai, badina be tomadiho momokani ena anina ta be unai. (Mataio 7:12) Tadikaka hegeregeredia lalokau heheni dalana ia gwauraia, ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Namona be Iesu ena hahediba taudia do idia lalokau heheni, bona edia orea taudia bona ma haida do idia kara namo henidia be namo.—Galatia 6:10.
MAI EMU LALONA IBOUNAI IDA
20, 21. (a) Dirava ese edena bamona tomadihona ia ura henia? (b) Dahaka dainai Malaki ena negai Israela ena tomadiho ia dadaraia?
20 Bema emu lalona ai oi ura Dirava do oi tomadiho henia maoromaoro, namona be iena lalohadai tomadiho dekenai do oi abia dae. Hahediba tauna Iamesi ese ia hahedinaraia Dirava ena lalohadai be mai anina bada, iseda lasi. Ia gwau: “Keristani tauna ena kara goevagoeva bona momokani, Tamana Dirava ena vairanai be inai: Bema tamana bona sinana lasi maragidia bona vabu be mai edia hisihisi, ia ese do ia naridia. Bona tanobada ena kara mirodia dekena amo do ia raka siri.” (Iamesi 1:27) Ita ura Dirava do ita hamoalea, unai dainai namona be ita ta ta ese iseda tomadiho karana do ita tahua namonamo, bena do ita diba kara dikadia amo ita hamiroa eiava, bona Dirava ese ia laloa bada karana ta ita reaia eiava.—Iamesi 1:26.
21 Mai eda goeva bona mai eda lalona ibounai ida ita karaia tomadihona sibona be Iehova ese ia moalelaia. (Mataio 22:37; Kolose 3:23) Israela besena ese unai kara idia reaia neganai, Dirava ia gwau: “Mero ese iena tamana ia matauraia noho, bona hesiai tauna ese iena biaguna ia matauraia noho danu. Lau be emui tamana, badina dahaka lau dekenai umui matauraia lasi? Lau be emui biaguna, badina dahaka lau dekenai umui gari lasi?” Animal dikadia, matakepulu gaudia, aena dika gaudia, bona gorere gaudia, be idia bouboulaia, iena; unai dainai ia badu bona unai tomadiho karadia ia dadaraia. (Malaki 1:6-8) Iehova be hegeregere tomadiho dalana goevagoevana amo do ita tomadiho henia, bona ia ura bada ita be ia sibona ena.—Esodo 20:5; Aonega Herevadia 3:9; Apokalupo 4:11.
22. Bema ita ura Dirava ese iseda tomadiho do ia abia dae, dahaka amo do ita siri, bona dahaka do ita karaia?
22 Toana be Samaria hahinena, Iesu ia hereva henia hahinena, ia ura Dirava ena ura dalana ai Ia do ia tomadiho henia. Bema iseda ura be unai, hahediba herevadia bona karadia kereredia amo do ita siri. (2 Korinto 6:14-18) Do ita gaukara goadagoada, Dirava do ita diba maoromaoro bona ena ura do ita karaia totona. Ia gwauraia hidi tomadiho dalana do ita badinaia namonamo. (1 Timoteo 2:3, 4) Iehova ena Witness taudia be unai bamona idia karaia goadagoada, bona oi idia noia, oi be idia ida “lauma bona momokani dekena amo” Dirava do umui tomadiho henia hebou. (Ioane 4:24) Iesu ia gwau: “Tamana ese unai bamona idia tomadiho henia taudia ia tahua noho.” (Ioane 4:23) Ai ura do ai itaia oi be unai bamona tauna. Unai Samaria hahinena hegeregerena, momokani oi ura mauri hanaihanai do oi abia. (Ioane 4:13-15) To taunimanima oi itaia, idia buruka bena idia mase. Unai ena badina be karoa gabena ese ia gwauraia.
EMU DIBA OI TOHOA
Ioane 4:23, 24 hegeregerena, dahaka tomadiho be Dirava ese ia abia dae?
Edena bamona ita diba Dirava ese tomadiho karadia o heboudia ia moalelaia eiava lasi?
Tomadiho maoro karadia haida be dahaka dahaka?
[Full-page picture on page 44]