Duahia Taudia Edia Henanadai

‘Lauma dekena amo’ Iehova ita tomadiho henia ena anina be dahaka?

Iesu Keriso ese Sukara hanuana kahirakahira ia noho Iakobo ena ranu guri amo ranu abia totona ia mai Samaria hahinena ia haroro henia neganai, ia gwau: “Dirava be Lauma, bona do idia tomadiho henia taudia ese, lauma bona momokani dekena amo do idia tomadiho henia.” (Ioane 4:24) “Momokani dekena amo” Dirava ita tomadiho henia ena anina be Iehova Dirava ese Baibel dekenai ia sibona bona ena ura ia hahedinaraia hegeregerena ia ita tomadiho henia. Danu, namona be mai eda kudouna ibounai ida Dirava ita lalokau bona abidadama henia dainai, mai ura bada bona goada ida ia ita hesiai henia. (Tito 2:14) To, badina siridia ese idia hahedinaraia Iesu ena hereva ‘lauma dekena amo Dirava ita tomadiho henia’ ese Iehova ita hesiai henia lalonai ita hahedinaraia lalohadai sibona ia herevalaia lasi.

Iesu ese unai ranu guri badinai, tomadiho lalonai ta ena ura ia bada eiava lasi be unai hahine ida ia herevalaia lasi. Tomadiho koikoi karadia danu be ura bada bona goada ida idia karaia diba. To, Iesu ia gwau Samaria ena ororo ta dekenai eiava Ierusalema ena dubu ta dekenai​—⁠ruaosi be gabu korikoridia⁠—⁠taunimanima ese Tamana do idia tomadiho henia lasi, bona murinai ia ese Dirava ena noho korikorina bona unai hegeregerena taunimanima ese ia idia tomadiho henia diba dalana matamatana ia herevalaia. (Ioane 4:21) Ia gwau: “Dirava be Lauma.” (Ioane 4:24) Dirava momokanina be lauma bona ita itaia o dogoatao diba lasi. Ia ita tomadiho henia lalonai dubu eiava ororo korikorina ta be mai anina lasi. Unai dainai, Iesu ese matana amo ita itaia diba gaudia ia hereaia tomadiho dalana ia herevalaia.

Dirava ese ia abia dae tomadiho karana be hereva momokani hegeregerena sibona lasi, to lauma helaga​—⁠Dirava ena gaukara siahuna, ita itaia diba lasi siahuna​—⁠ese ita ia hakaua danu be namo. Aposetolo Paulo ia gwau: “Lauma Helaga ese gau ibounai ia tahua noho, Dirava ena laloa dobu gaudia danu.” Ma ia gwau: “Inai tanobada ena lauma ita abia lasi. To Dirava dekena amo ia mai Lauma ita abia vadaeni, Dirava ese ita dekenai ia henia harihari gaudia do ita diba namonamo totona.” (1 Korinto 2:​8-12) Dala maorona ai Dirava ita tomadiho henia totona iena lauma helaga ita abia bona ita ia hakaua be namo. Danu, gau badana be iena Hereva ita stadilaia bona badinaia amo iseda lauma, eiava lalohadai goadana, be Dirava ena lauma hegeregerena.

[Picture on page 28]

“Lauma bona momokani dekena amo” Dirava oi tomadiho henia