Kahana 2

Dirava be Daika?

Dirava momokanina be daika, bona ena ladana be daika? (1, 2)

Iena tauanina oromana be edena bamona? (3)

Iena kara hereadaedia be dahaka dahaka? (4)

Ita tomadiho henia lalonai, kaivakuku bona toa ita gaukaralaia be namo, a? (5)

Edena dala rua amo Dirava ita dibaia diba? (6)

1. Taunimanima be gau momo idia tomadiho henia. To Baibel ese ita ia hamaoroa Dirava MOMOKANINA be tamona. Ia ese gau iboudiai guba ai bona tanobada dekenai ia karaia. Namona be Ia sibona do ita tomadiho henia, badina be ia ese ita dekenai mauri ia henia.​—⁠1 Korinto 8:​5, 6; Apokalupo 4:⁠11.

2. Dirava ena dagi ladadia be momo, to iena ladana be tamona. Unai ladana be IEHOVA. Baibel momo lalodiai, Dirava ena ladana idia kokia bena ena gabu ai dagi ladadia LOHIABADA eiava DIRAVA idia atoa. To Baibel idia torea neganai, unai ladana Iehova be nega 7,000 bamona ia hedinarai!​—⁠Esodo 3:15; Salamo 83:⁠18.

3. Iehova be mai ena tauanina, to iseda hegeregerena lasi. Baibel ia gwau: “Dirava be Lauma.” (Ioane 4:24) Lauma be mauri oromana ta, iseda mauri oromana ia hereaia. Taunimanima ta ese Dirava ia itaia lasi. Iehova be guba dekenai ia noho, to ia ese gau ibounai ia itaia diba. (Salamo 11:​4, 5; Ioane 1:18) To, lauma helaga be dahaka? Ia be Dirava hegeregerena laumana ta lasi. Lasi, ia be Dirava ena gaukara siahuna.​—⁠Iobu 33:⁠4.

4. Baibel ese Iehova ena kara ia hahedinaraia ita dekenai. Ia hahedinaraia iena kara hereadaedia be lalokau, kara maoromaoro, aonega, bona siahu. (Deuteronomi 32:4; Iobu 12:13; Isaia 40:26; 1 Ioane 4:⁠8) Baibel ese ita ia hamaoroa ia be hebogahisi, harihari bada, haheauka, bona dika gwauatao Diravana. Namona be mai edia kamonai natudia bamona, ia ita tohotohoa be namo.​—⁠Efeso 5:​1, 2.

5. Iseda tomadiho lalonai kaivakuku, laulau, o toa haida vairanai ita tui diho eiava ita guriguri henia be maoro, a? Lasi! (Esodo 20:​4, 5) Iehova ia gwau ia sibona do ita tomadiho henia. Iena hairai be tau ta eiava gau ta do ia henia lasi. Kaivakuku be siahu lasi ita do idia durua totona.​—⁠Salamo 115:​4-8; Isaia 42:⁠8.

6. Dirava be edena bamona ita dibaia namonamo diba? Dala ta be ia ese ia karaia gaudia ita itaia bona unai ese ita dekenai idia hadibaia gaudia be ita laloa dobu. Dirava ia havaraia gaudia ese idia hahedinaraia iena siahu bona aonega be bada herea. Iena lalokau be ia karaia gaudia iboudiai ese idia hahedinaraia. (Salamo 19:​1-6; Roma 1:20) Dirava ita dibaia dalana ma ta be Baibel ita stadilaia karana amo. Ia lalonai ita ia hadibaia goevagoeva ia be edena bamona Diravana. Ia ese ena palani bona ia ura do ita karaia karadia danu be ita ia hamaoroa.​—⁠Amosa 3:7; 2 Timoteo 3:​16, 17.

[Pictures on page 5]

Dirava ia karaia gaudia bona Baibel amo ia ita dibaia