Tanobada Matamatana—Dirava Ena Gwauhamata Hegeregerena
BAIBEL, Dirava ena Hereva, ese ita dekenai helaro ia henia, ia gwau: “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.”—2 Petero 3:13.
“Guba matamata” be dahaka? Baibel lalonai guba be Dirava ena lohia siahuna ida ia gwauraia hebou. (Salamo 11:4) “Guba matamata” ena anina be gavamani matamata, tanobada ibounai do ia lohiaia gauna. Ia be matamata, badina ia ese hari idia lohia noho gavamanidia edia gabu do ia abia; danu ia be Dirava ena ura do ia havaraia dalana matamatana. Iesu ese ita ia hadibaia do ita gurigurilaia Basileiana unai. (Mataio 6:10) Dirava be unai Basileia ena Badina bona guba dekenai ia noho dainai, unai gavamani idia gwauraia “Guba Basileia.”—Mataio 7:21.
“Tanobada matamata” be dahaka? Ia be tanobada korikorina matamatana lasi, badina Baibel ia gwau inai tanobada be taunimanima ese do idia noholaia hanaihanai. To “tanobada matamata” ena anina be tanobada do idia noholaia bese matamatana. Ia be matamata badina kara dika taudia be tanobada amo Dirava ese do ia abidia siri. (Aonega Herevadia 2:21, 22) Unai neganai do idia noho taudia ibounai ese Havaraia Tauna do idia matauraia bona kamonai henia, bona Iena taravatu hegeregerena do idia noho. (Salamo 22:27) Bese idauidau taudia ai boiria unai taravatu do idia dibaia bona unai hegeregerena hari edia mauri idia haidaua be namo. Oi be unai bamona oi karaia noho, a?
Dirava ena tanobada matamatana lalonai, taunimanima ese Iena lohia siahuna do idia matauraia. Dirava lalokau henia karana ese oi ia veria Ia oi badinaia totona, a? (1 Ioane 5:3) Emu ruma lalonai, sikuli eiava gaukara gabunai bona emu mauri oi gaukaralaia dalana amo unai oi hahedinaraia, a?
Unai tanobada matamatana ai, taunimanima be Dirava momokanina do idia tomadiho henia hebou. Oi ese guba bona tanobada ia Havaraia Tauna oi tomadiho henia, a? Oiemu tomadiho karana ese oi bona emu bese, iduhu bona gado idauidau tadikakadia ia hatamonaia momokani, a?—Salamo 86:9, 10; Isaia 2:2-4; Sepanaia 3:9.
[Box on page 17]
Unai Gaudia Ia Gwauhamatalaia Diravana
Ia be guba korikorina bona Tanobada ia Havaraia Tauna. Iesu Keriso ese ia gwauraia “Dirava momokani tamona” unai.—Ioane 17:3.
Taunimanima momo herea be idia sibona ese idia karaia diravadia idia matauraia. Taunimanima milioni momo be idia mauri lasi kaivakukudia edia vairanai idia tui diho. Ma haida be taunimanima edia orea, kohu momo tahua lalohadaina, taunimanima edia aonega eiava idia sibona edia ura idia abia isi. Sibona idia gwauraia Baibel idia gaukaralaia taudia ibounai danu be Baibel ese ia gwauraia “Dirava momokanina” ena ladana idia matauraia lasi.—Deuteronomi 4:35, NW.
Havaraia Tauna be ia sibona inai bamona ia herevalaia: “Lau sibona be Lohiabada [“Iehova,” NW ], egu ladana be unai.” (Isaia 42:5, 8) Gado ginigunadia ai idia torea Baibel lalonai, unai ladana be nega 7,000 bamona ia hedinarai. Iesu Keriso ese iena murinai idia raka taudia ia hadibaia inai bamona do idia guriguri: “Aiemai Tamana e, guba dekenai oi noho, oiemu ladana do ai hahelagaia.”—Mataio 6:9.
Dirava momokanina ena kara be edena bamona? Ia sibona ia gwau, ia be ‘bogahisihisi bona hariharibada Diravana. Ia be badu dekenai ia haraga lasi, to bogahisihisi bona lalokau dekenai ia be haraga’ bona Ia ese mai edia ura ida ena taravatu idia utua taudia do ia panisia. (Esodo 34:6, 7) Idaunegai Dirava ese taunimanima ia kara henia dalana ese unai hereva ia hamomokania vaitani.
Iena ladana bona kara ita hahelagaia be namo. Ia be Havaraia Tauna bona Guba bona Tanobada edia Lohia Badana dainai, ia ita badinaia bona ita tomadiho henia be maoro. Oi be unai bamona oi karaia ia dekenai, a?
[Box/Picture on page 18]
“Guba Matamata Bona Tanobada Matamata” Dekenai, Dahaka Do Idia Idau?
Tanobada be Paradaiso ai do ia lao Luka 23:43
Unai tanobada dekenai bese, iduhu Ioane 13:35;
bona gado idauidau taudia be lalokau Apokalupo 7:9, 10
ese do ia hatamonadia
Tanobada hegegemadai taunimanima be Salamo 37:10, 11;
maino bona noho namona momokanina do Mika 4:3, 4
idia abia
Gaukara namodia bona aniani be momo Isaia 25:6; 65:17,
21-23
Gorere, lalohisihisi bona mase do Isaia 25:8;
idia ore vaitani Apokalupo 21:1, 4
[Box/Pictures on page 19]
Namo ta Do Oi Abia, A?
Dirava ia koikoi diba lasi!—Tito 1:2.
Iehova ia gwau: “Lau gwauraia hereva, be anina do ia havaraia, bona lau dekenai do ia giroa kava lasi. Lau siaia totona gaukarana be do ia karaia momokani.”—Isaia 55:11.
Iehova be “guba matamata bona tanobada matamata” ia karaia noho. Guba gavamani be hari ia gaukara noho. “Tanobada matamata” ena badina be ia haginia vadaeni.
Apokalupo bukana be “guba matamata bona tanobada matamata” ese taunimanima dekenai do ia mailaia gau namodia haida ia herevalaia murinai, ia ese Dirava sibona, Guba bona Tanobada edia Lohia Badana ena hereva ia gwauraia: “Harihari be gau ibounai lau karaia matamata inai.” Ma ia gwau: “Harihari inai hereva do oi torea, badina ia be maoromaoro bona momokani vadaeni, bona inai hereva do umui abidadama henia diba.”—Apokalupo 21:1, 5.
Henanadai badana be, “Guba matamata” ena siahu henunai do ia noho “tanobada matamata” ena kahana ai ita lao totona, ita ese kara haida ita haidaua, a?