Headava—Lalokau Diravana Ena Harihari Gauna

1, 2. (a) Nega haida headava matamata taudia dekenai dahaka ita laloa, bona dahaka dainai? (b) Edena henanadai haida do ita herevalaia?

MAI moale ida oi ura ma haida edia headava dekenai oi lao, ani? Taunimanima momo idia lao, badina unai bamona negadia idia moalelaia. Oi itaia headava tau bona hahine be dabua namodia idia hahedokilaia! Unai dina ai idia moale bada bona toana be edia vaira negana ena mauri lalonai gau namodia momo do idia karaia hebou.

² To, ita gwau diba hari headava momo be idia dika idia lao noho. Ena be ita ura headava matamata taudia edia mauri do ia namo, to reana nega haida do ita laloa: ‘Edia headava lalonai do idia moale, a? Edia headava do ia noho ela bona hanaihanai, a?’ Tau bona hahine idia moale bona idia noho hebou hanaihanai totona, Dirava ena sisiba headava dekenai idia abia dae bona badinaia be gau badana. (Aonega Herevadia 3:5, 6) Dirava ena lalokau lalonai idia noho totona, unai bamona idia karaia be namo. Mani Baibel amo inai henanadai hani edia haere ita tahua: Dahaka dainai oi ura headava? Bema oi ura headava, daika do oi abia hidi? Edena dala ai headava totona oi hegaegae diba? Bona dahaka ese headava taudia ia durua diba idia moale noho totona?

HEADAVA ENA BADINA NAMODIA

3. Dahaka dainai haida ese idia doria dainai ta ia headava be aonega karana lasi?

³ Haida idia laloa idia moale totona idia headava be gau badana—badina bema adavana ta idia davaria lasi do idia moale lasi. To unai be momokani lasi! Iesu be ia headava lasi. Bona ia gwau headava lasi maurina be harihari gauna ta bona haida ia hagoadaia unai bamona mauri idia abia dae totona. (Mataio 19:11, 12) Bona aposetolo Paulo be headava lasi maurina ena namo ia herevalaia danu. (1 Korinto 7:32-35) To, Iesu bona Paulo be ta ia headava lasi totona taravatu idia atoa lasi; Baibel ia gwau “headava lasi” taravatu be “lauma dikadia” edia hahediba herevana ta. (1 Timoteo 4:1-3) To, idia headava lasi taudia be gau ta ese ia koua lasi Iehova idia hesiai henia totona. Unai dainai, namo lasi badina haida, hegeregere haida ese idia doria dainai ta ia headava, unai be aonega karana lasi.

4. Edena dala ai headava namona be natudia dekenai mauri namona ia henia?

⁴ To, ta ia headava totona badina namodia idia noho, a? Oibe. Headava be iseda lalokau Diravana ese ia henia harihari gauna ta. (Genese 2:18) Unai dainai, headava be mai ena namo bona hahenamo idauidau ia havaraia diba. Hegeregere, headava namona be natudia dekenai mauri namona ia henia. Tama sina ese natudia idia lalokau henidia, idia matahakani henidia, bona idia naridia. (Salamo 127:3; Efeso 6:1-4) To, headava be natudia havaraia totona sibona lasi.

5, 6. (a) Hadibaia Tauna 4:9-12 ena hereva hegeregerena, tura namodia idia noho hebou ena namo haida be dahaka? (b) Edena dala ai headava be varo toi amo idia hatua varona bamona?

⁵ Inai karoa ena siri badana bona ena badina siridia mani ita laloa: “Tau rua ese tau tamona idia hereaia noho, badina rua edia gaukara davana be namo. Badina bema ta ia moru neganai, iena turana ese do ia abia isi. To bema tau ta be sibona ia noho neganai ia moru, madi ia dika, badina ia do ia durua tauna ta be lasi. Inai danu, tau rua idia hekure hebou neganai edia tauanidia do idia siahu. To tau tamona sibona be keru neganai edena bamona do ia siahu diba? Tau tamona be tau ta ese do ia halusia diba, to tau rua ese unai heatu tauna idia koua diba. Varo toi dekena amo idia hatua varona be do idia makohia haraga lasi.”—Hadibaia Tauna 4:9-12.

⁶ Unai siri ese tura edia hebamo karana ena namo ia herevalaia. Oibe, headava lalonai tura namodia rua idia noho hebou bona unai siri ena hereva hegeregerena, idia ese ta ta idia durua, idia hagoadaia, bona idia naria. Edia headava be do ia goada bema Dirava be idia huanai ia noho. Unai siri ese ia hahedinaraia reana varo rua idia hatua be ia makohi diba. To, varo toi be nega tamona idia hatua neganai, do ia makohi be auka. Bema tau bona hahine be Iehova hamoalea karana idia laloa bada, edia headava be unai varo toi bamona do ia goada.

7, 8. (a) Mahuta hebou urana idia biagua diba lasi headava lasi taudia dekenai Paulo be dahaka sisiba ia henia? (b) Baibel be headava dekenai dahaka lalohadai maorona ia gwauraia?

⁷ Headava sibona lalonai tau bona hahine be mahuta hebou urana idia hagugurua diba. Oibe, headava sibona lalonai unai kara idia moalelaia diba. (Aonega Herevadia 5:18) Ena be headava lasi tauna be matamata negana ia hanaia vadaeni, to nega haida mahuta hebou urana do ia goada noho. Mahuta hebou urana ita biagua lasi neganai, iseda lalona ia veria diba sihari kava karana ita karaia totona. Dirava ena siahu amo, Paulo be headava lasi taudia dekenai inai sisiba ia henia: “Bema idia edia lalona ena ura, bona edia tauanina idia biagua hegeregere lasi neganai, namona be idia headava.”—1 Korinto 7:9; Iamesi 1:15.

⁸ Herevana badina idauidau dainai ta ia ura headava, to namona be lalohadai maorona ia abia. Paulo ia gwau idia headava taudia be “edia tauanina ai hisihisi do idia abia.” (1 Korinto 7:28, NW) Headava taudia ese idia davaria hekwakwanai be headava lasi taudia ese do idia davaria lasi. To, bema oi ura headava, edena dala ai hekwakwanai momo do oi dadaraia bona hahenamo momo oi davaria diba? Dala ta be adavana namona do oi abia hidi.

DAIKA BE ADAVANA NAMONA AI IA LAO DIBA?

9, 10. (a) Witnes tadikaka eiava taihu be murimuri hahine eiava tauna ia adavaia karana ena dika be Paulo ese edena dala ai ia haheitalaia? (b) Dirava ena sisiba idia dadaraia taudia be dahaka hekwakwanai idia davaria?

⁹ Bema ta ia ura adavana ia abia hidi, Paulo be mai anina bada hakaua herevana ta ia gwauraia: “Dirava idia abidadama henia lasi taudia danu do umui hakapua tamona lasi.” (2 Korinto 6:14) Paulo be biru gaukara ena haheitalai ta ia herevalaia. Bema animal badana bona maragina be tano geia totona idia hakapua tamona, do idia gaukara namonamo lasi bona hisihisi do idia davaria. Unai hegeregerena, Witnes tadikaka eiava taihu ta be murimuri tauna eiava hahinena ia adavaia neganai, hekwakwanai momo do idia davaria. Bema tadikaka eiava taihu ia ura Iehova ena lalokau lalonai ia noho, to ena adavana be unai ia laloa bada lasi, idia huanai lalotamona be lasi, bona unai ese hekwakwanai ia havaraia diba. Unai dainai, Paulo ese Keristani taudia ia hagoadaia ‘Keristani tauna sibona do idia adavaia’ be namo.—1 Korinto 7:39.

¹⁰ Nega haida, headava lasi Keristani taudia idia laloa sibona idia noho ena lalohisihisi idia hanaia totona, reana Iehova idia abidadama henia lasi tauna idia adavaia be namo. To, haida be Baibel ena sisiba idia dadaraia, bona nega momo unai bamona idia karaia taudia be hekwakwanai idia davaria. Unai bamona idia karaia taudia be edia adavadia danu mai anina bada gaudia idia herevalaia eiava karaia hebou diba lasi. Hari ia mamia lalohisihisina be guna ia headava lasi lalonai sibona ia noho ena lalohisihisi ia hanaia. To, ita moale badina headava lasi taudia tausen momo be Dirava ena sisiba idia badinaia noho. (Salamo 32:8) Ena be idia ura gabeai do idia headava, to idia naria noho ela bona Iehova Dirava ia tomadiho henia turana namona ta idia davaria.

11. Dahaka ese oi do ia durua adavana namona oi abia hidi totona? (Rau 130 ai ia noho mauana itaia danu.)

¹¹ To, ita gwau lasi Iehova ena hesiai taudia ibounai be adavana namona ai do idia lao. Bema oi ura headava, namona be emu kara, Dirava ena hesiai gaukara lalonai oi tahua gaudia, bona Dirava oi lalokau henia karana be oi ura henia tauna eiava hahinena ena ida idia hegeregere. Hesiai tauna mai ena kamonai oreana be headava dekenai heduru hereva namodia momo ia henia. Unai sisiba namodia oi stadilaia namonamo neganai, unai ese oi do ia durua unai mai anina bada abia hidi oi karaia totona.a—Salamo 119:105.

12. Tano momo dekenai edena kastom karana idia badinaia, bona Baibel ese dahaka hakaua herevana ia gwauraia?

¹² Tano momo ai, tama sina ese edia natuna ena adavana idia abia hidi. Idia gwau tama sina be mai edia aonega bona diba unai mai anina bada abia hidi idia karaia totona. Baibel negadiai, nega momo tama sina ese adavana idia abia hidi dainai headava ia namo. Aberahamo be iena hesiai tauna ia siaia lao Isako totona adavana ta do ia abia hidi be haheitalai namona tama sina dekenai. Aberahamo be moni bona dagi ia laloa bada lasi. To, ia hekwarahi bada Iehova idia tomadiho henia taudia huanai Isako ena adavana ia tahua totona.b—Genese 24:3, 67.

EDENA DALA AI HEADAVA NAMONA TOTONA OI HEGAEGAE DIBA?

13-15. (a) Edena dala ai Aonega Herevadia 24:27 ena hakaua herevana ese ia ura headava matamata tauna ia durua diba? (b) Edena dala ai kekeni matamata be headava totona ia hegaegae diba?

¹³ Bema oi ura headava, namona be sibona oi nanadaia, ‘Lau be lau hegeregere momokani, a?’ Adavana namona ai oi lao totona emu hemami mero o kekeni tura henia karana, lalokau, mahuta hebou bona natuna havaraia karana dekenai be hegeregere lasi. To, namona be tau bona hahine be headava ena maduna idauidau idia laloa.

¹⁴ Adavana ia tahua tau matamata be inai hakaua herevana ia laloa namonamo be gau badana: “Oiemu tano hanamoa gaukara do oi haorea, bona oiemu uma gabuna do oi abia hegaegae. Unai murinai, oiemu noho rumana do oi haginia.” (Aonega Herevadia 24:27) Unai siri ena anina be dahaka? Unai negai, bema tau ta ia ura ena ‘noho rumana do ia haginia,’ eiava ia headava bona bese ta ia havaraia, namona be sibona do ia nanadaia, ‘Lau hegeregere egu adavana bona natudia lau naria bona durua totona, a?’ Namona be iena uma gabu do ia haorea guna. Hari danu, unai hakaua herevana ita badinaia diba. Ia ura headava tauna be maduna ia huaia totona ia hegaegae be namo. Bema ia goada, ia gaukara be namo. Baibel ia hahedinaraia bema tau ta be tauanina dalanai, hemami bona tomadiho dalanai ena ruma bese ia durua lasi, ena dika ese abidadama lasi tauna ena dika ia hereaia!—1 Timoteo 5:8.

¹⁵ Bema kekeni ta ia ura headava, anina be ia laloparara ia ese maduna badadia haida do ia huaia. Baibel ese hahine ia hanamoa badina ena adavana ia durua bona ena ruma bese ia naria totona mai diba bona aonega ida ia gaukara. (Aonega Herevadia 31:10-31) Idia hegaegae lasi to idia headava haraga taudia be sibona edia ura idia atoa guna bona do idia adavaia tauna o hahine idia durua daladia idia laloa lasi. To, mai anina bada gauna be inai: Namona be headava idia lalohadailaia taudia be idia hegeregere Dirava ena hakaua herevadia be edia headava maurina lalonai idia badinaia totona.

16, 17. Headava totona idia hegaegae taudia ese edena hakaua herevadia idia laloa dobu be namo?

¹⁶ Headava totona oi hegaegae ena anina be Dirava ese tau bona hahine dekenai ia henia maduna do oi laloa dobu. Keristani tauna ese ruma bese ena kwara dagina ena anina ia diba be namo. Ia be bosi dikana ta bamona iena ruma bese do ia biagua lasi. To, namona be Iesu ese ena kwara dagina ia gaukaralaia dalana ia tohotohoa. (Efeso 5:23) Unai hegeregerena, Keristani hahinena be ena maduna ia lalopararalaia be gau badana. Mai ena ura ida tau ena “taravatu” henunai do ia noho, a? (Roma 7:2) Ia be Iehova bona Keriso edia taravatu henunai ia noho vadaeni. (Galatia 6:2) To, ruma bese lalonai iena adavana ena siahu be taravatu ma ta. Ia hegeregere ena goevadae lasi adavana ena siahu henunai ia noho totona, a? Bema ia ura lasi unai bamona ia karaia, vadaeni namona be ia headava lasi.

¹⁷ Ma danu, headava taudia be edia adavana ena namo idia laloa bada be namo. (Filipi 2:4) Paulo ia gwau: “Tau ese iena adavana do ia lalokau henia, ia sibona ia lalokau henia hegeregerena. Hahine danu ese iena adavana do ia matauraia.” Lauma helaga ena siahu amo Paulo ia laloparara tau ia ura iena adavana ese do ia matauraia. Bona hahine be ena adavana ese ia lalokau henia be namo.—Efeso 5:21-33.

18. Dahaka dainai mero bona kekeni idia loa hebou neganai, tauanina ena ura idia biagua be gau badana?

¹⁸ Mero bona kekeni idia loa hebou be moale karadia sibona idia karaia totona lasi. To, unai nega ai mero bona kekeni ese dala maorona ai ta ta do idia kara henia daladia do idia dibaia, bona do idia tahua bema idia ruaosi be hegeregere idia headava totona. Unai nega ai namona be tauanina ena ura idia biagua! Badina idia ruaosi edia ura heheni be goada dainai, heudahanai karana ena hahetoho ia vara diba. To, bema tau bona hahine huanai lalokau korikorina ia noho, ta do ia ura lasi ma ta ena hetura karana Dirava ida do ia hadikaia. (1 Tesalonika 4:6) Unai dainai bema oi be ta ida oi loa hebou, tauanina ena ura oi biagua be gau badana. Ena be oi headava eiava oi headava lasi, to emu mauri lalonai unai kara ese oi do ia durua bada.

EMU HEADAVA IA NOHO DAUDAU DALANA

19, 20. Edena dala ai Keristani tauna ena lalohadai headava dekenai be tanobada taudia edia amo ia idau? Gwauraia hedinarai.

¹⁹ Bema tau bona hahine idia ura edia headava ia noho daudau, namona be idia ruaosi be headava dekenai gwauhamata badinaia karana idia laloa bada. Taunimanima be muvi idia itaia neganai, tau bona hahine be mai moale ida idia headava bona muvi be unuseniai ia doko. To mauri korikori be unai bamona lasi. Iehova ia ura tau bona hahine idia headava murinai, mai moale ida do idia noho hebou ela bona hanaihanai. (Genese 2:24) To madi, hari momo be unai bamona idia laloa lasi. Tano haida ai, headava idia herevalaia neganai idia gwau ia be varo rua idia kwatua hebou bamona. Idia laloparara lasi unai haheitalai ese taunimanima momo edia lalohadai ia hahedinaraia. Taunimanima idia ura varo rua idia kwatua namonamo bona ia goada be gau badana. To, danu idia ura unai varo idia ruhaia neganai, ia auka lasi idia kokia totona.

²⁰ Hari inai negai, momo idia laloa headava be ia noho daudau lasi gauna. Idia ura idia headava haraga badina idia laloa unai ese edia ura gauna do ia hagugurua, to bema edia mauri ia auka neganai idia ura edia headava idia hadokoa. To, Baibel ese headava totona ia gaukaralaia haheitalai mani oi laloa—varo toi amo idia hatua varona unai. Bouti totona idia hatua varodia be idia noho daudau gaudia, lai badana ia mai bona medu badana ia diho, to unai varo be idia dika haraga lasi. Unai hegeregerena, headava be ia noho daudau gauna. Laloatao, Iesu ia gwau: “Dirava ese ia hakapua taudia, be taunimanima ese do idia hapararaia lasi.” (Mataio 19:6) Bema oi headava, namona be headava be unai bamona oi laloa danu. Unai bamona oi laloa neganai, headava maurina be ia auka, a? Lasi.

21. Tau bona hahine be edena dala ai ta ta idia kara henia be namo, bona dahaka ese idia ia durua unai idia karaia totona?

²¹ Tau bona hahine be mai lalohadai maorona ida ta ta idia kara henia be namo. Bema idia ta ta edia kara namodia bona gaukara namona idia laloa bada, headava lalonai moale do ia noho. Ia goevadae lasi tau o hahine dekenai unai bamona ita laloa diba, a? Iehova ia diba ita be goevadae lasi taudia, to ita diba ia ese iseda kara namodia bona gaukara namodia sibona ia laloa bada. Salamo torea tauna ia gwau: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba?” (Salamo 130:3) Tau bona hahine be unai bamona lalohadai idia abia be namo, bona ta ta edia dika do idia gwauatao.—Kolose 3:13.

22, 23. Headava taudia dekenai edena dala ai Aberahamo bona Sara be haheitalai namona?

²² Bema lagani momo lalonai umui headava vadaeni, unai ese moale bada ia havaraia diba. Baibel ese Aberahamo bona Sara ia herevalaia neganai, idia be idia buruka vadaeni. Edia mauri lalonai hekwakwanai idia davaria danu. Mani Sara oi laloa, reana ena mauri lagani be 60 bamona, ena hanua namona Uru ia rakatania bona unai murinai palai ruma dekenai ia noho. To, iena adavana ena kwara dagina ia matauraia. Ia ese Aberahamo ia durua namonamo, bona mai hemataurai ida Aberahamo ena abia hidi ia badinaia. Bona mai momokani ida Aberahamo ia matauraia. Danu, Sara be “sibona lalona dekenai” ia gwau iena adavana be iena lohia. (Genese 18:12, NW; 1 Petero 3:6) Mai ena kudouna ibounai ida Aberahamo ia matauraia.

²³ Momokani, Aberahamo bona Sara be nega haida idia lalotamona lasi. Nega ta Sara ena hereva dainai Aberahamo ena ‘lalona ia hisihisi bada.’ To, Iehova ena hakaua henunai, Aberahamo be mai manau ida ena adavana ena hereva ia kamonai, bona ena ruma bese be hahenamo idia abia. (Genese 21:9-13) Hari inai negai, lagani momo lalonai idia headava vadaeni taudia be Aberahamo bona Sara amo gau momo idia dibaia diba.

24. Edena bamona headava be Iehova Dirava ia hanamoa, bona dahaka dainai?

²⁴ Keristani kongrigeisen ai, idia moale headava taudia tausen momo idia noho—hahine be iena adavana ia matauraia bada, tau be iena adavana ia lalokau henia bona hanamoa, bona idia gaukara hebou edia mauri lalonai Iehova ena ura idia atoa guna totona. Bema emu lalona oi hadaia oi headava totona, namona be emu adavana oi abia hidi namonamo, gau haida oi karaia hegaegae, bona oi gaukara goada headava lalonai maino bona lalokau ia noho totona. Unai ese Iehova Dirava ia hanamoa. Unai amo emu headava ese Iehova Dirava do ia hanamoa bona Dirava ena lalokau lalonai do umui noho.