Baibel Be Edena Bamona Oi Laloa?
Do oi gwau ia be . . .
taunimanima edia aonega amo idia torea bukana, a?
gori bukana, a?
Dirava ena Hereva, a?
BAIBEL IA GWAU
“Toretore Helagadia be Dirava ena hahekau henunai idia torea.”—2 Timoteo 3:16, Nega Matamata Baibel.
BAIBEL ENA NAMO
Henanadai badadia ia haerelaia.—Aonega Herevadia 2:1-5.
Dina ta ta ai oi ia hakaua diba.—Salamo 119:105.
Vaira negana ai do idia vara momokani gaudia be ita dekenai ia hadibaia.—Roma 15:4.
BAIBEL ITA ABIDADAMA HENIA DIBA, A?
Oibe, badina toi be inai:
Gau tamona ia herevalaia. Taunimanima idauidau 40 bamona ese Baibel be lagani 1,600 mai kahana lalonai idia torea. Ena be Baibel torea taudia momo be Baibel torea taudia ma haida idia diba lasi, to Genese ela bona Apokalupo ai gau tamona idia herevalaia, unai be Dirava ena ladana bona iena lohia siahuna!
Idaunegai sivaraidia ia herevalaia maoromaoro. Nega momo histori torea taudia ese tuari ai edia bese idia lusi ena sivarai idia torea lasi. To, Baibel torea taudia ese sibodia edia kerere bona edia bese edia kerere idia hunia lasi.—2 Sivarai 36:15, 16; Salamo 51:1-4.
Ena peroveta herevadia be hanaihanai idia guguru. Babulonia hadikaia karana be Baibel ese ia perovetalaia, bena lagani 200 murinai unai peroveta herevana ia guguru. (Isaia 13:17-22) Unai sibona lasi, to Babulonia do ia hadikaia tauna ena ladana danu be Baibel ese ia gwauraia hedinarai!—Isaia 45:1-3.
Baibel ena peroveta herevadia ma haida danu be idia guguru. Unai dainai, ita gwau diba Baibel be Dirava ena Hereva.—2 Petero 1:21.
MANI OI LALOA
Edena dala ai Dirava ena Hereva ese emu mauri ia hanamoa diba?
Haere be inai Baibel siridia dekenai: ISAIA 48:17, 18 bona 2 TIMOTEO 3:16, 17.