Dahaka Dainai Egu Toana Lau Laloa Momo?

DAHAKA DO OI KARAIA?

Haheitalai ta laloa: Julia be mira lalonai ia itaia ena tauanina be ia bada. Ia gwau: “Egu tauanina ia maragi be namo.” To, iena tama sina bona turadia idia gwau ia be “turia kavakava” o “turia momokani.”

Vanegai, Julia ia ura ena tauanina ia maragi dainai, hegeregere 2.2 kilogram (faiv pound) ia kokia. Anina be, dina haida lalonai, ia be do ia aniani lasi . . .

Bema oi be Julia, dahaka do oi karaia?

STOPU BONA LALOA!

Emu toana oi laloa bada be kerere lasi. Baibel ese ia sivarailaia tatau bona hahine haida (hegeregere Sara, Rahela, Abigaila, Iosepa, bona Davida) edia toana be namo herea. Baibel ia gwau, kekeni ladana Abisaga be “mai ena hairaina momokani.”​—⁠1 King Taudia 1:4.

To, memero kekeni momo be edia toana sibona idia laloa momo. Bona unai ese hekwakwanai haida ia havaraia diba. Mani oi laloa:

• Ripoti ta ia gwau, kekeni 58 pesen idia gwau idia be feti, to lasi, unai be 17 pesen sibona.

• Ripoti ma ta ia gwau, edia tauanina ia maragi hahinedia 45 pesen idia laloa idia bada!

• Matamata taudia haida be edia tauanina ia maragi totona idia aniani lasi​—⁠unai amo mase ia havaraia diba gorerena ladana anorexia idia abia.

Bema unai bamona anorexia gorerena oi abia, heduru oi tahua. Gau badana be tama sina o oi trastia turana ena heduru oi tahua. Baibel ia gwau: “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.”​—⁠Aonega Herevadia 17:17.

EDENA BAMONA EMU TOANA OI HANAMOA DIBA?

Taunimanima be emu kara dainai oi do idia ura henia o lasi. King Davida ena natuna Abesaloma oi laloa. Baibel ia gwau:

“Abesaloma be toana namo tauna momokani, iena toana be mai ena sivarai bada. Bona tau ta ese ia hereaia lasi.”​—⁠2 Samuela 14:25.

To, inai mero matamata Abesaloma be ia hekokoroku, sibona ia abia isi, bona ia koikoi momo. Unai dainai, Baibel be Abesaloma ena hairai ia herevalaia momo lasi, to ena gwau-edeede bona taunimanima alaia kava karana ia herevalaia momo.

Badina namona dainai, Bible ena sisiba ita dekenai be inai:

“Mauri matamata be dabua bamona do umui hahedokilaia.”​—⁠Kolose 3:10.

“Namo lasi emui hairai be murimuri ai sibona . . . , To namona be emui hairai be emui kudouna ai ia noho gauna.”​—⁠1 Petero 3:3, 4.

Oi ura emu toana ia namo be kerere lasi, to emu kara ia namo be gau badana. Momokani, taunimanima be emu kara namodia do idia hanamoa bada to emu tauanina goadana o hairai do idia hanamoa maragi! Kekeni ladana Phylicia ia gwau: “Taunimanima be emu hairai idia itaia haraga diba to do idia laloatao gauna be, emu kara namodia.”

EMU TOANA BE EDENA BAMONA?

Emu toana oi itaia neganai, nega momo oi moale lasi, a?

Emu tauanina ia maragi totona, oi ura opereisen (cosmetic surgery) oi abia hidi o aniani lasi maurina oi badinaia, a?

Emu toana dekenai, oi ura dahaka oi haidaua guna? (Henunai hereva ta oi sekolo.)

• LATA

• WEIGHT

• HUINA

• TAUANINA ENA SHAPE

• VAIRANA

• KOPI KALANA

Bema henanadai namba 1 bona 2 dekenai emu haere be “Oibe” to henanadai namba 3 dekenai haere toi o momo oi sekolo, vadaeni inai oi laloa: Haida idia itaia emu toana ia namo, to reana oi itaia emu toana ia dika. Momokani, reana lalohadai kererena oi abia bona emu toana oi laloa momo.​—⁠1 Samuel 16:7.