Esera be Dirava Ena Taravatu Ia Hadibaia

Lagani 70 ia hanaia vadaeni Israela taudia momo be Ierusalema dekenai idia giroa, to haida be Parasa Basileia ena hanua ta ta dekenai idia do noho. Idia ta be hahelaga tauna Esera, ia be Iehova ena Taravatu ia hadibaia tauna. Esera ia kamonai Ierusalema dekenai idia noho Iuda taudia be Taravatu idia badinaia lasi, unai dainai idia durua totona Ierusalema dekenai ia ura lao. Parasa ena King Aratasaseta be Esera dekenai ia gwau: ‘Dirava ese oi dekenai aonega ia henia, unai amo taunimanima dekenai iena Taravatu do oi hadibaia. Oi ida idia ura lao taudia oi abia lao danu.’ Esera ese Ierusalema dekenai do idia lao taudia ia haboua. Edia laolao daudauna lalonai idia gimaia totona, Iehova dekenai idia guriguri murinai idia lao.

Hua 4 murinai, Ierusalema dekenai idia ginidae. Lohia taudia ese Esera idia hamaoroa: ‘Israela taudia be Iehova idia gwau-edeede henia bona dirava koikoi idia tomadiho henia hahinedia idia adavaia.’ Esera be dahaka ia karaia? Taunimanima vairanai, Esera ia tui diho bona ia guriguri: ‘Iehova e, oi ese ai totona gau namodia momo oi karaia, to ai kara dika.’ Taunimanima idia helalo-kerehai, to kara dika idia do karaia noho. Esera ese tatau badadia bona hahemaoro taudia ia abia hidi hekwakwanai idia hamaoromaoroa totona. Hua toi lalonai, Iehova idia tomadiho henia lasi taudia be idia siaia lao.

Lagani 12 ia hanaia vadaeni. Unai nega ai, Ierusalema ena magu idia haginia lou. Unai dainai Esera ese ariara ai taunimanima ia haboua bona idia dekenai Dirava Ena Taravatu ia duahia. Esera ese buka ia kehoa neganai, taunimanima idia gini. Esera ese Iehova ia hanamoa bona taunimanima be mai lalotamona ida edia imana idia abia isi. Bena Esera ese Taravatu ia duahia bona anina ia herevalaia, bona taunimanima idia kamonai namonamo. Idia gwau Iehova idia rakatania bona idia taitai. Murina dinana ai, Esera ese idia dekenai Taravatu ma haida ia duahia. Idia laloparara Au Raurau Rumadia Ena Aria be ia kahirakahira. Karaharaga unai aria totona idia hegaegae matamaia.

Dina 7 lalonai aria idia karaia bona mai moale ida Iehova idia tanikiu henia, badina uma aniani namona idia abia. Unai bamona Au Raurau Rumadia Ena Aria be guna Iosua ena nega ai ia vara. Unai aria murinai, taunimanima idia haboua bona idia guriguri: ‘Iehova e, igui hesiai amo oi ese ai oi ruhaia, tano kaukau dekenai ai oi ubua, bona inai tano namona oi henia. To ai kara dika loulou. Peroveta taudia oi siaia ai oi sisiba henia totona, to ai kamonai lasi. To oi haheauka. Aberahamo dekenai oi karaia gwauhamata oi badinaia noho. Hari ai gwauhamata oi do ai kamonai henia.’ Idia ese edia gwauhamata idia torea bona lohia taudia, Levi taudia, bona hahelaga taudia ese unai idia hamomokania.