Paulo Bona Timoteo

Lusitera kongrigeisen ai Timoteo be tadikaka matamata. Iena tamana be Grik tauna bona sinana be Iuda hahine. Timoteo ia maragi neganai, iena sinana Eunike, bona tubuna hahine Loi ese ia dekenai Iehova idia hadibaia.

Paulo ena misinari laolao iharuana ai, ia itaia Lusitera dekenai Timoteo be tadikaka ia lalokau henidia bona ia ura idia ia durua. Paulo ese Timoteo ia boiria ia ida idia loaloa totona. Unai negadia ai, Paulo ese Timoteo ia treinia sivarai namona harorolaia bona hahediba tauna namona ai ia lao totona.

Paulo bona Timoteo idia lao gabudia ai, lauma helaga ese idia ia hakaua. Hanuaboi ta ai, Paulo be matahanai amo, tau ta ese ia hadibaia Makedonia dekenai do ia mai bona idia durua totona. Unai dainai Paulo, Timoteo, Sila, bona Luka idia lao unuseniai idia haroro bona kongrigeisen matamatadia idia haginia.

Makedonia ena siti Tesalonika ai, tatau bona hahine momo be Keristani taudia ai idia lao. To Iuda taudia haida be Paulo bona ia idia bamoa taudia dekenai idia mama. Idia ese hutuma idia haboua bona tadikaka idia veridia lao siti ena lohia taudia dekenai, idia boiboi: ‘Inai tatau be Roma gavamani edia inai taudia!’ Paulo bona Timoteo dekenai dika do ia vara dainai, hanuaboi ai Berea dekenai idia lao.

Berea ai idia noho taudia be sivarai namona idia ura dibaia, bona unuseniai Grik bona Iuda taudia be abidadama taudia ai idia lao. To Tesalonika amo idia mai Iuda taudia haida be heiriheiri idia havaraia neganai, Paulo be Atena dekenai ia lao. Timoteo bona Sila be idia noho Berea dekenai, tadikaka idia hagoadaia totona. Nega maorona ai, Paulo ese Timoteo ia siaia giroa lou Tesalonika dekenai dagedage idia davaria tadikaka ia durudia totona. Gabeai, Paulo ese Timoteo ia siaia kongrigeisen ma haida ia vadivadi henia bona hagoadaia totona.

Paulo ese Timoteo ia hamaoroa: ‘Iehova idia ura hesiai henia taudia be dagedage do idia davaria.’ Timoteo be ena abidadama dainai idia dagedage henia bona dibura ruma ai idia atoa. Ia moale badina unai dala amo Iehova dekenai ena badinaia karana ia hamomokania.

Paulo ese Filipi taudia ia hamaoroa: ‘Timoteo be umui dekenai do lau siaia. Umui dekenai hereva momokani lalonai raka ena anina bona haroro gaukara totona umui do ia hadibaia.’ Paulo ia diba Timoteo be unai do ia karaia. Lagani momo lalonai tura namodia bamona hesiai gaukara idia karaia hebou.