Timoteo—Natuna Korikorina Abidadama Lalonai

KERISTANI tauna aposetolo Paulo ese ena loaloa ai ia do ia bamoa totona Timoteo ia abia hidi neganai, Timoteo be do tau matamata. Unai kara ese lagani 15 bamona lalonai idia karaia hetura karana ia hamatamaia. Unai tatau ruaosi huanai ia vara hetura karana dainai Paulo ese Timoteo ia gwauraia diba “lauegu lalokau merona, mai ena kara momokani danu, Keriso ena mauri dalana lalonai” bona “lauegu natuna korikori, Iesu oi badinaia dainai.”​—⁠1 Korinto 4:17; 1 Timoteo 1:⁠2.

Dahaka kara namodia be Timoteo ese ia hahedinaraia dainai, Paulo ese ia ura henia bada? Edena dala ai Timoteo be unai bamona turana namona ai ia lao? Bona Dirava ena lauma amo Timoteo ena gaukara idauidau idia torea sivaraidia ese ita dekenai dahaka gau namodia idia hadibaia?

Paulo ese Ia Abia Hidi

Lagani 50 C.E. bamona ai, aposetolo Paulo be ena misinari laolao iharuana lalonai Lusitera (hari inai negai ia be Turkey) dekenai ia vadivadi neganai, ia ese hahediba tauna matamatana Timoteo ia davaria. Ia hedinarai Timoteo ena mauri lagani be kahirakahira 20 o 25 ia do abia lasi, bona Keristani taudia Lusitera bona Ikonio ai ese ia idia gwauraia namo. (Kara 16:​1-3) Ia be ena ladana ena anina hegeregerena ia noho, ena anina be “Dirava Ia Matauraia Tauna.” Timoteo ia maragi negana amo, ena tubuna hahine Loi bona ena sinana Eunike ese revareva helagadia amo idia hadibaia. (2 Timoteo 1:5; 3:​14, 15) Reana lagani haida gunanai, Paulo ese edia hanua ia vadivadi henia negana ginigunana ai, idia ese Keristani dalana idia abia dae. Hari, lauma helaga amo ia vara peroveta herevana ta ese Timoteo ena vaira negana ia hahedinaraia. (1 Timoteo 1:18) Unai hakaua dalana hegeregerena, Paulo bona kongregesen ena tau badadia ese edia imana be unai tau matamata ena kwarana dekenai idia atoa, unai amo idia hahedinaraia ia be gaukara ta do ia karaia, bona aposetolo Paulo ese ia abia hidi iena misinari turana ai ia lao.​—⁠1 Timoteo 4:​14; 2 Timoteo 1:⁠6.

Timoteo ena kopina idia utua lasi badina ena tamana be abidadama lasi Helene tauna. Momokani, unai be Keristani taudia edia taravatu ta lasi. To, do idia vadivadi henia Iuda taudia ia hahekwakwanaia gauna ta kokia totona, Timoteo be unai hisihisi bada gauna ia haheaukalaia.​—⁠Kara 16:⁠3.

Guna taunimanima idia laloa Timoteo be Iuda tauna ta, a? Diba bada taudia haida idia gwau rabi siahu taudia edia hereva hegeregerena, “bese idauidau taudia edia headava amo idia vara natuna ena bese be ena sinana amo idia gwauraia, to ena tamana amo lasi.” Unai ena anina be, “Iuda hahinena ese Iuda natudia ia havaraia.” To, toretore tauna Shaye Cohen ia henanadai bema unai bamona “taunimanima idia herevalaia rabi taudia edia taravatu be Keristani taudia ginigunadia edia negai ia noho vadaeni eiava” bona Iuda taudia Asia Minor ai ese idia badinaia eiava. Histori ena sivarai ia tahua murinai, ia gwau Idau Bese tatau ese Israela hahinedia idia adavaia neganai, “unai headava amo idia vara natudia idia gwauraia Israela taudia bema unai ruma bese be Israela taudia huanai idia noho. Sinana ena tano dekenai idia noho neganai idia be sinana ena tano taudia. Bema Israela hahinena ese ena tano ia rakatania ena adavana, Idau bese tauna, ida ia noho totona, ena natudia idia gwauraia Idau Bese taudia.” To, Timoteo ena tamana ena bese be idau bona ena sinana ena bese be idau dainai, reana unai ese ena haroro gaukara ia durua. Iuda taudia o Idau Bese taudia ia hereva henia neganai, edia mauri ia lalo-pararalaia bona reana unai dainai idia huanai idia noho hekwakwanai ia hanaia diba.

Paulo ena vadivadi Lusitera dekenai be mai anina bada gauna Timoteo ena mauri lalonai. Unai tau matamata ia ura lauma helaga ena hakaua dalana ia badinaia bona mai ena manau danu Keristani elda taudia ida ia gaukara hebou dainai hesiai gaukara ena hahenamo badadia momo ia abia. Unai nega ai ia lalo-parara eiava lasi, to Paulo ese ia hakaua lalonai gabeai Timoteo be mai anina bada tiokratik gaukaradia do ia karaia, idia dainai ena hanua amo ia lao ela bona unai basileia ena siti badana, Roma dekenai.

Timoteo ese Basileia Gaukarana Ia Habadaia

Timoteo ena gaukara sivaraidia haida sibona ita diba, to ia be Basileia gaukarana habadaia totona gabu momo dekenai ia loaloa. Lagani 50 C.E. ai, Timoteo ena laolao ginigunana lalonai ia be Paulo bona Sila ida Asia Minor amo Europe dekenai idia lao. Unuseniai ia be Filipi, Tesalonika, bona Berea ai haroro gaukara ia durua. Dagedage ia vara dainai Paulo be Atena dekenai ia lao murinai, Timoteo bona Sila be Berea dekenai ia rakatania, hahediba taudia matamatadia edia orea idia naria totona. (Kara 16:6–17:14) Gabeai, Paulo ese Timoteo ia siaia lao Tesalonika dekenai, unuseniai kongregesen matamatana ia hagoadaia totona. Korinto ai Paulo ia davaria neganai, Timoteo ese unai kongregesen ia tubu ena sivarai namona ia gwauraia.​—⁠ Kara 18:⁠5; 1 Tesalonika 3:1-7.

Timoteo be Korinto taudia ida ia noho negana ena daudau be Baibel ese ia gwauraia lasi. (2 Korinto 1:19) To, reana lagani 55 C.E. bamona ai, Paulo ese idia dekenai Timoteo ia siaia lou, badina edia hekwakwanai ena sivarai ia kamonai. (1 Korinto 4:17; 16:10) Gabeai, Timoteo be Erasito ida Efeso amo Makedonia dekenai idia siaia lao. Bona Paulo be Korinto amo Roma taudia ia tore henia neganai, Timoteo be ia danu ia noho lou.​—⁠Kara 19:22; Roma 16:⁠21.

Paulo be Ierusalema dekenai ia lao gwauraia dainai Korinto ia rakatania neganai, Timoteo bona ma haida be ia danu idia lao, bona ia idia bamoa ela bona Troa dekenai. Timoteo be ia lao ela bona Ierusalema eiava lasi be ita diba lasi. To lagani 60-​61 C.E. bamona ai, Paulo be Roma ena dibura ruma amo ia torea revarevadia toi edia hamatamaia herevadia lalonai Timoteo ena ladana ia torea.a (Kara 20:⁠4; Filipi 1:⁠1; Kolose 1:⁠1; Filemona 1) Paulo be palani ia karaia Timoteo be Roma amo Filipi dekenai do ia siaia lao. (Filipi 2:19) Bona Paulo be dibura amo idia ruhaia murinai, aposetolo ena hereva dainai Timoteo be Efeso ai ia noho.​—⁠1 Timoteo 1:⁠3.

Kongregesen edia namo totona mai ena ura ida Timoteo ese unai laolao ia karaia dainai ia ita hanamoa, badina aposetolo edia nega ai laolao be ia auka bona mai ena hekwarahi. (Gima Kohorona, August 15, 1996, rau 29 ai ia noho maua itaia.) Iena laolao ta bona unai ese Timoteo ena sivarai dekenai ita ia hadibaia gaudia mani oi laloa.

Timoteo Ena Kara Ita Dibaia

Aposetolo Paulo be Roma dekenai dibura ai ia noho neganai, Timoteo be ia ida ia noho bona unai nega ai Paulo ese Filipi dekenai dagedage idia davaria Keristani taudia ia tore henia bona ia gwau: “Lohiabada bema ia ura neganai, lau laloa nega daudau lasi lalonai Timoteo umui dekenai do lau siaia. Vadaeni emui sivarai do lau kamonai, bona egu lalona do ia moale. Badina be lau dekenai ta ia noho lasi Timoteo hegeregerena, iena laloa bona lauegu laloa be tamona. Bona ia ura bada umui do ia durua. Badina be ibounai ese sibona edia gau idia tahua, to Iesu Keriso ena gau idia tahua lasi. To umui be Timoteo ena kara namona umui diba. Mero ese iena tamana ia durua bamona, ia ese lau ia durua vadaeni. Sivarai Namona dainai ai ruaosi ai gaukara hebou vadaeni.”​—⁠Filipi 1:​1, 13, 28-30; 2:​19-22.

Unai hereva ese idia hahedinaraia Timoteo ese abidadama tamona taudia edia noho ia laloa bada. Bema bouti amo ia lao lasi, unai bamona laolao ena anina be dina 40 lalonai Roma amo Filipi dekenai do ia raka lao, Adriatic Davarana danu do ia hanaia, bona Roma dekenai do ia giroa lou danu be ma dina 40. Timoteo be ia ura unai ibounai ia karaia ena tadikaka bona taihu ia durua totona.

Ena be Timoteo ia loaloa momo, to nega haida iena tauanina ia goada lasi. Ia be mai ena hekwakwanai bogana dekenai bona ia “gorere nega momo.” (1 Timoteo 5:23) To sivarai namona dainai ia gaukara goadagoada. Unai dainai Paulo be ia ida hetura karana namona ia abia be ita hoalaia lasi.

Aposetolo ese ia hadibaia dainai bona idia gaukara hebou dainai Timoteo ese Paulo ena kara ia hahedinaraia. Unai dainai, Paulo ese ia hamaoroa diba: “Oi ese lauegu hadibaia hereva oi badinaia vadaeni. Bona lauegu kara, lauegu ura namodia, lauegu abidadama, lauegu haheauka, lauegu lalokau, inai ibounai oi itaia vadaeni. Oi itaia danu, metau ibounai lalonai lau goada noho. Oi diba danu, dagedage bona hisihisi momo ese lau idia hadikaia, Antioka dekenai, Ikonio dekenai, bona Lusitera dekenai. Dagedage idauidau edia hisihisi lau abia.” Timoteo be Paulo ida ia taitai, Paulo ese ena guriguri lalodiai ia laloa, bona Basileia gaukara habadaia totona ia ida ia gaukara.​—⁠2 Timoteo 1:​3, 4; 3:​10, 11.

Paulo ese Timoteo ia hagoadaia ia gwau ‘ibounai do idia itaia ia be tau matamata, to do ia naria, ta ese anina lasi gauna do ia gwauraia garina.’ Reana unai ese ia hahedinaraia Timoteo be ia hemarai bona ena siahu hahedinaraia karana ia daradaralaia. (1 Timoteo 4:12; 1 Korinto 16:​10, 11) To, ia hegeregere ia sibona do ia gaukara, bona Paulo ese ia siaia diba mai ena maduna bada hesiai gaukarana ia karaia totona. (1 Tesalonika 3:​1, 2) Paulo ia itaia ta ese tiokratik dalanai Efeso kongregesen ia naria namonamo be namo neganai, ia ese Timoteo ia hamaoroa unuseniai do ia noho bona ‘hadibaia hereva koikoi idia gwauraia taudia edia hereva do ia hadokoa.’ (1 Timoteo 1:⁠3) Ena be maduna momo ia idia henia, to Timoteo be ia manau. Bona ena be ia hemarai, to ia gari lasi. Hegeregere, ia ese Paulo ia durua totona Roma dekenai ia lao, unai neganai Paulo be ena abidadama dainai idia kota henia. Momokani, toana be unai badina tamona dainai Timoteo danu be nega sisina lalonai dibura ruma ai ia noho.​—⁠Heberu 13:⁠23.

Ita daradara lasi, Timoteo be Paulo amo gau momo ia dibaia. Aposetolo tauna ese ia danu ia gaukara hebou tauna ia laloa bada be ia hedinarai, badina ia ese Dirava ena lauma ena heduru amo revareva rua Timoteo dekenai ia torea bona unai be Keristani Greek Revarevadia lalonai idia noho. Lagani 65 C.E. bamona ai, Paulo ia lalo-parara iena mase be kahirakahira neganai, ia ese Timoteo ia boiria lou. (2 Timoteo 4:​6, 9) Paulo idia do hamasea lasi neganai Timoteo ese ia itaia eiava lasi, be Baibel ese ia hahedinaraia lasi.

Sibona Oi Henia!

Timoteo ena haheitalai namona amo gau momo ita dibaia diba. Paulo ia bamoa dainai ia ese namo bada ia davaria, ia be ia hemarai tau matamata amo ia tubu daekau ela bona naria tauna ta ai ia lao. Hari inai negai, Keristani tatau bona hahine matamatadia be unai bamona hebamo karana amo gau momo idia dibaia diba. Bona bema Iehova ena gaukara be edia gaukara korikori ai idia halaoa, idia ese mai anina bada gaukara momo do idia karaia diba. (1 Korinto 15:58) Idia be painia gaukara, o ful-taim haroro gaukara idia karaia diba edia kongregesen ai, o reana Basileia harorolaia taudia be momo lasi gabuna dekenai hesiai gaukara idia karaia diba. Idia karaia diba gaudia ma haida be misinari gaukara tano ma ta dekenai o hesiai gaukara Watch Tower Society ena hedikwota dekenai o ena brens ta dekenai. Bona, momokani, Keristani taudia ibounai ese Timoteo ia hahedinaraia karana idia hahedinaraia diba, mai edia goada ibounai ida Iehova ena hesiai gaukara idia karaia diba.

Oi ura lauma dalanai do oi tubu noho, Iehova ese ia laloa oi karaia diba gaukarana ai ena orea ese oi do ia gaukaralaia diba totona, a? Vadaeni, Timoteo ia karaia bamona oi karaia. Oi karaia diba hegeregerena, sibona oi henia. Daika ia diba edena bamona hesiai gaukara ena hahenamo be vaira negana ai do oi abia diba?

[Footnote]

[Picture on page 31]

“Lau dekenai ta ia noho lasi Timoteo hegeregerena”