Bible Herevana Haidaua Hahine Momo Adavaia Totona be Maoro, A?
MAGASIN ta ladana Bijeen (Noho Hebou) be Roman Katolik magasin ta Netherlands amo, bona toretore tauna ta, Sjef Donders ese unuseniai Africa tanodia haida lalodiai idia hepapahuahulaia herevana ta ia torea. Bible ia gwau adavana tamona abia be maoro, to Africa taudia edia kara be tatau ese hahine momo idia adavaia. Unai toretore tauna ia gwau hepapahuahu do idia hadokoa bema “dubu ena hahediba [adavana tamona sibona be maoro] do idia kokia neganai.”
Unai dubu ena lalo-rua karana inai sivarai ese ia hahedinaraia. Toretore tauna Donders be American fada tauna, Eugene Hillman, Holy Ghost Fathers ena memba ta, Roman Katolik dubu lalonai, ena hereva ia torea. Unai fada tauna ese Katolik ena misinari gaukara ia gunalaia Africa dekenai. Unai tau Hillman ese buka ta lalonai tatau ese hahine momo adavaia karana ia torea, bona ia gwau: “Bema dika badana ta ia vara, hegeregere tano ia mareremarere o abata badana ta ia vara, eiava taunimanima edia kara amo hekwakwanai bada herea ia vara bona unai amo tatau momo herea idia mase, bona idia roho mauri hahinedia momo idia noho kava, vadaeni Bible ena hereva amo gwau maoro do idia tahua unai tatau oredia ese hahine momo ida do idia mahuta hebou totona.”
Gwau maoro herevana ta do idia davaria diba a? Unai fada tauna ena lalohadai be herevana. Keristen tauna ta be edena bese amo eiava ena noho dalana ena toana be herevana, ia dekenai hahine momo adavaia karana be mai taravatuna. Eden umana dekenai Dirava ese adavana tamona sibona ia henia tau dekenai, bona Iesu Keriso ia gwau Keristen kongregesen taudia ese unai idia badinaia lou be namo. (Mataio 19:4—6) Lauma helaga ena siahu amo Paulo be inai bamona ia torea: “Ekalesia gunalaia tauna be kara maoromaoro tauna, . . . hahine tamona ena adavana.” (1 Timoteo 3:2) Bona Keristen taudia iboudiai dekenai inai sisiba ia henia, ia gwau: “Lebulebu ia vara garina tatau ese edia adavana ta ta do idia abia be namo. Hahine taudia danu edia adavana korikori sibona do idia abia be namo.” (1 Korinto 7:2) Vadaeni, ia hedinarai goevagoeva Keristen korikori taudia ese hahine momo idia adavaia be maoro lasi.