Duahia Taudia Idia Henanadai
Adavana Momo Adavaia Karana Be Dirava Ese Ia Abia Dae, A?
Lasi; Dirava ese Eden umana lalonai adavana tamona adavaia karana ena taravatu ia atoa. Gabeai, Iesu Keriso ese iena murinai idia raka taudia dekenai unai taravatu ia gwauraia lou.—Genese 2:18-24; Mataio 19:4-6.
Aberahamo, Iakobo, Davida, bona Solomona be hahine momo idia adavaia, a? Oibe, to Baibel ese unai kara be edena bamona ia herevalaia? Ia hahedinaraia Aberahamo bona Iakobo edia bese lalonai adavana momo adavaia karana ese hepapahuahu ia havaraia. (Genese 16:1-4; 29:18–30:24) Gabeai, Dirava ena Taravatu king ta ta dekenai be inai bamona: “King . . . ese adavana momo do ia abia lasi, idia ese Lohiabada dekena amo iena lalona do idia veria garina.” (Deuteronomi 17:15, 17) Solomona be hahine 700 mai kahana ia adavaia karana amo unai taravatu ia badinaia lasi! Madi, unai hahine ese Solomona idia hakaua kerere dainai, Iehova ia rakatania. (1 King Taudia 11:1-4) Unai ese ia hahedinaraia, adavana momo adavaia karana be Baibel ese ia gwauraia dika.
To reana haida idia laloa, dahaka dainai Dirava ese adavana momo adavaia karana ia koua lasi? Inai haheitalai oi laloa: Oi dekenai sea o teibolo gunana ta ia noho bona oi ura lasi negea, badina oi ura nega sisina lalonai do oi gaukaralaia, ani? Momokani, Dirava ena dala bona lalohadai be iseda dala bona lalohadai ia hereaia. (Isaia 55:8, 9) To, Dirava ese adavana momo adavaia karana ia koua haraga lasi ena badina haida mani ita itaia.
Laloatao, Eden lalonai Iehova be “garana” ta ia gwauhamatalaia bona unai garana ese Satani do ia haorea. Gabeai, Iehova ia gwau Aberahamo be bese ibounai edia tamana ai do ia lao bona unai Garana be iena bese amo do ia mai. (Genese 3:15; 22:18, BHğ) Satani ia ura bada unai garana ena mai dalana ia koua. Unai dainai, ia ese idaunegai Israela besena ia hadikaia. Nega momo Satani ese Israela taudia edia lalona ia veria kara dika idia karaia totona, unai amo Dirava ena lalonamo bona gimaia karana idia laloaboio.
Iehova ese Israela taudia ia durua Satani ena tarapu idauidau idia hanaia totona, Ia be hanaihanai peroveta taudia ia siaia idia dekenai kara maoromaoro taravatudia idia hadibaia. To, Ia diba vadaeni iena taunimanima be hanaihanai ena taravatu, hegeregere kaivakuku tomadiho henia lasi ena taravatu danu, do idia makohia. (Esodo 32:9) Bema taravatu ta idia badinaia be auka, vadaeni edena dala ai adavana momo adavaia karana ena taravatu do idia badinaia? Iehova be taunimanima edia kara ia lalopararalaia goevagoeva dainai, ena be unai negai adavana momo adavaia karana be bada, to Ia itaia unai be nega maorona lasi unai kara ia koua totona. Bema unai negai adavana momo adavaia karana ia koua, vadaeni Satani ese Israela taudia ia hamorua haraga diba.
Dirava ese adavana momo adavaia karana ia koua haraga lasi ena badina ma haida idia noho danu. Israela besena ia durua bese badana ai ia lao totona. Israela besena ia bada ia lao neganai, unai ese idia ia gimaia ela bona Mesia ia ginidae. Danu, adavana momo adavaia karana ese hahine haida ia durua, bona nega dikadia ai idia be mai edia ruma bona edia ruma bese ese idia naria diba.
To laloaboio lasi, Iehova ese adavana momo adavaia karana ia hamatamaia lasi. Ia ese unai kara ia koua haraga lasi, bona unai ese hahine be dika amo ia gimadia diba. (Esodo 21:10, 11; Deuteronomi 21:15-17) Iehova be ia idia tomadiho henia taudia huanai adavana momo adavaia karana Ia haorea totona, Ia be ena Natuna amo Eden ai Ia karaia headava taravatuna Ia haginia lou. Unai dainai, Iesu ese ena hahediba taudia dekenai adavana momo adavaia karana ia taravatua. (Mareko 10:8) Unai amo inai hereva momokani ia hedinarai: Idaunegai Mose ena Taravatu be namo, to “Keriso ena taravatu” be namo herea.—Galatia 6:2.