Iesu ena Mauri bona Gaukara

Sabati Dinana ai Kara Namo Ia Karaia

INAI be lagani 31 C.E. ai idia vara gaudia edia sivarai. Hua haida idia lao vadaeni, Iesu ese Iudea ia rakatania bena Galilea ia lao henia noho neganai, Samaria ena ranu gurina ta dekenai hahine ta ia hereva henia.

Galilea dekenai ia haroro momo, bena Iudea dekenai ia giroa lou, unuseniai dubu lalodiai ia haroro. Ena haroro gaukara Galilea ai be Bible ese ia herevalaia momo, to lagani 30 C.E. ena Paseka murinai Iudea lalonai ia karaia haroro gaukarana ia herevalaia momo lasi. Badina be Galilea taudia momo ese ena hereva idia abia dae, to Iudea taudia haida sibodia ese ena hereva idia abia dae.

Iesu be Iudea ena taoni badana, Ierusalem dekenai ia lao, lagani 31 C.E. ena Paseka ariana totona. Ierusalem ai digu gohuna ta ladana Betesata ia noho. Gorere taudia, matakepulu taudia, aena dika taudia bona imana dika taudia momo be unuseniai idia lao, badina idia laloa gohu ena ranu ia marere neganai bema ranu dekenai do idia diho do idia namo lou.

Sabati dinanai, Iesu ese tau ta, ena gorere lagani be 38, ia itaia, gohu badinai ia hekure. Iesu ia diba lagani momo lalodiai ia gorere noho, unai dainai ia nanadaia, ia gwau: “Oi be mauri oi ura, a?”

Ia haere, ia gwau: “Lohiabada e, ranu ia marere neganai, ranu dekenai lau ia atoa diho tauna be lasi, gohu dekenai lau diho gwauraia neganai tau ta ia guna vadaeni.”

Iesu ese ia hereva henia, ia gwau: “Oi toreisi, oiemu geda oi lokua, oi raka.” Vadaeni, ena tauanina ia goada haragaharaga, ia tore isi, ena geda ia lokua, ia raka matama!

To Iuda taudia ese hari tau idia itaia neganai, idia gwau: “Inai be Sabati. Oiemu geda oi abia loaloa be mai taravatu.”

Ia haere henidia, ia gwau: “Lau ia hanamoa tauna ese ia hereva henia lau dekenai, ia gwau, ‘Oiemu geda oi lokua, oi raka.’ ”

Bena idia nanadaia, idia gwau: “Daika ese ia hanamoa oi, ia gwau, ‘Oiemu geda oi lokua, oi raka’?” Iesu be ia raka oho vadaeni, bona mauri ia davaria tauna be ena ladana ia diba lasi. To gabeai, Dubu Helaga lalonai Iesu ese ia davaria lou neganai, ia diba daika ese ia hamauria.

Vadaeni hari tau ia lao, Iuda taudia ia hamaorodia ia hamauria tauna be Iesu. Unai sivarai idia kamonai neganai, idia lao Iesu dekenai. Idia gwau henia badina be Sabati dinana ai kara namodia ia karaia. Idia dagedage henia danu! Luka 4:44; Ioane 5:​1-16.

◆ Iesu ese Iudea ia vadivadi henia guna bena nega ede daudauna murinai ma ia vadivadi henia lou?

◆ Dahaka dainai taunimanima momo be digu gohuna ladana Betesata dekenai idia lao?

◆ Digu gohuna ai Iesu ese dahaka hoa karana ia karaia, bona unai dainai Iuda taudia be edena bamona idia kara henia?