Keristen Taudia be Tuari Idia Durua Lasi

“Taunimanima ena rara ia bubua tauna, ia sibona ena rara danu be taunimanima ese do idia bubua, badina be Dirava ese taunimanima ia karaia,iena toana bamona.”—Genese 9:6, NW.

1. Lagani 1914 ema bona harihari, dahaka ia vara dainai taunimanima idia laloa momo?

LAGANI 1914 amo ema bona harihari taunimanima 100 milion edia rara idia bubua vadaeni. Bona vaira neganai dahaka do ia vara? Lagani 1945 lalonai Japan ena siti rua idia hadikaia momokani bona noholaia taudia 200,000 idia hamasedia. Unai gau dainai tanobada besedia badadia mai goadadia ruaosi be lalohadai matamatana idia abia. Edia palani be niuklia tuari gaudia momo herea, tanobada idia hadikaia ore diba gaudia, do idia haboudia, bena unai dala amo do idia hagaria heheni. Unai tuari gaudia dika rohorohodia be sabmarin ese gadobada dekenai idia abia loaloa, bona vanegai unai dika idia habadaia, tuari be guba dekenai do idia karaia dalana idia herevalaia neganai. Vadaeni, inai kavakava karadia rakatania dalana ia noho a?

2. Iesu ese hari inai nega edena bamona ia perovetalaia, bona Keristen taudia edena bamona ia gwauhamata henidia?

² Oibe, dala ia noho. To ia be tanobada besedia ese idia abia hidi dalana lasi. Iesu ese edia dara doko hari inai nega lalonai ia perovetalaia, ia gwau: “Dina, hua, hisiu dekenai toa do idia vara, bona tanobada besedia be do idia hisihisi bona edia kudouna dekenai do idia gari dikadika. Davara ena regena bona hurehure danu do idia bada. Taunimanima edia kudouna dekenai do idia gari momokani, edia laloa danu do idia doko, unai idia vara gaudia dainai. Badina be guba ena siahu do ia mareremarere.” Unai peroveta herevana ena dokonai, Iesu ese Keristen taudia ia gwauhamata henidia, ia gwau: “Do umui naria, . . . vadaeni inai dika ibounai dekena amo do umui roho mauri.”—Luka 21:25, 26, 36.

Maino Ita Tahua, Dirava Ida

3. (a) Tanobada besedia ese “inai tanobada e dirava” ena ura edena bamona idia karaia noho (b) Iehova ese edia gwau-edeede karadia edena bamona do ia hadokoa?

³ Tanobada besedia idia kara helulu, tanobada idia biagua totona, bona niuklia tuari gaudia idia abia besedia ese unai kara idia karaia badabada. Taunimanima haida idia laloa unai dala amo tanobada do idia hadikaia ore vaitani. Unai be “inai tanobada ena dirava” ena ura hegeregerena. Guba dekenai, Keriso be king dagina ia abia vadaeni, to tanobada besedia “idia gini bona lohia idia hebou, Iehova bona [ena Keriso] idia inai henidia.” Iehova ese do ia hagania neganai Keriso ese unai bese do ia hamakohidia, hegeregere auri itotohina amo do ia hamakohidia bamona. Bena inai gwauhamata do ia momokani: “Iseda maino ia havaraia Diravana ese nega sisina Satani do ia moia momokani umui emui aena henuna dekenai.”—2 Korinto 4:4; Salamo 2:2, 6-9; Roma 16:20.

4. Maino be edena bamona ita tahua diba, Dirava ida? (1 Petro 3:11)

⁴ Namona be ita ura ita be maino do ita tahua Dirava ida. Unai be edena bamona do ita karaia diba? Namona be ita ura Dirava ena lalohadai do ita abia; anina be, ia hegeregerena ita ese taunimanima edia mauri bona rara do ita matauraia, gau helagadia do ita gwauraidia.

5. Davida edia sivarai ese idia hahedinaraia, Iehova ese taunimanima edia rara idia bubua kava taudia edia davana ia henidia?

⁵ Iehova ese taunimanima mai edia rara ia havaradia, unai rara ese iseda tauanina ia hagoadaia bona ita ia hamauria. Iehova be nega ibounai ia ura lasi taunimanima edia rara do idia bubua kava. Kain ese taunimanima alaia karana ginigunana ia karaia murinai, Iehova ia gwau Abel ena rara ese ia boiboi henia, ia dainai Kain ena davana do ia henia totona. Gabeai, Kain ena tubuna ta, Lamek, ese tau ta ia alaia mase, bena ia gwau, bema ta ese ia alaia mase, iena rara dainai unai tau ena davana do ia henia. Gabeai, tanobada ia dika bona dagedage amo ia honudae. Iehova ese abata ia halasia, unai bese gunana haorea totona. Maino tauna Noa mai ena ruma taudia ida sibodia idia roho mauri.—Genese 4:8-12, 23, 24; 6:13; 7:1.

6. Dirava ena taravatu rara dekenai be dahaka, bona daidia ese unai taravatu idia badinaia be namo?

⁶ Bena Iehova ese Iena ura korikori rara dekenai be Noa ia hadibaia. Ia gwau: “Taunimanima ena rara ia bubua tauna, ia sibona ena rara danu be taunimanima ese do idia bubua, badina be Dirava ese taunimanima ia karaia, iena toana bamona.” (Genese 9:3-6, NW) Inai taravatu Dirava ena amo ese ia hahedinaraia goevagoeva mauri ita matauraia be namo, bona taunimanima iboudiai hari inai nega lalonai be Noa ena bese taudia; unai dainai, Dirava ena lalonamo idia tahua taudia iboudiai ese inai taravatu idia badinaia be namo. Hahegani Gwauta namba 6 ese danu ia gwau, “Taunimanima oi alaia lasi.” Rara kererena idia kotalaia bona davana idia henia be maoro.—Esodo 20:13; 21:12; Deuteronomi 21:1-9; Heberu 10:30.

7. (a) Iehova ese Israel taudia ia oda henidia do idia tuari; dahaka dainai unai bamona ia haganidia be maoro? (b) Hari inai nega lalonai Keristen taudia be dahaka tuari idia tuarilaia noho?

⁷ Iehova ese rara bubua karana ia taravatulaia goevagoeva; vadaeni dahaka dainai ia ese Israel besena be gwaumaoro ia henidia do idia tuari, bona nega haida ia haganidia do idia tuari? Namona be inai ita laloa: Unai tuari be tuari helagadia, idia amo Iehova, tanobada ibounai ena Diadi, ese demoni idia tomadiho henidia besedia ia haoredia. Kanana taudia be Gwauhamata Tanona idia noholaia kava, unai be edia tano korikorina lasi. Danu, demoni ese idia biagudia dainai matabodaga karadia momo idia karaia, unai kara amo Dirava ena bese helagana do idia hakererea diba. Iehova ena oda hegeregerena, iena bese taudia ese unai matabodaga taudia idia tuari henidia, edia noho gabuna amo idia negedia. (Levitiko 18:1-30; Deuteronomi 7:1-6, 24) Unai hegeregerena, Keristen taudia hari inai nega lalonai be lauma tuarina idia tuarilaia be maoro.—2 Korinto 10:3-5; Efeso 6:11-18.

8. Dahaka ese ia hahedinaraia Dirava ese kerere lasi taudia edia rara bubua karana ia badulaia?

⁸ To, Iehova ia gwaumaoro henidia lasi taunimanima edia rara do idia bubua kava totona. Unai dainai, Iuda ena pavapava ta ena sivarai be inai bamona idia torea: “Inai danu, Manase ese kerere lasi taudia hutuma edia rara ia bubua ela bona Ierusalem ia hahonua vadaeni, duduna ela bona duduna.” Ena be Manase be gabeai ia helalo-kerehai bona sibona ia hamanaua Iehova vairanai, to unai rara kererena be ia bona ena iduhu taudia latadiai ia noho. Manase ena tubuna, King Iosia, ese Dirava ia gari henia dainai tano ia hagoevaia bona tomadiho momokani ia haginia lou. To unai rara kererena ia abia oho diba lasi. Iosia ena natuna Iehoiakim ena lohia negana lalonai, Iehova ese Nebukadnesara ia mailaia, Iuda do ia tuari henia bona unai bese ena dika davana do ia henia. “Momokani, inai be Iehova ena oda herevana dainai Iuda dekenai ia vara, iena vairana amo do idia abia oho totona, Manase ena kara dika, ia karaia karadia iboudiai, dainai, bona kerere lasi taudia edia rara ia ese ia bubua dainai. Badina be ia ese Ierusalem be kerere lasi taudia edia rara amo ia hahonua, bona Iehova ese unai kara ia gwauatao lasi.”—2 Hanua Pavapavadia 21:16; 24:1-4; 2 Sisiga 33:10-13.

Taravatu, Keristen Taudia Edia

9. Iesu ese rara bubua karana edena bamona ia taravatulaia Keristen taudia dekenai?

⁹ Iesu, Keristen Tomadihona Haginia Tauna, ese Keristen taudia ia taravatu henidia, taunimanima edia rara do idia bubua lasi. Sibona ena mase laloa lou karana be ena hahediba taudia ia haheitalaidia murinai, ia hamaorodia tuari kaia idia abidia hegaegae be namo. Idia gwau: “Lohiabada e, tuari kaia rua be inai.” Ia gwau: “Ia hegeregere vadaeni.” Dahaka dainai unai bamona ia hereva? Badina be ia ura taravatu ta mai ena anina bada do ia haginia, unai taravatu be Keristen taudia iboudiai ese do idia badinaia be namo. Getesemane dekenai, tuari taudia be Iesu dogoatao totona idia mai neganai, Petro ese iena tuari kaia ia veria, hahelaga tauna badana ena hesiai tauna ladana Malako ena taiana idibana ia utua oho. Dirava ena Natuna dainai unai bamona ia tuari be kara namo hereana a? Iesu be unai bamona ia laloa lasi. Hesiai tauna ena taiana ia hanamoa lou bena Petro ia hamaoroa, iena Tamana guba dekenai ia noho bema ia noia, ia ese aneru orea 12 do ia siaidia diba, Iesu idia hamauria totona. Unai neganai Iesu ese hereva ta mai anina bada ia gwauraia, ia gwau: “Tuari kaia idia abia taudia ibounai be tuari kaia dekenai do idia mase.”—Mataio 26: 51-53; Luka 22:36, 38, 49-51; Ioane 18:10, 11.

10. (a) Dahaka hereva mai anina bada be Ioane 17:14, 16, bona 18:36 dekenai ia gwauraia? (b) Aposetolo taudia edia nega lalonai Keristen taudia be dahaka idia karaia bena unai dainai idia roho mauri?

¹⁰ Gabeai Keristen taudia aposetolo edia nega lalonai idia noho ese Iesu ena guriguri herevana ta idia laloa lou, ena hahediba taudia dainai Iehova ia guriguri henia goadagoada, ia gwau: “Idia be tanobada ena lasi, lau hegeregerena, lau be tanobada ena lasi.” Idia ese Iesu ena haere, Pontio Pilato ia henia herevana, idia laloatao: “Lauegu Basileia be inai tanobada gauna lasi. Bema lauegu Basileia be inai tanobada gauna, egu hesiai taudia be do idia tuari, Iuda taudia edia imana dekena amo lau do idia hamauria. Gau tamona, lauegu Basileia be iniseni lasi.” (Ioane 17:14, 16; 18:36) Unai nega lalonai, Iuda taudia edia orea idauidau idia hepapahuahu heheni bona idia ala-ala heheni. To Iesu ena hahediba taudia ese unai dagedage karadia idia durua lasi. Lagani 30 bamona idia be Ierusalem lalonai idia naria noho. Bena Iesu ena peroveta herevana hegeregerena “ororo dekenai . . . idia heau lao.” Unai hepapahuahu bona ala-ala karadia amo idia siri bena idia heau dainai hahemauri idia abia.—Mataio 24:15, 16.

11, 12. (a) Korenelio bona Seregio Paulo be Keristen taudia ai idia lao neganai, dahaka idia lalohadailaia maoromaoro be namo? (b) Heduru be edeseniai idia abia, edia lalona idia hadaia maoromaoro totona? (c) Unai ena anina be dahaka ita dekenai?

¹¹ Reana haida idia henanadai, idia gwau, ‘Tuari kapitan, Korenelio bona gavana tauna, Seregio Paulo Kupro dekenai be edena bamona? Unai tatau ruaosi be tuari oreana taudia ani?’ Oibe, Keristen sivaraina idia abia dae neganai idia be tuari taudia. To Korenelio bona ma haida be idia helalo-kerehai murinai idia karaia karadia edia sivarai be Buka Helaga ese ia gwauraia lasi. Momokani, Seregio Paulo be “laloa namo tauna” bona “Lohiabada ena hadibaia hereva dekenai ia hoa bada herea,” unai dainai nega daudau lasi murinai ia be ena abidadama matamatana hegeregerena iena dagi ia laloa namonamo bona ia lalohadailaia maoromaoro. Korenelio danu be unai bamona ia karaia. (Kara 10:1, 2, 44-48; 13:7, 12) Bible ia gwau lasi hahediba taudia ese idia oda henidia. Idia lalo-parara dahaka do idia karaia be namo, badina be idia sibodia ese Dirava ena Hereva idia stadilaia dainai.—Isaia 2:2-4; Mika 4:3.

¹² Unai hegeregerena, namona be Keristen taudia hari inai nega lalonai ese ma haida idia oda henidia lasi, Keristen hegeregeredia idia be tanobada taudia edia hepapahuahu bona tuari amo edena bamona do idia siri. Namona be idia ta ta ena lalona ena lalona idia hadaia, Bible ena taravatu idia lalo-pararalaia hegeregerena.—Galatia 6:4, 5.

Hari Inai Nega Lalonai

13. Tanobada Ibounai Tuarina Ginigunana negana lalonai, Bible Student taudia be rara bubua karana amo idia siri toho neganai, dahaka ia vara idia dekenai?

¹³ Lagani 1914 lalonai tuari bada hereana ia vara. Idia tuari besedia ese edia kohu iboudiai bona edia bese taudia edia goada ibounai be tuari totona idia gaukaralaia. Iehova ena Witness taudia, unai neganai Bible Student taudia idia gwauraidia, momo ese dala idia tahua goadagoada rara dekenai do idia kerere lasi totona. Taunimanima ese idia dagedage henidia bada, Iesu ena peroveta herevana hegeregerena.—Ioane 15:17-20.

14, 15. (a) Tanobada Ibounai Tuarina Iharuana negana lalonai, Iehova ese ena hesiai taudia edena bamona ia sisiba henidia? (b) Bena Iehova ena Witness taudia be dahaka idia karaia? (c) Edia kara be edena bamona ia idau, tanobada ena, tomadiho orea taudia edia kara hegeregeredia lasi?

¹⁴ Tanobada besedia be lagani 1939 lalonai idia tuari lou neganai, Iehova ese ena hesiai taudia ia sisiba henidia goevagoeva. Tuari ia matamaia bena hua rua murinai inai sisiba be Bible stadi herevana ta amo ia henidia, unai hereva ena ladana be “Gini Siri,” Gima Kohorona, November 1, 1939 gauna lalonai idia torea. Unai hereva ena dokona be inai: “Lohiabada ena kaha dekenai idia gini taudia iboudiai be idia tuari noho besedia edia kara amo do idia siri, bona DIRAVA badana bona ena Pavapava do idia badinaia mai edia lalona ibounai danu.”

¹⁵ Dahaka ia vara? Tanobada hegegemadai Iehova ena Witness taudia be tadikaka bamona idia kara heheni; edia ekalesia varavara idau tanodia dekenai bona kerere lasi taudia oredia danu edia rara idia bubua lasi. Katolik taudia, Protestant taudia, Buddhist taudia, bona ma haida be idia ala-ala heheni noho lalonai, Iesu ena hahediba taudia momokanidia ese iena hahegani matamatana idia badinaia noho: “Lau ese umui dekenai lau lalokau henia hegeregerena, umui danu ta ta dekenai umui lalokau henia.”—Ioane 13:34.

16. (a) Iehova ena Witness taudia be edena bamona idia hahedinaraia idia be kara maoromaoro taudia? (b) Witness taudia be Dirava ena gau na Dirava edena bamona idia henia noho mai edia goada danu, bona unai dainai dahaka ia vara idia haida dekenai?

¹⁶ Hari Keristen taudia ese Kaisara ena gau Kaisara idia henia noho. Idia be kara maoromaoro taudia dainai, idia ese edia tano edia taravatu idia badinaia. (Mataio 22:17-21; Roma 13:1-7) To gau badana be inai, Dirava ena gau be Dirava idia henia, anina be edia mauri, idia gwauhamatalaia vadaeni gaudia, bona Keristen tomadihona danu idia henia. Unai dainai, Kaisara ese ia oda henidia Dirava ena gau be ia do idia henia neganai, idia ese Kara 4:19 bona 5:29 dekenai idia gwauraia herevadia hegeregeredia idia kara. Keristen taudia mai edia kamonai edia lalona idia hegeregere lasi, taunimanima edia rara do idia bubua, eiava tuari gaukara idaudia do idia karaia, eiava gaukara idaudia be unai gaukara edia gabunai do idia karaia, eiava bese ta ena pepe, kaivakuku bamona gauna, do idia hanamoa. Unai bamona idia gini auka dainai, idia haida be gavamani ese idia hamasedia.—Mataio 24:9; Apokalupo 2:10.

Idia Lalo-Rua Lasi

17. (a) Buka ta ena hereva hegeregerena, Nazi taudia ese Iehova ena Witness taudia be edena bamona idia kara henidia? (b) Iehova ena Witness taudia idia gini auka neganai, idia be edena bamona idia idau, haida hegeregeredia lasi

¹⁷ Vanegai idia halasia bukana ladana Of Gods and Men ia gwau, Hitler ena lohia negana lalonai, Iehova ena Witness taudia idia “dagedage henidia bada,” tomadiho oreadia oredia be unai bamona idia kara henidia lasi. Iehova ena Witness taudia idia lalo-rua lasi. Tomadiho oreadia idaudia Germany lalonai be edia orea taudia ese edia haroro taudia ami lalonai idia gavadia; unai dala amo Germany ena gavamani idia tomadiho henia bona politikol dagedage gauna ena “maka be edia imana idiba kahana dekenai o edia baguna dekenai” idia abia. (Apokalupo 13:16) Unai taudia ese Germany ena politikol oreana idia durua, bona edia lalohadai idia hahedinaraia goevagoeva, Hitler hanamoa totona edia imadia idia abia isi negadiai, bona swastika pepena idia hanamoa negadiai danu.

18. (a) Dahaka sivarai ese ia hahedinaraia Iehova ena Witness taudia be “politikol karadia amo ‘idia gini siri’”? (b) Inai sivarai dainai ita ta ta ibounai be dahaka ita karaia be namo?

¹⁸ Keristen taudia momokanidia be dahaka idia karaia unuseniai? Ataiai ai gwauraia bukana be ma ia gwau: “Iehova ena Witness taudia mo sibodia ese gavamani ena oda idia abia dae lasi. Idia dadaraia mai edia goada danu, bona unai dainai idia 4 4 amo rua rua be dibura dekenai idia koudia bona ta ta idia hamasedia. . . . Idia be idau, [tomadiho oreadia haida hegeregeredia lasi], tanobada idia laloa lasi, anina be tanobada taudia edia hahenamo herevadia bona tanobada ena gau namodia idia tahua lasi, bona idia laloa idia be tanobada taudia lasi. Politikol karadia amo idia ‘siri badina be idia be tanobada idauna ena—Dirava ena tanobada unai. . . . Idia lalorua lasi. . . . Idia diba, bema ami lalonai idia vareai, o bema idia vouti, o bema edia imadia idia abia isi Hitler hanamoa totona, unai amo idia hahedinaraia idia abia dae inai tanobada ena taravatu ese Dirava ena taravatu ia hanaia.” Dibura kampadia lalodiai danu taunimanima idia diba Iehova ena Witness taudia ese maino idia tahua bona idia dagedage lasi. Unai dainai “Witness taudia sibodia idia abidia hidi, kampa ena gima taudia be reisa latadia amo do idia seividia, badina be idia sibodia idia abidadama henidia, idia diba do idia hamasedia lasi.”

19. Iehova ena Witness taudia ese Iesu ena boga-auka edena bamona idia tohotohoa, bona unai dainai dahaka ia vara?

¹⁹ Tanobada ibounai tuarina iharuana negana lalonai, Iehova ena Witness taudia be Keristen taudia hegeregeredia tuari bona tuari durua karadia amo idia siri. Tanobada ibounai lalonai, idia be Iesu ena kara idia tohotohoa; ia hegeregerena idia be “tanobada ena lasi”; inai tanobada mai ena rara kererena be idia ese idia halusia, Keriso ese ia halusia hegeregerena.—Ioane 17:16; 16:33; 1 Ioane 5:4.

Rara Kererena amo Roho Mauri Dalana

20. (a) Dahaka dainai tomadiho koikoi ita heautania haraga be namo? (b) Hari inai nega lalonai roho mauri gabuna korikorina tamona be edeseniai?

²⁰ Gunaguna amo ema bona hari, tomadiho oreadia ese kerere lasi taudia edia rara be tuari “helagadia” lalodiai bona dagedage karadia idaudia lalodiai idia habubua. Idia ese lohia taudia dikadia, taunimanima momo edia rara idia bubua taudia, ida idia gwauhamata heheni. Unai lohia taudia ese Iehova ena Witness taudia be dibura rumadia bona dibura kampadia lalodiai idia koudia bona idia momo idia hamasedia neganai, tomadiho oreadia ese unai kara idia hanamoa. Gavamani gunalaia taudia, Witness taudia idia pididia mase eiava edia kwarana idia utua oho taudia, be idia ese idia durudia mai edia ura danu. Unai tomadiho oreadia be Iehova ena kota karana maoromaorona amo do idia roho mauri diba lasi. Unai hahemaoro do ia leiti lasi. Unai hegeregerena, namona be kara maoromaoro ura henia taudia iboudiai ese tomadiho koikoi—rara momo ia bubua oreana “Babulono Badana” unai—idia rakatania haraga bona Iehova ena orea lalonai hahemauri idia tahua be namo.—Apokalupo 18:2, 4, 21, 24.

21. Dirava ena taravatu hegeregerena hanua haida be roho mauri hanuadia idia gwauraia; unai ese dahaka ia laulaulaia?

²¹ Ita momo, Dirava ena Hereva ita do stadilaia lasi neganai, reana taunimanima edia rara ita bubua eiava ita be tomadiho oreadia o politikol oreadia, mai edia rara kereredia oreadia, edia memba taudia. Inai dala amo ita be idau negai Israel tauna ta bamona, ia badu lasi neganai ia ese ena bamona ia hamasea, to ia ese ena bamona ia badu henia lasi bona ia ura lasi ia hamasea. Unai neganai hanua 6 be roho mauri hanuadia idia gwauraidia, unai kerere tauna be idia ta dekenai do ia heau lao, bena do ia mauri. Unuseniai do ia noho, ela bona Israel ena hahelaga tauna badana do ia mase. Hari inai nega lalonai, unai anina be Dirava ena Hahelaga Tauna Badana, Iesu Keriso, ita abia dae bona iena hesiai gaukara ena hahenamo henunai ita noho. Bema ita be Dirava ena horoa taudia ida unuseniai ita noho, reana do ita roho mauri, Dirava ena hahemaoro hegeregerena Iesu Keriso ese rara idia bubua taudia edia davana do ia henidia neganai. Dirava ena orea dekenai idia heau lao taudia “hutuma bada herea” be unai roho mauri gabuna lalonai do idia noho be namo, ela bona Keriso, iena Hahelaga Tauna Badana dagina lalonai, ese ena hahemauri karana amo do ia doko, hegeregere do ia ‘masetania’ bamona.—Numera 35:6-8, 15, 22-25; 1 Korinto 15:22-26; Apokalupo 7:9, 14.

22. Isaia 2:4 dekenai, United Nations besedia be edena bamona idia idau, Dirava ena bese helagana hegeregerena lasi?

²² United Nations ena magu ena haba dekenai, New York, U.S.A. dekenai, Isaia 2:4 amo idia torea hanai herevadia be inai: “Idia ese edia tuari kaia do idia hodoa, tano geia auridia ai do idia halaoa, bona edia io do idia hodoa, au rigidia utua pakosidia ai do idia halaoa. Bese ta ese tuari kaia do ia abia isi lasi, bese ta hadikaia totona, bona tuari daladia do idia hadibaia lou lasi.” To daidia ese unai hereva idia badinaia hari inai nega lalonai? United Nations ena memba besedia ta lasi ese ia badinaia. “Bese” tamona ese ia badinaia, Iehova ena Witness taudia milion toi mai kahana unai, tanobada hegegemadai maino idia tahua, bona idia hahedinaraia goevagoeva Keristen taudia be tanobada ena rara bubua karadia amo edena bamona idia gini siri diba.

Henanadai Haida

□ Maino be edena bamona ita tahua Dirava ida?

□ Iehova ese rara bubua kava karana edena bamona ia laloa?

□ Keristen taudia idia gini siri ena anina be dahaka?

□ Daidia ese kara maoromaoro idia haheitalaia namo herea?

□ Roho mauri gabuna be edena bamona ita davaria diba?

[Box on page 21]

Abidadama, Boga-Auka, bona Lalo-Maoromaoro Sivaraina

Buka ta ladana New Religious Movements: A Perspective for Understanding Society, ese Iehova ena Witness taudia edia kara maoromaoro Nazi taudia edia dagedage idia haheaukalaia neganai, inai bamona ia gwauraia:

“Nazi taudia edia lalohadai be, edia politikol pati ese edia bese taudia iboudiai do ia biagudia, edia kara iboudiai lalodiai. Iehova ena Witness taudia ese idia kamonai henidia lasi neganai, idia dagedage henidia, to Witness taudia idia gini goada noho dainai idia daradara. Ena be idia dagedage henidia, idia hahisidia, idia hadiburadia bona idia kirikirilaidia, to Witness taudia ese edia lalohadai idia abia dae lasi. Unai dainai Nazi taudia ese Witness taudia edia kara idia hoalaia bona idia daradaralaia.”

“Nazi taudia ese Witness taudia idia inai henidia bada, Badina be ena be Nazi taudia edia goada ese Witness taudia edia goada ia hanaia, to Witness taudia edia abidadama ese Nazi taudia edia abidadama ia hanaia. Nazi taudia ese edia gavamani ena siahu idia daradaralaia . . . To Witness taudia be edia orea ena badina idia daradaralaia lasi, badina be edia abidadama be Abel ena nega amo ema ia hedinarai. Nazi taudia idia kwalimu dalana tamona be, idia inai henidia taudia idia koudia bona sibodia edia orea taudia edia lalona idia hagoadaia loulou, . . . to Witness taudia edia diba momokani edia orea taudia do idia gini auka ela bona mase.”

Keristen abidadama do ia kwalimu vaitani neganai do ita moale bada. (Roma 8:35-39) Unai neganai, “Maino Lohiana,” Iesu Keriso, be ena Basileia lalonai do ia lohia neganai, “iena lohia siahuna habadaia karana bona maino do idia doko lasi.”—Isaia 9:6, 7.

[Box on page 22]

Uhau ese Kara Maoromaoro Idia Badinaia

Inai sivarai be tau ta ese guna ia torea bena vanegai idia halasia. Europe ena tano ta dekenai ia itaia gaudia ia sivarailaia. Ia hahedinaraia, Witness uhaudia be mai edia boga-auka danu idia hahedinaraia idia be “tanobada ena lasi.”—Ioane 17:14.

‘1945, March 12: Ami taudia ese uhau rua, Iehova ena orea taudia, idia kota henidia, badina be (edia tomadiho ena anina hegeregerena) idia ura lasi ami lalonai do idia vareai. Idia ta, ena lagani be 20 henunai, idia kota henia guna, idia gwau lagani 15 do ia dibura. To ena bamona idia kota henia neganai, idia gwau do idia hamasea. Maoromaoro idia mailaia sibona ena hanua dekenai, iniseniai idia hamasea totona, Ia be unai bamona idia hamasedia taudia namba 14. Maino dekenai do ia laga-ani be namo. Inai gau ia vara dainai lau lalohisihisi bada. Iehova ena orea taudia be unai bamona oi kara henidia diba lasi.

‘Adorahi ai, hari tauhau idia hamasea ai kamonai. Maketi dekenai idia hamasea, taunimanima momo vairadiai. Idia hamasea gwauraia neganai, tuari tauna ta be sibona ia pidia mase, unai kara ia hemarailaia dainai. Ena lalona ia hegeregere lasi unai kara do ia durua, unai dainai sibona ia hamasea. Tauhau ia mase mai ena boga-auka danu. Hereva ta ia gwauraia lasi.’

Toreisi lou neganai, unai bamona uhau do idia moale, badina be mase ena hisihisi idia abia hidi, Iehova ena nega matamatana do idia reaia garina!—Hosea 13:14 itaia.