Haroro Herevana Hereadaena — Gima Kohorona INTANET LAIBRI

Iesu ena Mauri bona Gaukara

Haroro Herevana Hereadaena

BIBLE ena sivarai ta mai anina bada be inai: Nega ta Iesu be ororo gabana dekenai ia helai, taunimanima ia haroro henidia. Unai gabu be Galilea Gohuna kahirakahira dekenai, reana unai be Kaperanaum kahirakahira dekenai. Hanuaboi ai Iesu ese Dirava ia guriguri henia ela bona daba rere, bena ena hahediba taudia 12 ia abidia hidi, ena aposetolo ai ia halaodia. Bena ia be idia ida idia raka diho, ela bona ororo ena palaka gabuna dekenai idia ginidae.

Reana oi laloa unai neganai Iesu ia hesiku momokani bona ia ura do ia mahuta. To taunimanima hutuma be gabu daudaudia, Iudea bona Ierusalem bona Turo bona Sidono amo idia mai vadaeni, Iesu ena hereva do idia kamonaia bona ia ese edia gorere do ia hanamoa totona. Idia haida be demoni ese idia hahisidia.

Iesu ia diho neganai, gorere taudia ese idia dauatoho, bona ia ese iboudiai edia gorere ia hanamoa. Gabeai, Iesu be ororo ai ia daekau lou, bena ia helai bona taunimanima hutuma ia hadibadia. Mani oi laloa! Unai taunimanima iboudiai edia gorere badadia idia ore vadaeni!

Unai taunimanima idia ura bada unai hoa karadia ia karaia diba tauna ena hereva do idia kamonaia. To Iesu ia hereva iena hahediba taudia hadibadia totona; reana idia be ia kahirakahira dekenai idia helai. Mataio bona Luka ese ena hereva idia torea, ita danu be unai hereva amo namo do ita davaria totona.

Iesu ena haroro herevana ese taunimanima ia durudia bada diba, badina be dobu herevadia momokanidia be hereva haragadia amo ia gwauraia hedinarai goevagoeva dainai. Taunimanima momo idia karaia loulou karadia ia parabolelaia, unai dainai mauri namona be Dirava ena dalanai idia tahua taudia ese ena lalohadai idia lalo-pararalaia haraga diba. Gima Kohorona gabedia haida lalodiai, iena hereva haida do ita dibaia namonamo. Luka 6:12-20; Mataio 5:1, 2.

◆ Iesu ena haroro herevana hereadaena be edeseniai ia harorolaia, daidia be ia dekenai idia noho, bona dahaka ia vara guna bena unai hereva ia harorolaia?

◆ Dahaka dainai Iesu ena haroro herevana ese ita ia durua bada diba?