Oi Moale Karaia Ogogami Taudia Oi Bogadia Hisi
“Dekena tauna ia dadaraia tauna be tau dikana, to ogogami taudia ia bogadia hisi tauna be ia moale.”—HEREVA LADA-ISIDIA 14:21.
1, 2. Filapino ruma bese toi dekenai dahaka ia vara, bona edena henanadai ita lalodia be namo?
FILAPINO ruma bese toi be Pangasinan Provinsi dekenai Keristen hebouhebou ta dekenai idia lao neganai, lahi ese edia ruma ia gabudia ore. Edia ruma dekediai idia lou lao neganai, idia be aniani lasi bona mahuta gabuna lasi. Edia Keristen bamodia ese unai kerere ena sivarai idia kamonai neganai, haraga herea aniani idia henidia bona mahuta gabudia idia henidia. Kerukeru dabai, edia Keristen orea taudia ese baubau bona ma gau haida idia mailaia edia ruma karaia totona. Unai ruma bese toi ese namo idia davaria unai. Ena be lahi ese edia ruma ia gabudia ore, to edia abidadama bona Keristen karadia ia gabudia ore lasi, to idia bada idia lao edia orea taudia edia heduru namona dainai.—Mataio 6:33; 1 Korinto 3:12-14 itaia.
2 Unai bamona heduru karadia ese iseda lalona idia hamoalea, ani? Iseda abidadama idia hagoadaia badina ita diba taunimanima haida ese hebogahisi karadia idia do karaia noho bona Keristen dalana korikorina be do mai ena siahu. (Kara 28:2) To ita diba dahaka dainai Bible ia gwau, namona be “taunimanima ibounai dekenai kara namodia do ita karaia. To Keriso idia abidadama henia taudia do ita durua bada herea be namo”? (Galatia 6:10) Ita ta ta be unai kara edena bamona ita habadaia diba?
Haheitalai Namona Ita Totona
3. Edena bamona ita diba Iehova ese ita ia naria noho?
3 Hahediba tauna Iakobo ia gwau: “Gau namodia ibounai, bona harihari gaudia namodia momokani ibounai be Dirava dekena amo idia diho mai.” (Iakobo 1:17) Unai be momokani, badina lauma dalanai bona tauanina dalanai ita dabu gaudia Iehova ese ita ia henia badabada! To edena ia laloa bada? Lauma gaudia ia lalodia bada, ani? Ia ese Bible ita ia henia, lauma dalanai ita ia hakaua totona bona helaro ita abia totona. Ia ese ena Natuna ia henia dainai, ita be mai eda helaro, badina ena boubou gauna dainai iseda kara dika ia gwauatao diba bona mauri hanaihanai ita abia diba.—Ioane 3:16; Mataio 20:28.
4. Edena bamona ita diba Dirava ia ura tauanina dalanai ita noho namo?
4 Iehova ia ura tauanina dalanai ita noho namo danu. Aposetolo Paulo be unai ia herevalaia Lustera dekenai idia noho taudia ida. Ena be idia be tomadiho momokani taudia lasi, inai hereva idia gorea diba lasi: Dirava ese ‘kara namodia ia karaia, medu ia siaia diho guba amo, bona aniani haboua nega namona ia henia ita dekenai. Boga kunu ia henia ita dekenai, bona iseda kudouna dekenai moale ia havaraia.’ (Kara 14:15-17) Lalokau dainai, Iehova ese lauma dalanai bona tauanina dalanai ita dabu gaudia ita ia henia. Oi laloa unai kara dainai ia be “moale Diravana” a?—1 Timoteo 1:11, NW.
5. Dirava ena kara Israel taudia dekenai ese dahaka ia hahedinaraia?
5 Dirava ena kara Israel taudia dekenai ese ia hahedinaraia, ia idia tomadiho henia taudia edia ura gaudia, lauma gaudia bona tauanina gaudia unai, ia lalodia. Guna, ia ese Taravatu iena orea taudia ia henidia. Ena pavapava taudia ia haganidia, hahelaga taudia edia Taravatu bukana amo unai Taravatu be buka ta lalonai idia torea hanai, edia. Danu, nega ta ta ai taunimanima idia hebou bena Iena Taravatu idia duahia hedinarai idia vairadiai. (Deuteronomi 17:18; 31:9-13) Unai Taravatu dainai dubu idia haginia, unuseniai hahelaga taudia ese boubou karadia idia karaia, unai amo taunimanima ese Dirava ena hahenamo idia abia diba. Lagani ta ta iboudiai nega idauidau ai, Israel taudia edia hebou edia tomadiho ariadia karaia totona. (Deuteronomi 16:1-17) Unai gaudia dainai, Israel taudia ta ta be lauma dalanai Dirava vairanai idia taga diba.
6, 7. Iehova ese ena Taravatu amo edena bamona ia hahedinaraia Israel taudia ia naridia tauanina dalanai?
6 Iena Taravatu ese ia hahedinaraia, Dirava ese taunimanima edia tauanina durua gaudia danu ia lalodia. Reana oi laloatao Dirava ese Israel taudia dekenai taravatu ia henidia edia tauanina idia goeva totona bona gorere do idia henia hanai garina. (Deuteronomi 14:11-21; 23:10-14) Namona be ita laloaboio lasi, Dirava ese dala ia karaia ogogami tauna bona gau ta lasi tauna ese heduru idia abia totona. Gorere eiava kerere ta, hegeregere lahi o abata, ese Israel tauna ia haogogamia diba. Ena Taravatu lalonai Iehova ia gwau iboudiai edia noho do ia hegeregere lasi, haida do idia ogogami. (Deuteronomi 15:11) To ogogami taudia bona hisihisi idia ania taudia ia bogadia hisi sibona lasi. Dala ia karaia heduru idia abia totona.
7 Unai bamona taudia be aniani dekenai idia dabu. Unai dainai Dirava ese hahegani ia henia, Israel ai idia noho ogogami taudia be taunimanima edia uma amo gogoa taudia ese idia reaia anianina o aniani orena idia abia diba, edia. ( Deuteronomi 24:19-22; Levitiko 19:9, 10; 23:22) Dirava ia ura lasi taunimanima idia lahedo, to bema idia be mai edia dala ia ura idia gaukara edia aniani abia totona. Aniani orena ia gogoa tauna ia hekwarahi bada, reana hora momo lalodiai dina ena siahu ai ia gaukara, unai dina ena aniani gogoa totona. Namona be ita laloatao, unai dala amo Dirava ese idia dabu taudia ia durudia.—Ruta 2:2-7 itaia; Salamo 69:33; 102:17.
8. (a) Iuda taudia ese dahaka hahegani idia abia edia tadikaka durudia totona? (Ieremia 5:26, 28 itaia.) (b) Dirava ese Iuda taudia ia haganidia karana bona hari inai nega karana edia idau be dahaka?
8 Iehova ena hereva Isaia 58:6, 7 lalonai ese idia hahedinaraia ia ese hisihisi idia ania taudia ia lalodia bada. Nega ta idia dabu lasi Israel taudia haida idia anivaga koikoi neganai, Dirava ena peroveta tauna ia gwau: “Lau abia hidi vadaeni anivagana be inai ani? … Idia hahisihisidia taudia do oi ruhadia nege, bona maduna iboudiai do oi hamakohidia ani? Hitolo taudia ida emu aniani oi haria, bona ruma lasi ogogami taudia be emu ruma ai oi hakaudia vareai, ani? Dabua lasi tauna dekenai dabua oi henia, bona emu varavarana edia amo oi komu lasi, ani?” Taunimanima haida edia lalona be hegeregere ia dabu tauna ta do idia durudia bema unai durua karana be hekwarahi lasi eiava bema edia ura gauna do idia reaia lasi. Dirava ena hereva, Isaia ese ia gwauraia herevadia unai, edia mamina be idau ani?—Esekiel 18:5-9 itaia danu.
9. Taravatu be dahaka moni idia henia torehai neganai, bona Dirava be dahaka ia ura idia karaia?
9 Ogogami Israel tadikakadia durudia dalana ta be moni idia henidia torehai. Bema ta ia ura moni ia abia torehai bisinesi karaia totona, unai moni ia henia Israel tauna be mai ena maoro atoakau monina abia torehai tauna amo ia tahua. To, Iehova ia gwau, bema ogogami tadikakana ta dekenai moni idia henia torehai, atoakau monina idia tahua diba lasi, ia abitorehai tauna ese unai atoakau monina haloua totona do ia kara kerere garina. (Esodo 22:25; Deuteronomi 15:7, 8, 11; 23:19, 20; Hereva Lada-isidia 6:30, 31) Dirava ena lalohadai idia dabu taudia dekediai be haheitalai namona ena orea taudia dekediai. Ena gwauhamata be inai: “Ogogami tauna dekenai hebogahisi ia hahedinaraia tauna be Iehova dekenai ia henia torehai; Iehova ese ena kara davana do ia henia.” (Hereva Lada-isidia 19:17) Inai mani oi laloa—bema Iehova dekenai oi henia torehai, ia gwauhamata davana oi do ia henia!
10. Dirava ena haheitalai namona ita diba neganai ita iboudiai be dahaka henanadai do ita gwauraia?
10 Namona be ita ta ta be sibona ita nanadaia, ita gwau: Dirava ena lalohadai bona ena kara ogogami taudia dekediai edia anina be dahaka lau dekenai? Ena haheitalai namo hereana ese lau ia hadibaia bona lau tohotohoa toho a? Ena toana hegeregerena ai Dirava ese ita ia karaia, unai dainai lau ese egu toana lau hanamoa diba ena toana hegeregerena ai lau noho totona a?—Genese 1:26.
Natuna ese ena Tamana Ia Tohotohoa
11. Edena bamona ita diba Iesu ena kara bona ena Tamana ena kara be idia hegeregere? (2 Korinto 8:9)
11 Iesu Keriso “be [Iehova] ena hairaina ena diari, bona iena toana be Dirava ena toana hegeregerena momokani.” (Heberu 1:3) Unai dainai ita laloa ia ese ena Tamana ena kara tomadiho momokani idia laloa bada taudia dekenai do ia tohotohoa. Unai bamona ia karaia. Iesu ese ia hahedinaraia lauma dalanai idia dabu taudia ese heduru idia abia be gau badana; ia gwau: “Idia diba lauma gaudia idia tahua be namo taudia idia moale, badina guba basileia be idia edia.” (Mataio 5:3; Luka 6:20 itaia.) Danu Keriso ia gwau: “Hereva momokani gwauraia hedinarai totona lau vara bona lau mai inai tanobada dekenai.” (Ioane 18:37) Ia ese hoa karadia ia karaia bona taunimanima ia hanamodia, to ia be hahediba tauna hereadaena dainai taunimanima ese idia laloatao. (Mareko 10:17-21; 12:28-33) Mareko 6:30-34 itaia danu. Unuseniai ia gwau nega ta Iesu be ia laga-ani totona taunimanima noho lasi gabuna ta ia tahua. To, ia ginidae neganai “hutuma ia itaia … idia be mamoe hegeregere, bona naria tauna lasi.” Dahaka ia karaia? “Ia ese mauri sivarai momo ia hadibaia.” Oibe, Iesu ese sibona ia hagoadaia ia durudia totona, hereva momokani ia hadibadia idia ese mauri hanaihanai dohore idia abia totona.—Ioane 4:14; 6:51.
12. Mareko 6:30-34 bona Mareko 6:35-44 dekenai ia hahedinaraia Iesu ena kara be dahaka?
12 Iesu ese kohu momo lasi Iuda taudia ia durudia lauma dalanai, to tauanina dalanai ia durudia danu. Mareko ena sivarai lalonai ia hahedinaraia Iesu ia diba aniani korikori idia ania be gau badana. Aposetolo taudia idia gwau hutuma ia siaidia lao be namo “aniani haida idia hoia, idia ania” totona. To Iesu ia ura lasi. Bena aposetolo taudia idia gwau namona be idia sibodia idia abia mai monina sisina amo aniani do idia hoia hutuma idia ubudia totona. To, Iesu ese hoa dalana amo tatau 5,000, hahine bona natudia danu paraoa bona gwarume amo ia ubudia. Reana haida idia laloa unai hoa karana Iesu dekenai be ia auka lasi. To, laloaboio lasi, ia ura dikadika ia durudia, unai dainai ia karaia.—Mareko 6:35-44; Mataio 14:21.*
13. Iesu be edena bamona ia hahedinaraia taunimanima edia namo ia tahua?
13 Reana Evanelia buka lalonai oi duahia vadaeni, Iesu ese ogogami taudia ia durudia, to idia mo sibodia lasi. Ia ese gorere o tauanina dika taudia ia durudia danu. (Luka 6:17-19; 17: 12-19; Ioane 5:2-9; 9:1-7) Ia kahirakahira dekenai idia noho taudia sibodia ia hanamodia lasi. Nega haida gorere tauna dekenai ia lao ia durua totona.—Luka 8:41-55.
14, 15. (a) Dahaka dainai ita diba Iesu ia ura ena hahediba taudia ese ena kara idia tohotohoa? (b) Sibona dekenai dahaka do ita gwau be namo?
14 To, hoa karadia idia karaia diba taudia sibodia ese ogogami o gorere (o hereva momokani tahua) taudia idia hanamoa diba eiava? Lasi, Iesu ena hahediba taudia iboudiai edia maduna be unai. Haheitalai ta be inai, mauri hanaihanai ia ura abia taga tauna ta dekenai ia gwau: “Emu kohu ibounai do oi hoihoilaia, ogogami taudia dekenai do oi harihari henia, guba ena kohu do oi abia.” (Luka 18:18-22) Danu Iesu ena sisiba be inai: “Aniani do oi karaia neganai, ogogami taudia bona edia tauanina kahana idia dika taudia bona aena dika taudia bona matakepulu taudia dekenai do oi boiboi. Unai dekena amo do oi namo, badina idia be kohu lasi, vadaeni kara maoromaoro taudia edia toreisi neganai oiemu davana do oi abia.”—Luka 14:13, 14.
15 Keristen tauna be Keriso murinai do ia raka, unai dainai ita ibounai sibona dekenai do ita gwau: Iesu ena lalohadai bona ena kara ogogami taudia, tauanina dika taudia o hekwakwanai idia davaria taudia dekenai lau tohotohoa eiava? Lau be aposetolo Paulo hegeregerena lau gwau diba: “Lau karaia bamona do umui karaia, Keriso ena kara lau karaia bamona.”?—1 Korinto 11:1.
Paulo—Haheitalai Namona Tauna
16. Aposetolo Paulo be edena gaukara ia laloa bada?
16 Harihari Paulo ena kara ita laloa, ia be haheitalai namona ita tohotohoa totona. Ia hekwarahi bada lauma dalanai taunimanima ia durudia totona. Ia be ‘Keriso ena hereva gwauraia hedinarai tauna, haida ia noidia, Dirava danu do idia turana karaia’ totona. (2 Korinto 5:20) Paulo ena gaukara badana Iuda lasi taudia dekenai, ia haroro henidia bona edia kongregesen ia hagoadadia. Ia gwau: “Dirava ese Iuda lasi taudia dekenai haroro gaukara be lau dekenai ia henia.”—Galatia 2:7.
17. Edena bamona ita diba Paulo ese tauanina durua karana ia laloa danu?
17 Paulo ia gwau Keriso ia tohotohoa, unai anina be (Iehova bona Iesu bamona) ia ese ena tomadiho tadikakadia ia durudia tauanina dalanai, eiava hekwakwanai idia davaria neganai, a? Namona be Paulo ese unai henanadai ia haerelaia. Galatia 2:9 dekenai ia gwau: ‘Iakobo bona Petro bona Ioane ese lau bona Banaba aiemai imana idia abia, varavara hanamoa toana. Vadaeni ai be Iuda lasi taudia huanai do ai gaukara.’ Bena siri 10 dekenai ia gwau: “‘Ogogami taudia do umui laloa be namo.’ … hanaihanai lau laloa noho gauna be unai.” (Galatia 2:10) Paulo ia diba ia be misinari o aposetolo tauna dainai ena maduna badana be kongregesen momo ia durudia totona, to nega ia atoa tauanina dalanai ena tadikaka bona taihu ia durudia totona.
18. Galatia 2:10 dekenai ia gwauraia “ogogami” taudia be daidia, bona dahaka dainai heduru idia abia be namo?
18 Reana Galatia 2:10 dekenai ia gwauraia “ogogami” taudia be Iuda Keristen taudia Ierusalem bona Iudea lalonai. Unai nega lalonai “Helene gado idia hereva Iuda taudia ese Heberu gado idia hereva Iuda taudia dekenai idia maumau. Idia gwau: ‘Dina ibounai, aniani idia haria neganai, aiemai vabu dekenai umui henia hegeregere lasi.’” (Kara 6:1) Vadaeni, Paulo ia gwau Iuda lasi taudia totona aposetolo gaukara ia karaia, to ia hahedinaraia goevagoeva ia ese ena Keristen tadikaka iboudiai ia lalodia bada. (Roma 11:13) Ia diba inai siri be mai anina danu tauanina durua karana dekenai, ia gwau: “Tauanina be do ia parara lasi … kahana ibounai ese ta ta ibounai do idia naria totona. Vadaeni, kahana ta do ia hisihisi neganai, kahana ibounai ese unai hisihisi mamina do idia abia.”—1 Korinto 12:25, 26.
19. Dahaka ese ia hamomokania Paulo bona ma haida ese ogogami taudia idia durudia?
19 Keristen taudia Ierusalem bona Iudea lalonai ese ogogami, doe, eiava dagedage karana dainai dika idia davaria, gabu daudau dekenai idia noho kongregesen haida ese idia durudia. Ena be edia ogogami tadikakadia idia lalodiatao edia guriguri lalodiai, Dirava ese ia durudia totona, to ma gau ta idia karaia danu. Paulo ia gwau: “Makedonia bona Akaia taudia ese edia harihari gaudia idia haboua vadaeni Ierusalema ekalesia ogogami taudia dekenai henia totona.” (Roma 15:26, 27 ) Moni idia siaia neganai edia “harihari gaudia idia dekenai bona haida dekenai danu idia itaia neganai Dirava do idia hanamoa bada.” (2 Korinto 9:1-13) Unai karana dainai idia moale bada, ani?
20. Dahaka dainai tadikaka ese “ogogami” taudia idia durudia neganai idia moale?
20 Unai tadikaka ese edia moni amo “Ierusalema ekalesia ogogami taudia” idia durudia neganai idia moale, to ma badina ta dainai idia moale danu. Idia ese ogogami taudia idia durudia dainai Dirava ena hahenamo idia abia diba. Unai be momokani badina Roma 15:26 bona 2 Korinto 9:13 dekenai unai hereva “harihari gauna” idia torea, bona Greek gado ai ena anina be “hetura toana, lalo-tamona toana.” Heberu 13:16 dekenai idia herevalaia inai bamona, idia gwau: “Kara namodia do umui laloaboio lasi, bona kohu lasi taudia danu umui emui kohu do umui abia hebou. Inai bamona karadia be boubou gaudia bamona, Dirava ese ia moalelaia gaudia.”
Do Ita Moale A?
21. Moale do ita abia ena badina be dahaka?
21 Inai hereva dekenai, Bible ese ia hamomokania Iehova Dirava, Iesu Keriso, bona aposetolo Paulo ese ogogami taudia idia durudia. Ita diba vadaeni idia iboudiai ese taunimanima idia durudia lauma dalanai guna. To, ogogami, gorere, bona dika idia davaria taudia be tauanina dalanai idia durudia danu. Idia moale unai taudia idia durudia neganai. Hari inai nega lalonai danu unai bamona ita karaia a? Aposetolo Paulo ese ita ia hagania, ia gwau: “Lohiabada Iesu ena hereva umui laloatao, ia gwau, ‘Henia kara ena moale be bada, abia kara ena moale be maragi.’”—Kara 20:35.
22. Do ita herevalaia henanadaidia be dahaka?
22 Reana inai bamona oi henanadai: Lau be dahaka do lau karaia? Heduru idia ura abia taudia be edena bamona do lau diba? Edena bamona heduru lau henia diba hebogahisi ai bona dala namonai, haida edia mamina idia namo totona, bona ena be lau durudia to do idia lahedo lasi, bona egu Keristen maduna, sivarai namona harorolaia gaukarana do lau hagugurua totona, a? Murina sivaraina ese unai henanadai do ia haerelaia, bona edena dala amo emu moale do oi habadaia diba do ia herevalaia danu.
[Footnotes]
Mani ita laloa danu, taunimanima ese Iesu gau haida idia henia neganai ia hemarai lasi eiava ia hekokoroku lasi, to unai henia gaudia ia abidia.—Luka 5:29; 7:36, 37; 8:3.
Oi Laloatao A?
□. Dirava be edena bamona ia hahedinaraia iseda lauma gaudia bona iseda tauanina gaudia ia lalodia, a?
□. Dahaka ia hahedinaraia Iesu ese hereva momokani sibona amo taunimanima ia durudia lasi, a?
□. Paulo ena kara ogogami taudia dekenai be dahaka haheitalai ita dekenai?
□. Iehova, Iesu, bona aposetolo Paulo edia haheitalai dainai, dahaka ita karaia be namo?
[Picture on page 13]
Keristen elda bona taunimanima ma haida ese Iesu ena sisiba Luka 14:13, 14 dekenai idia badinaia be namo