Inai Tanobada Ena “Hodahoda” ese Mase Ia Havaraia!

“Ena be guna umui be emui kerere bona kara dika lalodiai umui mase, to Dirava ese umui ia hamauria. Guna umui be . . . hodahoda ena siahu ena lohia umui kamonai henia.”​—EFESO 2:​1, 2, NW.

TA BE ruma mai siahuna amo ia raka lasi bena hodahoda ena mamina ia abia neganai, unai ese ia hagoadaia lou! To hari inai negai taunimanima ese hodahoda hamiroa karana idia laloa momo. Tano momo dekenai mase muramuradia na hodahoda lalonai idia halasia badabada. Kwalahu dikana, kahu dikana bona mauri gaudia maragimaragidia, gorere bona mase idia havaraia gaudia unai, be hodahoda ese ia odaia loaloa. Iseda lalokau Diravana ese hodahoda na ita ia henia, unai gau dainai ita mauri noho; to hari inai negai taunimanima idia mataganigani bona idia naria namonamo lasi dainai, hodahoda ese mase ia havaraia diba, bona unai dika ia bada ia lao noho.

2. Dahaka “hodahoda” mai mirona ena dika ese ita hadonoa diba hodahodana mai mirona ena dika ia hanaia?

² Hodahoda hamiroa karana ese dika bada ia havaraia diba, to “hodahoda” idauna ta ia noho, ia miro dainai ena hamasea siahuna be bada herea. Chernobyl (U.S.S.R.) dekenai, niuklia paua seteisini ia pou neganai, hodahoda mirona ia halasia, bona Los Angeles, California (U.S.A.) dekenai hodahoda be kwalahu amo ia honudae, to harihari ai herevalaia gauna be ia idau. Bema ita naria namonamo lasi, hari “hodahoda,” mai ena mase siahuna bada gauna, do ita hadonoa. Aposetolo Paulo ese ia gwauraia, Keristen taudia be inai bamona ia tore henidia neganai: “Ena be guna umui be emui kerere bona kara dika lalodiai umui mase, to Dirava ese umui ia hamauria. Unai neganai umui be inai tanobada ena kara hegeregerena ai umui raka, hodahoda ena siahu ena lohia umui kamonai henia, kamonai lasi memerodia lalodiai ia gaukara noho laumana unai.”​—Efeso 2:​1, 2.

3, 4. (a) “Hodahoda ena siahu ena lohia” be daika? (b) Dahaka dainai Efeso 2:​1, 2 ese ia gwauraia ‘hodahodana’ be demoni edia noho gabuna lasi?

³ Hari “hodahoda” be dahaka? Paulo ia hahedinaraia ia be mai ena “siahu,” bona “lohia” ta ese ia biagua. Momokani, unai lohia be Satana Diabolo, Iesu ese ia gwauraia “inai tanobada ena lohia.” (Ioane 12:31) Inai idia diba dainai, Bible ena hereva tahua taudia haida idia laloa Paulo ese Iuda taudia eiava idau bese taudia edia lalohadai hegeregeredia ia gwau Diabolo ese ia biagudia lauma dikadia ese hodahoda idia noholaia. Bible idauidau momo lalodiai unai lalohadai idia hahedinaraia. To hari “hodahoda” be idau, bona “guba,” “lauma dikadia” ese idia noholaia gabuna unai, be ma ia idau.​—Efeso 6:​11, 12.

⁴ Paulo ese Efeso dekenai idia noho Keristen taudia ia tore henidia neganai, Satana bona demoni be do guba dekenai idia noho, to Dirava ese ia dadaraidia vadaeni. Unai neganai Iesu ese tanobada kahirakahira dekenai ia do negedia diho lasi. (Apokalupo 12:​7-10) Danu, hodahoda be mai ena anina bada taunimanima dekediai, to lauma dekediai ena anina be maragi. Unai hegeregerena, Apokalupo ese ia hahedinaraia, Dirava ena badu ena disi ginigabena be “hodahoda” latanai do ia bubua neganai, tanobada taudia ese ena mamina do idia abia.​—Apokalupo 16:​17-21.

5. “Hodahoda,” hari ita herevalaia noho gauna, be dahaka, bona dahaka ia karaia taunimanima dekenai?

⁵ Unai hegeregerena, Paulo ese hodahoda korikori be Dirava idia diba lasi taudia edia lalohadai ida ia hahegeregerea, unai lalohadai ena anina be, sibodia edia namo idia tahua bona idia gwau-edeede hanaihanai. Ia ese unai lalohadai ia gwauraia ‘lauma’; “kamonai lasi memerodia lalodiai ia gaukara noho laumana” bona “inai tanobada ena lauma.” (Efeso 2:​2, NW; 1 Korinto 2:12) Hodahoda korikori be gabu iboudiai dekenai ia noho bona taunimanima ese idia hadonoa haraga diba; unai hegeregerena, “inai tanobada ena lauma” be gabu iboudiai dekenai ia noho. Taunimanima idia maragi negana amo ela bona idia mase, edia ura karadia idia karaia toho noho lalonai, unai lauma ese edia lalohadai bona edia kara ia biagua.

6. (a) Dahaka ese inai tanobada ena “hodahoda” ena “siahu” ia habadaia, bona ena “siahu” be edena bamona ia gaukaralaia? (b) Bema ta ese hari “hodahoda” ia hadonoa, unai ese edena bamona ia veria, Diabolo ena gwau-edeede karana ia tohotohoa totona?

⁶ Hari kara dika bona gwau-edeede laumana ena siahu be ia bada, goevadae lasi taudia bogaragidiai. Hari “hodahoda” idia hadonoa noho lalonai, ena mase siahuna ia bada ia lao, badina be edia bamodia ese idia doridia, bona lebulebu karadia idia ura henia bada dainai. Unai dainai, ia be mai ena “siahu” taunimanima dekenai. (Roma 6:​12-14 itaia.) Momokani, Diabolo ese dika ibounai ia havaraia. (Ioane 8:44) Unai dainai ia ese taunimanima edia lalona ia ania, iena kamonai lasi karadia do idia tohotohoa totona; unai dala amo ia ese taunimanima edia laloa, edia bese taudia ida idia abia hebou lalohadaina o ‘hodahodana’ unai, be ia ese ia havaraia bona ia biagua. Satana be hari “siahu” dikana ena “lohia” dainai, ia gaukaralaia taunimanima edia lalohadai biagua totona. Unai siahu ena anina idauidau ia gaukaralaia, taunimanima do ia veridia, nega ibounai sibodia edia tauanina edia ura gaudia bona tanobada gaudia do idia tahua totona; bena edia nega be hegeregere lasi bona idia ura lasi Dirava do idia dibalaia bona ena lauma helaga do idia kamonai henia, “mauri ia havaraia” laumana unai. (Ioane 6:63) Lauma dalanai idia mase vadaeni.

7. (a) Dahaka dainai guna Keristen taudia edia “dika davana korikori be Dirava ena badu”? (b) Ita be Keristen taudia ai ita lao neganai, iseda mauri be edena bamona ita haidaua?

⁷ Keristen taudia danu be guna Dirava ena Hereva idia do diba lasi bona iena taravatu maoromaorodia idia do badinaia lasi neganai, be unai “hodahoda” mirona ena “siahu” henunai idia noho. “Guna ita ibounai be idia [tanobada taudia] bamona ita karaia. Iseda tauanina edia ura dikadia, bona iseda lalona edia ura kava sibona ita karaia. Vadaeni unai bamona ita noho dainai, iseda dika davana korikori be Dirava ena badu, taunimanima oredia ibounai hegeregerena.” To ita be Keristen taudia ai ita lao neganai, ita ese inai tanobada ena “hodahoda” hadonoa karana ita hadokoa, mase havaraia hodahodana unai. ‘Mauri matamata ita atoa, dabua matamata ita atoa bamona. Inai mauri matamata dainai iseda toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.’​—Efeso 2:3; 4:​22-24.

8. Dahaka dainai iseda noho hari inai nega lalonai be Israel besena ena noho hegeregerena, tano gagaena dekenai idia noho neganai?

⁸ Namona be hari ita naria namonamo, ita be inai tanobada ena hodahoda mirona amo ita roho mauri murinai, Satana ese iseda lalona do ia ania, unai hodahoda dekenai do ita giroa lou totona. Hari ita be “dokona negana” lalonai ita noho, bona tanobada matamatana be ia kahirakahira momokani. (Daniel 12:4) Momokani, ita ura lasi tarapu lalodiai do ita moru, Israel taudia be unai tarapu lalodiai idia moru bamona. Dirava ese hoa dalana amo Egypt amo ia hamauridia bena idia be Gwauhamata Tanona ena hetoana dekenai idia ginidae neganai, idia 23,000 be “taunimanima idia noho lasi tano dekenai idia mase ore.” Badina be dahaka? Badina be idia haida be kaivakuku idia tomadiho henia, haida idia heudahanai, bona ma haida be edia maumau amo Iehova idia tohoa dainai. Paulo ia gwau: “Oibe, iseda tubuna dekenai unai bamona kara idia vara, be ita dekenai toana bamona, do ita itaia mai gari danu. Edia sivarai danu Buka Helaga lalonai idia torea vadaeni idia ese ita do idia sisiba henia totona. Badina be tanobada ena dokona be kahirakahira negana ita noho inai.”​—1 Korinto 10:​1-11.

9. (a) Edena dala amo ita be tanobada dekenai ita noho to ita be tanobada ena lasi? (b) Dahaka ita karaia be namo, tanobada ena mase havaraia ‘hodahodana’ lalonai ita do idia veria vareai lou lasi totona?

⁹ Iesu be ena hahediba taudia dainai ia guriguri, ia gwau: “Idia be tanobada ena lasi, lau hegeregerena, lau be tanobada ena lasi. Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria.” (Ioane 17:​14, 15) Iehova ese ita do ia naria, to ia ese ita ia ‘hamagua’ lasi, bona hoa dalana amo inai tanobada ena “hodahoda” ia koua lasi, ita do ia hadikaia garina. (Iobu 1:​9, 10) Unai dainai ita hekwarahi, badina be ena be ita be Satana ena tanobada lalonai ita noho to ita be tanobada ena lasi, bona ena be inai tanobada ena “hodahoda” mirona ese ita ia koua hegege, to ita hadonoa lasi. Tanobada ena buka eiava magasin ita duahia neganai, televisen ita raraia neganai, eiava moale gabudia dekenai ita lao neganai, ita be tanobada ena “hodahoda” ena mamina ita abia diba. Ena be tanobada taudia ita rakatanidia vaitani diba lasi, badina be gaukara gabudia ai, sikuli ai, bona ma gabu haida dekenai ita be idia ida ita gaukara hebou, to namona be ita naria namonamo, inai tanobada ena “hodahoda” lalonai ita do idia veria vareai lou garina, mase havaraia hodahodana unai.​—1 Korinto 15:​33, 34.

10, 11. (a) Dahaka dainai ita gwau ita be Iehova ena lauma paradaisona lalonai ita noho be hegeregere ita be “kuku ania lasi” gabuna ta dekenai ita noho bamona? (b) Bema inai tanobada ena “hodahoda” ena bonana ita bonaia, dahaka ita karaia be namo?

¹⁰ Iseda noho be hegeregere ita be peleini ta lalonai ita helai bamona, hari peleini ena kahana ta lalonai taunimanima be kuku idia ania diba, bona ena kahana ma ta lalonai kuku idia ania be taravatu. Ita Keristen taudia be Iehova ena lauma paradaiso lalonai ita noho dainai, ita be “kuku ania lasi” gabuna dekenai ita noho, inai tanobada ena lauma ia noho lasi gabuna inai. Momokani, ita ura lasi kuku idia ania diba gabuna dekenai do ita helai. Unai be kara kavakavana. To ita be peleini ena “kuku ania lasi” kahana lalonai ita helai neganai, dahaka ia vara? Kwalahu amo ia honu hodahodana mirona be ia hure mai bona ena bonana ita bonaia! Inai bamona ia vara neganai, ita be hodahoda mirona ita moalelaia a? Eiava ita ura do ita rakatania haraga a?

¹¹ To inai tanobada ena “hodahoda” ena bonana oi bonaia neganai, dahaka oi karaia? Kara haraga dala oi tahua unai siahu dikana oi rakatania totona a? Bema oi rakatania lasi to oi hadonoa, momokani oiemu lalona do ia hadikaia. Bema hari “hodahoda” oi hadonoa daudau, do oi manadalaia. Danu, gabeai ena bonana do oi dadaraia lasi, to emu tauanina ese do ia moalelaia. Reana emu ura hehunina ta do ia habadaia, guna oi koua toho urana unai.

12. Inai tanobada ena “hodahoda” ena anina haida edia mamina ita abia haraga diba lasi; dahaka ita karaia be namo, unai gau ese ita do idia hadikaia garina?

¹² Hodahoda korikorina idia hamiroa gaudia haida be taunimanima ese idia bonaia diba lasi bona idia mamia diba lasi. Unai hegeregerena, inai tanobada ena “hodahoda” ena poisini haida edia mamina ita mamia haraga diba lasi. Unai dainai, bema ita naria namonamo lasi, reana ‘mase havaraia hodahodana’ ena mamina do ita abia lasi ela bona ita ia hadikaia momokani vadaeni. Inai tanobada taudia ese lebulebu karadia idia karaia eiava idia abia dae, bona Dirava ena taravatu maoromaorodia idia badinaia lasi; unai dainai namona be ita naria namonamo, edia lalohadai kereredia amo mase ena tarapu ta lalonai ita do idia hakaua vareai garina. Paulo ese Keristen taudia edia lalona ia hagoadaia, ia gwau: “Umui ta ta dekenai durua hereva do umui henia, emui lalona hagoadaia totona. Dina ibounai inai bamona do umui karaia, umui ta be kara dika ese ia koia garina. Bona unai tau ena lalona Dirava dekenai do ia koua garina.”​—Heberu 3:13; Roma 12:2.

13. (a) Inai tanobada ena “hodahoda” ena anina ta be dahaka, ia dekenai ita naria namonamo be namo? (b) Dahaka dainai ita diba momokani, hari “hodahoda” ese Iehova ena orea taudia haida ia hadikadia vadaeni?

¹³ Inai tanobada ena “hodahoda” ena siahu badana dainai, ita be tanobada taudia momo hegeregeredia dahaka lalohadai ita abia dae matamaia diba, iseda kerere ita do lalo-pararalaia lasi neganai? Ta be inai, ita ura lebulebu karadia do ita karaia. Inai tanobada ena lalohadai seks bona kara maoromaoro dekenai ese ita idia koua hegege. Tanobada taudia momo idia gwau: ‘Sihari kava karadia, natudia havaradia kava karana, bona tatau ese tatau idia sihari henidia karadia, unai kara iboudiai be kerere lasi. Ita be taunimanima edia kara korikori ita karaia inai.’ Hari “hodahoda,” tanobada ena lalohadai unai, ese Iehova ena orea taudia ia hakereredia vadaeni eiava? Madi, September 1985 amo ema bona August 1986, 37,426 be Keristen kongregesen amo idia atodia siri; idia momo be idia sihari kava eiava idia heudahanai dainai, unai bamona idia kara henidia. Bona ma momo herea be unai bamona kara idia karaia dainai idia gwau henidia, to kongregesen amo idia atodia siri lasi, badina be idia helalo-kerehai momokani dainai.​—Hereva Lada-isidia 28:13.

14. Dahaka dainai Keristen taudia haida be Bible ena sisiba idia dadaraia bena lebulebu karadia idia karaia?

¹⁴ Dahaka dainai idia lalo-manoka bena lebulebu karadia idia karaia? Haida ese edia kerere idia tahua neganai, idia davaria idia momo be inai tanobada ena mase havaraia ‘hodahodana’ idia hadonoa lou vadaeni. Tanobada taudia edia lalohadai idia abia dae dainai edia kara maoromaoro idia negea. Reana muvini piksa idia itaia, guna unai bamona piksa be idia ura lasi momokani do idia itaia. Bona gau dika hereana be inai, sibodia edia ruma dekenai vidio dekenai muvini piksa idia itaia, Keristen taudia ese unai bamona piksa idia itaia be maoro lasi. Lebulebu karadia unai bamona idia abia dae neganai, Bible ena taravatu ta idia utua; taravatuna be inai: “Umui be Dirava ena taudia dainai heudahanai bona matabodaga bona kohu ura dikadika kara, be do umui herevalaia lasi. Lebulebu hereva, hereva kavakava, hevaseha hereva mai miro danu be namo lasi.”​—Efeso 5:​3, 4.

15. Satana ese haida edena bamona ia dibaganidia, lebulebu karadia idia karaia matamaia totona?

¹⁵ Momokani, bema ta ese oi ia dibagania umui raruosi be heudahanai karana do umui karaia totona, reana do oi dadaraia haraga. To bema gaukara gabunai eiava sikuli dekenai ta ese oi ia lebulebu henia, eiava oiemu tauanina ia dogoatao toho, eiava oi ia noia do oi bamoa loaloa totona, dahaka oi karaia? Inai dala amo inai tanobada ena “hodahoda” be oi dekenai ia ginidae. Unai kara oi moalelaia, bona ia karaia tauna ena lalona oi hagoadaia do ia karaia lou totona, a? Elda taudia edia ripoti ese idia hahedinaraia, nega momo kara dika be unai dala amo ia matamaia. Reana tanobada tauna ta ese Keristen hahinena ta ia hereva henia, ia gwau: “Hari dina oiemu toana be namo herea!” Reana unai hahine ese unai hereva ia moalelaia, bona bema ena lalona ia hisihisi badina be ena turana ta be lasi, ia moalelaia bada. Keristen hahinedia haida edia kerere badana be inai: tanobada tauna ta ese edia tauanina ia dauatoho kerere neganai, idia kara henia lasi mai edia aonega ida. Idia dadaraia sisina dainai unai tanobada tauna ena lalona ia goada unai kara do ia karaia loulou. Bema ta ese Keristen hahinena ta unai bamona ia kara henia loulou, hegeregere hodahoda mirona ia odaia henia bamona, dahaka ia karaia be namo? Namona be ia hereva henia auka, ia hamaoroa ia be unai kara ia ura lasi bona do ia abia dae lasi. Bema unai hahine ese unai “hodahoda” ia hadonoa noho, reana ena lalona do ia manoka bona unai tau ena kara do ia dadaraia diba lasi. Bena reana ena lalona do ia ania bena do idia heudahanai, eiava aonega lasi dalana amo do idia headava.​—Hereva Lada-isidia 5:​3-14 itaia; 1 Korinto 7:39.

16. “Keriso ena bonana namona” ai ita lao totona, dahaka ita karaia be namo?

¹⁶ Unai dainai, namona be inai tanobada ena “hodahoda,” mase havaraia gauna unai, be oi dadaraia haraga be namo. Ena bonana oi bonaia noho lasi, ena bonana ese oiemu lalona do ia veria bena Iehova ena ladana bona ena orea do oi hahemaraia garina, to emu lalohadai bona kara maoromaorodia amo bonana namona ai oi lao Dirava dekenai. Paulo ia gwau: “Momokani, ai be Keriso ena bonana namona, Dirava ena vairana dekenai. Inai bonana namona be mauri dala idia raka taudia, bona mase dala idia raka taudia danu idia kamonai noho. Mase dala idia raka noho taudia dekenai inai bonana be mase ia havaraia gauna. To mauri dala idia raka noho taudia dekenai inai bonana be mauri ia havaraia gauna.” (2 Korinto 2:​15, 16) Taunimanima momo ese Keristen dalana be bonana dikana ta bamona idia dadaraia be herevana, ani? (1 Petro 4:​1-5) Tanobada taudia amo oi raka siri, idia be edia dala do idia rakalaia noho, bona edia kara ena anina dikana do idia abia noho; edia ruma bese do idia parara, edia natudia do idia havaradia kava, VD goreredia, AIDS bona unai bamona gorere ma haida do idia abia, bona edia lalona bona edia tauanina dekenai do idia hisihisi. Hisihisi momo amo do oi roho mauri bona Dirava ese oi do ia lalo-namo henia. Danu, haida ese oiemu kara namo bona Basileia sivaraina, oi harorolaia sivaraina, be do idia laloa bada; unai amo inai “bonana” namona, “mauri ia havaraia gauna,” ese edia lalona do ia veria.

Tanobada ena Sitailo edia “Hodahoda”

17. Ta ena dabua bona ena tauanina edia toana ese edena bamona idia hahedinaraia inai tanobada laumana ese ena lalona ia hakererea vadaeni?

¹⁷ Inai tanobada ena “hodahoda” ena anina ma ta be dabua bona hui edia sitailo. Tanobada hahinedia bona kekenidia momo ese edia dabua edia sitailo amo tatau bona memero edia lalona idia veria idia ura henidia totona. Kekeni maragidia danu idia ura unai bamona dabua do idia atoa. Unai “hodahoda,” gabu idauidau momo dekenai idia abia lalohadaina unai, ese oi ia hakererea a? Kekeni e, dabua oi atoa, tatau bona memero edia matana bona edia lalona oi veria kerere totona a? Bema unai bamona oi karaia noho, dika bada do oi davaria diba. Unai “hodahoda” bema oi hadonoa noho, unai ese emu lalo-maoromaoro do ia hadikaia. Tanobada laumana idia abia taudia ese oi do idia ura henia. Emu kara dainai do idia laloa oiemu lalona ia hegeregere oi be idia ida lebulebu karadia do umui karaia hebou. Unai dala oi rakalaia matamaia dalana be, unai bamona “hodahoda” oi abia dae bena oiemu lalona ia veria, Dirava ia badulaia karadia do oi karaia totona. To unai bamona oi karaia ena namo be dahaka?

18. Bema nega ibounai ita laloatao ita be Iehova ena hesiai taudia, unai ese ita edena bamona ia durua, dabua bona hui karaia daladia namodia ita abia hidi totona?

¹⁸ Ita gwau lasi, iseda dabua ita atoa mai eda hemataurai ida o iseda huina be unai bamona ita karaia, anina be toana dika dabuadia sibodia ita atoa. Iehova ena Witness taudia momo herea edia dabua bona edia tauanina edia toana mani oi laloa. Inai tanobada ena sitailo dikadia amo idia raka siri, to edia dabua ena toana be namo, badina be idia laloatao idia be guba bona tanobada edia Pavapava, Iehova ena ladanai idia haroro. Tanobada gunana taudia ese edia dabua mai ena toana namona idia gwauraia dika be herevana. Idia ura lasi momokani inai tanobada taudia edia lalohadai ese do idia veridia edia Keristen daladia maorodia amo idia raka siri totona. Aposetolo Paulo ia gwau: “Unai dainai, Lohiabada ena ladana dainai umui lau sisiba henia, harihari ia lao, Dirava diba lasi taudia bamona umui noho lasi. Idia edia laloa be anina lasi. . . . Idia be hemarai lasi momokani. Lebulebu daladia idia ura dikadika, bona matabodaga karadia idia tahua doko lasi.” (Efeso 4:​17-19) Keristen tauna goadana be ena dabua do ia atoa mai ena hemataurai ida, Dirava diba lasi taudia bamona do ia raka lasi.​—1 Timoteo 2:​9, 10.

19. Inai tanobada ena “hodahoda” ena anina rua ita herevalaia vadaeni dainai, ita diba bema ita hadonoa dahaka dika do ita davaria diba?

¹⁹ Inai tanobada ena “hodahoda” ena anina rua sibodia ita herevalaia vadaeni, to ita davaria vadaeni hari “hodahoda” ese lauma dalanai ita ia hadikaia bada diba. Hereva gabena lalonai, ita ese hari mase havaraia ‘hodahodana’ do ita herevalaia, unai gau be Diabolo bona ena tanobada ese Keristen taudia idia odaia henidia hanaihanai, idia hamorudia totona. Gau badana be ita ese unai bamona “hodahoda” amo ita siri, badina be inai tanobada ena lauma ita abia dae be hegeregere mase havaraia hodahodana ita hadonoa bamona!

Edena Bamona Oi Haere?

◻ Inai tanobada ena “hodahoda” be dahaka, bona daika ese ia biagua?

◻ Tanobada ena “hodahoda” ena “siahu” taunimanima dekenai be dahaka?

◻ Dahaka dainai ita gwau diba Keristen taudia be “kuku ania lasi” gabuna dekenai idia noho?

◻ Inai tanobada ena “hodahoda” ese Iehova ena orea taudia edena bamona ia veridia diba, lebulebu karadia idia karaia totona?

◻ Bema iseda dabua bona iseda tauanina edia toana be ita karaia mai eda hemataurai ida, unai ese ita edena bamona ia durua, inai tanobada ena “hodahoda” ita dadaraia totona?

1. Hodahoda hamiroa karana ese taunimanima edia mase edena bamona ia havaraia?

[Picture on page 10]

Inai tanobada ena mase havaraia ‘hodahodana’ oi dadaraia noho a?