Dina Gabedia​—Uma ena Anina Utua Negana

“Lauegu matana lau negea lou, ori kurokurona ta lau itaia, bona ta, iena toana be Taunimanima ena Natuna bamona, be ori latanai ia helai. Iena kwarana dekenai be golo kwara gauna ia noho, bona iena imana dekenai be kaia badana ta mai matana ia dogoatao.”​—APOKALUPO 14:14.

1. Dahaka dainai hari inai nega be idau vaitani, nega gunadia hegeregeredia lasi?

IDIA hanai vadaeni laganidia 80 lalodiai hekwarahi badadia momo idia vara! Tanobada ibounai tuaridia rua idia tuarilaia mai edia dagedage bada ida. Tano momo dekenai gavamani idia hamorudia. Taunimanima momo herea ese hisihisi idia ania badina be edia aniani be hegeregere lasi dainai. Taunimanima iboudiai ese dika idia davaria diba, badina be bisinesi momo idia heau namonamo lasi, raskol karadia bona taravatu utua karadia idauidau momo idia vara, tanobada idia hamiroa bona idia hadikaia, bona gorere dikadia idia vara dainai. Inai nega lalonai, taunimanima ese edia diba idia habadaia momokani. Atom ena siahu idia gaukaralaia, bona hua ena kopina dekenai idia raka danu. Momokani, hari inai nega be idau vaitani, nega gunadia hegeregeredia lasi. To, gau ta ese iseda nega lalonai idia vara gaudia iboudiai ia hereaia momokani.

2. Daniel ia peroveta ia gwau dahaka do ia vara?

² Lagani 600 idia do noho ema bona Iesu ia vara neganai, peroveta Daniel ese hari gau ia perovetalaia. Dirava ena lauma ese ia hadibaia hegeregerena, ia gwau: “Bena hanuaboi matahanaidia dekenai lau itaia noho, ta be guba oridia dekenai ia mai, ia be taunimanima ena natuna bamona; ia be Gauka dekenai ia mai, bena ia vairanai idia hakaua lao. Bena lohia siahuna ia henia, bona hairai bona basileia danu, bese idauidau bona basileia idauidau bona gado idauidau iboudiai ese iena hesiai gaukara do idia karaia totona.”​—Daniel 7:​13, 14.

3. (a) “Gauka” be daika, bona “taunimanima ena natuna bamona” tauna dekenai dahaka ia henia? (b) Hari “taunimanima ena natuna bamona” tauna be daika, bona Iesu ese inai ia gwauraia hedinarai neganai, Iuda tomadiho gunalaia taudia be dahaka idia karaia?

³ Hari “Gauka” be Iehova Dirava. Daniel ese ia itaia, “guba oridia” lalodiai ia noho, ita itaia diba lasi laumadia edia noho gabuna unai; lohia siahuna be “taunimanima ena natuna bamona” tauna ia henia. Unai tauna be daika? Unai henanadai be Iesu ese ia haerelaia, lagani 33 C.E. lalonai idia kota henia neganai. Iuda hahelaga tauna badana ese Iesu ia oda henia, do ia hamaorodia ia be Keriso eiava lasi. Iesu ia haere mai ena goada ida, ia hahedinaraia Daniel ena peroveta herevana be mai anina ia dekenai. Ia gwau: “Taunimanima ena Natuna do umui itaia, siahu ibounai Diravana ena imana idibana kahana dekenai do ia helai, bona guba ena ori dekenai do ia mai.” Hahelaga tauna badana ese Iehova ena abia hidi Pavapavana ia igo diho henia lasi, to ia samania, ia gwau Dirava ia hadikaia unai. Gabeai, Iuda ena tomadiho gunalaia taudia ese Pontio Pilato idia doria, oda do ia gwauraia Iesu do idia hamasea totona.​—Mataio 26:​63-65; 27:​1, 2, 11-26.

⁴ Inai dala amo Iesu ena hereva hamomokania dalana idia koua toho, to edia palani ia moru, mase amo ia toreisi lou bona guba dekenai ia daekau neganai, unuseniai ia naria noho ela bona Iehova ese ena nega korikorina ai Basileia do ia henia. (Kara 2:​24, 33, 34; Salamo 110:​1, 2) Unai nega be lagani 1914 lalonai ia ginidae. Gau momo ese idia hamomokania, unai lagani ena kahana gabena lalonai, Iesu ese pavapava dagina na “Gauka” amo ia abia bena ia lohia matamaia. (Mataio 24:​3-42) Ia vara matamata Basileiana be Satana mai ena demoni ida ese idia inai henia dikadika. To Iuda tomadiho gunalaia taudia aposetolo edia nega lalonai, bona tanobada besedia edia siahu ibounai, bona Satana bona ena demoni danu be idia hegeregere lasi, Dirava ena ura hagugurua dalana do idia koua. (Salamo 2:​2, 4-6; Apokalupo 12:​1-12) Lagani 1914 lalonai nega korikori ai guba dekenai idia boiboi hebou, idia gwau: “Tanobada biagua siahuna be iseda Lohiabada bona ena Keriso idia abia vadaeni. Bona ia ese tanobada do ia biagua momokani ela bona hanaihanai.” (Apokalupo 11:15) Unai nega amo ema bona harihari, ita be inai nega dikana ena “dina gabedia” lalodiai ita noho.​—2 Timoteo 3:​1, NW.

Uiti Utua Negana

5. (a) Daniel ena peroveta herevana hegeregerena, daidia ese Pavapava matamatana ena hesiai gaukara do idia karaia? (b) Ioane be dahaka matahanai ia abia, ia lalonai danu Iesu be Pavapava matamatana ta bamona ia hedinarai?

⁵ Daniel ena peroveta herevana hegeregerena, Iesu be lohia siahuna ia abia neganai, “bese idauidau bona basileia idauidau bona gado idauidau iboudiai ese iena hesiai gaukara do idia karaia.” To, bema tanobada besedia idia ura lasi edia Pavapava ai do ia lao, unai hereva be edena bamona ia momokani diba? Matahanai ta, Iesu ese aposetolo Ioane ia hahedinarai henia gauna, ese unai henanadai ia haerelaia. Ioane ese ia itaia gauna ia gwauraia hedinarai, ia gwau: “Lauegu matana lau negea lou, ori kurokurona ta lau itaia, bona ta, iena toana be Taunimanima ena Natuna bamona, be ori latanai ia helai. Iena kwarana dekenai be golo kwara gauna ia noho, bona iena imana dekenai be kaia badana ta mai matana ia dogoatao.” (Apokalupo 14:14) Iesu ia itaia, Daniel ena matahanai lalonai ia hedinarai hegeregerena, ori latanai ia helai, bona idia gwauraia “Taunimanima ena Natuna.” Iena kwarana dekenai be kwara gauna ia noho, ena pavapava dagina ena toana unai, to ena imana dekenai pavapava ena itotohi ia dogoatao lasi, to uiti utua tauna ena kaia ta hari. Badina be dahaka?

6 Ioane be ma ia gwau: “Vadaeni aneru ma ta dubu helaga dekena amo ia raka mai, ori latanai ia helai tauna dekenai ia boiboi badabada, ia gwau, ‘Oiemu kaia badana harihari do oi gaukaralaia, badina be anina utua negana be ia ginidae vadaeni, tanobada ena anina ia mage vadaeni.’ ” Ena be Iesu be Pavapava ta, to ia ese Iehova ena oda herevadia, “dubu helaga” amo ia halasia herevadia, ia badinaia noho. Unai dainai, Iehova ese ia oda henia dina gabedia lalodiai uma ena anina utua gaukarana do ia karaia neganai, unai hereva hegeregerena ia karaia. Iesu “ese iena kaia badana ia gaukaralaia, tanobada ena anina ia utua haorea.”​—Apokalupo 14:​15, 16; Heberu 9:24; 1 Korinto 11:3.

7. (a) “Tanobada ena anina” be dahaka? (b) Idia “utua” matamaia neganai, edena taudia idia gogodia guna?

⁷ Hari “tanobada ena anina” be dahaka? Taunimanima unai, Satana ena orea idia rakatania bena Iehova bona Iena abia hidi Pavapavana edia hesiai gaukara idia karaia. Anina ia utua matamaia neganai, 144,000 oredia ia gogodia guna, idia be Iesu ida iena guba basileiana lalonai do idia lohia hebou taudia unai. (Mataio 13:​37-43) Unai taudia be “Dirava ena Israela momokani taudia,” “idia be taunimanima ginigunadia Dirava bona Mamoe ena Natuna ese idia abia, edia.” (Galatia 6:16; Apokalupo 14:4; 5:9, 10) Inai dala amo, taunimanima haida, “bese ibounai, gado ibounai, hanua ibounai bona kopina idauidau ibounai” amo idia mai taudia, ese King Iesu ena hesiai gaukara idia karaia matamaia.

8. (a) Horoa taudia gogodia gaukarana be edena lagani lalonai ia ore? (b) Ioane ena matahanai ma ta hegeregerena, tanobada ena anina utua gaukarana be edena bamona idia karaia noho?

⁸ To, idia be sibodia idia noho lasi. Matahanai ma ta lalonai, Ioane ese aneru ia itadia, 144,000 ginigabedia edia baguna dekenai Dirava ena maka idia atoa. (Apokalupo 7:​1-8) Idia vara vadaeni gaudia ese idia hahedinaraia, unai taudia gogodia gaukarana be lagani 1935 lalonai idia haorea. To Ioane ia gwau, unai murinai ia ese “hutuma bada herea [ia] itaia, duahia diba lasi. Idia be bese idauidau, iduhu idauidau, kopina idauidau, bona gado idauidau. Idia ibounai be helai gabuna badana vairanai bona Mamoe ena Natuna vairanai idia gini.” (Apokalupo 7:​9-17) Unai dainai, uma ena anina utua gaukarana idia karaia noho lalonai, taunimanima momo “bese idauidau bona basileia idauidau bona gado idauidau” amo ese King Iesu ena hesiai gaukara idia karaia matamaia.

9. Hari vareai matamata taudia be daidia, bona edena peroveta taudia ese idia perovetalaidia, idia gwau “dina gabedia” lalodiai do idia hedinarai?

⁹ Hari vareai matamata taudia edia helaro namona be, mauri be paradaiso tanobadana dekenai do idia moalelaia, Iehova ena abia hidi Pavapavana henunai. (Salamo 37:​11, 29; 72:​7-9) Gogodia gaukarana be peroveta taudia ma haida ese idia perovetalaia. Isaia ia gwau, “dina gabedia” lalodiai bese idauidau do idia aru lao Iehova ena dubu dekenai. (Isaia 2:​2, 3) Hagai ia peroveta, ia gwau Dirava ese bese idauidau do ia haheudeheudedia bena “bese iboudiai edia kohu namodia do idia vareai mai.” (Hagai 2:7) Sekaria ese “tatau 10, gado idauidau iboudiai besedia amo” ia herevalaidia, ia gwau idia ese Dirava ena orea taudia do idia badinadia. (Sekaria 8:23) Danu, Iesu ese hari “hutuma bada herea” ia perovetalaidia. Ia gwau: “Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai. Vadaeni bese ibounai iena vairana dekenai do ia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona. Mamoe be ena idiba kahana dekenai do ia atoa, nanigosi be ena lauri kahana dekenai do ia atoa.”​—Mataio 25:​31-33.

10. (a) Edena dala amo “tanobada ena anina” idia utua noho? (b) Daidia sibodia be aneru ida idia gaukara hebou, inai gaukara lalonai?

¹⁰ Oibe, taunimanima iboudiai idia itadia tao namonamo, unai amo idia diba daidia be “mamoe” bona daidia be “nanigosi.” Inai kara be edena bamona idia karaia? Ioane ena matahanai lalonai, aneru ese hereva mai siahudia idia harorolaia noho lalonai, “tanobada ena anina” idia utua. Aneru ta ese “noho hanaihanai Sivarai Namona” ia harorolaia. Ma ta ese “Babulono badana” ena moru ia gwauraia hedinarai. Bona aneru ihatoina ese taunimanima ia hadibadia, ia gwau “dagedage gauna,” Satana ena politikol oreadia unai, bema idia tomadiho henia, dika do idia davaria. (Apokalupo 14:​6-10) Momokani, taunimanima ta ese unai aneru edia gadona ia kamonai lasi. To idia ese unai bamona hereva idia kamonai vadaeni, kamonai taudia ese idia harorolaia neganai. (Mataio 24:14; Isaia 48:20; Sekaria 2:7; Iakobo 1:27; 1 Ioane 2:​15-17) Unai dainai ita diba momokani, unai hereva be taunimanima ese idia harorolaia, aneru ese idia hadibadia hegeregerena. Taunimanima ta bema ia ese aneru edia hereva ia abia dae, unai amo ia hahedinaraia ia be ‘mamoe’ ta, eiava bema ia dadaraia, ia hahedinaraia ia be ‘nanigosi’ ta. Hari inai nega lalonai, Iehova ena Witness taudia mo sibodia be aneru ida idia gaukara hebou, inai gaukara badana lalonai.

11. Inai aneru edia amo idia mai herevadia harorolaia gaukarana be mai anina bada eiava?

¹¹ Inai hadibaia herevadia harorolaia gaukarana be mai anina bada, hari inai nega lalonai. Politikol taudia edia kwalimu sivaraina ta eiava saiens taudia ese idia davaria gauna ta ena sivarai be unai sivarai ida idia hegeregere lasi. Hari hadibaia herevadia ese taunimanima iboudiai edia hekwarahi haorea dalana idia hahedinaraia, bona kamonai taudia hamauridia ela hanaihanai dalana danu. Bona, gau bada hereana be inai, Iehova ena ladana hahelagaia karana idia gwauraia hedinarai.

Lagani ena Ripoti

12, 13. Lagani gunana ena haroro ripotina oi gwauraia hedinarai, oi hahedinaraia “anina” bada idia gogoa vadaeni.

¹² Unai dainai Iehova ena Witness taudia be Iehova ena orea ena gaukara ena ripoti idia naria mai edia moale ida, hanaia laganina lalonai idia karaia gaukarana unai. Idia moale, badina be idia itaia ia ese edia gaukara ia hanamoa noho. Oi ese lagani 1987 ena ripoti, inai magasin ena rau 12 ela bona 15 dekenai idia torea, bema oi itaia namonamo, do oi itaia, aneru bona idia ida idia gaukara hebou taudia be idia gaukara goadagoada, unai lagani lalonai.

¹³ Sivarai namona be tano 210 dekenai idia harorolaia​—momokani, ‘iduhu idauidau, bese idauidau, bona gado idauidau’ dekenai idia haroro. (Mareko 13:10) Danu, unai gaukara karaia totona, idia 3,395,612 idia gaukara hebou​—idau nega amo ema bona harihari Keristen taudia edia momo be unai bamona lasi. Tano ta ta dekenai danu idia momo daekau momokani. United States lalonai, idia momo daekau ela bona 773,219. Brazil dekenai 216,216 idia gaukara bona Mexico dekenai 222,168 idia gaukara; bona tano 6 dekenai, Britain, Germany, Italy, Japan, Nigeria, bona Philippines, idia gwau edia momo ese 100,000 ia hanaia. To tano haida be idau vaitani; unuseniai taunimanima momo idia noho, to Witness taudia be momo lasi. Unai Witness taudia danu edia gaukara be mai anina bada herea, badina be mai edia kamonai ida idia gaukara goadagoada, hekwarahi momo bogaragidiai hereva momokani ena diari idia halasia noho totona.​—Mataio 5:​14-16.

14. Edena bamona taudia be Iehova ena orea lalonai idia gogodia vareai?

¹⁴ To momokani, Dirava ena orea taudia ese edia orea habadaia karana sibona idia laloa momo lasi. To idia diba, Iehova ena orea lalonai idia vareai matamata taudia iboudiai be “kohu namodia” Iehova ena matana ai. Idia momo be “kara dika rohorohodia iboudiai” Kerisendom lalonai idia itaia dainai, “idia taitailaia bona idia ganaganalaia.” (Esekiel 9:4) Idia iboudiai be “Iehova ena ororo” dekenai idia aru mai, badina be idia ura Dirava ese ena dala do ia hadibalaidia. (Isaia 2:​2, 3) Ita diba momokani Iehova ese ita ia hanamoa​—badina be inai mataganigani negana dikana lalonai, lagani ta ta iboudiai taunimanima momo herea be edia kara amo idia hahedinaraia idia be Iehova ena “kohu namodia”!

Hari Inai Nega Lalonai Ita Gaukara Haraga be Namo

15. (a) Haroro gaukara ena gabu ena bada be edena bamona? (b) Ioane ena matahanai hegeregerena, “hutuma bada herea” be edena bamona idia gaukara goadagoada?

¹⁵ Iehova ena Witness taudia be edia haroro gaukara idia karaia haraga be namo. Badina be dahaka? Badina ta be inai, edia haroro gabuna be bada herea. Dirava ena ura be, “Sivarai Namona” be “bese ibounai, iduhu ibounai, gado ibounai bona kopina idauidau ibounai taudia” dekenai do idia harorolaia. (Apokalupo 14:6) Iesu ena parabole lalonai, ia ese taunimanima “bese iboudiai” lalodiai ia hapararadia, “mamoe” bona “nanigosi” hegeregeredia. Gaukara momo ia noho. Unai dainai Ioane ese ia itadia hegeregerena, “hutuma bada herea” ese “dina bona hanuaboi” ai Dirava idia hanamoa noho. (Apokalupo 7:15) Unai matahanai hegeregerena, hari “hutuma bada herea,” be edia tadikaka, horoa taudia, ida idia gaukara hebou, bena edia ripoti amo idia hahedinaraia, lagani gunana lalonai hora 739,019,286 be haroro gaukara lalonai idia haorea, namba bada herea unai. Anina be, tanobada hegegemadai, hua ta lalonai pablisa ta ta iboudiai edia averes be hora 18. Mani inai oi laloa, lagani 10 idia lao vadaeni edia averes be hora 12 hua ta lalonai; unai amo oi diba haroro gaukara idia habadaia noho. Oi sibomu emu haroro gaukara ena hora edia averes be tanobada ibounai ena averes hegeregerena eiava?

16. (a) “Sivarai Namona . . . harororolaia goadagoada” dalana namo hereana be dahaka? (b) Lagani gunana lalonai hida be unai gaukara idia karaia?

¹⁶ Mani inai danu oi laloa, heduru pioneer taudia bona regular pioneer taudia idia momo daekau ela bona edia momo be 650,095, guna be inai bamona lasi. Anina be, lagani gunana lalonai idia gaukara noho pioneer taudia edia momo ese lagani 1955 lalonai idia gaukara pablisa taudia iboudiai edia momo ia hanaia. Oi danu be pioneer tauna ta a? Bema oibe, Paulo ena sisiba badinaia dalana namona hereana oi davaria vadaeni, ia gwau: “Sivarai Namona do oi harorolaia goadagoada.” (2 Timoteo 4:2) Namona be dala oi tahua, pioneer gaukara be hari lagani lalonai do oi karaia totona, ani?

Orea Do Ia Bada Ia Lao Diba

17. Dahaka namba ese idia hahedinaraia iseda orea be ma do ia bada ia lao diba?

¹⁷ Momokani, iseda orea do ia bada ia lao diba. Bible stadi iboudiai be 3,005,048​—bona Bible stadi taudia ta ta iboudiai be “kohu namodia” ai do idia lao diba! Danu, April 1987 lalonai taunimanima 8,965,221 idia hebou, Lohiabada ena Anibou karaia totona. Idia hebou taudia momo herea be Iehova ena Witness taudia lasi. Idia haida be kamonai matamata taudia. Ita abidia dae mai eda moale ida, bona edia lalona ita hagoadaia, do idia goada idia lao noho totona. Ma haida be reana nega haida unai bamona hebou lalodiai idia vareai vadaeni. Iehova ena Witness taudia edia hebamo idia moalelaia, to idia laloa bema idia bamodia sibona, unai be hegeregere.

18. Iesu bona Sekaria edia peroveta herevadia hegeregeredia, ta be dahaka ia karaia be namo, Iehova ena “mamoe” ta ai ia lao totona?

¹⁸ Unai bamona taudia ita hanamodia, badina be Bible ena hereva momokani idia ura henia. To mani oi laloa, Iesu ena parabole lalonai “mamoe,” mauri hanaihanai gabuna dekenai do idia lao taudia unai, ese Iesu ena tadikaka, horoa taudia, idia durudia bona idia ida idia gaukara hebou. (Mataio 25:​34-40, 46) Sekaria ena peroveta herevana lalonai “tatau 10” idia hereva mai edia goada ida, idia gwau: “Mani umui ida do ita lao, badina be ai kamonai, Dirava be umui dekenai ia noho.” (Sekaria 8:23) Idia ese Dirava ena orea taudia idia lalo-namo henidia sibona lasi. Idia ‘dogodiatao’ bona idia ida idia lao, sibodia idia henia, unai taudia edia Dirava ena hesiai gaukara karaia totona. Hari inai nega lalonai, anina be Iehova ena orea idia durua momokani.

Nega Daudau Lasi

19, 20. (a) Ioane ena matahanai hegeregerena, “tanobada ena anina” do idia gogoa ore neganai, dahaka do ia vara? (b) Unai ena anina be dahaka, Iesu ena lohia siahuna idia dadaraia taudia dekenai?

¹⁹ Uma ena anina utua gaukarana ita karaia haraga ena badina ma ta be inai: Inai gaukara be kahirakahira do ia ore. (Mataio 24:​32-34) Unai murinai dahaka do ia vara? Ioane ena matahanai herevana mani oi duahia, ia gwau: “Vadaeni aneru ma ta guba ena dubu helaga dekena amo ia raka mai. Ia danu iena imana dekenai kaia badana mai matana ia dogoatao. Ma aneru ta be pata helagana dekena amo ia raka mai. Unai aneru be mai ena siahu lahi do ia gaukaralaia. Ia ese unai kaia badana mai matana ia dogoatao aneruna ia boiboi henia badabada, ia gwau, ‘Oiemu kaia badana harihari do oi gaukaralaia, tanobada ena vain huahua do oi utua vain dekena amo, badina idia mage vadaeni.’ Vadaeni aneru ese iena kaia badana ia gaukaralaia tanobada dekenai. Tanobada ena vain huahua ia utua oho, bona moia gabuna badana, semenisi tanika bamona gauna lalonai ia negea vareai. Inai moia gabuna be Dirava ena badu, siahu dikadika.”​—Apokalupo 14:​17-19.

²⁰ “Kohu namodia” idia gogodia murinai, inai tanobada gunana mai ena dika do ia noho be badina lasi. “Tanobada ena vain huahua,” Satana ena tanobada ibounai oreana unai, be do ia utua oho bena do ia hadikaia ore. Unai neganai, Iehova ena abia hidi Pavapavana ena inai taudia danu ese ena lohia siahuna do idia dadaraia diba lasi. Ioane ia torea herevana be inai: “Umui itaia, ia be ori latanai ia mai noho. Taunimanima ibounai be momokani do idia itaia. Idia gwadaia taudia ese danu do idia itaia. Tanobada besedia ibounai be ia dainai do idia tai.” (Apokalupo 1:7; Mataio 24:30) Unai neganai Iesu ena hereva Iuda tomadiho gunalaia taudia dekenai be do ia momokani, “idia gwadaia taudia,” idia gunalaia taudia unai. (Mataio 26:64) Momokani, unai tomadiho koikoi taudia be mase amo do idia toreisi lou lasi, sibodia edia matana amo Iesu idia “itaia” totona. (Mataio 23:33) To edia dala be hari inai negai idia badinaia bona Iehova ena abia hidi Pavapavana idia dadaraia taudia iboudiai ese ena lohia siahuna do idia dadaraia diba lasi, bese iboudiai be Aramagedono dekenai hadikadia ore totona do ia mai neganai.​—Apokalupo 19:​11-16, 19-21.

21. Dahaka dainai Dirava ena orea taudia be guba anerudia ida idia gaukara goadagoada be namo?

²¹ Momokani, taunimanima haida ita durudia diba idia roho mauri totona. Iseda maduna be bada, badina be aneru ida ita gaukara hebou. To unai be hahenamo badana ta danu! Uma ena anina utua bona gogoa gaukarana ia do ore lasi neganai, mamoe bamona taudia iboudiai ita davaridia toho noho lalonai, namona be guba anerudia ida ita gaukara hebou noho mai eda goada ida.

Inai Oi Haerelaia Diba A?

◻ Lagani 1900 amo ema bona harihari, dahaka gau be mai ena anina bada herea?

◻ “Tanobada ena anina” be dahaka, bona edena bamona idia gogoa noho?

◻ Iehova ena “mamoe” edia kara korikori haida be dahaka?

◻ Lagani gunana ena ripoti ese edena bamona ia hahedinaraia Iehova ese tanobada ena anina utua gaukarana ia hanamoa?

◻ Dahaka dainai haroro gaukara ita karaia goadagoada be namo?

4. (a) Edena negai Iesu ese King dagina ia abia? (b) Ena be daidia ese idia inai henia to unai dagi ia abia?

6. Iesu ese lohia dagina ia abia matamata neganai, Iehova ese ia hagania dahaka gaukara do ia karaia?

[Chart on page 12-15]

IEHOVA ENA WITNESS TAUDIA EDIA LAGANI 1987 ENA HARORO GAUKARA RIPOTI

(For fully formatted text, see publication)