Basileia Haroro Ripoti

Dirava ena Gaukara Idia Goadalaia

IEHOVA ena Witness taudia ese Basileia ena sivarai namona harorolaia gaukarana idia laloa bada, Dirava ese ia henidia gaukarana unai. (1 Korinto 9:16; Kara 20:​26, 27) Unai dainai, tau ta mai ena adavana France dekenai idia ura unai sivarai namona be taunimanima iboudiai dekenai idia harorolaia. Edia teritori dekenai, hostel (mahuta rumana) ta ia noho, politik dainai idau tanodia idia heautanidia taudia bona idau tano amo idia mai gaukara taudia matamatadia ese idia noholaia. Hari tau mai ena adavana idia gwau: “Ai laloa momo, badina unai ruma lalonai vareai dalana tamona be​—ta ese oi ia boiria oi vareai totona. Unai dainai hostel murimurinai ai gini hostel taudia ai hedavari henidia totona, bona ai laloa reana ta ese ai do ia boiria ai vareai totona. Vadaeni, tauhau ta be mai ena ura ida magasin ia abidia bona ia gwau ia ura do ai vadivadi henia.

“Ai vadivadi henia, bena maoromaoro stadi ai hamatamaia. Ena turana ta danu ia noho, to ia hereva lasi. Stadi negana iharuana ai ena turana ai nanadaia, ia danu ia ura ena diba Dirava ena Hereva dekenai do ia habadaia eiava; bena ia haere, ia gwau: ‘Oibe.’ Stadi iharuana ai hamatamaia unai. Ai stadi henidia matamaia neganai, ai boiridia hebou dekenai do idia mai, bona unai negana amo ema hebou ta idia reaia lasi. Lauma dalanai idia goada idia lao, bona idia dibaia gaudia be hostel dekenai idia herevalaidia, unai dainai ma tau ta mai ena adavana ida idia ura stadi. Dina ta ai, idia iboudiai be hebou dekenai idia lao gwauraia dainai hostel ena vareai gabuna dekenai idia gini neganai, edia bamona ma ta ia gwau do ia bamodia. Unai kekeni ese ia moalelaia bada, bona ia ura ena turana merona ese do ia dibalaia danu. Vadaeni, idia ruaosi idia stadi matamaia.

“Unai neganai stadi 5 ai karaia unuseniai, to idia ta ta be hebou maragidia bamona, badina idia iboudiai be edia bamodia edia stadi lalodiai idia helai vareai, bona ma haida danu be idia ida. Idia iboudiai ese hereva momokani idia herevalaia, unai dainai stadi namba 6 ai hamatamaia ma tau ta ida. Ia danu be hebou dekenai ia mai bona ena turana kekenina ia haroro henia danu.

“Hostel taudia ese unai matamata taudia idia hoalaidia. Edia mauri gunana, hegeregere, kuku ania, inuinu kekero, dagedage, lebulebu, bona taunimanima dikadia bamodia karadia, be dabua gunadia bamona idia kokia bena mauri matamatana idia atoa be mai ena hekwarahi. Satana ese edia turadia gunadia amo ia hahekwakwanaidia toho, to ia kwalimu lasi.

“Vanegai, unai uhau ta be dibura dekenai idia koua ia ura lasi ia tuari dainai. Lagani ta ia do ore lasi neganai, idia 6 idia bapatiso, bena idia 5 be maoromaoro heduru pioneer gaukara idia hamatamaia. Hari, idia 6 be regular pioneer gaukara idia karaia, bona edia ura be special pioneer gaukara do idia karaia.”

Dirava ena gaukara idia goadalaia dainai, hari tau mai adavana be hahenamo badana Dirava ena amo idia abia! Ena be ekspiriens namodia unai bamona ita abia lasi, to namona be Basileia ena sivarai namona be mai eda kamonai ida ita harorolaia noho.​—Mataio 24:14.