Hairai Korikorina Oi Havaraia Diba

BIBLE ena sisiba hairai dekenai be mai ena anina tatau bona hahine dekenai. Tatau dekenai Bible ena sisiba be inai: “Uhau edia hairai be edia goada.” (Hereva Lada-isidia 20:29) Oibe, uhau edia goada bona siahu be gau namo hereadia. To unai goada ia ore neganai, dahaka ia vara? Bible ia gwau: “Hui buruka be kwara gauna mai hairaina, kara maoromaoro dalanai ia noho neganai.” (Hereva Lada-isidia 16:31) Kara maoromaoro be lalona ena hairai ena kahana ta. Tauhau ta, bema unai kara maoromaoro ia habadaia, ena goada ia ore neganai, ena kara maoromaoro do ia ore lasi.

Bible ese hahine ia gwauraia inai bamona: “Hahine ena moale toana be reana koikoi, bona ena hairai toana be reana anina lasi; to Iehova dekenai ia gari hahinena ena ladana do idia abia isi.” (Hereva Lada-isidia 31:30) Kekeni hairaina mai ena moale toana be ita bamoa neganai ita moale. To bema ena toana namona ese ena kara koikoi bona ena hekokoroku idia hunia, ena hairai be kopina sibona dekenai; bona ena lalona ena dika ia hunia. Iena hairai ia ore neganai, dahaka do ia noho? Kekeni ta bema “Iehova dekenai ia gari” dainai, ena vairana sibona lasi, to ena lalona danu ia hairai, unai be namo herea!

Kara Haidaua

Ita ese lalona ena hairai ita habadaia diba, a? Oibe. Momokani, Keristen taudia ese unai idia karaia be gau badana. Dirava ese hairai korikorina ia laloa bada. “Gau iboudiai be mai edia hairai danu ia karaia edia nega korikori ai.” (Kohelete 3:​11) Taunimanima haida edia kara ese ia hahedinaraia edia lalona be dika. Dirava ese unai bamona taudia edia tomadiho do ia abia dae lasi.

Aposetolo Paulo ena hereva Kolose Keristen taudia dekenai ese idia hahedinaraia lalona ena hairai idia habadaia be namo. Guna, ia gwau: “Inai gaudia umui negea momokani: badu, dagedage, laloa dikadika. Hereva dika bona hereva mirodia do umui gwauraia lasi. Umui ta ta dekenai umui koikoi lasi. Badina be emui mauri gunana mai ena dika dabua gunana bamona umui kokia vadaeni.” Oibe, unai kara idia karaia momo taudia be Dirava bona kudou-maoro taudia ese idia dadaraia vaitani. Paulo be ma ia gwau: “Mauri matamata umui atoa vadaeni. Inai mauri matamata be Dirava ese ia havaraia. Bona ia ese nega ibounai diba matamata ia henia noho ia lao bona Dirava ena toana momokani do umui abia.” (Kolose 3:​8-10) Gau badana be Dirava ena ura hegeregerena ai lalohadai dalana matamatana bona lalo-mamina dalana matamatana be ita ‘atoa.’ Unai “mauri matamata” ena anina be dahaka?

Keristen Karadia

Bible ese kara namodia momo, idia ese mauri matamata idia havaraia karadia, ia gwauraia. To Iesu ese lalona ena hairai ena badina be inai bamona ia gwauraia: “ ‘[Iehova] oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.’ Inai be taravatu bada herea momokani. Ia be ginigunana. Iharuana be inai, ginigunana hegeregerena, ‘Oiemu badibadinai tauna dekenai oi lalokau henia, oi sibona oi lalokau henia bamona.’ ” (Mataio 22:​37-39) Dirava ita lalokau henia dainai, ita ura iseda kara ese Dirava do idia hamoalea. Unai lalokau ese ita ia doria, Dirava be taunimanima ma haida dekenai do ita herevalaia totona, bona do ita durudia idia danu ese edia Havaraia Diravana do idia diba totona.​—⁠Isaia 52:⁠7.

Aposetolo Paulo ese mauri matamata ena kara ma haida ia gwauraia: “Lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana. Inai bamona karadia idia karaia taudia be taravatu ta ese ia koudia diba lasi.”​—⁠Galatia 5:​22, 23.

Danu, Bible be tatau dekenai ia gwau: “Badina tau be iena adavana ena kwarana, Keriso be ekalesia ena kwarana bamona . . . Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.” (Efeso 5:​23, 25) Bona hahine dekenai Bible ia gwau: “Hahine e, emui adavana do umui kamonai henia, Lohiabada umui kamonai henia hegeregerena . . . Hahine danu iena adavana do ia matauraia.” (Efeso 5:​22, 33) Tau ese ena maduna ia huaia mai ena lalokau, hebogahisi bona manau ida neganai, ruma bese maurina be namo herea! Bona hahine bema mai ena lalokau ida tau ia durua bona ia maumauraia momo lasi dainai ena lalona ena hairai ia hahedinaraia, tau ese ena maduna ia huaia namonamo be auka lasi. Unai neganai, ruma bese maurina be mai ena hairai.

Inai magasin ena hereva ginigunana ena haheitalai ese unai kara namodia idia hahedinaraia goevagoeva. Suluma kekenina ia ura lasi ena lalokau merona do ia rakatania, Solomon ena pavapava rumana ena hairai do ia abia totona. Unai dainai ena kara namona bona ena lalokau badana ia hahedinaraia. Iosef ia ura lasi ena biaguna, Potifara, do ia kara dika henia neganai, ia hahedinaraia ena lalona ia namo. Potifara ena adavana ese ia veria garina, ia heautania neganai, ia hahedinaraia danu sibona ena tauanina ia biagua. Bona Iosef ia ura lasi ena mauri lalonai ia davaridia hekwakwanaidia momo ese ena lalona do idia hadikaia. Unai dala amo manau, maino bona haheauka danu ia haheitalaia.

Hairai Tanobada Dikana Lalonai

Unai kara hairaidia be mai edia anina hari inai negai, a? Taunimanima momo idia laloa, lasi. Idia itaia, momo ese sibodia edia namo idia tahua guna bona kohu idia tahua goadagoada. Unai idia itaia dainai, taunimanima vairadiai edia kara be idia ha-aukaia. Idia laloa, dika do idia davaria garina, namona be taunimanima idia bogadia hisi lasi, bona sibodia edia ura idia tahua goadagoada, sibodia idia laloa guna, bona kohu idia tahua goadagoada be namo.

Bible ena sisiba be unai kara amo ia idau vaitani; ia gwau: “Umui sibona emui ladana do umui habadaia gwauraia lasi, bona do umui hekokoroku lasi. To umui ibounai ta ta dekenai do umui manau. Umui ta ta nega ibounai inai bamona do umui laloa, ‘Haida be idia namo herea, to lau be namo lasi.’ Bona haida edia namo do umui tahua, to umui emui namo sibona do umui tahua lasi.” (Filipi 2:​3, 4) Taunimanima momo ese unai sisiba namona idia badinaia lasi dainai, taunimanima edia noho dalana ia dika ia lao.

Danu, hari ia noho tanobadana lalonai, taunimanima idia laloa, taunimanima edia kwalimu ena anina be moni bada eiava dagi bada idia abia. Bema tau ta ia taga, idia gwauraia kwalimu tauna ta. To kara namodia korikoridia ita gwauraia neganai, ta ia taga o ia ogogami be herevana. Momokani, taga ese hekwakwanai ia havaraia diba. Bible ia gwau: “Kohu momo idia ura henia taudia be hedibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura taudia do idia koia bona hadikaia.” Ia be ma ia gwau: “Moni ura henia kara ese dika idauidau ibounai ia havaraia noho.”​—⁠1 Timoteo 6:​9, 10.

Momokani, sibodia edia namo idia tahua guna taudia, sibodia edia ura gaudia idia tahua goadagoada taudia, kohu idia laloa bada taudia bona taunimanima idia bogadia hisi lasi taudia be hari inai negai nega sisina lalonai idia “kwalimu.” To unai be kwalimu korikorina lasi, badina edia mauri dalana dikana be mai ena davana dika hereana​—⁠unai bamona taudia be taunimanima momo ese idia ura henia lasi, edia headava idia dika, idia gorere bona gau momo dainai idia badu. Dirava ese taunimanima ia havaraia sibona ena toana hegeregerena, to Dirava be matamanai taunimanima ia henidia kara namodia be taunimanima ese idia dadaraia vaitani neganai, edia mauri lalonai moale momokani idia davaria diba lasi.​—⁠Genese 1:⁠27.

Lalona ena Hairai Havaraia Dalana

Vadaeni, inai tanobada ena dika be edena bamona ita dadaraia diba, bona kara namodia be edena bamona ita havaraia diba? Paulo ese ‘lalokau, moale, maino, haheauka, bogahisihisi, kara maoromaoro, abidadama, manau, bona tauanina ena ura koua karana’ ia gwauraia neganai, ia gwau idia be ‘Lauma Helaga ese ia havaraia karadia.’ (Galatia 5:​22, 23) Unai dainai lalona ena hairai do ita habadaia totona, Dirava ena lauma helaga ena heduru ita abia be namo.

Edena dala amo? Inai bamona, bema Dirava ena lauma helaga ese ia havaraia gauna, Bible, ita stadilaia, vadaeni, unai ese ita do ia durua, unai kara namodia do ita diba totona bona do ita ura dikadika ita havaradia totona. (2 Timoteo 3:16) Iehova ena Witness taudia idia ura unai kara lalonai heduru do idia henia, badina idia laloa taunimanima idia durudia Bible do idia stadilaia totona be edia hesiai gaukarana ta. Bema mai eda momokani ida sibona eda kara ita tahua, iseda manoka gabudia do ita diba bona do ita hamaoromaorodia totona, Dirava ena lauma helaga ena heduru ita noia diba. Dirava idia tomadiho henia taudia ita bamodia neganai, unai ese iseda lalona do ia hagoadaia. Hebamo karana dekenai danu, Dirava ena lauma helaga ia heduru, badina Iesu ena hereva hegeregerena, “lauegu ladanai tau rua o toi idia hebou gabu ta dekenai, lau danu be idia dekenai lau noho.”​—⁠Mataio 18:⁠20.

Tanobada Hairaina Do Ia Mai

Momokani, ita ta lasi ese iseda kerere do ita kokia vaitani, to bema ita gaukara goadagoada lalona ena hairai do ita habadaia totona, Dirava ese ita do ia durua. Bona dala hereadaena amo iseda davana namona be ita do ia henia. Bible ese ia hahedinaraia, Dirava ena gwauhamata be, nega matamatana, hari nega dikana amo do ia idau vaitani negana unai, do ia havaraia. Unai nega matamatana lalonai, “Kara maoromaoro taudia ese tanobada do idia abia, bona ia latanai do idia noho ela bona hanaihanai.” (Salamo 37:29) Iesu ia gwau: “Dagedage lasi taudia be idia namo, badina tanobada do idia abia.”​—⁠Mataio 5:⁠5.

Hari inai nega lalonai, taunimanima idia mama dainai idia ura ma haida idia hanaidia bona sibona edia namo idia laloa guna. Nega matamatana lalonai unai kara dikadia edia gabu ai maino bona lalo-maino do idia havaraia. “Idia ese gau ta do idia hahisia lasi eiava gau ta do idia hadikaia lasi egu ororo helagana lalonai; badina be tanobada ibounai be Iehova diba maorona amo dohore ia honudae, davara ia honudae hegeregerena.” (Isaia 11:⁠9) Momokani, Dirava ese “matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—⁠Apokalupo 21:⁠4.

Unai kara oi ura henidia, a? Unai gau namodia idia vara diba ena badina tamona be inai: Unai negai tanobada taudia ese Dirava bona taunimanima idia lalokau henidia dainai, edia lalona be mai edia hairai. Bona Dirava ena gwauhamata be, hari ia idia hesiai henia taudia, idia ese “mauri matamata” idia habadaia bona idia hekwarahi bada Dirava ena taravatu do idia badinaia totona taudia, ese unai nega matamatana do idia itaia. Tauanina ena hairai ese unai bamona hahenamo ia mailaidia diba lasi. Ia ore haraga lasi hairaina, lalona ena hairai, kudou-maoro taudia bona Dirava ese idia moale henia gauna unai, ita habadaia be mai ena badina namona!

[Picture on page 6]

Namona be mai edia tauanina hairaina taudia ese sibona edia namo idia tahua guna lasi, bona taunimanima idia doridia lasi. To namona be Dirava ese ia moale henia gauna, lalona ena hairai, idia habadaia