Reana Kopina Ena Hairai be Gau Badana Lasi

EVA, Dirava ese ia karaia hahinena tamona bona ginigunana, ena hairai ese ma hahine iboudiai edia hairai ia hanaia. To ia bona ena adavana, Adam, ese Iehova idia gwau-edeede henia. Unai dainai Eva be Iehova ena turana namona bamona ia noho diba lasi, bona taunimanima iboudiai edia hisihisi ia havaraia. Momokani, unai ia karaia murinai ia do hairai noho, to ena kopina ena hairai be gau badana lasi.

Hairai be Dirava ese ia henia harihari gauna ta, bona taunimanima haida edia hairai ese taunimanima ma haida edia hairai ia hanaia. Taunimanima haida idia ura edia hairai idia habadaia bona momo ese nega bona moni bada idia negea, edia hairai idia hahedinaraia goevagoeva totona. To, Eva ena haheitalai ese ia hahedinaraia, bema ta ia hairai sibona, to ia dekenai kara namodia be lasi, ena hairai be anina lasi. Unai kara namodia be dahaka? King Solomon ena nega ai ia vara gauna ta ese unai henanadai ia haerelaia.

Hairai Ia Hereaia Gauna

Bible bukana ta, Solomon ena Ane, ese Suluma kekeni hairaina ena sivarai ia gwauraia. Unai kekeni ese ena hanua merona ta ia lalokau henia. Unai mero ese mamoe ia naria. Unai kekeni ena hairai ese pavapava ena matana ia veria, bona pavapava ese dala ia karaia, unai kekeni be Ierusalem dekenai do idia abia mai, pavapava ese do ia adavaia totona. Unai be gau namo herea kekeni matamatana ta dekenai! Ierusalem dekenai, ena hairai ia gaukaralaia diba, moni, siahu bona dagi do ia abia totona. To unai kekeni be mai ena lalo-goada ida pavapava ena lalo-ani karadia ia dadaraia. Ierusalem ena moni bona kohu ia laloa lasi, to ena mero ia badinaia noho. Unai kekeni ena hairai be ena lalona dekenai ia noho. Ena ura gaudia sibona ia laloa lasi bona ia mataganigani lasi. To ia idau, ena lalona be mai ena hairai, ena tubuna Eva ena lalona hegeregerena lasi.​—⁠Solomon ena Ane 1:15; 4:1; 8:​4, 6, 10.

Hairai ena Idoa

Ena be ita ura ita hairai, to hairai ese hekwakwanai haida ia havaraia diba. Lalona ena hairai ese unai hekwakwanai ia havaraia lasi. Hegeregere, lagani kahirakahira 4,000 gunanai, Iakobo ese natuna kekenina ladana Daina ia havaraia. Daina ia hairai momokani. Daina ia laloa namonamo lasi, bona “unai tano dekenai hahine haida” ia bamodia neganai, tauhau ta ladana Sekema ese ia ura henia bada dainai, ia kara dika henia.​—⁠Genese 34:​1, 2.

Danu, bema lalona ia hairai lasi, tauanina ena hairai ese heagi ia havaraia diba. King David be mai ena natuna ta ladana Absalom. Bible ia gwau: “Israel ibounai lalonai tau ta ia noho lasi ia hairai Absalom ia hairai hegeregerena, bona Absalom ena hairai hegeregerena do idia hanamoa totona.” (2 Samuel 14:25) To Absalom ena hairai ese ena lalona ena dika ia hunia: Ia hekokoroku, sibona ena ura ia tahua goadagoada, bona ia hebogahisi lasi. Unai tauhau be mai ena aonega ida, taunimanima edia lalona ia veria, Israel lalonai taunimanima ese ia do idia badinaia totona, bena palani ia karaia ena tamana do ia hamorua totona. Unai raho-namo tauna ese Israel lalonai tuari ia havaraia. Gabeai, idia hamasea.

Tatau edia Hairai

Absalom ena sivarai ese ia hahedinaraia hegeregerena, Bible ese hahine sibodia lasi, to tatau danu ia gwauraidia mai edia hairai. Iosef, Daina ena taihuna, ia hairai, to ena hairai dainai ia moru lasi. (Genese 30:​20-24) Iosef be mero matamatana neganai, ena kakadia ese idia hoilaia, Aigupito dekenai do idia abia lao, hesiai tauna ta ai do ia lao totona. Unuseniai, tuari oreana ena biaguna tauna ta ladana Potifara ese ia hoia. Ia kara maoromaoro bona ia gaukara goadagoada dainai, Iosef ese Potifara ena ruma gaukara bona kohu iboudiai ia naria. Unai negana lalonai, Iosef “ena vairana bona tau-anina dekenai itaia be mero namo herea momokani.”​—⁠Genese 39:⁠6.

Potifara ena adavana ese Iosef ia ura henia bada, bona hemarai lasi ia veria toho, ia ida do idia mahuta hebou totona. To unai tauhau ese ia hahedinaraia ena tauanina sibona dekenai lasi, to ena lalona dekenai danu ia hairai. Iosef ia ura lasi, ena biaguna Potifara ia kara dika henia. Vadaeni, unai hahine ia heautania. Unai dainai, dibura rumana lalonai idia guia. Badina be dahaka? Badina be Potifara ena adavana ia lalohisihisi dainai, Iosef ia samania koikoi, ia gwau, Iosef ese ia kara dika henia toho. Ena be Iosef dekenai ia vara gauna be dika herea, to Iosef ese ena kara namona ia rakatania lasi, bona hekwakwanai negana ai Iosef ese kara namona ia haheitalaia namonamo dainai, unai nega amo ema bona hari kudou-maoro taudia edia lalona ia hagoadaia.

Unai haheitalai ese idia hahedinaraia, lalona ena hairai​—⁠anina be Dirava abidadama henia karana ese ia havaraia kara namona⁠​—⁠​be mai anina bada, to tauanina ena hairai be anina bada lasi. Idia ura headava matamata taudia ese unai idia laloa namonamo be namo. Namona be gaukara biagudia danu ese unai idia laloatao gaukara taudia idia tahudia neganai. Bona namona be ita iboudiai ita diba, herevana ita hairai eiava ita hairai lasi, ita ese mai anina bada gauna, lalona ena hairai, ita havaraia diba. To lalona ena hairai ena anina be dahaka? Bona edena bamona ita havaraia diba? Hereva gabena lalonai, unai gaudia do ita tahua.