Hehuni Gauna Ta​—⁠Ariara Hahinena Babulono Badana be Daika?

HAHINE ta, ariara hahinena, taunimanima momo ia biagudia hahinena, be idia alaia mase, ena kara ena davana unai. To idia hamasea karana be idau. Badina be dahaka? Ia hamasea gauna be dagedage gauna ta, hahine ena dabua ia darea oho, ena kopina ia ania, bona ena mase tauanina orena ia rakatania, lahi ese do ia araia ore totona. Unai siahu bada hahinena be daika? Badina be dahaka dagedage gauna ta ese ia hadikaia? Dahaka idia karaia dainai, mai dagedage ida idia hadikaia ore?​—⁠Apokalupo 17⁠:​16, 17.a

Reana inai sivarai be gori bamona idia gwauraia diba​—⁠to ia be gori ta lasi. Inai sivarai be momokani, bona hari ia vara momokani. Inai sivarai be mai ena anina oi dekenai badina reana emu mauri be harihari ia biagua. Danu, unai hahine do oi badinaia noho eiava do ia rakatania ena anina be do oi mauri o do oi mase. Unai hahine be daika?

Hahine ena Turadia

Bible bukana Apokalupo lalonai, Ioane ese unai lebulebu hahinena ia herevalaia, ia gwau: “Lauma Helaga ese lau ia abia, bona unai aneru ese taunimanima noho lasi tano dekenai lau ia abia lao. Unuseni hahine ta, dagedage gauna kakakakana ta latanai ia helai, lau itaia. Unai dagedage gauna ena kwarana be 7, bona iena doana be 10. Ia latanai be Dirava hadikaia ladana momo herea idia torea. Unai hahine ena dabua kala be kakakaka bona ma sisina kakakaka. Iena herahera gaudia be golo, davana bada nadidia, bona davana bada kavabukavabu. Iena imana dekenai golo kapusi ia dogoatao. Kapusi be iena matabodaga gau dika rohorohodia bona gau mirodia dekenai ia honu. Hahine ena baguna dekenai be ladana ta ia torea. Inai ladana ena anina be hunia gauna: ‘Babulono badana, ariara hahine ibounai bona tanobada ena kara mirodia ibounai edia sinana.’ ”​—⁠Apokalupo 17⁠:​3-5.

“Babulono badana” be mai ena siahu bada hahinena, badina siri 1 (NW ) ia gwau ia be “ranu momo latanai ia helai.” Unai hereva ena anina be dahaka? Dirava ena aneru ese Ioane ia hadibaia, ia gwau: “Oi itaia ranu momo gabudia, hahine be idia dekenai ia helai gabudia. Idia be tano idauidau taudia, bese idauidau taudia, kopina idauidau taudia bona gado idauidau taudia.” (Apokalupo 17⁠:15) Momokani, unai ariara hahinena ena siahu be tanobada ibounai dekenai ia noho. To ia be ariara hahinena ta sibona lasi. Ia be “ariara hahine ibounai . . . edia sinana,” ariara karana ena biaguna unai. Ia haganidia do idia sihari kava. To ia be mai ena turadia idaudia danu.

Aneru ese ia hahedinaraia unai turadia be daika. Ia gwau, “Tanobada ena king ese [Babulono Badana] danu matabodaga karadia idia karaia. Bona tanobada noho taudia ese iena matabodaga uaina idia inua, vadaeni idia kekero.” (Apokalupo 17⁠:⁠2) Unai ariara hahinena ese politikol lohia taudia, “tanobada ena king” unai, ia veridia totona, namona be ia be mai ena lalo-ani herevadia bona mai ena heduru taudia namodia! Vadaeni, hari hahine be daika?

Aneru ia gwau ia be mai ena ladana, “Babulono badana,” ena anina be hehuni gauna. Vadaeni, gau rua dainai ita diba ia be daika​—⁠gau ta be ena turadia bona gau ma ta be ena ladana, Babulono Badana. Unai gau rua dainai, dahaka ita diba?

[Footnote]