Duahia Taudia Edia Henanadai

◼ Bible ena hereva hegeregerena, Keristen tauna ta mai ena hahine ese natuna havaraia dalana koua totona hahine ese koua muramurana ia hadonoa be maoro, eiava?

Buka Helaga ese Keristen headava taudia ia haganidia lasi idia ese natudia do idia havaraia be namo, bona ia haganidia lasi natudia hida do idia havaraia. Namona be headava tauna ta mai ena adavana danu be sibodia idia noho neganai natudia havaraia karana idia kikilaia hebou mai edia aonega ida. Bema idia ura natudia havaraia dalana do idia koua, namona be idia sibodia ese dala ta idia abia hidi. To, namona be​—Bible ena hereva hegeregerena bona sibodia edia lalona ena mamina hegeregerena​—idia laloa namonamo, natudia havaraia dalana koua gauna ta bema idia gaukaralaia, unai ese do ia hahedinaraia mauri ena helaga idia matauraia, eiava lasi.

Bible ese ia hahedinaraia, hahine ia rogorogo matamata neganai, ena natuna ena mauri ia matamaia; mauri ia henia Tauna ese ia itaia, mauri ta ia matamaia vadaeni. Hahine ena bogana lalonai do ia tubu gauna, ‘ia tubu matamaia tauanina,’ ia itaia danu. (Salamo 139:16; Esodo 21:​22, 23; Ieremia 1:5) Unai dainai, bema mauri ia matamaia vadaeni, ta ese unai mauri ia hadokoa toho be namo lasi. Bema unai bamona ia karaia, sinana ena bogana lalonai ia noho natuna ia alaia mase.

Tano momo lalodiai hahine momo ese natuna havaraia dalana koua muramura idia gaukaralaia. Unai muramura be edena dala amo natuna havaraia dalana idia koua? Natuna havaraia dalana idia koua muramura rua be, combination pill bona progestin-only pill (minipill). Diba idia tahua taudia ese idia hahedinaraia goevagoeva unai muramura be edena dala amo natuna havaraia dalana idia koua.

Combination pill lalonai muramura rua estrogen bona progestin idia noho. Orea ta, U.S. Food and Drug Administration, ia gwau combination pill ena “gaukara badana” be, “sinana ena gatoi karaia dalana (ovulation) ia koua.” Hahine ese unai muramura ia abia hanaihanai neganai, nega kahirakahira iboudiai gatoi karaia gauna (ovary) ena amo hahine ena bogana dekenai gatoi do idia diho lasi. Gatoi o ovum ia diho lasi neganai, natuna be bogana ena varovaro, Fallopian tubes, lalonai ia tubu matamaia diba lasi. Reana, combination pill ese “endometrium [bogana ena kopina] ena toana do ia haidaua danu (bona unai dainai bogana ena kopina ese gatoi do ia dogoatao haraga lasi),” to unai kara be combination pill ena gaukara badana lasi.

Combination pill ese gorere haida ia havaraia diba dainai idia haida be mai estrogen muramurana danu idia karaia. Unai combination pill ese gatoi karaia gaudia (ovaries) edia gaukara momo idia koua lasi. Contraceptive Development Branch of the National Institutes of Health ena biaguna, Doketa Gabriel Bialy, ia gwau: “Saiens taudia ese idia davaria, ena be estrogen be combination pill dekenai idia atoa, to nega 100 100 amo nega 95 95 bamona gatoi karaia gaudia (ovaries) amo gatoi be bogana dekenai idia diho lasi. Bema gatoi ta ia diho, reana gatoi bona tau ena cell idia hedavari lasi dainai, natuna do idia havaraia lasi.”

Bema hahine ese combination pill ena hadonoa negana ta ia reaia, reana bogana ena kopina ena toana ia idau dainai, natuna do ia havaraia lasi. Stadi ta amo idia davaria, combination pill rua idia reaia hahinedia 100 100 amo, hahine 36 36 lalonai gatoi ta be gatoi karaia gauna amo ia diho. Buka ta, ladana Contraception lalonai ia gwau, bema hahine ese combination pill rua ia reaia, “combination pill ese bogana ena kopina ena toana bona bogana ena aiona ena ranu ia haidaudia dainai . . . reana natuna havaraia dalana ia koua noho.”

Progestin-only pill (minipill) be edena bamona? Buka ta, Drug Evaluations (1986) lalonai ia gwau: “Progestin-only minipill ese sinana ena gatoi ena diho dalana idia koua lasi. Minipill ese bogana ena aiona ena ranu ia haidaua ela bona ranu be kamoa tao gauna bamona ai ia lao. Unai dainai tau ena cell be hahine ena bogana lalonai idia vareai haraga diba lasi. Danu, progestin-only pill ese tau ena cell edia heau dalana ia koua dainai idia heau haraga diba lasi, bona progestin-only pill ese dala ia koua lasi dainai bogana ena kopina ia giroa [unai dainai bema tau ena cell bona sinana ena gatoi idia hedavari, reana natuna matamatana do ia tubu haraga lasi].”

Haida idia gwau progestin-only pill idia gaukaralaia hahinedia “100 100 amo 40 40 lalonai gatoi be bogana dekenai idia diho.” Unai dainai nega momo progestin-only pill ese gatoi edia diho dalana ia koua lasi. Bogana ena aiona ena ranu be kamoa tao gauna bamona ai ia lao dainai, reana tau ena cell be hahine ena bogana lalonai idia vareai diba lasi, bona tau ena cell bona hahine ena gatoi idia hedavari diba lasi dainai, natuna havaraia dalana ia koua. To bema unai ia vara lasi, bona tau ena cell bona hahine ena gatoi idia hedavari, progestin-only pill ena muramura ese dala ia koua dainai hahine ena bogana ena kopina ese gatoi ia dogoatao diba lasi bona unai dainai natuna havaraia dalana ia koua.

Unai dainai, natuna havaraia dalana do ia koua totona, hahine ese combination pill eiava progestin-only pill ia hadonoa hanaihanai neganai, nega momo tau ena cell bona hahine ena gatoi idia hedavari dalana ia koua. Unai dainai unai muramura ese sinana ena bogana lalonai ia noho natuna idia alaia mase lasi. To, progestin-only pill (minipill) be nega momo hahine ena gatoi ena diho dalana ia koua lasi; unai dainai, reana nega haida hahine ena gatoi bona tau ena cell idia hedavari. Unai neganai, progestin-only pill ese dala ia koua dainai, ena be natu matamatana ena mauri ia hamatamaia vadaeni, to bogana ena kopina ese unai gatoi ia dogoatao diba lasi. Saiens taudia ese idia davaria, vaia, (hahine ese natuna havaraia dalana koua muramurana ia inua lasi neganai) “hahine ese ena hua gorere ia reaia negana ginigunana be ia do mai lasi neganai, hahine ena gatoi bona tau ena cell idia hedavari negadia 100 100 amo, nega 60 60 unai gatoi idia boio.” To, ena be unai ia vara, to natudia havaraia dalana ia koua muramurana ese dala ia koua dainai hahine ena gatoi bona tau ena cell idia hedavari murinai bogana ena kopina ese gatoi ia dogoatao diba lasi. Unai muramura idia abia hidi neganai reana natuna matamatana ena mauri ia hamatamaia murinai idia hamasea.

Unai dainai, bema tau mai ena adavana be doketa tauna ida natuna havaraia dalana koua muramurana idia kikilaia hebou, gau badana be Dirava ena taravatu idia laloa danu. Namona be Keristen taudia be edia kara iboudiai lalodiai dala idia tahua, iseda Dirava bona Mauri Henia Tauna ena vairanai edia “lalona be goevagoeva” totona.​—Kara 23:1; Galatia 6:5.